?E nin aolia nun sran mun e kwla koko yalɛ?

ƝANMIƐN mɔ like fi nunmɛn i sin’n fali junman wie wlali aolia nun sran wie’m be sa nun. I wie yɛle kɛ ɔ fali asiɛ’n i sielɛ’n wlɛli i Zezi Klist sa nun. Kpɛkun ɔ sieli i anzi nga be su i titi’n be kɛ be uka sran mun jasin fɛ’n bolɛ junman’n i dilɛ nun. (Sa Nglo Yilɛ 14:6) Sanngɛ Ɲanmiɛn srɛlɛ’n ti i liɛ ngunmin. W’a fɛmɛn i tielɛ’n w’a wlɛmɛn i sran fi sa nun. Ɲanmiɛn kunngba cɛ yɛ ɔ fata kɛ e srɛ i ɔ.

Zoova yɛ sɛ ‘be srɛ i ɔ, ɔ ti’ ɔ. (Jue Mun 65:3) Ɔ tie e srɛlɛ’n, yɛ ɔ tɛ su. Akoto Zan klɛli Ɲanmiɛn srɛlɛ’n i su ndɛ mɛnnin i wiengu Zoova sufuɛ mun. I waan: “E si kɛ like kwlaa nga e srɛ i’n, b’ɔ ti i klun su’n, [Nyanmiɛn] ɔ́ mán ye. Sɛ e si kɛ like nga e srɛ i’n ɔ́ mán ye’n, like kwlaa nga e srɛ i’n, sɛ ɔ ti sɛ ɔ ti sɛ o, e si kɛ y’a nyɛn i.”—1 Zan 5:14, 15.

Anzi nga b’a kpɔciman Ɲanmiɛn’n be kunndɛman kɛ e srɛ be. Ɲanmiɛn srɛlɛ’n i wun ajalɛ nga Ɲanmiɛn fali’n, mɔ wie liɛ’n ɔ wɔ be trele’n, be wun i wlɛ yɛ be nian su nanti. ?Wafa sɛ yɛ srɛlɛ’n wɔ be ɔ? I wie yɛle kɛ i nun mɔ Ɲanmiɛn nuan ijɔfuɛ Daniɛli srɛli Zoova Zerizalɛmu klɔ’n i sacilɛ’n su’n, Ɲanmiɛn tɛli i srɛlɛ’n su. Ɔ maan ɔ sunmannin  anzi Gabliɛli kɛ ɔ wa kan ndɛ kun m’ɔ wla fanngan’n kle Daniɛli.—Daniɛl 9:3, 20-22.

?Ɔwuliɛ’m be kwla to e ngaliɛ?

?Ɔ fata kɛ e kpɛ be nga be wuli’n be sin atin? Be kan be nga be waan be nin wunmiɛn’m be ijɔli’n be su ndɛ sunman. I wie yɛle kɛ nvle nga be flɛ i Irlandi nun lɔ’n, sran kun mɔ i waan ɔ nin wunmiɛn’m be ijɔ’n ɔ wa seli bla kun kɛ ɔ nin bla’n i wun mɔ be flɛ i Frɛdi’n be ijɔli kɔnguɛ. Kusu nn bla’n i wun sɔ’n wuli w’a di le mɔcuɛ nɲɔn kun. Sran sɔ’n, ɔ wa kannin ndɛ wie kleli bla’n. I waan Frɛdi yɛ ɔ kannin ɔn. Ndɛ sɔ’n, bla’n bu i kɛ i kunngba cɛ yɛ ɔ si nun ɔn. I sɔ’n ti’n, ɔ kwla bu i kɛ Frɛdi o nguan nun aolia nun lika wie, naan ɔ su kunndɛ kɛ ɔ́ kán ndɛ klé i. Sanngɛ i sɔ akunndan mɔ bla’n bu’n, ɔ nin be nga be wuli’n be su ndɛ nga Biblu’n kɛn i weiin’n, be sansan be wun.—An nian kuku ng’ɔ o ja ngua lɛ’n i nun.

?Yɛ wafa sɛ yɛ e kwla wun ndɛ kɛ ngalɛ’n sa’n be wlɛ ɔ? Like kun mɔ mmusu’m be fa laka sran mun’n, yɛle kɛ be yo kɛ be yɛ be ti sran ng’ɔ wuli’n sa. Bla’n i ndɛ nga nun’n, be yoli kɛ Frɛdi yɛle be sa. ?Ngue ti yɛ be yo sɔ bɔbɔ’n niɔn? Bé yó sɔ naan nán sran’m be fa like nga Biblu’n kle’n su, yɛ nán be lafi Zoova i su. Ɔ ti weiin kɛ Satan nin i mmusu’m be ‘yo sa kekleekle’n kwlaa, be yi atrɛ, yɛ be yo abonuan sa gblɛ nun. Be fa sa tɛtɛ wafa’n kwlaa lakalaka be nga be su mlin’n.’—2 Tɛsalonikfuɛ Mun 2:9, 10.

Sran wie’m be o lɛ’n, be waan be nin ɔwuliɛ’m be ijɔ. Yɛ be nga be fa be wun be mantan  be’n, be bu i kɛ be nin ɔwuliɛ’m be su ijɔ sakpa. Sanngɛ ng’ɔ ti nanwlɛ’n, yɛle kɛ sɛ be nin sran kun be ijɔ sakpasakpa’n, nn aolia nun sran nga be tanndan Zoova i ɲrun’n mun ɔn. I kunngba’n kusu’n, sran wie’m be o lɛ’n, be bu i kɛ Ɲanmiɛn yɛ be su i lɛ, sanngɛ nn nɛ́n i sɔ ɔ. Ɲanmiɛn maan akoto Pɔlu klɛli ndɛ cinnjin yɛ’n. I waan: “Nanwlɛ, nnɛn nga be fa sɔ amuɛn’n, mmusu mun yɛ be fa sɔ be-ɔ, nán Nyanmiɛn yɛ be fa sɔ i-ɔ.”—1 Korɛntfuɛ Mun 10:20, 21.

?Kɛ mɔ e si kɛ e kwla srɛ Sran nga like fi nunmɛn i sin’n, m’ɔ klo e mɔ e ndɛ lo i’n niɔn, ngue ti yɛ é yáci i lɛ é kó srɛ́ sran uflɛ yɛ? Afin i kwlaa yoli o Biblu’n cici e wla kɛ: “[Zoova] nian-nian asiɛ wunmuan’n su naan ɔ́ súan be nga be fa be wla’n kwlaa guɛ i su’n be bo.”—2 Be Nyoliɛ 16:9.

[Ndɛ kwle, bue 9]

?Kɛ mɔ e si kɛ e kwla srɛ Sran nga like fi nunmɛn i sin’n, m’ɔ klo e mɔ e ndɛ lo i’n niɔn, ngue ti yɛ é yáci i lɛ é kó srɛ́ sran uflɛ yɛ?

[Kuku/Foto, bue 8, 9]

Nanwlɛ’n nin ato’n

NANWLƐ’N: SATAN TI SRAN JRƐIIN

“Satan bɔbɔ kaci i wun kɛ anz b’ɔ kpaja’n sa.”—2 Korɛntfuɛ Mun 11:14.

“An sasa amun wun, an nian-nian! Afin mmusu’m be si Satan b’ɔ ti amun kpɔfuɛ’n, ɔ ti kɛ asɔmɔli b’ɔ wlan-wlan ɔ kpan kunndɛ nnɛn’n sa.”—1 Piɛr 5:8.

“Sran ng’ɔ yo sa tɛ’n, ɔ ti mmusu’m be si Satan i liɛ, afin kɛ ɔ fin i bo bolɛ nun’n, mmusu’m be si Satan’n ti sa tɛ yofuɛ.”—1 Zan 3:8.

“I sɔ’n ti, an fa amun wun man Nyanmiɛn. Nán an lo amun wun man mmusu’m be si Satan’n, an jran kekle yɛ ɔ́ wánndi amun.”—Zak 4:7.

“Kɛ ɔ fin i bo bolɛ nun’n, [mmusu’m be si Satan] ɔ ti sran kunfuɛ, ɔ di-man nanwlɛ mlɔnmlɔn, afin ɔ si-man nanwlɛ’n. Ɔ bua ato, afin ato’n ti i nzuɛn, ato’n ti i junman, i yɛ ɔ ti ato buafuɛ’m be si nin-ɔn.”—Zan 8:44.

ATO’N: KƐ SRAN WU’N Ɔ KƆ AOLIA NUN LIKA’N NUN LƆ

“Nvufle tú wɔ kpa naan w’a nyan ɔ nuan nun aliɛ w’a di. Ɔ́ yó sɔ lele naan w’a fa sa ɔ sin a kaci fa ekun, afin fa yɛ n fa yili wɔ-ɔ. A ti fa yɛ á wá sá ɔ sin á káci fa ekun.”—Bo Bolɛ 3:19.

“Be nga be nyin o su’n, be si kɛ bé wú cɛn kun, sanngɛ be nga b’a wu’n be liɛ’n be wun-man sa fi wlɛ.”—Akunndanfuɛ’n 9:4-5.

“Like kwlaa nga á yó’n, fa ɔ wunmiɛn’n gua su yo. Afin kɛ á wá wú á kɔ́ [ndia’n nun] lɔ lɛ’n, i junman dilɛ o, i sa nun yiyilɛ o, i sa silɛ o, i ngwlɛlɛ o, be wie fi nun-man lɔ kun.”—Akunndanfuɛ’n 9:10.

“Kɛ be ko ka nun bɔ be ko sa be sin ko yo fa’n, wuun like kwlaa nga be sunnzunnin kɛ bé yó’n i kwlaa w’a ka lɛ w’a mlin cɛn kunngba sɔ’n nun.”—Jue Mun 146:4.

NANWLƐ’N: ANZI NGA B’A KPƆCIMAN ƝANMIƐN’N BE NIAN E LIKA

“Anannganman i anz’n ɔ bo sin yia be nga be nyin yi i’n, yɛ ɔ yi be sa kekle’m be nun fite.”—Jue Mun 34:8; 91:11.

“?Anz’n kwlaa bɔ be ti aolia nun sran bɔ be su Nyanmiɛn’n, w’a sunman-man be kɛ be wa nian be nga be wa nyan be ti’n be su?”—Ebre Mun 1:14.

“N wunnin anz kun ekun ɔ tu sin nyanmiɛn ble kpa nun lɔ, ɔ lɛ jasin fɛ kun b’ɔ ti anannganman, b’ɔ́ kán kle sran nga be o asiɛ’n su bɔ be fin mɛnmɛn nin nvle-nvle’n kwlaa nun’n, ɔ nin be kwlaa nga be aniɛn’n ti fanunfanun’n, ɔ nin sran wafa-wafa’n kwlaa. Ɔ kpan se kɛ: ‘Maan amun nyin yi Nyanmiɛn, an mɛnmɛn i.’”—Sa Nglo Yilɛ 14:6, 7.

ATO’N: ZEZI NIN ƝANMIƐN BE SƐ

“N klo kɛ an wun i wlɛ kpa kɛ Krist yɛ ɔ sie yasua-a, yasua kusu yɛ ɔ sie bla-a, yɛ Nyanmiɛn kusu sie Krist.”—1 Korɛntfuɛ Mun 11:3.

“Yɛ kɛ ɔ ko fa Krist ko sie like’n kwlaa su’n, i sin Krist bɔbɔ b’ɔ ti i Wa’n, ɔ́ fɛ́ i wun mɛ́n i kɛ ɔ sie i naan Nyanmiɛn sie like’n kwlakwlakwla.”—1 Korɛntfuɛ Mun 15:28.

“Nanwlɛ, like nga Ba’n wun kɛ i Si yo’n, yɛ ɔ nian su yo-ɔ. Ba’n bɔbɔ kwlá kpɛ-mɛn i ti nun yo-man like fi.”—Zan 5:19.