Maan e fa usa Zezi

Sran nga be ɲin yi Ɲanmiɛn’n be nun kpanngban be bu i kɛ ɔ fata kɛ be kpanndan Ɲanmiɛn sulɛ’n nin politiki yolɛ’n. Be lafi su kɛ Ɲanmiɛn sulɛ’n kwla uka sran mun naan b’a siesie asiɛ’n su sa mun. Sanngɛ sran nga Ɲanmiɛn sulɛ’n ti be cinnjin’n be nun wie’m be bu i kɛ ɔ fataman kɛ be sanngan politiki yolɛ’n nin Ɲanmiɛn sulɛ’n. ?Amun bɔbɔ amun bu i kɛ Ɲanmiɛn sulɛ’n nin politiki’n be kwla kɔ likawlɛ? ?Ninnge nɲɔn sɔ mɔ be le ta sran’m be su kpa’n, be kwla kan be bo nun?

BE KANNIN Zezi Klist i ndɛ seli kɛ “kɛ ɔ fɛ i laa lele m’ɔ́ fá jú andɛ’n, i yɛ Ɲanmiɛn i sulɛ nun’n, ɔ le ta kpa sran’m be su ɔ.” I sɔ’n ti’n maan ɔ yo e kɛ Zezi o lɛ naan e kwla usɛ i kosan sa. ?Sɛ e usɛ i kɛ ɔ fata kɛ Ɲanmiɛn sufuɛ kun yo politiki’n, ɔ́ tɛ́ su sɛ? I nun nga Zezi o asiɛ’n su wa’n, ndɛ ng’ɔ kannin’n nin i aeliɛ’n be kleli wafa ng’ɔ́ tɛ́ kosan sɔ’n su’n. I wie yɛle Ɲanmiɛn ndɛ ng’ɔ kɛnnin i oka’n su lɔ mɔ sran sunman si i’n. Ndɛ sɔ’n uka i sɔnnzɔnfuɛ mun naan b’a si wafa ng’ɔ fata kɛ be nin be asa’n sufuɛ’m be tran’n. Maan e fa e ɲin e sie ndɛ sɔ mɔ kannin’n i bue cinnjin wie’m be su.

Be nin sran’m be tran

Zezi kannin aeliɛ ng’ɔ fata kɛ i sɔnnzɔnfuɛ’m be yi i nglo mɛn’n nunfuɛ’m be lika’n i ndɛ. Ɔ seli kɛ: ‘Amun yɛ an ti kɛ njin’n sa mɛn’n nun-ɔn. ?Sanngɛ sɛ njin’n i ta’n kpɔ’n nguɛ yɛ bé fá yó naan w’a yo fɛ ekun-ɔn? Ɔ yo-man sa fi ye kun, san blo yɛ bé yí i-ɔ, yɛ sran’m bé tíatía su. Amun yɛ an ti kɛ kannin sa mɛn’n nun-ɔn. An yo kɛ kannin sa sran’m be nyrun, maan be wun amun nyoliɛ kpa’n naan be man-man amun Si b’ɔ o nyanmiɛn su lɔ’n.’ (Matie 5:13-16) ?Ngue ti yɛ Zezi seli kɛ i sɔnnzɔnfuɛ’m be ti kɛ njin nin kannin sa ɔ?

Zezi i ndɛ’n kle kɛ nán sran akpasua kaan kun ngunmin i ye yolɛ ti yɛ i sɔnnzɔnfuɛ’m be ti kɛ njin sa ɔ. Sanngɛ klɔ sran’m be ngba be ti ɔ. Asa kusu’n, nán sran wie’m be ngunmin be ɲrun kpajalɛ ti yɛ be ti kɛ kannin sa ɔ. Sanngɛ sran’m be kwlaa nga be kunndɛ kɛ bé wún ase weiin’n be ti yɛ be ti sɔ ɔ. Zezi fɛli i sɔ sunnzun ase’n fa kleli weiin kɛ ɔ kunndɛman kɛ i sɔnnzɔnfuɛ’m be tran be liɛ ngunmin. ?Ngue ti yɛ w’a kunndɛman sɔ ɔ?

Maan e bu sa nga i akunndan. Njin’n yo naan aliɛ wie’m b’a saciman. Sanngɛ á wún kɛ ɔ́ yó i sɔ’n nn b’a fa sanngan aliɛ’n nun. Asa kusu’n, sɛ b’a faman kannin’n b’a tɛkɛmɛn i lika kun nun’n, ɔ kwlá kpajaman lika sɔ’n nun. I kwlaa sɔ’n maan e wun like nga ti yɛ Zezi w’a semɛn i sɔnnzɔnfuɛ’m be kɛ be ngunmin be ko tran asiɛ’n i bue uflɛ su’n, i wlɛ weiin. Yɛ like nga ti yɛ w’a seman be kɛ kɛ mɔ be ti Klistfuɛ’n ti’n, nán maan be nin sran be yo like wie fi likawlɛ’n, e wun i wlɛ. Sanngɛ kɛ nga njin’n fa kan aliɛ’n naan w’a saciman sa’n, yɛ be sie kannin’n i lika kun nun naan w’a kwla kpaja lika sɔ’n nun sa’n, ɔ fata kɛ Klistfuɛ’m be nin sran’m be tran naan b’a kwla uka be.

“Be ti-man mɛn nunfuɛ”

Sanngɛ kɛ Zezi seli i sɔnnzɔnfuɛ’m be kɛ be nin sran mun be tran’n, i sɔ’n kpɛ ndɛ cinnjin kun ba. Yɛle wafa ng’ɔ fata kɛ Klistfuɛ’m be bu politiki yolɛ’n. ?Ngue ti yɛ ɔ kpɛ ndɛ ba ɔ? I nun mɔ Zezi i wie cɛn’n mantannin koko’n, ɔ srɛli Ɲanmiɛn mɛnnin i sɔnnzɔnfuɛ mun. Ɔ seli kɛ: ‘N srɛ-man wɔ kɛ a yi be mɛn’n nun, sanngɛ ń srɛ́ wɔ kɛ Klunwifuɛ’n ti a nian be su. Be ti-man mɛn nunfuɛ kɛ n kusu n ti-man mɛn nunfuɛ’n sa.’ (Zan 17:15, 16) ?Sanngɛ yoo, wafa sɛ yɛ Klistfuɛ’m be nin sran mun be kwla tran naan be kunngba’n b’a yoman mɛn’n nunfuɛ ɔ? Kɛ ɔ ko yo naan y’a wun i wlɛ’n maan e bu kosan nɲɔn ekun be akunndan. Be yɛ:

• ?Wafa sɛ yɛ Zezi buli politiki yolɛ’n niɔn?

• ?Ngue yɛ ɔ fata kɛ Klistfuɛ’m be yo i andɛ ɔ?