Inot na Samuel 16:1-23
16 Pag-abot nin panahon, sinabi ni Jehova ki Samuel: “Sagkod nuarin ka magmumundo para ki Saul?+ Isinikwal ko na baga siya sa pamamahala bilang hadi kan Israel.+ Panua nin lana an saimong lalagan na sungay+ asin magduman ka ki Jesse+ na taga Betlehem, huling pinili kong magin hadi an saro sa saiyang mga aki.”+
2 Alagad sinabi ni Samuel: “Paano ako makakaduman? Pag mabaretaan ini ni Saul, gagadanon niya ako.”+ Nagsimbag si Jehova: “Magdara ka nin sarong ugbon na baka tapos sabihon mo, ‘Nagdigdi ako para mag-atang ki Jehova.’
3 Agdahon mo si Jesse na ibanan kang mag-atang; dangan ipapaaram ko saimo kun ano an gigibuhon mo. Dapat mong lahidan para sa sako an saro na pipilion ko.”+
4 Ginibo ni Samuel kun ano an sinabi ni Jehova. Pag-abot niya sa Betlehem,+ nagtatarakig sa takot an kamagurangan kan siyudad kan sinasabat ninda siya, asin nagsarabi: “Katuninungan an tuyo kan pagdigdi mo?”
5 Kaya nagsimbag siya: “Iyo, katuninungan. Nagdigdi ako tanganing mag-atang ki Jehova. Pabanala an saindong sadiri, asin ibanan nindo akong mag-atang.” Dangan pinabanal niya si Jesse asin an mga aking lalaki kaini. Pagkatapos, inimbitaran niya sinda sa gigibuhon na pag-atang.
6 Kan padangadang sinda, nahiling niya si Eliab+ asin sinabi niya: “Siguradong an sarong ini an pinili ni Jehova.”*
7 Pero sinabi ni Jehova ki Samuel: “Dai ka maghiling* sa saiyang itsura asin kun gurano siya kalangkaw,+ ta bako siya an pinili ko. Huli ta an paghiling nin tawo bakong arog kan paghiling nin Diyos. An tawo naghihiling sa kun ano an nahihiling kan mga mata, alagad si Jehova naghihiling sa kun ano an nasa puso.”+
8 Dangan inapod ni Jesse si Abinadab+ asin iinatubang ini ki Samuel, pero sinabi ni Samuel: “Bako man ini an pinili ni Jehova.”
9 An sunod na iinatubang ni Jesse iyo si Sammah,+ pero sinabi ni Samuel: “Bako man ini an pinili ni Jehova.”
10 Kaya naiatubang ni Jesse ki Samuel an pito sa saiyang mga aking lalaki, pero sinabi ni Samuel ki Jesse: “Mayong pinili si Jehova sa mga ini.”
11 Sa katapos-tapusi, sinabi ni Samuel ki Jesse: “Iyo na ini an gabos mong aking lalaki?” Kaya nagsimbag siya: “Mayo pa digdi su pinakanguhod;+ nagpapastor kaya siya kan mga karnero.”+ Dangan sinabi ni Samuel ki Jesse: “Ipasundo mo siya, ta dai kita matukaw para magkakan sagkod na dai siya nag-aabot.”
12 Kaya ipinasundo niya siya asin iinatubang ki Samuel. Mamula-mula siya, magayon an mga mata, saka guwapo.+ Dangan sinabi ni Jehova: “Sige na, lahidan mo na siya, ta siya an pinili ko!”+
13 Kaya kinua ni Samuel an lalagan na sungay na may laog na lana+ asin linahidan niya siya sa atubangan kan saiyang mga tugang. Asin an espiritu ni Jehova nagpuon na maghiro ki David puon kan aldaw na idto.+ Dangan, naghali na si Samuel asin nagpasiring sa Rama.+
14 Binayaan na kan espiritu ni Jehova si Saul.+ Asin itinugot ni Jehova na purisawon si Saul nin maraot na kaisipan.*+
15 An mga lingkod ni Saul nagsarabi sa saiya: “Itinugot nin Diyos na purisawon ka nin maraot na kaisipan.*
16 Tabi, samong kagurangnan, magpahanap ka samo na mga lingkod mo nin sarong lalaking matibay magtugtog nin arpa.+ Pag itinutugot nin Diyos na purisawon ka nin maraot na kaisipan,* papatugtugon niya iyan, asin magigin marahay an pagmati mo.”
17 Kaya sinabi ni Saul sa mga lingkod niya: “Ihanap tabi nindo ako nin sarong lalaking matibay magtugtog, tapos darahon nindo siya sa sako.”
18 Saro sa mga lingkod kan hadi an nagsabi: “Nahiling ko na kun gurano katibay magtugtog an aki ni Jesse na taga Betlehem, asin saro siyang pusuan saka matibay na parapakilaban.+ Mahusay siyang magtaram, saka guwapo,+ asin nasa kaibanan niya si Jehova.”+
19 Kaya nagsugo si Saul nin mga mensahero pasiring ki Jesse tanganing sabihon: “Padigdihon mo sako an aki mong si David, su nagpapastor sa mga karnero.”+
20 Kaya nagkua si Jesse nin sarong asno asin kinargahan niya iyan nin tinapay, nin arak na nasa lalagan na anit, asin nin sarong ugbon na kanding, tapos ipinadara niya an mga iyan sa aki niyang si David tanganing itao ki Saul.
21 Kaya nagduman si David ki Saul asin nagpuon na maglingkod sa saiya.+ Gustuhon siya ni Saul, asin nagin siyang paradara kan pangalasag niya.
22 Nagpadara nin mensahe si Saul ki Jesse: “Magtugot ka tabi na padagos na maglingkod sako si David, ta nawiwilihan ko siya.”
23 Pag itinutugot nin Diyos na purisawon si Saul nin maraot na kaisipan,* kinukua ni David an arpa asin pinapatugtog iyan, asin nagrarahay an pagmati ni Saul, tapos nagiginhawahan siya saka nahahali sa saiya an maraot na kaisipan.*+
Mga Nota
^ Sa literal, “Siguradong nasa atubangan na ni Jehova an linahidan niya.”
^ O “magtaong atensiyon.”
^ Sa literal, “Asin pinurisaw siya nin maraot na espiritung hali ki Jehova.”
^ Sa literal, “Pinurisaw ka nin maraot na espiritung hali sa Diyos.”
^ Sa literal, “Pag pinupurisaw ka nin maraot na espiritung hali sa Diyos.”
^ Sa literal, “Pag pinupurisaw si Saul nin maraot na espiritung hali sa Diyos.”
^ Sa literal, “saka binabayaan siya kan maraot na espiritu.”
