Genesis 4:1-26
4 Asin nakidurog si Adan sa saiyang agom na si Eva, asin nagbados ini.+ Kan ipinangaki niya si Cain,+ nagsabi siya: “Nangaki ako nin lalaki sa tabang ni Jehova.”
2 Dangan nangaki giraray siya; ipinangaki niya si Abel,+ an tugang ni Cain.
Si Abel nagin pastor, pero si Cain nagin paratanom.
3 Pag-abot nin panahon, nagdara si Cain nin nagkapirang bunga kan daga para idulot ki Jehova.
4 Alagad si Abel, idinulot niya an nagkapirang inot na ugbon kan saiyang mga karnero,+ kaiba an mga taba kaini. Nauyunan ni Jehova si Abel asin an dulot kaini,+
5 pero dai niya nauyunan si Cain asin an dulot kaini. Kaya naanggot* na marhay si Cain asin grabe an kamunduan niya.
6 Dangan sinabi ni Jehova ki Cain: “Taano ta angguton ka saka mamunduon?
7 Kun magibo ka nin marahay, bako daw na mauuyunan taka giraray?* Pero kun dai ka magibo nin marahay, an kasalan nag-aabang na sa may pinto, asin gustong-gusto kaiyan na biktimahon ka; pero dai mo daw iyan dadaugon?”
8 Pagkatapos kaiyan, sinabi ni Cain sa tugang niyang si Abel: “Magduman kita sa kalangtadan.” Asin mantang yaon sinda sa kalangtadan, dinaguso ni Cain an tugang niyang si Abel asin ginadan ini.+
9 Paghaloy-haloy, sinabi ni Jehova ki Cain: “Hain an tugang mong si Abel?” Nagsimbag siya: “Dai ko aram. Ano ako, parabantay kan sakuyang tugang?”
10 Huli kaini, suminabi Siya: “Anong ginibo mo? Magdangog ka! An dugo kan saimong tugang nagkukurahaw sa sako hali sa daga.+
11 Asin ngunyan isinumpa ka: Papalayason taka sa daga na nagbuka kan nguso kaini para akuon an dugo kan saimong tugang hali sa kamot mo.+
12 Pag magtanom ka sa daga, dai iyan mabunga nin marahay para sa saimo. Maglalagaw-lagaw ka digdi sa daga asin madulag kun sain-sain.”
13 Dahil kaini, nagsabi si Cain ki Jehova: “Magabaton an padusa para sa sakuyang kasalan.
14 Pinapalayas mo ako ngunyan sa dagang ini,* saka mawawara ako sa saimong paghiling; asin maglalagaw-lagaw ako digdi sa daga saka madulag kun sain-sain, asin siguradong gagadanon ako kan siisay man na makakahiling sa sako.”
15 Kaya sinabihan siya ni Jehova: “Kun siring, an siisay man na gumadan ki Cain babaluson nin pitong beses.”
Kaya nagbugtak* si Jehova nin tanda para ki Cain tanganing dai siya paggadanon kan siisay man na makakahiling sa saiya.
16 Dangan naghali si Cain sa atubangan ni Jehova asin nag-istar sa daga nin Nod,* sa sirangan kan Eden.+
17 Pagkatapos, nakidurog si Cain sa saiyang agom,+ asin nagbados ini asin ipinangaki si Enoc. Dangan nagpuon siyang magtugdok nin siyudad na pinangaranan niya kan pangaran kan aki niyang si Enoc.
18 Pagkalihis nin panahon, si Enoc nagkaigwa nin aki, si Irad. Asin si Irad nagkaigwa nin aki, si Mehujael. Asin si Mehujael nagkaigwa nin aki, si Metusael. Asin si Metusael nagkaigwa nin aki, si Lamec.
19 Duwa an nagin agom ni Lamec. Ada an pangaran kan inot, asin Zila an pangaran kan ikaduwa.
20 Ipinangaki ni Ada si Jabal. Ini an kainot-inuting nag-istar sa mga tolda saka nag-ataman nin mga hayop.
21 Jubal an pangaran kan saiyang tugang. Ini an kainot-inuting paratugtog nin arpa saka nin plawta.*
22 Ipinangaki man ni Zila si Tubal-cain, na nagpapanday nin gabos na klaseng kagamitan na gibo sa tanso saka lansang.* Igwa si Tubal-cain nin tugang na babayi, si Naama.
23 Dangan ginibo ni Lamec an tulang ini para sa saiyang mga agom na si Ada saka si Zila:
“Danguga nindo ako, kamong mga agom ni Lamec;
Magdangog kamo sa sakong sinasabi:
Sarong lalaki an ginadan ko huling linugadan ako kaini,
Iyo, sarong hoben na lalaki huling kinulgan ako kaini.
24 Kun ibabalos si Cain nin 7 beses,+
Si Lamec 77 beses.”
25 Nakidurog giraray si Adan sa saiyang agom, asin nangaki ini nin lalaki. Pinangaranan ini ni Eva na Set*+ huling arog kan sinabi niya, “Nagtagama an Diyos para sa sako nin saro pang aki* bilang karibay ni Abel, huling ginadan siya ni Cain.”+
26 Nagkaigwa man nin sarong aking lalaki si Set, asin pinangaranan niya ining Enos.+ Kan panahon na iyan, an mga tawo nagpuon na mag-apod sa pangaran ni Jehova.
Mga Nota
^ O “nadagit.”
^ O “bako daw na ilalangkaw ka?”
^ Sa literal, “sa lalawgon kan daga.”
^ O “nag-establisar.”
^ O “daga nin Pagkadistiyero.”
^ O “pipano.”
^ O “batbat.”
^ Nangangahulugan na “Itinagama; Ilinaag; Ibinugtak.”
^ Sa literal, “banhi.”
