?Sran kun yɛ maan be yo sa tɛtɛ mun ɔn?

AFUƐ nga be flɛ i 1994 nun’n, be kunnin sran’m be abɔlɛ kunlɛ kpa Ruanda lɔ. ONU i sonja’m be su kpɛn ng’ɔ o nvle sɔ’n nun’n, ɔ wunnin nun. Sanngɛ i su kpɛn liɛ’n seli i kɛ nán ɔ yo naan sran’m be yaci be wun kunlɛ. Kɛ ɔ buli i kwlaa sɔ’n i akunndan’n, ɔ seli kɛ mmusu’m be si Satan o lɛ sakpa. Bian kun liɛ’n, kɛ ɔ́ kán wafa nga sran’m be fa kunnin be wun sinnzin su’n i ndɛ’n, ɔ seli kɛ: “Sran ng’ɔ se ekun kɛ Satan nunman lɛ’n, maan e nin i e yia Ruanda lɔ kan be tiantiannin sran nga be kunnin be abɔlɛ su’n lɔ’n.” ?Sakpasakpa naan mmusu’m be si Satan yɛ maan be yo klunwi sa kɛ nga lɛ sa mun ɔn?

Sran sunman lika bumɛn i kɛ nzaje sa nin sran like yaya yolɛ ngbɛnngbɛn’n be fin aolia nun sran kun mɔ i klun yo wi’n. Sran kaka be bu i kɛ like bɔbɔ ba nga ti yɛ sran’m be yo sa tɛtɛ lika’n nun’n, yɛle tɛ m’ɔ o klɔ sran nun’n. Wie’m be kusu be waan anuannzɛ kun mɔ i nunfuɛ’m be ti aɲanbeunfuɛ mɔ be le kwlalɛ kpa’n, be kunndɛ kɛ bé síe mɛn’n wunmuan’n. I sɔ’n ti’n, be wlawla sran mun. Yɛ be sɔli i sɔ yolɛ nán andɛ sa ɔ. Sran wie’m be liɛ’n, be fa sran lufle bulɛ’n nin ɲrɛnnɛn kwlaa nga e wun be’n be gua awa’m be su.

?Yɛ amun li? ?Amun bu i sɛ? ?Ngue ti yɛ andɛ mɛn wunmuan nun’n, sran’m be mian be ɲin kpa naan bé jrán klunwi sa nin abɔlɛ nin ɲrɛnnɛn sa wafawafa mun kusu nn blɛ li yɛ sa sɔ’m be su tru ɔ? ?Ngue ti yɛ sran’m be faman sa nga be yoli’n be tuman be wun fɔ m’ɔ yo kɛ blɛ li yɛ be su wla be wun ase bé yó be wun abɔlɛ kpa ɔ? ?Sran kun yɛ maan be yo sa tɛtɛ kwlaa sɔ mun ɔn? ?Wan yɛ ɔ sie mɛn’n sakpasakpa ɔ? Atrɛkpa’n, kosan sɔ’m be su tɛlɛ’n bó amun nuan.