Sran fi nin-a wunman Ɲanmiɛn le. (Ezipti Lɔ Tulɛ 33:20; Zan 1:18; 1 Zan 4:12) Biblu’n se kɛ “Ɲanmiɛn ti aolia nun sran.” Kusu e klɔ sran mun’n, e kwlá wunman aolia nun sran mun.—Zan 4:24; 1 Timote 1:17.

 Sanngɛ anzi’m be liɛ’n be kwla wun Ɲanmiɛn. Afin be kusu be ti aolia nun sran wie. (Matie 18:10) Asa’n, sran wie’m be liɛ’n, kɛ be ko wu’n be kaci aolia nun sran yɛ be kɔ ɲanmiɛn su. Be kusu be kwla wun Ɲanmiɛn wie.—Filipufuɛ Mun 3:20, 21; 1 Zan 3:2.

 Kpɛ sunman’n, kɛ Biblu’n se kɛ sran kun wun ase’n, i bo’n yɛle kɛ sran sɔ’n wun sa wlɛ. (Ezai 6:10; Zeremin 5:21; Zan 9:39-41) Ɔ maan dɔ nga su’n, sran nga ‘Ɲanmiɛn w’a tike i akunndan’n’ ɔ kwla wun Ɲanmiɛn. Yɛle kɛ sɛ ɔ lafi Ɲanmiɛn su’n, ɔ kwla si i ɔ nin i nzuɛn’n. (Efɛzifuɛ Mun 1:18) Biblu’n kle e like ng’ɔ fata kɛ e yo naan y’a lafi Ɲanmiɛn su’n.

•   Maan e fa e ɲin sie i ninnge ng’ɔ yili be’n su. I liɛ’n, é wún i wlɛ kɛ ɔ klo sran, i klun ti ufue, ɔ si ngwlɛlɛ yɛ ɔ le tinmin. (Rɔmunfuɛ Mun 1:20) Kɛ Ɲanmiɛn fali Zɔbu i ɲin sieli ninnge ng’ɔ yili be’n be su’n, ɔ yoli Zɔbu kɛ ɔ wun Ɲanmiɛn sa bɔbɔ.—Zɔbu 42:5.

•   Maan e suan Biblu’n nun like. I liɛ’n é sí Ɲanmiɛn. Biblu’n se kɛ: “Sɛ a kunndɛ [Ɲanmiɛn’n], ɔ́ yó maan á wún i.”—1 Be Ɲoliɛ 28:9; Jue Mun 119:2; Zan 17:3.

•   Maan e fa e ɲin sie i Zezi i su ndɛ’n su. Kɛ mɔ Zezi yo ninnge mun kɛ i Si Zoova sa cɛ’n ti’n, ɔ seli kɛ: “Sran ng’ɔ wun min’n, nn w’a wun Siɛ’n wie.”—Zan 14:9.

•   Maan e yo ninnge nga Ɲanmiɛn klo be naan w’a yo e ye. Zezi seli kɛ: “Be nga sa tɛ fi nunman be awlɛn’n nun’n be liɛ su ti ye, afin bé wá wún Ɲanmiɛn.” Kɛ nga e fa kannin sa’n, kɛ be nga be yo Ɲanmiɛn klun sa’n be nun wie’m be ko wu’n, Ɲanmiɛn cɛn be yɛ be kɔ ɲanmiɛn su. Kɛ be ju lɔ’n, ‘be kwla wun Ɲanmiɛn.’—Matie 5:8; Jue Mun 11:7.

 Kɛ e kanngan Biblu’n nun ndɛ wie’m be nun’n, ɔ kwla yo e kɛ sran wie’m be wunnin Ɲanmiɛn jrɛiin sa. Sanngɛ kɛ e fa e ɲin e sie i ndɛ sɔ’m be ɲrun nin be sin’n be su kpa’n, e wun kɛ anzi mun annzɛ aolia nun ninnge mun yɛ be wunnin be-ɔ.

 Anzi mun.

Laa nun’n, Ɲanmiɛn sunmannin anzi wie mun kɛ be wa kɛn i nuan su ndɛ kle klɔ sran mun. (Jue Mun 103:20) I wie yɛle kɛ, cɛn kun’n Ɲanmiɛn kannin ndɛ kleli Moizi susrɛ kun nun. Biblu’n se kɛ: “Moizi kɛtɛli i ɲrun. Srɛ m’ɔ kun i’n ti’n, ɔ kunndɛman kɛ ɔ́ nían Ɲanmiɛn Kpli.” (Ezipti Lɔ Tulɛ 3:4, 6) Nán Ɲanmiɛn Kpli yɛ Moizi wunnin i-ɔ. Afin ndɛ tre kunngba sɔ’n nun’n, be seli kɛ “Zoova i anzi’n” yɛ ɔ wunnin i-ɔ.—Ezipti Lɔ Tulɛ 3:2.

 Asa’n, Biblu’n se kɛ Ɲanmiɛn “nin Moizi be koko yalɛ kɛ sran kun nin i wiengu be fa koko yalɛ’n sa.” (Ezipti Lɔ Tulɛ 4:10, 11; 33:11) I sɔ’n kleman kɛ Moizi wunnin Ɲanmiɛn. Afin Ɲanmiɛn ‘sin anzi’m be lika’ yɛ ɔ kan ndɛ kle i-ɔ. (Galasifuɛ Mun 3:19; Sa Nga Be Yoli’n 7:53) Sanngɛ kɛ mɔ Moizi lafili Ɲanmiɛn su dan’n ti’n, Biblu’n waan “ɔ ti kɛ w’a wun Ɲanmiɛn mɔ sran kwlá wunmɛn i’n sa.”—Ebre Mun 11:27.

 Abraamun kusu Ɲanmiɛn sinnin anzi’m be lika kannin ndɛ kleli i wie. I yo, kɛ e kanngan Biblu’n nun’n, ɔ ju wie’n ɔ kwla yo e kɛ Abraamun wunnin Ɲanmiɛn jrɛiin sa. (Bo Bolɛ 18:1, 33) Sanngɛ ndɛ’n i ɲrun nin i sin’n kle kɛ “sran nsan” nga be ɔli Abraamun sin’n be ti anzi mɔ Ɲanmiɛn sunmannin be-ɔ. Abraamun wunnin i wlɛ kɛ Ɲanmiɛn yɛ ɔ sunmannin be-ɔ. Ɔ maan ɔ kannin ndɛ kleli be kɛ Zoova yɛ ɔ su kan ndɛ kle i trele sa-ɔ.—Bo Bolɛ 18:2, 3, 22, 32; 19:1.

 Aolia nun ninnge mun.

Ɲanmiɛn yili i wun nglo kleli sran mun aolia nun wie. I wie yɛle kɛ, kɛ Biblu’n se kɛ Moizi nin Izraɛlifuɛ onga’m “be wunnin Izraɛli Ɲanmiɛn’n,” i bo’n yɛle kɛ “be wunnin Ɲanmiɛn Kpli aolia nun.” (Ezipti Lɔ Tulɛ 24:9-11) I wafa kunngba’n, Biblu’n se kɛ ɔ ju wie’n Ɲanmiɛn nuan ijɔfuɛ’m “be wunnin Zoova.” (Ezai 6:1; Daniɛli 7:9; Amɔsu 9:1) Ndɛ sɔ’m be ɲrun nin be sin’n kle kɛ b’a wunman Ɲanmiɛn jrɛiin sa, sanngɛ be wunnin i aolia nun.—Ezai 1:1; Daniɛli 7:2; Amɔsu 1:1.