Ɲrɛnnɛn sa’m be su tranman lɛ kun!

?SƐ SRAN kun se amun kɛ ɔ ka kaan sa ɲrɛnnɛn sa’m be su tranman lɛ kun’n, amún sé i sɛ? Atrɛkpa’n amún tɛ́ i su kɛ: “?Ɔ kpa’n laliɛ yɛ a su cɛn ɔn? E su ɲrɛnnɛn sa’m be ti kɛ alua nin i wun sɔsɔwa sa.” Annzɛ kusu amun kwla usa amun wun kɛ: ‘?Aɔwi li yɛ ɔ su di ɔ?’

Kannzɛ bɔbɔ ɔ yo e kɛ ɲrɛnnɛn sa sroesroe’m bé trán lɛ titi’n, sanngɛ like kun ti’n, e kwla lafi su kpa kɛ bé wíe cɛn kun. Nán klɔ sran mun yɛ bé yó maan like kɛ asiɛ m’ɔ keje’n annzɛ jenvie m’ɔ di lika’n bé wíe ɔ. Afin, wafa nga ɲrɛnnɛn sa sɔ’m be ju’n, ɔ nin like nga ti yɛ be ju’n, be wunmɛn i wlɛ kpa, naan se kɛ jranlɛ yɛ bé jrán be ɔ. Laa Izraɛlifuɛ’m be famiɛn Salomɔn m’ɔ ti ngwlɛlɛfuɛ’n, ɔ fɛli i ɲin sieli i like nga klɔ sran’m be yo’n su kpa. I ndɛ ng’ɔ kannin’n yɛ: “N wunnin Nyanmiɛn i junman ng’ɔ di’n i kwlaa, yɛ n wunnin kɛ sran’m bé klé be wun nyrɛnnɛn ngbɛn, be su wun-mɛn i wlɛ le. Sran nga bɔ i waan ɔ si ngwlɛlɛ bɔbɔ’n, ɔ su wun-mɛn i wlɛ le.”—Akunndanfuɛ’n 8:17.

?Kɛ mɔ klɔ sran’m be kwlá yoman naan ɲrɛnnɛn sa’m b’a wie’n, wan yɛ ɔ́ kwlɛ́ i yo ɔ? Biblu’n kle kɛ e Yifuɛ’n yɛ ɔ́ wá yó maan ɲrɛnnɛn sa’m bé wíe ɔ. I yɛ ɔ siesieli asiɛ’n su ninnge’n kwlaa ɔ. I wie yɛle nzue m’ɔ tɔ’n. (Akunndanfuɛ’n 1:7) Asa kusu’n, Ɲanmiɛn timan kɛ klɔ sran mun sa. I liɛ’n, ɔ le wunmiɛn lele kpe nun. I sɔ yɛ Ɲanmiɛn nuan ijɔfuɛ Zeremi kannin ɔn. Ɔ seli kɛ: “Ee! Anannganman Nyanmiɛn kpli, ɔ wunmiɛn dan’n nin ɔ ngwlɛlɛ’n yɛ maan a kwla yili nyanmiɛn’n bɔ la nglo lɔ plaii’n nin asiɛ nin-ɔn, like fi ti-man kekle ɔ nyrun.” (Zeremi 32:17) Kɛ mɔ Ɲanmiɛn yɛ ɔ yili asiɛ’n ɔ nin i su ninnge’n kwlaa’n ti’n, ɔ si wafa nga ɔ́ yó naan klɔ sran’m b’a kwla tran fɔundi nin alaje nun asiɛ’n su wa’n.—Jue Mun 37:11; 115:16.

?Wafa sɛ yɛ Ɲanmiɛn wá káci ninnge mun kɛ ɔ nin i fata’n sa ɔ? Biblu’n se kɛ ɲrɛnnɛn sa nga e wun be andɛ’n, be ti “nzɔliɛ” mɔ be kle kɛ e o ‘mɛn’n i awieliɛ’ blɛ’n nun ɔn. Zezi seli kɛ: “Kɛ amún wún kɛ sa sɔ’m be su yo’n, an si kɛ Nyanmiɛn sielɛ blɛ’n w’a mantan.” (Matie 24:3; Lik 21:31) Ɲanmiɛn Sielɛ’n ti awa kun m’ɔ Ɲanmiɛn tɛkɛli i ɲanmiɛn su lɔ ɔ. I yɛ Ɲanmiɛn wá fá yó maan asiɛ’n su ninnge’m bé káci uflɛ ɔ. Ɔ maan ninnge kɛ nzue nin aunmuan sa’n, be su faman ɲrɛnnɛn yimɛn i sran’m be su kun. Kannzɛ Ɲanmiɛn Zoova bɔbɔ kwla yo i sɔ liɛ’n, sanngɛ junman sɔ’n, ɔ fa wlɛli i Wa’n i sa nun. Ɲanmiɛn nuan ijɔfuɛ Daniɛli kannin Ɲanmiɛn i Wa’n i ndɛ seli kɛ: “Be fali kwlalɛ’n be mɛnnin, be mɛnmɛnnin i, yɛ be fali famiɛn diwlɛ’n be wlɛli i sa nun. Nvle-nvle’n kwlaa nin mɛnmɛn’n kwlaa be nunfuɛ mun bɔ be kan aniɛn wafa-wafa’n kwlaa’n, be suli i.”—Daniɛl 7:14.

Kɛ ɔ ko yo naan Ɲanmiɛn i Wa Zezi Klist w’a kwla siesie asiɛ’n su ninnge mun kɛ ɔ nin i fata’n sa’n, naan i su tranlɛ’n w’a yo fɛ’n ti’n, Ɲanmiɛn mɛnnin i tinmin. I afuɛ akpi nɲɔn yɛ, kɛ Zezi bali asiɛ’n su wa’n, ninnge kɛ jenvie ɔ nin aunmuan sa’n, ɔ yili i nglo kan kɛ ɔ le kwlalɛ be su. Cɛn kun m’ɔ nin i sɔnnzɔnfuɛ’m be o alie kun nun Galile jenvie’n su’n, “seke dan kpa kpɛli nzue’n su, ɔ maan nzue’n bo guali alie’n nun, ɔ ka kaan naan w’a yi.” Srɛ  kunnin i sɔnnzɔnfuɛ mun kpa. Be bu i kɛ nn be su wa wu. Ɔ maan be kpan flɛli Zezi. ?Ngue yɛ ɔ yoli ɔ? Ɔ ijɔli “aunngban’n, yɛ ɔ seli nzue’n kɛ: ‘Yaci bolɛ’n, jran diin!’ Kpɛkuun kpe yɛ aunngban’n kpɛli-ɔ, naan lika’n w’a tɔ bliin.” I sɔ’n boli i sɔnnzɔnfuɛ’m be nuan dan kpa naan b’a usa be wun kɛ: “?Nguɛ sran yɛlɛ nga bɔ aunngban’n nin nzue’n bɔbɔ be sro i sɔ-ɔ?”—Mark 4:37-41.

Kɛ ɔ fin cɛn mɔ Zezi sɛli i sin ɲanmiɛn su lɔ’n, Zoova mɛnnin i aɲrunɲan. Ɔ maan siɛn’n, i tinmin’n nin i kwlalɛ’n be tra laa liɛ’n. Kɛ m’ɔ ti Ɲanmiɛn Sielɛ’n i su Famiɛn’n ti’n, wafa nga ninnge’m be ko kaci uflɛ’n, Ɲanmiɛn fɛli i siesielɛ’n wlɛli i sa nun. Ɔ maan klɔ sran’m bé kwlá trán fɔundi nun asiɛ’n su wa.

Sanngɛ andɛ’n, ɲrɛnnɛn sa’m be dan lika ɔ nin asiɛ’n i sacilɛ mɔ su saci’n, be fin klɔ sran’m be konvi kpli’n ɔ nin be ngunmin be wun akunndan bulɛ’n. ?Sran sɔ’m mɔ be kunndɛman kɛ bé káci be sa’n, ngue yɛ Ɲanmiɛn Sielɛ’n yó be ɔ? Biblu’n se kɛ kɛ e Min Zezi “nin i anz’m bɔ be lɛ fanngan dan’n, bé fín nyanmiɛn su lɔ bé jrá’n, [...] ɔ́ bá sin b’ɔ jue’n nun naan ɔ́ tú be nga be si-man Nyanmiɛn’n nin be nga be fa-man e Min Jésus i jasin fɛ’n su’n be fɔ.” Nanwlɛ, ɔ́ “núnnún be nga be saci asiɛ’n.”—2 Tɛsalonikfuɛ Mun 1:7, 8; Sa Nglo Yilɛ 11:18.

I sin’n, Zezi Klist m’ɔ ti ‘Famiɛn’m be Famiɛn’n’ ɔ́ síe asiɛ’n i su ninnge’m be ngba. (Sa Nglo Yilɛ 19:16) Ɔ́ wá yó maan ɲrɛnnɛn sa wie fi su tɔman klɔ sran nga ɔ́ síe be’n be su kun. Tinmin nga Ɲanmiɛn fa mɛnnin i ti’n, ɔ́ wá yó maan munngun blɛ’n nin wawa blɛ’n bé yó sɛsɛ. Ɔ maan be su kleman klɔ sran’m be ɲrɛnnɛn kun. Yɛ nzue tɔlɛ blɛ’n su kacikaciman kun. Kɛ ɔ ko yo sɔ’n, ndɛ nga laa kpa’n Ɲanmiɛn Zoova kan kleli i nvle’n, ɔ́ kpɛ́n su. Ɔ seli be kɛ: “Min kusu sɛ nzue’n i tɔlɛ’n ju-ɔ, ń tɔ́ i ḿ mán amun naan fie’m be yo ye naan waka’m be kusu be su kpa.” (Saun Yolɛ 26:4) Sɛ klɔ sran’m be kplan sua’n, srɛ su kunman be kɛ sa wie ti’n sua sɔ’n sáci. Afin’n, Biblu’n se kɛ: “Sɛ min sran’m be kplan sua’n, bé trán be nun, sɛ be ta vinyi’n, bé dí i su mma.”—Ezai 65:21.

?Ngue yɛ ɔ fata kɛ amun yo ɔ?

Amun kusu amun kunndɛ kɛ amún trán mɛn sɔ’n mɔ ɲrɛnnɛn sa su tranman nun’n i nun wie. ?Nɛ́n i ɔ? ?Sɛ ɔ ti sɔ’n, ngue yɛ ɔ fata kɛ amun yo naan amun a kwla tran mɛn sɔ’n nun wie ɔ? “Be nga be si-man Nyanmiɛn’n” mɔ ‘be faman jasin fɛ’n su’n,’ be su kwlá tranman mɛn sɔ mɔ ɲrɛnnɛn su tranman nun’n i nun wie. Ɔ maan ɔ ti weiin kɛ sran ng’ɔ kunndɛ kɛ ɔ́ trán mɛn sɔ’n nun wie’n, ɔ fata kɛ ɔ suan Ɲanmiɛn i su like, naan ɔ suan like nga Ɲanmiɛn su siesie naan w’a sie asiɛ’n i bo. Ɲanmiɛn kunndɛ kɛ e si i naan e fa i Sielɛ’n mɔ i Wa’n yɛ ɔ ti i su Famiɛn’n, i jasin fɛ’n su.

Sɛ amun waan amún súɛn i sɔ yolɛ’n, amun bo amun ɲin ase be suan Biblu’n i nun like. Ninnge ng’ɔ fata kɛ e yo be naan mɛn nga Ɲanmiɛn wá síe’n mɔ ɲrɛnnɛn su tranman nun kun’n, y’a kwla tran nun’n, be o Biblu’n nun. Amun kwla se Zoova i Lalofuɛ’m be kɛ be uka amun naan amun suan Biblu’n nun like. I sɔ’n yɛ be kunndɛ ɔ. Nyanndra Mun 1:33 se kɛ: “Sran nga n kan ndɛ n kle i-ɔ ɔ ti’n, i sɔfuɛ’n ɔ́ nyɛ́n i ti bɔ cɛ. Ɔ́ trán fɔundi tranlɛ, sa tɛ kaan sa su nyɛn-mɛn i.” Sɛ amun mian amun ɲin suan Ɲanmiɛn i su like’n, naan amun sɔ jasin fɛ’n nun’n, amun kwla lafi su kɛ ndɛ sɔ’n kpɛ́n su amun lika.