Bilang 30:1-16
30 Dangan kinaulay ni Moises an mga pamayo+ kan mga tribo kan Israel, na sinasabi: “Ini an ipinagbuot ni Jehova:
2 Kun an sarong lalaki maggibo nin promesa+ ki Jehova o magsumpa+ na uutubon niya an sarong panuga,* sarong promesa na dai gigibuhon an sarong bagay, dai niya dapat pagbalgahon an saiyang sinabi.+ Dapat niyang gibuhon an gabos na bagay na iprinomesa niyang gigibuhon.+
3 “Asin kun an sarong babayi maggibo nin promesa ki Jehova o magpromesa na dai niya gigibuhon an sarong bagay mantang siya hoben pa saka nakaistar pa sa harong kan saiyang ama
4 tapos maaraman kan saiyang ama an saiyang promesa o an saiyang promesang dai gigibuhon an sarong bagay asin dai diyan magkontra an saiyang ama, magigin balido an gabos niyang promesa pati an lambang promesa niyang dai gigibuhon an sarong bagay.
5 Pero kun dai nagtugot an saiyang ama kan maaraman kaini an saiyang mga promesa, dai iyan magigin balido. Papatawadon siya ni Jehova huling dai iyan itinugot kan saiyang ama.+
6 “Alagad, kun magpaagom siya mantang siya may promesa o mantang nakagibo na siya nin pabigla-biglang panuga
7 tapos maaraman iyan kan agom niya asin dai ini magkontra kan aldaw na maaraman niya iyan, magigin balido an saiyang mga promesa o an mga promesa niyang dai gigibuhon an sarong bagay.
8 Alagad kun dai magtugot an saiyang agom sa aldaw na maaraman niya iyan, puwede niyang kanselaron an promesa o an pabigla-biglang panuga na ginibo kan agom na babayi,+ asin papatawadon ini ni Jehova.
9 “Pero kun sarong babaying balo o sarong babaying idiniborsiyo an maggibo nin promesa, obligado siyang utubon an gabos na iprinomesa niya.
10 “Alagad, kun an sarong babayi maggibo nin promesa o nin promesang dai gigibuhon an sarong bagay mantang yaon na siya sa harong kan saiyang agom
11 tapos naaraman iyan kan saiyang agom asin dai ini nagkontra, magigin balido an gabos niyang promesa o an ano man na iprinomesa niyang dai gigibuhon.
12 Pero kun sa aldaw na naaraman iyan kan saiyang agom kinanselar kaini an ano man na sinumpaan niyang promesa o an ano man na iprinomesa niyang dai gigibuhon, dai magigin balido an mga iyan.+ Kinanselar iyan kan saiyang agom, asin papatawadon ni Jehova an agom na babayi.
13 May koneksiyon sa ano man na promesa o ano man na pagsumpa dapit sa promesa na dai gigibuhon an sarong bagay bilang pagpainda sa sadiri,* an agom na lalaki an madesisyon kun baga tutugutan niya an saiyang agom na utubon iyan o dai.
14 Alagad kun sa paglihis nin mga aldaw dai magkontra an agom na lalaki, ipinapahiling kaiyan na tinutugutan niya an saiyang agom na utubon an gabos kaining promesa o an gabos na iprinomesa kaining dai gigibuhon. Huling dai siya nagkontra kan aldaw na maaraman niya an promesa kaini, ipinapahiling kaiyan na tinutugutan niya ining gibuhon iyan.
15 Pero kun kanselaron niya iyan paghaloy-haloy, pagkalihis kan aldaw na maaraman niya iyan, siya an maninimbag sa kasalan kan agom niyang babayi.+
16 “Iyan an mga regulasyon na ipinagbuot ni Jehova paagi ki Moises may koneksiyon sa agom na lalaki asin sa agom kaini, asin may koneksiyon sa ama asin sa saiyang hoben na aking babayi na nakaistar sa saiyang harong.”
Mga Nota
^ O “magsumpa na tatawan niya nin obligasyon an saiyang kalag.”
^ O “dapit sa promesa na pasakitan an kalag.”
