Maan e suan Ɲanmiɛn Ndɛ’n nun like

?Ngue sa yɛ ɔ́ jú Ɲanmiɛn sulɛ wafa’m be su ɔ?

Ndɛ nga tɛ kosan wie mɔ atrɛkpa’n amun fa usali amun wun’n be su. Yɛ amun Biblu’n i lika nga amun kwla kanngan nun naan amun a wun be su tɛlɛ’n ɔ kle amun. Zoova i Lalofuɛ’m be klo kɛ be nin amun kókó ndɛ sɔ’m be su yalɛ.

1. ?Ɲanmiɛn sulɛ wafawafa’m be ngba yɛ be ti kpa ɔ?

Ɲanmiɛn sulɛ wafa kpanngban nun’n, sran wie’m be kunndɛ kɛ bé yó naan Ɲanmiɛn i klun jɔ be wun. Ɲanmiɛn wun i sɔ sran mun yɛ be ndɛ lo i. Sanngɛ ng’ɔ yo ya’n yɛle kɛ sran wie’m be fia Ɲanmiɛn sulɛ’n i sin be yo sa tɛ. Laa’n, Ɲanmiɛn sulɛ wafa wie’m be su kpɛn’m be yoli be ɲrun tanndanfuɛ’m be tɛtɛ kpa bɔbɔ. (2 Korɛntfuɛ Mun 4:3, 4; 11:13-15) Andɛ’n, nganniɛn nga e ti be’n yɛle kɛ Ɲanmiɛn sulɛ wafa’m be su kpɛnngbɛn wie’m be wlawla sran mun maan be yo kakawlonga sa mun. Asa kusu’n, be suan alɛ kunlɛ’n bo yɛ be nin ba kanngan’m be la.​—An kanngan Matie 24:3-5, 11, 12 nun.

Biblu’n waan Ɲanmiɛn sulɛ’n ti fa nɲɔn. Kun ti kpa yɛ kun timan kpa. Ng’ɔ timan kpa’n, ɔ kleman Ɲanmiɛn i su nanwlɛ’n. Kusu’n nn Ɲanmiɛn Zoova kunndɛ kɛ sran’m be si i su nanwlɛ’n.​—An kanngan 1 Timote 2:3-5 nun.

2. ?Ngue sa yɛ ɔ́ jú Ɲanmiɛn sulɛ wafa’m be su ɔ?

Ɲanmiɛn sulɛ wafa nga be waan be klo Ɲanmiɛn sanngɛ kusu nn be kanman i su ndɛ nanwlɛ’n, Ɲanmiɛn kloman kɛ be laka sran mun. Mɛn mɔ mmusu’m be si Satan yɛ ɔ sie i’n, i dilɛ’n yɛ ɔ yo Ɲanmiɛn sulɛ wafa sɔ’m be nunfuɛ’m be fɛ ɔ. (Zak 4:4; 1 Zan 5:19) Ɲanmiɛn sulɛ wafa nga be yaci Ɲanmiɛn lɛ mɔ sran’m be famiɛn diwlɛ mun yɛ be suan be bo’n, Ɲanmiɛn Ndɛ’n fa be sunnzun tekle bla. Biblu’n flɛ tekle bla sɔ’n kɛ “Babilɔni klɔ dan’n.” Kɛ Nowe blɛ su nzue dan’n tɔli’n, be wa flɛli klɔ kun Babilɔni. Lɔ yɛ Ɲanmiɛn sulɛ wafa ng’ɔ timan su’n boli i bɔ ɔ. Klɔ sɔ’n i dunman yɛ be fa tɔnnin tekle bla’n niɔn. Ɔ ka kaan sa, be ɲinma bulɛ kunngba nun’n, Ɲanmiɛn wá núnnún Ɲanmiɛn sulɛ wafa ng’ɔ laka sran mun’n mɔ kusu’n ɔ kle be ɲrɛnnɛn’n.​—An kanngan Sa Nglo Yilɛ 17:1, 2, 5, 17 nin 18:8, 23, 24 nun.

 3. ?Ngue yɛ Ɲanmiɛn wá yó naan asiɛ’n i bue kwlaa su’n, sran’m be di aklunjuɛ ɔ?

Ɲanmiɛn sulɛ wafa’m be jɔlɛ mɔ Ɲanmiɛn wá dí’n, ɔ ti ndɛ fɛ. I sɔ’n wá yó maan asiɛ’n i bue kwlaa su’n sran’m bé fín ɲrɛnnɛn nga be kle be’n nun fíte. Ɲanmiɛn sulɛ wafa tɛ wie fi su tranman lɛ lakalakaman sran mun kun, yɛ ɔ su yoman naan sran b’a bubu be wun nun. Sran’m be kwlaa be bo yó kun bé sú Ɲanmiɛn Kpli kunngba cɛ.​—An kanngan Ezai 11:9 nin Sa Nglo Yilɛ 18:20, 21 nin Ng 21:3, 4 nun.

4. ?Ngue yɛ ɔ fata kɛ be nga be klun ti kpa’n be yo ɔ?

Zoova i wla w’a fiman be nga be klun ti kpa’n mɔ be o asiɛ’n su Ɲanmiɛn sulɛ wafa nga be timan kpa’n be nun’n. Kɛ é sé yɛ’n ɔ su fa ndɛ nanwlɛ’n kle sran sɔ mun naan be bo yo kun be su i.​—An kanngan Mise 4:2, 5 nun.

Sran kwlaa ng’ɔ klo kɛ ɔ́ sú Zoova’n, Zoova sɔ i nun klanman ɔ fɛ i yo i awlo’n nun sran. Sɛ bɔbɔ’n kɛ e bo Zoova i sulɛ bo’n, e janvuɛ nin e osufuɛ’m be fa ya’n, sanngɛ e ɲan Zoova i sulɛ’n i su ye dan. Yɛle kɛ e nin Ɲanmiɛn e kaci janvuɛ, kpɛkun e yo awlobo kun mɔ i nunfuɛ’m be klo be wun kpa’n i nunfuɛ. Asa kusu’n, anannganman nguan’n i atin’n su yɛ e nanti ɔ.​—An kanngan Mark 10:29, 30 nin 2 Korɛntfuɛ Mun 6:17, 18 nun.

Sɛ amun kunndɛ kɛ amún sí nun ekun’n, an nian fluwa ?Ngue like yɛ Biblu’n kle i sakpasakpa ɔ? i ndɛ tre 15 nin 16 nun. Zoova i Lalofuɛ mun yɛ be yili ɔ.

[Foto cifuɛ mun, bue 26]

The Complete Encyclopedia of Illustration/​J. G. Heck