Inot na Samuel 19:1-24
19 Dangan kan huri, sinabi ni Saul sa aki niyang si Jonathan asin sa gabos niyang lingkod na gusto niyang magadan si David.+
2 Pero dahil namumutan na marhay ni Jonathan si David,+ sinabihan niya si David: “Gusto kang ipagadan kan ama kong si Saul. Mag-ingat ka tabi sa aga, magduman ka sa sarong sekretong lugar asin magdanay kang nakatago.
3 Maluwas man kami kan sakong ama asin malakaw-lakaw sa kalangtadan na pagtataguan mo. Kakaulayon ko siya manungod saimo, asin kun may maaraman ako, ipapaisi ko saimo.”+
4 Kaya marahay na mga bagay an pig-istorya ni Jonathan sa saiyang amang si Saul manungod ki David.+ Sinabi niya sa saiya: “Dai dapat gibuhan nin maraot kan hadi an* saiyang lingkod na si David, ta dai man siya nagkasala sa saimo; nakinabang ka pa ngani sa mga ginibo niya.
5 Isinapeligro niya baga an saiyang buhay* tanganing gadanon su Filisteo,+ kun kaya dakulang kapangganahan* an itinao ni Jehova sa bilog na Israel. Nahiling mo mismo iyan; ugmahon ka pa ngani. Kaya taano ta gusto mong ipagadan si David na mayo man nin dahilan? Taano ta magkakasala ka laban sa* sarong inosenteng tawo?”+
6 Dinangog ni Saul si Jonathan, asin suminumpa si Saul: “Isinusumpa ko sa ngaran kan buhay na Diyos na si Jehova, dai gagadanon si David.”
7 Pagkatapos kaini, inapod ni Jonathan si David asin sinabi niya an gabos na napag-ulayan ninda kan saiyang ama. Kaya inibanan ni Jonathan si David ki Saul, asin naglingkod na giraray si David sa hadi arog kan dati.+
8 Pag-abot nin panahon, nagkagiyera giraray. Nakipaglaban si David sa mga Filisteo asin kadakul kan nagadan niya sa sainda, asin nagdurulag sinda parayo sa saiya.
9 Kan nagtutukaw si Saul sa laog kan harong niya, kapot an saiyang garod, asin mantang nagtutugtog nin arpa si David, itinugot ni Jehova na purisawon si Saul nin maraot na kaisipan.*+
10 Pinurbaran ni Saul na itadok si David sa lanob gamit an garod, pero nakailag siya ki Saul, asin sa lanob tuminusok an garod. Nagdulag si David kan bangging idto.
11 Dangan, nagsugo si Saul nin mga mensahero tanganing bantayan an harong ni David asin gadanon siya pagkaaga.+ Pero sinabihan si David kan agom niyang si Mical: “Kun dai ka madulag* ngunyan na banggi, sa aga gadan ka na.”
12 Tulos-tulos na tinabangan ni Mical si David na makababa hali sa bintana tanganing makarayo asin makadulag.
13 Kinua ni Mical an terafim na estatuwa* asin pinahigda iyan sa higdaan. Sa pamayuhan kaiyan, nagbugtak siya nin telang gibo sa barahibo nin kanding, dangan tinamungan iyan nin bado.
14 Nagsugo ngunyan si Saul nin mga mensahero tanganing kuanon si David, pero sinabi ni Mical: “May hilang siya.”
15 Kaya isinugo giraray ni Saul an mga mensahero tanganing hilingon si David asin sinabihan sinda: “Dawa nasa higdaan siya, darahon nindo siya sako tanganing gadanon.”+
16 Kan makalaog an mga mensahero, an nahiling ninda sa higdaan iyo an terafim na estatuwa* na may telang gibo sa barahibo nin kanding sa may pamayuhan kaini.
17 Sinabi ni Saul ki Mical: “Taano ta linoko mo ako? Tapos tinabangan mong makadulag an kalaban ko?”+ Nagsimbag si Mical ki Saul: “Sinabi niya kaya sako, ‘Padulagon mo ako! Ta kun dai gagadanon taka!’”
18 Nagdulag si David asin nagduman ki Samuel sa Rama.+ Inistorya niya ki Samuel an gabos na ginibo sa saiya ni Saul. Dangan naghali sinda ni Samuel asin nagpasiring sa Naiot+ tapos duman sinda nagpirmi.
19 Pag-abot nin panahon, may nagsumbong ki Saul: “Yaon si David sa Naiot sa Rama.”
20 Nagsugo tulos si Saul nin mga mensahero tanganing dakupon si David. Kan mahiling ninda an may edad nang mga propeta na nagpopropesiya asin si Samuel na nakatindog na nanginginot sa mga ini, an espiritu nin Diyos napasa mga mensahero ni Saul asin sinda man nagpuon na gumawi na siring sa mga propeta.
21 Kan ibareta ninda ini ki Saul, nagsugo tulos siya nin iba pang mga mensahero, pero guminawi man sinda na siring sa mga propeta. Kaya nagsugo giraray si Saul nin ikatulong grupo nin mga mensahero, pero guminawi man an mga ini na siring sa mga propeta.
22 Sa katapos-tapusi, nagpasiring man siya sa Rama. Pag-abot niya sa may dakulang kalot na istakan nin tubig sa Secu, naghapot siya: “Hain si Samuel asin David?” Nagsimbag sinda: “Yaon tabi sinda sa Naiot+ sa Rama.”
23 Mantang pasiring si Saul sa Naiot sa Rama, napasaiya man an espiritu nin Diyos, asin naglakaw siyang minagawi na siring sa propeta sagkod na makaabot siya sa Naiot sa Rama.
24 Hinuruba man niya an saiyang mga bado, saka guminawi man siya na siring sa propeta sa atubangan ni Samuel. Asin kan bilog na aldaw asin bilog na bangging idto, naghigda siya duman na haros mayong sulot.* Iyan an dahilan kun taano ta pigsasabi ninda: “Propeta na man si Saul?”+
Mga Nota
^ O “Dai dapat magkasala an hadi sa.”
^ O “Ibinugtak niya sa saiyang kamot an saiyang kalag.”
^ O “pagliligtas.”
^ O “laban sa dugo nin.”
^ Sa literal, “pinurisaw si Saul nin maraot na espiritung hali ki Jehova.”
^ O “Kun dai mo papadulagon an saimong kalag.”
^ O “an diyos kan pamilya; an idolo.”
^ O “an diyos kan pamilya; an idolo.”
^ O “naghigda siya duman na huba.”
