Ezekiel 35:1-15
-
Propesiya laban sa kabukidan nin Seir (1-15)
35 Nag-abot giraray sako an tataramon ni Jehova, na sinasabi:
2 “Aki nin tawo, umatubang ka sa direksiyon kan kabukidan nin Seir,+ asin magpropesiya ka laban diyan.+
3 Sabihon mo diyan, ‘Ini an sinabi kan Soberanong Kagurangnan na Jehova: “Uya, mahiro ako laban saimo, O kabukidan nin Seir, asin uunaton ko an sakong kamot laban saimo asin gigibuhon takang sarong tiwangwang na kadagaan.+
4 Gigibuhon kong kagabaan an saimong mga siyudad, asin magigi kang sarong tiwangwang na kadagaan;+ asin mamimidbid mo nanggad na ako si Jehova.
5 Huli ta dai nawawara an pagkaungis mo sa Israel,+ asin itinao mo sa espada an mga Israelita kan panahon na nagsasakit sinda, kan panahon kan pangultimong padusa sa sainda.”’+
6 “‘Kaya isinusumpa ko sa sadiri ko,’* an sabi kan Soberanong Kagurangnan na Jehova, ‘pighahanda ko na an kagadanan* mo, asin lalapagon ka kan kagadanan.+ Huling dugo an ikinaungis mo, kagadanan an malapag sa saimo.+
7 Gigibuhon kong tiwangwang an kabukidan nin Seir,+ asin gagadanon ko an siisay man na nag-aagi o nagbabalik diyan.
8 Papanuon ko nin mga ginadan an mga bukid kaiyan; asin su mga ginadan paagi sa espada mabaragsak sa saimong mga bulod, sa saimong mga kababan, saka sa gabos mong sapa.
9 Dahil sa gigibuhon ko saimo, magigi kang tiwangwang sagkod lamang, asin dai na iistaran an saimong mga siyudad;+ asin mamimidbid nanggad nindo na ako si Jehova.’
10 “Huling sinabi mo, ‘An duwang nasyon na ini saka an duwang dagang ini magigin sakuya, asin magigin pagsadiri ta an mga iyan,’+ maski ngani yaon duman si Jehova,
11 ‘kaya isinusumpa ko sa sadiri ko,’* an sabi kan Soberanong Kagurangnan na Jehova, ‘ipapasapar ko sa saimo an kaparehong kaanggutan asin pagkauri na ipinahiling mo dahil sa pagkaungis mo sa sainda;+ asin ipapamidbid ko sa sainda an sadiri ko pag hinukuman taka na.
12 Sa panahon na iyan, maaaraman mo nanggad na ako mismo, si Jehova, an nakadangog sa gabos na maraot na bagay na sinabi mo laban sa mga bukid kan Israel kan magsabi ka, “Ginibo sindang tiwangwang asin itinao sa sato para sibaon ta.”*
13 Asin nagtaram kamo nin may kahambugan laban sa sako, saka dakul kamong sinabi laban sa sako.+ Nadangog ko idto gabos.’
14 “Ini an sinabi kan Soberanong Kagurangnan na Jehova: ‘Mag-uugma an bilog na daga pag ginibo takang sarong tiwangwang na kadagaan.
15 Dahil nag-ugma ka kan an mana kan banwaan* nin Israel nagin tiwangwang, iyan man an gigibuhon ko sa saimo.+ Magigi kang sarong tiwangwang na kagabaan, O kabukidan nin Seir, iyo, an bilog na Edom;+ asin mamimidbid nanggad ninda na ako si Jehova.’”
Mga Nota
^ Sa literal, “dugo; pagpabulos kan dugo.”
^ Sa literal, “kun paanong buhay ako.”
^ Sa literal, “kun paanong buhay ako.”
^ Sa literal, “bilang kakanon.”
^ Sa literal, “harong.”
