NDƐ NG’Ɔ KLƐ FLUWA’N SU’N | ?SIANSIFUƐ MUN TI’N E SU LAFIMAN BIBLU’N SU KUN?

Siansifuɛ’m be kwlá siman ninnge ngba

Sran wie’m be o lɛ’n, be waan be lafiman su kɛ Ɲanmiɛn o lɛ. Le nɲɔn nga nun’n, be ndɛ nga be kan’n, ɔ o fluwa wie’m be nun. Sran kpanngban be kanngan fluwa sɔ’m be nun. Yɛ be si i nun ndɛ’n i su akplowa kpa. Be flɛ fluwa sifuɛ kun kɛ Davidi Igɔlumani. Ɔ seli kɛ: ‘Sran nga be kanngannin fluwa sɔ’m be nun’n, be nun wie’m be bu i kɛ siansifuɛ’m be si ninnge ngba. Sanngɛ, siansifuɛ nga be si be junman’n i kpa’n, be ti akunndanfuɛ. Be kunndɛ kɛ bé sí ninnge uflɛ wie mun.’

Kɛ ɔ́ cɛ́ kɔ́’n, mɛn’n nun ninnge nga siansifuɛ nga be si be junman’n i kpa’n be wunnin be wlɛ’n, ɔ ti abonuan. Sanngɛ, be nun wie’m be dili fɔ dan. Sran sɔ’m be nun kun yɛle Izaaki Niitɔnu. Bian sɔ’n sili fluwa dan. Afin, ɔ kleli kɛ asiɛ’n nin nzraama mun, nin anglo ba’n, nin wia’n ɔ nin nglo lɔ ninnge wie mun ekun be nanti mmla kun su. Naan i ti yɛ be siesie be osu nun sɛsɛsɛ ɔ. Like nga fluwa sifuɛ sɔ’n kunndɛli m’ɔ wunnin i wlɛ’n, sran’m be nian su be yi ɔrdinatɛli. I su wie yɛ sran’m be nian naan b’a yi mannzin naan b’a wɔ nglo lɔ mmuammua kpa ɔ. Sanngɛ ɔ nin i sɔ ngba’n, Izaaki Niitɔnu wa kunndɛli kɛ ɔ́ yí atrɛ. Yɛle kɛ, ɔ fali ayre wie mun guɛli i blalɛ wie’m be su naan be kaci sika ɔkwlɛ.

Be flɛ Glɛki bian kun kɛ Ptoleme. Ɔ yoli fluwa sifuɛ dan kun. Yɛ ɔ dili i junman’n afuɛ 1.500 tra su lele naan b’a wu Izaaki Niitɔnu. Wafa nga nzraama’m be siesie nglo lɔ sɛsɛsɛ’n, ɔ jɛjɛli i fluwa kun su. Sanngɛ, ɔ buli i kɛ ninnge kwlaa be bo sin yia asiɛ’n. Be flɛ fluwa sifuɛ kun kɛ Karli Sagani. Ɔ kannin Ptoleme i ndɛ. Ɔ seli kɛ: ‘Ndɛ ng’ɔ kɛnnin i kɛ ninnge kwlaa be bo sin yia asiɛ’n, sran’m be fali ato ndɛ sɔ’n su lele afuɛ kɔe 1.500. I sɔ’n kle kɛ fluwa sifuɛ dan bɔbɔ’n, ɔ kwla di fɔ.’

?Siansifuɛ’m be kwla si ɲanmiɛn m’ɔ la nglo lɔ plaii’n, ɔ nin asiɛ’n be su like ngba? Ɔ ti su kɛ siansifuɛ’m b’a si ninnge kpanngban. Yɛ e ɲan junman nga be di’n i su ye. Sanngɛ, maan e wun i wlɛ kɛ nán ninnge ngba yɛ be kwla si be ɔ. Be flɛ fluwa sifuɛ kun kɛ Pɔlu Devizi. Ɔ seli kɛ: ‘E kwlá yiyiman wafa nga asiɛ’n nin nglo lɔ ninnge’m be ti’n, i nun weinwein kpa naan sran’m b’a wun i wlɛ.’ Bian’n i ndɛ sɔ’n ti nanwlɛ weiin. Sran’m be kwlá siman ninnge ngba. I sɔ’n ti, sɛ sran wie’m be se kɛ siansifuɛ’m be kwla yiyi ninnge’n kwlaa nga Ɲanmiɛn yili be’n be nun kle e’n, nán maan e ka lɛ e fa su.

E wun i wlɛ weiin kɛ wafa nga Biblu’n yo e ye’n, siansifuɛ’m be kwlá yoman e ye sɔ.

Biblu’n kle kɛ ninnge nga Ɲanmiɛn yili be’n, be ti abonuan dan. Ɔ se kɛ: “Nga ti sa ng’ɔ yo be’n be bue kaan sa. Be nganniɛn nga e ti i wa’n, e timɛn i kpa bɔ ngbɛn.” (Zɔb 26:14) Ninnge nga sran’m be nin a wunman be’n, ɔ nin nga be nin a siman be’n, be sɔnnin dan. Akoto Pɔlu kannin ndɛ kun i afuɛ kɔe 2.000 yɛ. Ndɛ sɔ’n ti nanwlɛ weiin. Ɔ seli kɛ: “Eee, Nyanmiɛn ti anyanbeunfuɛ o! Ɔ si ngwlɛlɛ o! Ɔ si sa’n kwlakwla kpan! ?Wan yɛ ɔ si i klun lɔ akunndan nin-ɔn? ?Wan yɛ ɔ wun sa ng’ɔ yo be’n be wlɛ-ɔ?”—Rɔmfuɛ Mun 11:33.

Like nga siansifuɛ’m be kwlá kleman e’n

Siansifuɛ’m be kle e ninnge nga Ɲanmiɛn yili be’n be su like. Biblu’n liɛ’n, ɔ kle e wafa ng’ɔ fata kɛ e nanti naan e nin e wiengu mun y’a tran fɔun. Asa ekun’n, ɔ kle e like ng’ɔ fata kɛ e yo naan e liɛ w’a yo ye’n. Like ng’ɔ kle e’n i wie yɛ.

Kɛ ɔ ko yo naan y’a kunman sran’n

Maan e bu nguan’n i like cinnjin

“Nán kun sran.”—Ezipt Lɔ Tulɛ 20:13.

“Sran kwlaa ng’ɔ kpɔ i niaan’n, wuun ɔ ti sran kunfuɛ.”—1 Zan 3:15.

Maan e nin e wiengu mun e tran fɔuun

“Ɔ wla sa tɛtɛ’n i ase, ɔ yo sa kpa. Maan ɔ nin sran kwlaa be nuan sɛ. Maan sran’m be afiɛn siesielɛ’n ɔ kaci i junman.”—Jue Mun 34:15.

“Be nga be siesie afiɛn’n, be ti kɛ fie difuɛ sa. Sɛ alaje o lɛ naan be lua like’n, like nga be nyɛn i nun’n yɛlɛ sa i nuan su yolɛ’n.”—Zak 3:18.

Nán e yo e wiengu’m be like yaya

“Anannganman si sran kpa’n i klun akunndan’n. Sanngɛ klunwifuɛ’n, ɔ nin sran ng’ɔ fa sa tɛ yolɛ’n cici i ti’n, ɔ kpɔ i sɔfuɛ mun.”—Jue Mun 11:5.

“Anwlɛn fufufuɛ’m be like nga be yo’n nán nian su yo wie. Be atin nga be fa su’n, nán fa wie fi su. Afin Anannganman nyin ci klunwifuɛ mun.”—Nyanndra Mun 3:31, 32.
Awlobo tranlɛ fɛ

Maan ba’m be ɲin yi be si nin be nin

“Ba kanngan mun, maan amun nyin yi amun si nin amun nin e Min’n liɛ bɔ an ti’n ti, afin i sɔ’n ti kpa. Be klɛli mmla nun kɛ: ‘Bu ɔ si nin ɔ nin be sran,’ mmla bɔ Nyanmiɛn fa mannin sran mun b’ɔ uka su kɛ sɛ be yo-ɔ ɔ́ yó be ye’n, ɔ ti be nun klikli. Ye sɔ’n yɛlɛ kɛ: ‘Ɔ wun jɔ́ wɔ fɔuun, á cɛ́.’”—Efɛzfuɛ Mun 6:1-3.

Ba’m be like klelɛ’n

“Nja mun, amun kusu, nán an yo sa b’ɔ kun amun mma’m be ya, sanngɛ an ta be kpa e Min’n liɛ’n su, yɛ an tu be fɔ, an kle be ngwlɛlɛ.”—Efɛzfuɛ Mun 6:4.

“Nja mun, nán an yo sa ng’ɔ kun amun mma’m be ya’n maan be sa sin búbú be’n.”—Kolɔsfuɛ Mun 3:21.

Sran kun nin i yi be wun klolɛ’n

“Maan yasua kun klo i yi kɛ ɔ fa klo i bɔbɔ wun’n sa, yɛ maan mmla’m be kusu be bu be wun’m be sran.”—Efɛzfuɛ Mun 5:33.
Nán e saci asiɛ’n

Biblu’n kan sa nga laa Izraɛlifuɛ’m be yoli’n i ndɛ se kɛ: “Sran nga be o asiɛ’n su’n be sacili i. [...] Yɛ i sufuɛ’m be sua be sa tɛ’n i su afɛ’n.” (Ezai 24:5, 6) Andɛ’n, be nga be saci asiɛ’n, Ɲanmiɛn nin be le i. Biblu’n waan Ɲanmiɛn wá “núnnún be nga be saci asiɛ’n.” (Sa Nglo Yilɛ 11:18) Nanwlɛ, bé súa be sa tɛtɛ nga be yo’n i su afɛ’n.