Jeremias 27:1-22
27 Sa kapinunan kan pamamahala kan hadi kan Juda na si Jehoiakim na aki ni Josias, uminabot ki Jeremias an tataramon na ini hali ki Jehova:
2 “Ini an sinabi sa sako ni Jehova, ‘Gumibo ka nin mga panggakod asin mga sakal, asin ibugtak mo an mga iyan sa liog mo.
3 Dangan ipadara mo an mga iyan sa hadi kan Edom,+ sa hadi kan Moab,+ sa hadi kan mga Ammonita,+ sa hadi kan Tiro,+ asin sa hadi kan Sidon+ paagi sa mga mensahero na nagpasiring ki Hading Zedekias kan Juda sa Jerusalem.
4 Sabihon mo sa sainda an pagbuot na ini para sa mga kagurangnan ninda:
“‘“Ini an sabi ni Jehova na pamayo nin mga hukbo, an Diyos kan Israel; ini an sabihon nindo sa mga kagurangnan nindo,
5 ‘Ako an naggibo kan daga, kan katawuhan, asin kan mga hayop na nasa ibabaw kan daga paagi kan sakong dakulang kapangyarihan asin paagi kan sakong nakaunat na takyag; asin itinatao ko iyan sa kiisay man na gusto kong tawan.*+
6 Asin ngunyan, itinao ko na sa kamot ni Hading Nabucodonosor+ kan Babilonya na sakuyang lingkod an gabos na kadagaan na ini; pati an mga layas na hayop sa kalangtadan itinao ko na sa saiya tanganing maglingkod sa saiya.
7 An gabos na nasyon maglilingkod sa saiya asin sa aki niya saka sa makuapo niya sagkod na umabot an panahon kan sadiri niyang daga,+ an panahon na gigibuhon siyang uripon kan dakul na nasyon asin makapangyarihan na mga hadi.’+
8 “‘“‘Kun an arin man na nasyon o kahadian habong maglingkod ki Hading Nabucodonosor kan Babilonya asin habong magpasakal kan liog niya sa sakal kan hadi kan Babilonya, papadusahan ko an nasyon na iyan paagi sa espada,+ tiggutom, asin epidemya,’* an sabi ni Jehova, ‘sagkod na maubos ko sinda paagi kan kamot niya.’
9 “‘“‘Kaya, dai kamo magdangog sa saindong mga propeta, mga parahula, mga parapangaturugan, mga paramahika, asin mga parakulam, na nagsasarabi sa saindo: “Dai kamo maglilingkod sa hadi kan Babilonya.”
10 Huli ta nagpopropesiya sinda sa saindo nin mga kaputikan, na magigin dahilan na kuruanon kamo saka darahon parayo sa saindong daga asin iwawarak ko kamo asin mapapara kamo.
11 “‘“‘Pero an nasyon na nagpapasakal kan liog kaini sa sakal kan hadi kan Babilonya asin naglilingkod sa saiya, tutugutan kong magdanay* sa daga kaiyan,’ an sabi ni Jehova, ‘tanganing kultibaron iyan asin mag-istar diyan.’”’”
12 Arog man kaiyan an sinabi ko ki Hading Zedekias+ kan Juda: “Pasakalan nindo an saindong liog sa sakal kan hadi kan Babilonya asin maglingkod kamo sa saiya saka sa banwaan niya, asin ta padagos kamong mabubuhay.+
13 Taano ta kaipuhan ka pang magadan asin an banwaan mo paagi sa espada,+ paagi sa tiggutom,+ asin paagi sa epidemya,+ arog kan sinabi ni Jehova manungod sa nasyon na dai maglilingkod sa hadi kan Babilonya?
14 Dai kamo magdangog sa mga tataramon kan mga propeta na nagsasabi sa saindo, ‘Dai kamo maglilingkod sa hadi kan Babilonya,’+ ta mga kaputikan an ipinopropesiya ninda sa saindo.+
15 “‘Huli ta dai ko man sinda isinugo,’ an sabi ni Jehova, ‘pero nagpopropesiya sinda nin mga kaputikan sa ngaran ko, na huli kaiyan iwawararak ko kamo, kamo asin an mga propetang nagpopropesiya sa saindo.’”+
16 Asin sinabi ko sa mga saserdote asin sa bilog na banwaan na ini: “Ini an sabi ni Jehova, ‘Dai kamo magdangog sa mga sinasabi kan mga propeta nindo na nagpopropesiya sa saindo: “Uya! An mga kagamitan sa harong ni Jehova madali nang ibalik hali sa Babilonya!”+ ta mga kaputikan an ipinopropesiya ninda sa saindo.+
17 Dai kamo magdangog sa sainda. Maglingkod kamo sa hadi kan Babilonya asin ta padagos kamong mabubuhay.+ Taano ta kaipuhan pang magin kagabaan an siyudad na ini?
18 Pero kun mga propeta sinda asin kun an tataramon ni Jehova yaon sa sainda, sabihan mo tabi sinda na makimahirak ki Jehova na pamayo nin mga hukbo na dai man lugod madara sa Babilonya an natatadang mga kagamitan sa harong ni Jehova, sa harong* kan hadi kan Juda, asin sa Jerusalem.’
19 “Huli ta ini an sabi ni Jehova na pamayo nin mga hukbo manungod sa mga harigi,+ sa tangke nin tubig,*+ sa mga kareta,+ asin sa natatadang mga kagamitan na nawalat sa siyudad na ini,
20 na dai kinua ni Hading Nabucodonosor kan Babilonya kan puwersahan niyang dinara* hali sa Jerusalem pasiring sa Babilonya an hadi kan Juda na si Jeconias na aki ni Jehoiakim, kaiba an gabos na mga respetadong tawo sa Juda asin Jerusalem;+
21 iyo, ini an sabi ni Jehova na pamayo nin mga hukbo, an Diyos kan Israel, manungod sa mga kagamitan na nawalat sa harong ni Jehova, sa harong* kan hadi kan Juda, asin sa Jerusalem:
22 ‘“Dadarahon an mga iyan sa Babilonya,+ asin magdadanay an mga iyan duman sagkod sa aldaw na ibaling ko an atensiyon ko sa mga iyan,”* an sabi ni Jehova. “Dangan kukuanon ko an mga iyan asin ibabalik sa lugar na ini.”’”+
Mga Nota
^ Sa literal, “sa siisay man na maninigo sa mga mata ko.”
^ O “hilang.”
^ Sa literal, “magpahingalo.”
^ O “palasyo.”
^ Sa literal, “sa Dagat,” an buot sabihon, an tansong tangke nin tubig sa templo.
^ O “kan idinistiyero niya.”
^ O “palasyo.”
^ O posibleng “sa sainda.”
