Ikaduwang Cronica 8:1-18
8 Itinugdok ni Solomon an harong ni Jehova saka an saiyang sadiring harong* sa laog nin 20 taon.+
2 Pagkatapos kaiyan, itinugdok giraray ni Solomon an mga siyudad na itinao ni Hiram+ ki Solomon asin pinaistar duman an mga Israelita.*
3 Sinalakay man ni Solomon an Hamat-zoba asin nasakop niya iyan.
4 Dangan pinasarig* niya an Tadmor na nasa kaawagan asin an gabos na siyudad para sa mga bodega+ na itinugdok niya sa Hamat.+
5 Pinasarig man niya bilang mga siyudad na may matibay na depensa an Itaas na Bet-horon+ saka an Ibabang Bet-horon+ paagi sa paggibo nin mga pader, mga trangkahan, saka mga balagbag na pambarat,
6 asin an Baalat+ siring man an gabos na siyudad ni Solomon para sa saiyang mga bodega, an gabos na siyudad para sa saiyang mga karwahe,+ an mga siyudad para sa saiyang mga parakabayo, asin an gabos na minawot na ipatugdok ni Solomon sa Jerusalem, sa Lebanon, asin sa gabos na lugar na saiyang nasasakupan.
7 Kun manungod sa gabos na tawong nagkatarada sa mga Hiteo, sa mga Amorita, sa mga Perizita, sa mga Hivita, asin sa mga Jebusita,+ na bakong kabtang kan Israel,+
8 idtong mga nagkatarada sa nasyon na dai linaglag kan mga Israelita,+ puwersahan na pinapagtrabaho ni Solomon an saindang mga gikan sagkod sa aldaw na ini.+
9 Alagad mayo nin siisay man na Israelita an ginibong uripon ni Solomon sa saiyang mga patrabaho+ huling sinda an saiyang mga parapakilaban, mga namamayo kan mga ayudante kan saiyang mga opisyal, asin mga namamayo kan saiyang mga suldados na nakasakay sa karwahe saka kan saiyang mga parakabayo.+
10 Igwa nin 250 namamayo sa mga superbisor ni Hading Solomon, na nagseserbing mga porman na namamahala sa mga tawo.+
11 Ibinalyo man ni Solomon an aking babayi ni Faraon+ hali sa Siyudad ni David pasiring sa harong na itinugdok niya para sa saiya,+ huling an sabi niya: “Dawa agom ko siya, dai siya dapat mag-istar sa harong ni Hading David kan Israel, huling banal an mga lugar na kinamugtakan kan Kaban ni Jehova.”+
12 Dangan nagdulot si Solomon ki Jehova nin mga atang na pigtututong+ sa ibabaw kan altar ni Jehova+ na ginibo niya sa atubangan kan portiko.+
13 Ginibo niya an kinakaipuhan na gibuhon sa kada aldaw asin nagdulot siya nin mga atang sigun sa tugon ni Moises para sa mga Sabbath,+ sa mga bagong bulan,+ asin sa inestablisar na mga kapiyestahan tulong beses kada taon+—an Kapiyestahan nin Tinapay na Daing Lebadura,+ an Kapiyestahan nin mga Semana,+ asin an Kapiyestahan nin mga Payag-payag.*+
14 Dugang pa, sigun sa reglamento kan saiyang amang si David, inareglar niya an mga dibisyon kan mga saserdote+ para sa saindang paglilingkod, asin an mga Levita para sa mga puwestong iinasignar sa sainda, tanganing mag-umaw+ saka maglingkod sa atubangan kan mga saserdote sigun sa kinakaipuhan na gibuhon sa kada aldaw, asin an mga dibisyon kan mga bantay sa trangkahan para sa mga grupo ninda na mapuwesto sa manlain-lain na trangkahan.+ Iyan kaya an tugon ni David, an lalaking lingkod kan tunay na Diyos.
15 Asin dai ninda sinuway an tugon kan hadi sa mga saserdote asin sa mga Levita may koneksiyon sa ano man na bagay o may koneksiyon sa mga bodega.
16 Kaya organisadong marhay* an gabos na patrabaho ni Solomon, puon kan ilatag an pundasyon kan harong ni Jehova+ sagkod na mahaman iyan. Kaya natapos an harong ni Jehova.+
17 Kan panahon na iyan nagpasiring si Solomon sa Ezion-geber+ asin sa Elot+ sa may baybayon kan dagat sa daga nin Edom.+
18 Pinadarahan siya ni Hiram+ nin mga barko saka eksperyensiyadong mga marinero sa panginginot kan sadiri kaining mga lingkod. Nag-iba sinda sa mga lingkod ni Solomon pasiring sa Ofir+ asin nagkua duman nin 450 talentong* bulawan+ dangan dinara iyan ki Hading Solomon.+
Mga Nota
^ O “palasyo.”
^ Sa literal, “mga aking lalaki ni Israel.”
^ O “itinugdok giraray.”
^ O “Temporaryong Istaran.”
^ O “aregladong marhay; kumpleto.”
^ An sarong talento katumbas nin 34.2 kilos. Hilingon an Apendise B14.
