Exodo 38:1-31
38 Naggibo siya nin altar para sa dulot na pigtututong na gibo sa kahoy na akasya. Kuwadrado iyan, na limang maniko* an laba, limang maniko an lakbang, asin tulong maniko an langkaw.+
2 Dangan ginibuhan niya nin mga sungay an ibabaw kan apat na kanto kaiyan; an mga sungay saka an mismong altar gibo sa saro sanang pidasong kahoy asin dai ginibo nin magkasuway. Tapos kinalupkupan niya iyan nin tanso.+
3 Pagkatapos, ginibo niya an gabos na kagamitan sa altar, an mga balde, mga pala, mga mangko, mga tinidor, asin an mga bugtakan nin baga. Tanso an ginamit niya sa paggibo kan gabos na kagamitan para diyan.
4 Naggibo man siya nin parilya para sa altar na gibo sa sinalasalang tanso, asin itinakod niya iyan sa may ibaba kan paranggilid, paibaba sagkod sa may kabangaan kan altar.
5 Naghurma siya nin apat na surusingsing asin itinakod niya iyan sa apat na kanto harani sa parilyang tanso, na magigin surukan kan mga ulayán.
6 Pagkatapos naggibo siya nin mga ulayán na gibo sa kahoy na akasya asin kinalupkupan niya iyan nin tanso.
7 Isinurok niya an mga ulayán sa mga surusingsing na nasa mga gilid kan altar para sa pagdara kaiyan. Ginibo niyang pormang kahon an altar, asin naggamit siya nin mga tabla sa paggibo kaiyan.
8 Dangan naggibo siya nin tansong planggana+ asin nin tansong patungan kaiyan; ginamit niya an mga salming* kan mga babaying inorganisar na maglingkod sa may entrada kan tolda nin pakipagtagbuan.
9 Tapos ginibo niya an patyo.+ Para sa parteng timog kan patyo, naglaag siya nin mga kurtina na gibo sa marahay na klaseng linubid na torsidong lino na 100 na maniko an laba.+
10 Igwa diyan nin 20 poste saka 20 patungtungan na may sulbungan na gibo sa tanso, asin an mga sabitan sa mga poste saka an mga pansugpon* kaiyan gibo sa plata.
11 Igwa man nin mga kurtina sa parteng norte na 100 na maniko an laba. An 20 poste kan mga iyan saka an 20 patungtungan kan mga iyan na may sulbungan gibo sa tanso. An mga sabitan sa mga poste saka an mga pansugpon* kaiyan gibo sa plata.
12 Pero sa parteng sulnupan, 50 maniko an laba kan mga kurtina. Igwa diyan nin sampulong poste asin sampulong patungtungan na may sulbungan, asin an mga sabitan sa mga poste asin an mga pansugpon* kaiyan gibo sa plata.
13 An lakbang kan parteng sirangan* 50 maniko.
14 Igwa nin mga kurtina sa sarong kampi kaiyan na 15 maniko an laba, asin igwa diyan nin tulong poste asin tulong patungtungan na may sulbungan.
15 Asin sa ibong na kampi kan entrada kan patyo, igwa nin mga kurtina na 15 maniko an laba, asin igwa man diyan nin tulong poste asin tulong patungtungan na may sulbungan.
16 An gabos na kurtina na nakapalibot sa patyo gibo sa marahay na klaseng linubid na torsidong lino.
17 An mga patungtungan na may sulbungan para sa mga poste gibo sa tanso, an mga sabitan sa mga poste asin an mga pansugpon* kaiyan gibo sa plata, an mga itaas na parte kinalupkupan nin plata, asin igwa diyan nin mga platang pandugtong para sa gabos na poste kan patyo.+
18 An lipod* sa entrada kan patyo hinabol gamit an asul na torsido, torsidong lana na kulor purpura, mapulahon na torsido, asin marahay na klaseng linubid na torsidong lino. An laba kaiyan 20 maniko asin an langkaw 5 maniko, kapareho kan langkaw kan mga kurtina kan patyo.+
19 An apat na poste kaiyan asin an apat na patungtungan na may sulbungan para sa mga posteng iyan gibo sa tanso. An mga sabitan saka an mga pansugpon* kaiyan gibo sa plata, asin an mga itaas na parte kaiyan kinalupkupan nin plata.
20 An gabos na taldok na pantolda para sa tabernakulo saka para sa palibot kan patyo gibo sa tanso.+
21 An minasunod iyo an imbentaryo kan mga materyales na ginamit sa pagtugdok kan tabernakulo, an tabernakulo kan Patotoo.+ An pag-imbentaryo ipinagbuot ni Moises asin paninimbagan kan mga Levita+ sa panginginot ni Itamar+ na aki ni Aaron na saserdote.
22 Ginibo ni Bezalel+ na aki ni Uri na aki ni Hur na gikan sa tribo ni Juda an gabos na ipinagbuot ni Jehova ki Moises.
23 Kaibanan niya si Oholiab+ na aki ni Ahisamac na gikan sa tribo ni Dan, sarong ekspertong trabahador saka paraburda asin parahabol nin asul na torsido, torsidong lana na kulor purpura, mapulahon na torsido, asin marahay na klaseng torsidong lino.
24 An gabos na bulawan na ginamit para sa gabos na gibuhon sa banal na lugar uminabot nin 29 talento* asin 730 siklo* na uyon sa siklo kan banal na lugar,* na iyo man an timbang kan mga bulawan na itinao bilang dulot na pigtuturutabyon.+
25 Asin an plata na itinao kan mga pigrehistro sa katiripunan 100 na talento asin 1,775 siklo na uyon sa siklo kan banal na lugar.*
26 An gabos na nakarehistro na 20 anyos pataas nagdara nin tigkarabangang siklo na uyon sa siklo kan banal na lugar,*+ asin an bilang ninda uminabot nin 603,550.+
27 An ginamit sa paghurma kan mga patungtungan na may sulbungan para sa banal na lugar asin kan mga patungtungan na may sulbungan para sa kurtina* uminabot nin 100 na talento; 100 na talento an ginamit para sa 100 na patungtungan na may sulbungan, sarong talento para sa kada patungtungan na may sulbungan.+
28 Ginamit niya an 1,775 siklo sa paggibo kan mga sabitan sa mga poste saka sa pagkalupkop kan mga itaas na parte kaiyan, asin pinagdugtong niya an mga iyan.
29 An tanso sa dulot* uminabot nin 70 talento asin 2,400 na siklo.
30 Ginamit niya iyan sa paggibo kan mga patungtungan na may sulbungan sa entrada kan tolda nin pakipagtagbuan, kan altar na tanso asin kan parilyang tanso kaiyan, kan gabos na kagamitan sa altar,
31 kan mga patungtungan na may sulbungan sa palibot kan patyo, kan mga patungtungan na may sulbungan sa entrada kan patyo, asin kan gabos na taldok na pantolda para sa tabernakulo saka kan gabos na taldok na pantolda+ para sa palibot kan patyo.
Mga Nota
^ An sarong maniko katumbas nin 44.5 sentimetros (17.5 pulgada). Hilingon an Apendise B14.
^ An buot sabihon, mga salming na metal na pinakintab na marhay.
^ O “surusingsing” na pansugpon, o pangkabit.
^ O “surusingsing” na pansugpon, o pangkabit.
^ O “surusingsing” na pansugpon, o pangkabit.
^ Sa literal, “kan parteng sirangan na sinisirangan kan aldaw.”
^ O “surusingsing” na pansugpon, o pangkabit.
^ O “kurtina.”
^ O “surusingsing” na pansugpon, o pangkabit.
^ O “uyon sa banal na siklo.”
^ An sarong siklo katumbas nin 11.4 gramos. Hilingon an Apendise B14.
^ An sarong talento katumbas nin 34.2 kilos. Hilingon an Apendise B14.
^ O “uyon sa banal na siklo.”
^ O “uyon sa banal na siklo.”
^ Nanunungod sa kurtina na nasa atubangan kan Kabanal-banali.
^ O “dulot na pigtuturutabyon.”
