Bilang 24:1-25
24 Kan mahiling ni Balaam na nauyunan* ni Jehova an pagbendisyon sa Israel, dai na siya naghali giraray para maghanap nin maraot na mga senyales,+ imbes uminatubang siya sa kaawagan.
2 Kan mahiling ni Balaam an Israel na nakakampo nin tribo-tribo,+ uminabot sa saiya an espiritu nin Diyos.+
3 Dangan sinabi niya an matalinhagang mga tataramon na ini:+
“An mga tataramon ni Balaam na aki ni Beor,Asin an mga tataramon kan tawo na nabuksan an mga mata,
4 An mga tataramon kan saro na nakadangog kan tataramon nin Diyos,Na nakahiling nin bisyon hali sa Makakamhan sa Gabos,Asin suminubsob sa daga na muklat an mga mata:+
5 Abaang gayon kan saimong mga tolda, O Jacob,Kan saimong mga tabernakulo, O Israel!+
6 Siring sa mga kababan* na harayo an naaabot,+Siring sa mga hardin na nasa gilid kan salog,Siring sa mga aloe* na itinanom ni Jehova,Siring sa mga sedro na nasa gilid kan katubigan.
7 An tubig padagos na nagtuturo hali sa duwa niyang anit na lalagan,Asin an saiyang banhi isinabwag* sa gilid kan dakul na katubigan.+
An saiya man na hadi+ magigin mas makapangyarihan kisa ki Agag,+Asin ilalangkaw an saiyang kahadian.+
8 An Diyos an nagluwas sa saiya sa Ehipto;Para sa saiya, Siya siring sa mga sungay nin sarong layas na toro.
Lalaglagon niya an mga nasyon, an mga nang-aapi sa saiya,+Asin ngangatngaton niya an mga tulang ninda, asin paagi sa saiyang mga pana paparasaon niya sinda.
9 Minalukob siya asin minaluko na siring sa leon,Asin kapareho nin leon, siisay an mangangahas na siya paangguton?
An mga nagbebendisyon sa saimo tatawan nin bendisyon,Asin idtong mga nagsusumpa sa saimo susumpaon.”+
10 Dangan naanggot na marhay si Balak ki Balaam. May pang-iinsultong nagpalakpak si Balak, tapos sinabi niya ki Balaam: “Ipinaapod taka para sumpaon an mga kaiwal ko,+ pero mayo kang ginibo kundi bendisyunan sinda nin tulong beses.
11 Magpuli ka na. Gusto ko kutang tawan ka nin dakulang onra,+ pero uya! pinugulan ni Jehova an pag-ako mo nin onra.”
12 Nagsimbag si Balaam ki Balak: “Bakong sinabi ko sa mga mensaherong isinugo mo,
13 ‘Dawa pa itao sako ni Balak an saiyang harong na pano nin plata asin bulawan, dai ko magigibo an ano man na bagay, marahay man o maraot, kun sadiri ko sanang kabutan iyan* asin dai man ipinagbuot ni Jehova. An sasabihon ko sana iyo an mga sasabihon sako ni Jehova’?+
14 Mapuli na ako ngunyan sa sakuyang banwaan. Madya digdi asin ihahayag ko sa saimo kun ano an gigibuhon kan banwaan na ini sa saimong banwaan sa maabot na panahon.”*
15 Kaya sinabi niya an matalinhagang mga tataramon na ini:+
“An mga tataramon ni Balaam na aki ni Beor,Asin an mga tataramon kan tawo na nabuksan an mga mata,+
16 An mga tataramon kan saro na nakadangog kan tataramon nin Diyos,Asin an saro na igwa kan kaaraman kan Kahuruhalangkawi,Sarong bisyon hali sa Makakamhan sa Gabos an nahiling niyaMantang nakasubsob sa daga na muklat an mga mata:
17 Mahihiling ko siya, pero bako ngunyan;Pagmamasdan ko siya, pero sa maabot pa.
Sarong bituon+ an maluwas ki Jacob,Asin sarong setro+ an matindog hali ki Israel.+
Asin papasaon niya nanggad an angog* ni Moab+Pati an bungo kan gabos na maringis na parapakilaban.
18 Asin an Edom magigin saiyang pagsadiri,+Iyo, an Seir+ magigin pagsadiri kan mga kaiwal kaini,+Mantang an Israel nagpapahiling kan kusog nin buot kaini.
19 Hali ki Jacob may saro na maluwas na mandadaog,+Asin gagadanon niya an siisay man na makakaligtas sa siyudad.”
20 Kan mahiling niya si Amalek, ipinadagos niya an saiyang matalinhagang mga tataramon:
“Si Amalek an inot sa mga nasyon,+Alagad sa huri malalaglag siya.”+
21 Kan mahiling niya an mga Kenita,+ ipinadagos niya an saiyang matalinhagang mga tataramon:
“Masarig an saimong irukan, asin yaon sa ibabaw nin dakulang gapo an saimong istaran.
22 Pero igwa nin saro na biyong masulo ki Kain.
Gurano pa daw kahaloy bago ka bihagon kan Asiria?”
23 Asin ipinadagos niya an saiyang matalinhagang mga tataramon:
“Hirak man! Siisay an makakaligtas pag ginibo ini nin Diyos?
24 Maarabot an mga barko hali sa baybayon nin Kitim,+Asin papasakitan ninda an Asiria,+Asin papasakitan ninda an Eber.
Alagad biyo man siyang mapapara.”
25 Dangan huminali si Balaam+ asin puminuli na sa saiyang lugar. Tapos naghali na man si Balak.
Mga Nota
^ Sa literal, “na marahay sa mga mata.”
^ O “mga sulugan na kababan.”
^ Apod ini sa sarong kahoy na may mahamot na substansiya na ginagamit bilang pahamot kaidtong panahon kan Bibliya.
^ O “an saiyang mga gikan maistar.”
^ Sa literal, “hali iyan sa puso ko.”
^ O “sa katapusan kan mga aldaw.”
^ O “an sentido kan payo.”
