Ikaduwang Cronica 17:1-19
17 Asin si Jehosafat+ na saiyang aki an nagsalida sa saiya bilang hadi, asin pinakusog niya an posisyon niya sa Israel.
2 Nagpuwesto siya nin mga puwersa militar sa gabos na may matibay na depensang siyudad sa Juda. Nagbugtak man siya nin mga garison sa daga nin Juda asin sa mga siyudad kan Efraim na nasakop ni Asa na saiyang ama.+
3 Padagos na nasa kaibanan ni Jehosafat si Jehova huling naglakaw siya sa mga dalan kaidto ni David+ na saiyang apuon asin dai niya hinanap an mga Baal.
4 Huli ta hinanap niya an Diyos kan saiyang ama+ asin sinunod niya an* saiyang pagbuot asin bako an mga gibo-gibo kan Israel.+
5 An kahadian pinagdanay ni Jehova na marigon an pagkaestablisar sa saiyang kamot;+ asin padagos na nagtao nin mga regalo ki Jehosafat an bilog na Juda, asin nagkamit siya nin dakulang kayamanan saka kamurawayan.+
6 Nagin makusog an buot niya sa paglakaw sa mga dalan ni Jehova, asin hinali pa ngani niya sa Juda an mga halangkaw na lugar+ saka an mga sagradong poste.*+
7 Kan ikatulong taon kan saiyang paghadi, ipinaapod niya an saiyang mga opisyal* na si Ben-hail, Obadias, Zacarias, Netanel, asin Micaias tanganing magtukdo sa mga siyudad kan Juda.
8 Kaiba ninda an mga Levita na si Semaias, Netanias, Zebadias, Asahel, Semiramot, Jehonatan, Adonias, Tobia, asin Tob-adonias, asin an mga saserdote na si Elisama saka Jehoram.+
9 Nagtukdo sinda sa Juda dara an libro kan Katugunan ni Jehova,+ asin naglibot sinda sa gabos na siyudad kan Juda asin nagtukdo sa mga tawo.
10 Asin pinangyari ni Jehova na magkatarakot na marhay an gabos na kahadian kan mga nasyon na nakapalibot sa Juda, asin dai sinda nakipaglaban ki Jehosafat.
11 Asin an mga Filisteo nagdadara ki Jehosafat nin mga regalo asin kuwarta bilang tributo.* An mga Arabe nagdadara sa saiya nin 7,700 na lalaking karnero asin 7,700 na lalaking kanding hali sa saindang mga aripumpon.
12 Lalo pang nagin makapangyarihan si Jehosafat,+ asin padagos siyang nagtugdok sa Juda nin mga lugar na may matibay na depensa+ saka mga siyudad para sa mga bodega.+
13 Kadakul siyang isinagibong proyekto sa mga siyudad kan Juda, asin igwa siyang mga suldados, mga matitibay na parapakilaban, sa Jerusalem.
14 Grinupo-grupo sinda sigun sa saindang mga angkan. Hali sa Juda, ini an mga pamayo nin rinibo: si Adnah na pamayo asin kaiba niya an 300,000 na matitibay na parapakilaban.+
15 Nasa pamamahala niya si Jehohanan na pamayo, asin 280,000 an kaiba niya.
16 Asin nasa pamamahala man ni Adnah si Amasias na aki ni Zicri, na nagboluntaryo sa paglilingkod ki Jehova, asin kaiba niya an 200,000 na matitibay na parapakilaban.
17 Hali sa Benjamin,+ si Eliada na sarong matibay na parapakilaban, asin kaiba niya an 200,000 na lalaking armado nin pana saka kalasag.+
18 Asin nasa pamamahala niya si Jehozabad, asin kaiba niya an 180,000 na lalaking armado para sa pakikigiyera.
19 Sinda an mga naglilingkod sa hadi apuwera pa sa mga ilinaag kan hadi sa mga may matibay na depensang siyudad sa bilog na Juda.+
