Bilang 31:1-54
31 Dangan sinabi ni Jehova ki Moises:
2 “Ibalos mo+ an mga Israelita sa mga Midianita.+ Pagkatapos, magagadan ka na asin ilulubong arog kan saimong mga apuon.”*+
3 Kaya kinaulay ni Moises an banwaan, na sinasabi: “Iandam nindo an mga lalaki sa saindo para sa pakikipaglaban* tumang sa mga Midianita asin para isagibo an pagbalos ni Jehova sa mga Midianita.
4 Hali sa gabos na tribo kan Israel, magpadara kamo nin 1,000 hali sa kada tribo para sa hukbo.”
5 Kaya hali sa rinibong Israelita,+ 1,000 an pinili sa kada tribo, bali 12,000 an inandam para sa pakikipaglaban.*
6 Dangan ipinadara sinda ni Moises para sa hukbo, 1,000 hali sa kada tribo, kaiba si Finehas+ na aki ni Eleazar na saserdote. Dara niya an banal na mga kagamitan asin an mga trumpetang ginagamit sa pagtaong senyal+ sa pakikipaglaban.
7 Nakigiyera sinda sa mga Midianita, arog kan ipinagbuot ni Jehova ki Moises, asin ginadan ninda an lambang lalaki.
8 Kaiba sa mga ginadan iyo an mga hadi kan Midian na si Evi, Rekem, Zur, Hur, asin Reba, an limang hadi kan Midian. Ginadan man ninda si Balaam+ na aki ni Beor paagi sa espada.
9 Alagad dinarang bihag kan mga Israelita an mga babayi asin an mga aki kan Midian. Sinamsam man ninda an gabos nindang ataman na hayop saka an gabos nindang pagsadiri.
10 Asin sinurulo ninda an gabos na siyudad na inistaran kan mga Midianita saka an gabos nindang kampo.*
11 Dinara ninda an gabos na nasamsam ninda, an mga tawo saka an mga hayop.
12 Dangan, dinara ninda ki Moises asin ki Eleazar na saserdote asin sa katiripunan kan mga Israelita an mga bihag saka an mga nasamsam ninda. Dinara ninda iyan duman sa kampo na nasa disyertong kapatagan kan Moab+ harani sa Jordan, sa kahampang kan Jerico.
13 Luminuwas si Moises asin si Eleazar na saserdote saka an gabos na pamayo kan katiripunan tanganing sabaton sinda sa luwas kan kampo.
14 Pero naanggot si Moises sa mga piniling pamayo kan hukbo, an mga namamayo sa manangribo asin an mga namamayo sa mananggatos na nag-abot hali sa pakikipaglaban.
15 Sinabi ni Moises sa sainda: “Pinabayaan nindong mabuhay an gabos na babayi?
16 Sinda baga su mga nagsunod sa sutsut ni Balaam asin nagin dahilan kun ta’no ta dai nagin maimbod+ ki Jehova an mga Israelita duman sa Peor,+ kaya uminabot an damat sa katiripunan ni Jehova.+
17 Gadanon nindo ngunyan an lambang aking lalaki asin gadanon nindo an lambang babayi na nakidurog na sa lalaki.
18 Pero dai nindo paggadanon an gabos na hoben na babayi na dai pa nakikidurog sa lalaki.+
19 Asin magkampo kamo sa luwas kan kampo nin pitong aldaw. An lambang saro sa saindo na nakagadan asin an lambang saro sa saindo na nagduta* sa ginadan+ dapat na dalisayon an saiyang sadiri+ sa ikatulo saka sa ikapitong aldaw, kamo asin an saindong mga bihag.
20 Dapat nindong dalisayon sa pagkakasala an gabos na bado, an gabos na bagay na gibo sa anit, an gabos na gibo sa barahibo nin kanding, saka an gabos na bagay na gibo sa kahoy.”
21 Dangan sinabi ni Eleazar na saserdote sa mga lalaki na nakipaglaban: “Ini an katugunan na ipinagbuot ni Jehova ki Moises,
22 ‘An mga bulawan sana, saka mga plata, tanso, lansang,* lata, asin timga—
23 idtong gabos na puwedeng paagihon sa kalayo—an dapat nindong paagihon sa kalayo, asin magigin malinig iyan. Pagkatapos, dapat man nindong dalisayon an mga iyan gamit an tubig na panglinig.+ Pero an gabos na dai puwedeng paagihon sa kalayo, huhugasan nindo kan tubig.
24 Dapat nindong labahan an saindong mga bado sa ikapitong aldaw asin dapat kamong magin malinig. Pagkatapos kaiyan, puwede na kamong maglaog sa kampo.’”+
25 Dangan sinabi ni Jehova ki Moises:
26 “Imbentaryuhon mo an mga nasamsam. Bilangon mo an mga bihag—an mga tawo saka an mga hayop; gibuhon mo iyan kaiba si Eleazar na saserdote asin an mga pamayo kan mga angkan kan katiripunan.
27 Bangaon mo sa duwa an mga nasamsam, an sarong kabanga para sa mga kabilang sa hukbo na nakipaglaban asin an saro pang kabanga para sa gabos na iba pa sa katiripunan.+
28 Bilang buhis para ki Jehova, hali sa kahirasan kan mga suldados na nakipaglaban, magkua ka nin sarong kalag* sa kada 500 na tawo, baka, asno, asin karnero.
29 Kuanon mo iyan sa inako nindang kabanga asin itao mo iyan ki Eleazar na saserdote bilang kontribusyon para ki Jehova.+
30 Hali sa kabanga na itinao sa mga Israelita, magkua ka nin saro sa kada 50 tawo, baka, asno, karnero, asin saro man sa kada 50 sa gabos na klase nin mga ataman na hayop, asin itao mo an mga iyan sa mga Levita,+ na iyo an nag-aasikaso sa mga paninimbagan may koneksiyon sa tabernakulo ni Jehova.”+
31 Kaya ginibo ni Moises saka ni Eleazar na saserdote an ipinagbuot ni Jehova ki Moises.
32 Ini an mga natada sa mga samsam na dara kan mga nakipaglaban: 675,000 na karnero,
33 72,000 na baka,
34 asin 61,000 na asno.
35 An mga babayi* na dai pa nakikidurog sa lalaki+ may bilang na 32,000.
36 An kabanga kan mga karnero na kahirasan kan mga kaiba sa mga nakipaglaban may bilang na 337,500.
37 An buhis para ki Jehova hali sa mga karnero may bilang na 675.
38 An mga baka may bilang na 36,000, asin 72 diyan an buhis para ki Jehova.
39 Asin an mga asno may bilang na 30,500, asin 61 diyan an buhis para ki Jehova.
40 Asin an mga tawo* may bilang na 16,000, asin 32 diyan an buhis para ki Jehova.
41 Dangan itinao ni Moises ki Eleazar na saserdote an buhis bilang kontribusyon para ki Jehova,+ arog kan ipinagbuot ni Jehova ki Moises.
42 Ini an kabanga na para sa mga Israelita, na kahirasan ninda kan an samsam bangaon ni Moises para sa sainda asin para sa mga kaiba sa mga nakigiyera,
43 an kabanga kan mga karnero, 337,500,
44 kan mga baka, 36,000,
45 kan mga asno, 30,500,
46 asin an kabanga kan mga tawo,* 16,000.
47 Dangan hali sa kabanga na inako kan mga Israelita, nagkua si Moises nin saro sa kada 50 tawo asin hayop, asin itinao niya an mga iyan sa mga Levita,+ na iyo an nag-aasikaso kan mga paninimbagan sa tabernakulo ni Jehova,+ arog kan ipinagbuot ni Jehova ki Moises.
48 Dangan nagdulok ki Moises an mga piniling pamayo sa rinibo kan hukbo,+ an mga namamayo sa manangribo asin an mga namamayo sa mananggatos,
49 asin nagsabi sinda ki Moises: “Binilang kan mga lingkod mo an mga suldados na nasa irarom kan samong pamamahala, asin mayo ni saro an ibinaretang nawawara.+
50 Kaya itatao kan kada saro sa samo bilang dulot ki Jehova an ano man na nakua niya, mga gamit na bulawan, mga kadenilya sa bitis,* mga pulseras, mga singsing na pantatak, mga hikaw, asin iba pang alahas, tanganing mabayadan an mga kasalan mi* sa atubangan ni Jehova.”
51 Kaya inako ni Moises saka ni Eleazar na saserdote an mga bulawan hali sa sainda, an gabos na alahas.
52 An gabos na bulawan na itinao ninda para ki Jehova uminabot nin 16,750 siklo,* hali sa mga namamayo sa manangribo asin sa mga namamayo sa mananggatos.
53 An kada saro sa mga suldados nagkua kan saiyang kahirasan sa samsam.
54 Inako ni Moises saka ni Eleazar na saserdote an mga bulawan hali sa mga namamayo sa manangribo asin sa mga namamayo sa mananggatos asin dinara iyan sa laog kan tolda nin pakipagtagbuan tanganing magserbing pagirumdom para sa banwaan kan Israel sa atubangan ni Jehova.
Mga Nota
^ Sa literal, “iiiba ka na sa saimong banwaan.” Saro ining poetikong ekspresyon para sa kagadanan.
^ O “para sa hukbo.”
^ O “para sa hukbo.”
^ O “napapaderan na kampo.”
^ O “nagduot.”
^ O “batbat.”
^ O “kalag.”
^ O “mga tawong kalag.”
^ O “mga tawong kalag.”
^ Sadit na kadena na ginagamit para pagtakudon an mga pulseras sa mag-ibong na bitis.
^ O “kan samong mga kalag.”
^ An sarong siklo katumbas nin 11.4 gramos. Hilingon an Apendise B14.
