Jeremias 28:1-17
-
Si Jeremias laban sa bakong tunay na propetang si Hananias (1-17)
28 Kan taon man na iyan, sa kapinunan kan pamamahala ni Hading Zedekias+ kan Juda, sa ikalimang bulan kan ikaapat na taon, si propeta Hananias na taga Gibeon+ na aki ni Azur nagsabi sa sako sa harong ni Jehova sa atubangan kan mga saserdote asin kan bilog na banwaan:
2 “Ini an sabi ni Jehova na pamayo nin mga hukbo, an Diyos kan Israel, ‘Babarion ko an sakal kan hadi kan Babilonya.+
3 Bago matapos an duwang taon,* ibabalik ko sa lugar na ini an gabos na kagamitan sa harong ni Jehova na kinua ni Hading Nabucodonosor kan Babilonya sa lugar na ini asin dinara sa Babilonya.’”+
4 “‘Asin ibabalik ko sa lugar na ini an hadi kan Juda na si Jeconias+ na aki ni Jehoiakim,+ asin an gabos na taga Juda na puwersahan na dinara sa Babilonya,’+ an sabi ni Jehova, ‘huling babarion ko an sakal kan hadi kan Babilonya.’”
5 Dangan nagtaram si Jeremias na propeta ki Hananias na propeta sa atubangan kan mga saserdote asin kan bilog na banwaan na nakatindog sa harong ni Jehova.
6 Sinabi ni Jeremias na propeta: “Amen!* Iyan lugod an gibuhon ni Jehova! Utubon lugod ni Jehova an mga tataramon na iprinopesiya mo; ibalik niya lugod sa lugar na ini hali sa Babilonya an mga kagamitan sa harong ni Jehova asin an gabos na puwersahan na dinara duman!
7 Pero, danguga tabi an mensaheng ini na sinasabi ko sa saimo asin sa bilog na banwaan.
8 Kaidto pa, nagpopropesiya na an mga propetang nainot sa sako saka sa saimo manungod sa dakul na kadagaan asin makapangyarihan na mga kahadian, may koneksiyon sa giyera, kapahamakan, asin epidemya.*
9 Kun an sarong propeta magpropesiya may koneksiyon sa katuninungan asin an tataramon kan propetang iyan magkatotoo, maaaraman na talagang isinugo ni Jehova an propetang iyan.”
10 Dangan kinua ni Hananias na propeta an sakal sa liog ni Jeremias na propeta asin binari iyan.+
11 Tapos sinabi ni Hananias sa atubangan kan bilog na banwaan: “Ini an sabi ni Jehova, ‘Arog ko kaini hahalion sa liog kan gabos na nasyon asin babarion an sakal ni Hading Nabucodonosor kan Babilonya bago matapos an duwang taon.’”+ Asin naghali si Jeremias na propeta.
12 Pagkatapos na halion ni Hananias na propeta an sakal sa liog ni Jeremias na propeta asin barion iyan, uminabot ki Jeremias an mensaheng ini ni Jehova:
13 “Dumanan mo si Hananias asin sabihon mo sa saiya, ‘Ini an sabi ni Jehova: “Binari mo an mga sakal na kahoy,+ pero karibay kan mga iyan magibo ka nin mga sakal na lansang.”*
14 Huli ta ini an sabi ni Jehova na pamayo nin mga hukbo, an Diyos kan Israel: “Bubugtakan ko nin sakal na lansang an liog kan gabos na nasyon na ini, tanganing maglingkod sinda ki Hading Nabucodonosor kan Babilonya, asin dapat sindang maglingkod sa saiya.+ Pati an mga layas na hayop sa kalangtadan itatao ko sa saiya.”’”+
15 Asin sinabi ni Jeremias na propeta ki Hananias+ na propeta: “Magdangog ka tabi, O Hananias! Dai ka isinugo ni Jehova, pero pinapaniwala mo an banwaan na ini sa sarong kaputikan.+
16 Kaya ini an sabi ni Jehova, ‘Uya! Hahalion taka sa ibabaw kan daga. Magagadan ka ngunyan na taon, ta dinadagka mo an banwaan na magrebelde ki Jehova.’”+
17 Kaya nagadan si Hananias na propeta kan ikapitong bulan kan taon na iyan.
Mga Nota
^ Sa literal, “an mga taon nin mga aldaw.”
^ O “Mangyari lugod!”
^ O “hilang.”
^ O “batbat.”
