An Inot na Surat sa mga Taga Corinto 6:1-20
6 Kun an siisay man sa saindo igwa nin reklamo laban sa iba,+ nagigibo daw niyang magduman sa husgado sa atubangan nin mga tawong bakong matanos, imbes na sa atubangan kan mga banal?
2 Dai daw nindo aram na an mga banal an mahusgar sa kinaban?+ Asin kun kamo an mahusgar sa kinaban, bakong may kakayahan man kamong resolberan an simplehon na mga bagay?
3 Dai daw nindo aram na mahusgar kita sa mga anghel?+ Kun siring, ano ta dai niyato kayang maghusgar sa mga bagay-bagay sa buhay na ini?
4 Kaya, kun igwa kamong mga bagay-bagay sa buhay na ini na kaipuhan resolberan,+ an mga tawo daw na dai minimidbid* kan kongregasyon an pipilion nindong magin mga hukom?
5 Sinasabi ko ini tanganing masupog kamo. Ano dai lamang nin maski sarong madunong diyan sa saindo na makakapaghusgar sa pag-ultanan kan saiyang mga tugang?
6 An nangyayari lugod, an mga tugang nagdederemandahan sa husgado, sa atubangan pa nin mga dai nagtutubod!
7 An totoo, daog na kamo pag igwa kamong mga asunto laban sa kada saro. Taano baya ta dai na lang nindo pabayaan na gibuhan kamo nin sala?+ Taano ta dai na lang nindo pabayaan na dayaon kamo?
8 An nangyayari lugod, kamo na an naggigibo nin sala saka nandadaya, sa mga tugang pa nindo!
9 Dai daw nindo aram na an mga tawong bakong matanos dai magmamana kan Kahadian nin Diyos?+ Dai kamo magpadaya.* An mga tawong imoral,*+ mga parasamba sa idolo,+ mga parasambay,+ mga lalaking nagpapagamit sa kapwa lalaki,*+ mga lalaking nagdudurog sa kapwa lalaki,*+
10 mga parahabon,* mga mahanab,*+ mga buratsero,+ mga paralait,* asin mga parakikil dai magmamana kan Kahadian nin Diyos.+
11 Alagad ta arog kaiyan dati an nagkapira sa saindo. Pero hinugasan na kamo asin lininig;+ pinabanal na kamo;+ ipinahayag na kamong matanos+ sa ngaran kan Kagurangnan na Jesu-Cristo asin paagi sa espiritu kan satuyang Diyos.
12 An gabos na bagay bakong bawal* para sako, pero bako gabos na bagay kapaki-pakinabang.+ An gabos na bagay bakong bawal para sako, pero dai ko tutugutan na makontrol ako* nin ano man na bagay.
13 An kakanon para sa tulak asin an tulak para sa kakanon, pero parehong paparaon nin Diyos an mga iyan.+ An hawak* bako para sa seksuwal na imoralidad* kundi para sa Kagurangnan,+ asin an Kagurangnan para sa hawak.
14 Alagad ibinangon nin Diyos an Kagurangnan+ asin ibabangon man niya kita hali sa kagadanan+ paagi kan saiyang kapangyarihan.+
15 Dai daw nindo aram na an saindong mga hawak mga kabtang ni Cristo?+ Kukuanon ko daw an mga kabtang kan Cristo asin gigibuhon iyan na magin kasaro nin sarong hostes?* Dai nanggad!
16 Dai daw nindo aram na pag an siisay man nagin kasaro nin sarong hostes, sinda nagigin sarong hawak? Huli ta an sabi niya, “an duwa magigin sarong laman.”+
17 Alagad pag an siisay man nagin kasaro kan Kagurangnan, saro na sinda sa espiritu.+
18 Dumulag ka sa seksuwal na imoralidad!*+ An gabos na iba pang kasalan na tibaad magibo nin sarong tawo kasalan sa luwas kan saiyang hawak, alagad an siisay man na nagsasagibo nin seksuwal na imoralidad nagkakasala sa sadiri niyang hawak.+
19 Dai daw nindo aram na an hawak nindo iyo an templo+ kan banal na espiritu na yaon sa saindo, na inako nindo hali sa Diyos?+ Saro pa, bako nindong sadiri an buhay nindo,+
20 huli ta binakal kamo sa dakulang halaga.+ Kaya, pamurawayon nindo an Diyos+ paagi kan saindong hawak.+
Mga Nota
^ O “na hinahamak.”
^ O “magpalagalag.”
^ O “mga nagsasagibo nin homoseksuwalidad.”
^ O “nagpapagamit para sa homoseksuwal na mga gibo.”
^ O “mahàbas.”
^ O “paslo.”
^ O “mapang-insultong magtaram.”
^ O “An gabos na bagay itinutugot.”
^ O “mapasairarom ako sa awtoridad.”
^ O “lawas.”
^ O “patutot.”
