Bilang 32:1-42
-
Mga iistaran sa sirangan kan Jordan (1-42)
32 Igwa nin dakulon na ataman na hayop an mga aki ni Ruben+ asin an mga aki ni Gad,+ asin nahiling ninda na an daga nin Jazer+ saka nin Gilead magayon na lugar para sa saindang mga ataman na hayop.
2 Kaya an mga aki ni Gad asin an mga aki ni Ruben nagdulok ki Moises, ki Eleazar na saserdote, asin sa mga pamayo kan katiripunan asin nagsabi:
3 “An Atarot, Dibon, Jazer, Nimra, Hesbon,+ Eleale, Sebam, Nebo,+ asin Beon,+
4 an daga na sinakop ni Jehova para sa katiripunan kan Israel,+ sarong magayon na daga para sa mga ataman na hayop, asin dakulon an mga ataman na hayop kan saimong mga lingkod.”+
5 Nagsabi pa sinda: “Kun nauuyunan mo kami, itao mo an dagang ini sa saimong mga lingkod tanganing magin pagsadiri mi. Dai mo kami pagpabalyuhon sa Jordan.”
6 Dangan sinabi ni Moises sa mga aki ni Gad asin sa mga aki ni Ruben: “Papabayaan nindong makigiyera an saindong mga tugang tapos kamo mapawalat digdi?
7 Ano ta papadisganaron nindo an banwaan nin Israel sa pagbalyo pasiring sa daga na siguradong itatao sainda ni Jehova?
8 Iyan an ginibo kan saindong mga ama kan isugo ko sinda hali sa Kades-barnea para hilingon an kadagaan.+
9 Kan magpasiring sinda sa Kababan* nin Escol+ asin mahiling an kadagaan, pinadisganar ninda an banwaan nin Israel sa pagpasiring sa daga na itatao sainda ni Jehova.+
10 Naanggot na marhay si Jehova kan aldaw na idto kaya isinumpa niya:+
11 ‘An mga luminuwas sa Ehipto na 20 anyos pataas, dai ninda mahihiling an daga+ na isinumpa kong itatao ki Abraham, ki Isaac, asin ki Jacob,+ huling dai ninda ako sinunod nin bilog na puso—
12 apuwera ki Caleb+ na aki ni Jefunne na Kenizita asin ki Josue+ na aki ni Nun, huling nagsunod sinda ki Jehova nin bilog na puso.’+
13 Kaya naanggot na marhay si Jehova sa Israel asin 40 taon niya sindang pinalagaw-lagaw sa kaawagan,+ sagkod na maubos an bilog na henerasyon na naggibo nin maraot sa atubangan ni Jehova.+
14 Ngunyan, an ginigibo nindo kapareho kan ginibo kan saindong mga ama, kamo na mga makasalan; pinapagrabe nindo an kaanggutan ni Jehova sa Israel.
15 Kun mapundo kamo sa pagsunod sa saiya, siguradong papabayaan niya giraray sinda sa kaawagan, asin kamo an magigin dahilan kan pagkalaglag kan bilog na banwaan na ini.”
16 Paghaloy-haloy, nagdulok sinda sa saiya asin nagsabi: “Tugutan mo kaming magtugdok digdi nin mga turil na gibo sa gapo para sa samong mga ataman na hayop asin nin mga siyudad para sa mga aki mi.
17 Pero magigin handa pa man giraray kami sa pakikipaglaban+ asin kami an mapuwesto sa inutan kan mga Israelita, sagkod na madara mi sinda sa saindang lugar, mantang an mga aki mi nakaistar sa mga siyudad na may matibay na depensa, na ligtas sa mga nakaistar sa kadagaan.
18 Dai kami mabalik sa samuyang mga harong sagkod na dai pa naaako kan lambang Israelita an saiyang daga bilang mana.+
19 Dai na kami maako nin mana kaiba ninda sa ibong kan Jordan, huling inako mi na an samuyang mana sa sirangan na parte kan Jordan.”+
20 Nagsimbag sa sainda si Moises: “Kun makikigiyera kamo sa atubangan ni Jehova,+
21 asin kun an kada saro sa saindo mag-iba sa pakikipaglaban asin magbalyo sa Jordan sa atubangan ni Jehova mantang pinapalayas niya sa atubangan niya an saiyang mga kaiwal+
22 sagkod sa masakop an kadagaan sa atubangan ni Jehova,+ kun siring, pagkatapos kaiyan puwede na kamong magpuli+ asin dai kamo magkakasala sa atubangan ni Jehova asin kan Israel. Asin magigin sadiri nindo an dagang ini sa atubangan ni Jehova.+
23 Alagad kun dai nindo gigibuhon iyan, magkakasala kamo ki Jehova. Kun iyan an mangyari, aram nindong maninimbag kamo sa saindong kasalan.
24 Kaya sige, puwede kamong magtugdok nin mga siyudad para sa saindong mga aki asin nin mga turil para sa saindong mga aripumpon,+ pero dapat nindong gibuhon an ipinanuga nindo.”
25 Ini an sinabi ki Moises kan mga aki ni Gad asin kan mga aki ni Ruben: “Gigibuhon kan mga lingkod mo an ipinagbubuot kan kagurangnan ko.
26 An samong mga aki, an samong mga agom, asin an gabos ming ataman na hayop mawawalat sa mga siyudad kan Gilead,+
27 pero mabalyo an mga lingkod mo asin an gabos magigin armado para sa pakikipaglaban tanganing makigiyera sa atubangan ni Jehova,+ arog kan sinasabi kan kagurangnan ko.”
28 Kaya may koneksiyon sa sainda, may ipinagbuot si Moises ki Eleazar na saserdote, ki Josue na aki ni Nun, asin sa mga pamayo kan mga angkan kan mga tribo nin Israel.
29 Sinabi sa sainda ni Moises: “Kun an mga aki ni Gad saka an mga aki ni Ruben magbalyo sa Jordan kaiba nindo asin an gabos magigin armado para makigiyera sa atubangan ni Jehova asin an kadagaan masakop na sa atubangan nindo, itao nindo sa sainda an daga nin Gilead tanganing magin pagsadiri ninda.+
30 Alagad kun dai sinda makigiyera asin dai sinda magbalyo kaiba nindo, maistar sinda sa daga nin Canaan kaiba nindo.”
31 Nagsimbag an mga aki ni Gad asin an mga aki ni Ruben: “Gigibuhon mi an sinabi ni Jehova sa mga lingkod mo.
32 Makikigiyera kami asin mabalyo pasiring sa daga nin Canaan sa atubangan ni Jehova,+ pero an pagsadiri na mamanahon mi iyo an nasa kamping ini kan Jordan.”
33 Kaya itinao ni Moises sa sainda—sa mga aki ni Gad, sa mga aki ni Ruben,+ asin sa kabanga kan tribo ni Manases+ na aki ni Jose—an kahadian ni Sihon+ na hadi kan mga Amorita asin an kahadian ni Og+ na hadi kan Basan, an daga na sakop kan mga siyudad na nasa mga teritoryong iyan, pati an mga siyudad sa nakapalibot na lugar.
34 Asin itinugdok* kan mga aki ni Gad an Dibon,+ Atarot,+ Aroer,+
35 Atrot-sofan, Jazer,+ Jogbeha,+
36 Bet-nimra,+ asin Bet-haran,+ mga siyudad na may matibay na depensa, asin naggibo sinda nin mga turil na gibo sa gapo para sa mga aripumpon.
37 Asin itinugdok kan mga aki ni Ruben an Hesbon,+ Eleale,+ Kiriataim,+
38 Nebo,+ asin Baal-meon+—binago an mga pangaran kan mga iyan—asin Sibma; asin rinibayan ninda an mga pangaran kan mga siyudad na itinugdok ninda liwat.
39 Sinalakay kan mga aki ni Makir+ na aki ni Manases an Gilead, asin sinakop ninda iyan tapos pinalayas an mga Amorita na yaon diyan.
40 Kaya itinao ni Moises an Gilead* ki Makir na aki ni Manases, asin nag-istar siya diyan.+
41 Nagsalakay man si Jair na aki ni Manases, asin sinakop niya an mga nakatoldang baryo sa Gilead, tapos inapod niya an mga iyan na Havot-jair.*+
42 Asin sinalakay saka sinakop ni Noba an Kenat pati an nakapalibot na mga banwa diyan,* asin inapod niya iyan na Noba susog sa sadiri niyang pangaran.
Mga Nota
^ O “Sulugan na Kababan.”
^ O “itinugdok liwat.”
^ O “an sarong porsiyon kan rehiyon nin Gilead.”
^ Nangangahulugan na “Mga Nakatoldang Baryo ni Jair.”
^ O “an mga banwa na nakadepende diyan.”
