Ezekiel 28:1-26
28 Nag-abot giraray sako an tataramon ni Jehova, na sinasabi:
2 “Aki nin tawo, sabihan mo an lider kan Tiro, ‘Ini an sinabi kan Soberanong Kagurangnan na Jehova:
“Dahil nagin mapalangkaw an saimong puso,+ pirmi kang nagsasabi, ‘Saro akong diyos.
Nakatukaw ako sa trono nin diyos sa tahaw kan dagat.’+
Pero saro ka man sanang tawo, bakong diyos,Maski ngani sa puso mo pagmati mo diyos ka.
3 Uya! Mas madunong ka pa ki Daniel.+
Mayong hilom an dai mo aram.
4 Pinayaman mo an sadiri mo paagi kan saimong kadunungan saka pakasabot,Asin nagpaparatipon ka nin bulawan saka plata sa saimong mga sarayan nin kayamanan.+
5 Nagin mayamanon ka dahil sa tibay mo sa pagnegosyo,+Asin nagin mapalangkaw an saimong puso dahil sa kayamanan mo.”’
6 “‘Kaya ini an sinabi kan Soberanong Kagurangnan na Jehova:
“Dahil sa puso mo pagmati mo saro kang diyos,
7 Madara ako nin mga dayuhan na masalakay saimo, an mga pinakadaing hirak sa mga nasyon,+Asin huhugkuton ninda an saindang mga espada para rauton an gabos na magayon na bagay na nakua mo paagi sa saimong kadununganAsin para lapastanganon an saimong labi-labing kagayunan.+
8 Dadarahon ka ninda paibaba sa lubungan,*Asin magagadan ka sa madahas na paagi sa tahaw kan dagat.+
9 Sasabihon mo pa man daw giraray, ‘Saro akong diyos,’ sa saro na naggagadan sa saimo?
Saro ka sanang tawo, bakong diyos, sa kamot kan mga naglalapastangan sa saimo.”’
10 ‘Sa kamot kan mga dayuhan, magagadan ka sa paaging kapareho kan sa mga bakong turi,Huli ta ako mismo an nagsabi kaiyan,’ an sabi kan Soberanong Kagurangnan na Jehova.”
11 Asin nag-abot giraray sako an tataramon ni Jehova, na sinasabi:
12 “Aki nin tawo, magkanta ka nin sarong panambitan* manungod sa hadi kan Tiro, asin sabihan mo siya, ‘Ini an sinabi kan Soberanong Kagurangnan na Jehova:
“Ika an modelo nin pagigin perpekto,*Na pano nin kadunungan+ asin perpekto an kagayunan.+
13 Yaon ka sa Eden, an hardin nin Diyos.
Nasasamnuhan ka nin lambang mamahalon na bato—Rubi, topasyo, asin jaspe; krisolito, onyx, asin jade; sapiro, turkesa,+ asin esmeralda;Asin an saindang mga enggaste gibo sa bulawan.
Inandam an mga iyan kan aldaw na ika lalangon.
14 Inasignar taka bilang an linahidan* na paratahob na kerubin.
Yaon ka sa banal na bukid nin Diyos,+ asin naglakaw-lakaw ka sa nagkakalayong mga gapo.
15 Daing katuyawan an saimong paggawi puon kan aldaw na ika lalangonSagkod sa may nahiling na karatan sa saimo.+
16 Dahil sa mauswag mong negosyo,+Napano ka nin kadahasan, asin nagpuon kang magkasala.+
Kaya dai taka na ibibilang na banal asin papalayason taka sa bukid nin Diyos asin lalaglagon,+Asin papahalion taka sa lugar mo sa nagkakalayong mga gapo, O paratahob na kerubin.
17 Nagin mapalangkaw an saimong puso dahil sa gayon mo.+
Sinayang mo an saimong kadunungan dahil sa sadiri mong labi-labing kagayunan.+
Iaapon taka sa daga.+
Gigibuhon takang sarong bagay na pagmamasdan kan mga hadi.
18 Dahil sa saimong grabeng kasalan asin sa madaya mong pagnenegosyo, linapastangan mo an mga santuwaryo mo.
Mapalaad ako nin kalayo sa tahaw mo, asin tutumtumon ka kaiyan.+
Gigibuhon takang abo sa ibabaw kan daga sa atubangan kan gabos na naghihiling sa saimo.
19 An gabos na nakakabisto sa saimo sa mga banwaan mapapaburarat sa saimo.+
An saimong katapusan magigin biglaan asin makatatakot,Asin mawawara ka na sa gabos na panahon.”’”+
20 Asin nag-abot giraray sako an tataramon ni Jehova, na sinasabi:
21 “Aki nin tawo, umatubang ka sa direksiyon kan Sidon,+ asin magpropesiya ka laban saiya.
22 Sabihon mo, ‘Ini an sinabi kan Soberanong Kagurangnan na Jehova:
“Uya, mahiro ako laban saimo, O Sidon, asin mapapamuraway ako sa tahaw mo;Asin mamimidbid nanggad kan mga tawo na ako si Jehova pag nagsagibo na ako nin paghukom sa saiya asin napabanal ako dahil sa saiya.
23 Mapaabot ako nin damat sa saiya asin mabulos an dugo sa saiyang mga tinampo.
An mga ginaradan mabaragsak sa tahaw niya pag sinalakay na siya kan espada hali sa gabos na direksiyon;Asin mamimidbid nanggad ninda na ako si Jehova.+
24 “‘“Dangan an banwaan* nin Israel dai na mapapalibutan nin mga nakakalugad na palungpong asin makulog na mga tunok,+ su mga nagtutuya-tuya sa sainda; asin maaaraman nanggad kan mga tawo na ako an Soberanong Kagurangnan na Jehova.”’
25 “‘Ini an sinabi kan Soberanong Kagurangnan na Jehova: “Pag tiniripon ko na giraray an banwaan nin Israel hali sa mga banwaan kun sain sinda nagkawararak,+ mapapabanal ako dahil sa sainda sa atubangan kan mga nasyon.+ Asin maistar sinda sa saindang daga+ na itinao ko sa sakuyang lingkod na si Jacob.+
26 Maistar sinda diyan nin tiwasay+ asin maturugdok nin mga harong saka magibo nin mga ubasan;+ maistar sinda nin tiwasay pag nagsagibo na ako nin paghukom sa gabos na nakapalibot sa sainda na nagtutuya-tuya sa sainda;+ asin mamimidbid nanggad ninda na ako si Jehova na saindang Diyos.”’”
Mga Nota
^ O “kalot.”
^ Sa literal, “an nagtatatak nin sarong arugan.”
^ O “awit nin pagmundo.”
^ Sa literal, “harong.”
