?Ɲanmiɛn yɛ ɔ yili ninnge mun annzɛ be boli nun sa ngbɛn? Wafa nga siansifuɛ nɲɔn nga e kannin be ndɛ’n be tɛli kosan sɔ’n su’n ɔ nin ndɛ nga Biblu’n kan’n, be sansan be wun. Sran wie’m be waan siansifuɛ’m be ndɛ yo fɛ. Wie’m be kusu be waan Biblu’n yɛ i ndɛ yo fɛ-ɔ. I sɔ’n ti’n, sran sunman be siman ndɛ kun nga bé fá sú-ɔ. Wie’m be liɛ’n, be si ndɛ sɔ’n i su akplowa.

Sɛ a ti suklu ba’n, atrɛkpa’n amun like klefuɛ’m be seli amun kɛ ninnge’m be boli nun sa ngbɛn. ?Sanngɛ be yiyili like nga ti yɛ be se sɔ’n i nun kpa kleli amun? Sɛ a kɔ asɔnun kusu’n, e si kɛ amun asɔnun’n nun lɔ’n be seli amun kɛ sran kun yɛ ɔ yili mɛn’n niɔn. ?Sanngɛ be kannin like nga ti yɛ be se sɔ’n i ndɛ kleli amun? ?Annzɛ be seli amun ngbɛn kɛ ɔ ti “Ɲanmiɛn ndɛ” naan ɔ fata kɛ amun lafi su?

Atrɛkpa’n, ɔ bɔbɔ a buli ndɛ sɔ’n i su akunndan. Sanngɛ a seli ɔ wun kɛ sɛ sran kun yɛ ɔ yili ninnge mun annzɛ be boli nun sa ngbɛn’n, sran fi kwlá dimɛn i nanwlɛ trele sa. I kpa bɔbɔ’n, kɔlɛ’n a usali ɔ wun kɛ: ?Kosan sɔ’n i su tɛlɛ’n ti cinnjin li?

Fluwa nga wá kán ninnge nga be ukali sran wie mun naan b’a lafi su kɛ sran kun yɛ ɔ yili ninnge mun’n be ndɛ. I sin’n, ɔ́ wá kán like nga ti yɛ ɔ ti cinnjin kɛ e si kosan sɔ’n i su tɛlɛ’n i ndɛ wie.