?Ngue yɛ e kwla fa e wla gua su-ɔ?

Ndɛ nga Biblu’n kan’n

Biblu’n waan Ɲanmiɛn kunndɛ kɛ ‘e ɲrun lɔ’n yo kpa naan e wla gua ase.’ (Zeremin 29:11) I kpa’n, sa nga ti yɛ Ɲanmiɛn yoli maan be klɛli Biblu’n, i kun yɛle kɛ ‘ɔ fɔnvɔ e naan e ɲan like e fa e wla e gua su.’ (Rɔmunfuɛ Mun 15:4) Ndɛ nga nun’n, é wá wún i kɛ ndɛ ng’ɔ o Biblu’n nun’n ɔ kwla uka e aliɛ ba kwlaa nun yɛ ɔ kwla uka e naan y’a lafi su kɛ e ɲrun lɔ’n yó kpa.

Ndɛ nga be yiyili nun’n:

?Wafa sɛ yɛ Biblu’n cici e wla-ɔ?

Biblu’n cici e wla. Afin ɔ kle e ninnge trele wie mɔ e kwla yo naan e mɛn dilɛ’n w’a yo kpa-ɔ. Ninnge sɔ’m be nun wie mun yɛ:

Maan e fa Biblu’n nun afɔtuɛ’m be su. Jue Mun 119:105 se kɛ: “Ɔ ndɛ’n ti kɛ kannin sa, ɔ kpaja min bo, yɛ ɔ kpaja min atin’n su.” Kannin ng’ɔ kpaja kpa’n, ɔ kwla yo like nɲɔn. Ɔ kwla kpaja e bo lɛ, kpɛkun ɔ kwla kpaja e ɲrun atin’n su mmua lɔ. I wafa kunngba’n, afɔtuɛ kpakpa nga be o Biblu’n nun’n be kwla uka e sa nga be tɔ e su aliɛ ba kwlaa nun’n be nun, kpɛkun be kwla uka e naan y’a lafi su kɛ e ɲrun lɔ’n yó kpa. Ndɛ nga Biblu’n kan’n kwla man e wunmiɛn yɛ ɔ kwla yo maan “sran klun jɔ.” (Jue Mun 19:7, 8) Asa’n, Biblu’n kle e like ɲɛnmɛn nga Ɲanmiɛn waan ɔ́ yó i asiɛ’n su fá mán klɔ sran mun’n. Like sɔ’n ti’n, e klun jɔ kpa fɔun.
Maan e kplin su kɛ sran uka e. Kɛ sa o e su mɔ e wunmɛn i trawlɛ’n, e kwla se kɛ e kplinman su kɛ e osufuɛ annzɛ e janvuɛ’m be uka e. Sanngɛ Biblu’n waan i sɔ ayeliɛ’n timan ngwlɛlɛ ayeliɛ. Afin sɛ e yo sɔ’n, é fá ajalɛ tɛ annzɛ é yó like tɛ. (Ɲanndra Mun 18:1) E osufuɛ nin e janvuɛ’m be kwla uka e naan y’a jran kekle. Asa’n, be kwla man e afɔtuɛ kpakpa wie mun naan y’a wun sa sɔ’n i trawlɛ. (Ɲanndra Mun 11:14) Asa ekun’n, be kwla fɔnvɔ e yɛ be kwla wla e fanngan naan y’a jran kekle lele y’a guɛ i ti nin i bo.—Ɲanndra Mun 12:25.
Maan e srɛ Ɲanmiɛn. Biblu’n se kɛ: “To ɔ ti su trɔ’n yi i Zoova su, yɛ ɔ́ súan ɔ bo. Ɔ su kplinman su le kɛ sran kpa’n ɔ tɔ.” a (Jue Mun 55:22) Nán ngbɛn ti yɛ be flɛ kɛ Zoova kɛ “Ɲanmiɛn mɔ maan e lafi su kɛ é ɲán like’n” niɔn. (Rɔmunfuɛ Mun 15:13) Maan e srɛ i naan e koko ‘e su sa’n kwlaa’ e kle i, yɛ maan e lafi su kɛ e ndɛ lo i. (1 Piɛli 5:7) I kpa bɔbɔ’n, Biblu’n se kɛ: ‘Ɔ́ yó maan é yó yakpafuɛ, ɔ́ yó maan é ɲán wunmiɛn, yɛ ɔ́ yó maan é jrán kekle.’—1 Piɛli 5:10.
Sa nga be tɔ e su’n be kwla uka e wie. Biblu’n se kɛ: “Sran ng’ɔ sie i su [Ɲanmiɛn] nuan bo’n, sa fi su ɲɛnmɛn i. Yɛ ɔ su sroman ɲrɛnnɛn fi.” (Ɲanndra Mun 1:33) Be flɛ bla kun kɛ Maagarɛti, ɔ tran Ɔstrali. Aunmuan dan kun sacili i sua’n, yɛ i ninnge kaka be fili i sa. Sanngɛ i wla w’a bomɛn i wun w’a tratraman su. I kpa’n, ɔ wunnin like cinnjin kpa kun i wlɛ. Yɛle kɛ ninnge nga e le be’n be kwla ka lɛ fi e sa. Kɛ sa sɔ’n sinnin’n, ɔ fuali kpa kɛ ɔ́ fɛ́ i ɲin síe i ninnge nga be ti cinnjin kpafuɛ’n be su. I wie yɛle i osufuɛ mun nin i janvuɛ mun, nin Ɲanmiɛn i janvuɛ tralɛ ɔ nin like kpa nga Biblu’n maan e wla o su’n.—Jue Mun 37:34; Zaki 4:8.

?Like benin yɛ Biblu’n waan sran’m be kwla ɲɛn i-ɔ?

Biblu’n kle kɛ e klɔ sran mun’n é ɲán like ɲɛnmɛn kpa kun asiɛ’n su wa. Like sɔ’n nunman mmua kun. I kpa’n, sa nga be tɔ sran’m be su dɔ nga su’n, be kle kɛ e o mɛn nga e o nun yɛ’n “i awieliɛ blɛ’n nun.” (2 Timote 3:1-5) Ɔ cɛ kan’n, Ɲanmiɛn bɔbɔ wá síe klɔ sran mun yɛ ɔ́ yó maan sran lufle bulɛ’n nin ɲrɛnnɛn kwlaa bé wíe. Ɔ́ sín awa kun i lika yó sɔ. Be flɛ awa sɔ’n kɛ Ɲanmiɛn Sielɛ’n. (Daniɛli 2:44; Sa Nglo Yilɛ 11:15) Kɛ Zezi klé i sɔnnzɔnfuɛ mun wafa ng’ɔ fata kɛ be srɛ Ɲanmiɛn’n, awa sɔ’n i akunndan yɛ ɔ buli-ɔ. Ɔ seli kɛ: “Maan ɔ Sielɛ’n i blɛ’n ju. Maan ɔ klun sa’n kpɛn su asiɛ’n su wa.”—Matie 6:9, 10.

Biblu’n kan like nga Ɲanmiɛn waan ɔ́ yó mán klɔ sran mun’n i ndɛ weinwein. Nian ninnge wie mɔ Ɲanmiɛn Sielɛ’n wá núnnún be’n:

Awe’n su tranman lɛ kun. “Asiɛ’n su ninnge’m bé yó kpa.”—Jue Mun 67:6.
Tukpacɛ’n su tranman lɛ kun. “Sran fi su seman kɛ: ‘N kpinndinman.’”—Ezai 33:24.
Wie’n su tranman lɛ kun. Ɲanmiɛn wá “núnnún [sran’m] be ɲinmuɛn’n kwlaa, wie’n su tranman lɛ kun, be su yoman sɛ kun, be su sunman kun, be su wunman ɲrɛnnɛn kun. Laa ninnge’m be nunman lɛ kun.”—Sa Nglo Yilɛ 21:3, 4.

a Biblu’n kle kɛ Ɲanmiɛn i dunman’n yɛle Zoova.—Jue Mun 83:18.

Biblu’n nun ndɛ wie mɔ be cici e wla’n

Zɔbu 5:16: “Be nga be leman ɲrun’n, be le like kun be fa cici be wla.”

Ndɛ sɔ’n i bo’n: Be nga sran’m be buman be wie mɛn nga nun’n, be kwla lafi su kɛ sɛ be kpɛ be ɲin Ɲanmiɛn wun lɔ’n, ɔ́ úka be.

Jue Mun 27:14: “Fa ɔ wla’n gua Zoova su, yo yakpafuɛ yɛ tra ɔ awlɛn. Ɛɛn-ɛn, fa ɔ wla’n gua Zoova su.”

Ndɛ sɔ’n i bo’n: Sɛ e fa e wla gua Ɲanmiɛn Zoova su’n, é ɲán fanngan yɛ é yó yakpafuɛ. Ɔ su yaciman be nga be lafi i su’n be le.

Jue Mun 62:5: “Ń trán diin ń mínndɛ Ɲanmiɛn, afin like nga min wla o su’n, ɔ fin i.”

Ndɛ sɔ’n i bo’n: Be nga be fa be wla be guɛ i Ɲanmiɛn su’n, kɛ sa o be su’n be tra be awlɛn be minndɛ i. Afin be lafi su kɛ ɔ́ dé be blɛ ng’ɔ ti su’n i nun.

Ɲanndra Mun 20:22: “Nán se kɛ: ‘Sa tɛ nga be yoli min’n, ń yí mán.’ Fa ɔ wla’n guɛ i Zoova su, yɛ ɔ́ dé wɔ.”

Ndɛ sɔ’n i bo’n: Sɛ sran wie loli e ngasi annzɛ ɔ yoli e sa wie’n, sɛ e fa e wla guɛ i Zoova su’n, e su tuman e klunngbɔ. É trá e awlɛn. Ɲanmiɛn kwla yi e su afɛ’n kwlaa yɛ ɔ kunndɛ kpa kɛ ɔ́ yó sɔ kusu.

Ebre Mun 6:19: “Like sɔ mɔ [e Klisifuɛ mun] e wla o su’n, ɔ tra e ase kɛ like ng’ɔ tra mmeli’n i ase’n sa naan e ɲan nguan. Ɔ yo maan e jran kekle kpa, yɛ e akunndan’n yoman nɲɔnnɲɔn.”

Ndɛ sɔ’n i bo’n: Like ng’ɔ tra mmeli’n i ase’n yɛ ɔ yo maan kɛ aunmuan’n fita dan’n mmeli’n jran kekle’n niɔn. I wafa kunngba’n, kɛ mɔ e wla o su kɛ Ɲanmiɛn yó e mo’n ti’n, e kokoman dan. Ɔ maan e akunndan’n sannganman yɛ e su Ɲanmiɛn kpa titi. Like sɔ’n ti’n, e tra e awlɛn sa kekle’m be nun wie.