Jeremias 34:1-22
34 Ini an tataramon na uminabot ki Jeremias hali ki Jehova, kan si Hading Nabucodonosor* kan Babilonya asin an bilog niyang hukbo saka an gabos niyang nasasakupan na kahadian sa daga pati an gabos na banwaan nakikipaglaban sa Jerusalem asin sa gabos na siyudad kaini:+
2 “Ini an sabi ni Jehova na Diyos kan Israel, ‘Magpasiring ka ki Hading Zedekias+ kan Juda asin sabihon mo sa saiya: “Ini an sabi ni Jehova, ‘Itatao ko sa kamot kan hadi kan Babilonya an siyudad na ini, asin susuluon niya ini sa kalayo.+
3 Asin dai ka makakadulag sa kamot niya, ta sigurado nanggad na dadakupon ka tapos itatao sa saiya.+ Asin personal mong mahihiling an hadi kan Babilonya, asin kakaulayon ka niya nin hampangan, asin dadarahon ka sa Babilonya.’+
4 Minsan siring, danguga an tataramon ni Jehova, O Hading Zedekias kan Juda, ‘Ini an sabi ni Jehova manungod sa saimo: “Dai ka magagadan sa espada.
5 Magagadan kang may katuninungan,+ asin magibo sinda para sa saimo nin seremonya nin pagsulo arog kan ginibo ninda sa saimong mga ama, su mga hading nainot sa saimo, asin ipagmumundo ka ninda na nagsasarabi, ‘O kagurangnan!’ huling ‘ako mismo an nagsabi kaini,’ an sabi ni Jehova.”’”’”
6 Dangan sinabi ni Jeremias na propeta an gabos na tataramon na ini ki Hading Zedekias kan Juda sa Jerusalem,
7 kan an mga hukbo kan hadi kan Babilonya nakikipaglaban sa Jerusalem asin sa gabos na natatadang siyudad kan Juda,+ laban sa Lakis+ saka sa Azeka;+ huling an mga ini na sana an mga siyudad na may matibay na depensa na natatada sa mga siyudad kan Juda.
8 May uminabot na tataramon ki Jeremias hali ki Jehova pakatapos na makipagtipan si Hading Zedekias sa bilog na banwaan na yaon sa Jerusalem tanganing ideklarar an saindang katalingkasan,+
9 na an lambang saro dapat na patalingkason an saiyang mga uripon na Hebreo, lalaki asin babayi, tanganing mayo na nin siisay man an padagos na magkaigwa nin uripon na kapwa niya Judio.
10 Kaya nagsunod an gabos na pamayo* asin an bilog na banwaan. Naggibo sinda nin tipan na an lambang saro dapat na patalingkason an saiyang mga uripon na lalaki asin babayi tapos dai na niya sinda magigin mga uripon. Nagsunod sinda asin pinatalingkas an mga ini.
11 Pero kan huri, pinabaralik ninda an pinatalingkas nindang mga uripon na lalaki asin babayi, asin puwersahan ninda sindang ibinalik sa pagkauripon.
12 Kaya an tataramon ni Jehova uminabot ki Jeremias hali ki Jehova, na an sabi:
13 “Ini an sabi ni Jehova na Diyos kan Israel, ‘Nakipagtipan ako sa mga apuon nindo+ kan aldaw na iluwas ko sinda sa daga nin Ehipto, kun sain sinda nagin uripon,*+ asin sinabi ko:
14 “Sa pagtatapos nin pitong taon, an lambang saro sa saindo dapat na patalingkason an tugang niyang Hebreo na ipinabakal sa saindo asin nagserbi na sa saindo nin anom na taon; dapat nindo siyang patalingkason.”+ Pero dai nagdangog o nagtaong atensiyon* sa sako an mga apuon nindo.
15 Asin dai pa sana nahahaloy,* nagbalik kamo sa sako asin ginibo nindo kun ano an tama sa paghiling ko paagi sa pagdeklarar nin katalingkasan kan saindong kapwa, asin nakipagtipan kamo sa atubangan ko sa harong na kinamumugtakan kan sakuyang pangaran.
16 Pero tuminalikod kamo asin linapastangan an pangaran ko+ paagi sa pagpapabalik nindo kan mga uripon nindong lalaki saka babayi na tinugutan na nindong maghali asin magduman sain man ninda gusto,* asin puwersahan nindo sindang ibinalik sa pagkauripon.’
17 “Kaya ini an sabi ni Jehova: ‘Dai nindo ako sinunod kun manungod sa pagdeklarar kan lambang saro sa saindo nin katalingkasan kan saiyang tugang asin kan saiyang kapwa.+ Kaya madeklarar ako ngunyan nin katalingkasan para sa saindo,’ an sabi ni Jehova, ‘paagi sa espada, epidemya,* asin tiggutom,+ asin gigibuhon ko kamong sarong bagay na magigin dahilan na an gabos na kahadian sa daga tarakigan.+
18 Asin ini an mangyayari sa mga tawong nagbalga sa sakuyang tipan paagi sa dai ninda pagsagibo kan mga tataramon kan tipan na ginibo ninda sa atubangan ko kan baakon ninda sa duwa an ugbon na baka asin mag-agi sinda sa pag-ultanan kan duwang kabaak,*+
19 an buot sabihon, an mga pamayo* kan Juda, an mga pamayo kan Jerusalem, an mga opisyal kan palasyo, an mga saserdote, asin an gabos na tawo sa kadagaan na nag-agi sa pag-ultanan kan duwang kabaak kan ugbon na baka:
20 Itatao ko sinda sa mga kalaban ninda asin sa mga gustong gumadan sa sainda,* asin an mga bangkay ninda magigin kakanon kan mga gamgam* sa kalangitan asin kan mga hayop sa daga.+
21 Asin si Hading Zedekias kan Juda asin an saiyang mga pamayo* itatao ko sa kamot kan saindang mga kalaban asin sa kamot kan mga gustong gumadan sa sainda* asin sa kamot kan mga hukbo kan hadi kan Babilonya,+ na minaatras na sa pagsalakay sa saindo.’+
22 “‘Matao ako nin pagbuot,’ an sabi ni Jehova, ‘asin papabalikon ko sinda sa siyudad na ini, asin makikipaglaban sinda digdi asin sasakupon ini tapos susuluon sa kalayo;+ asin an mga siyudad kan Juda gigibuhon kong tiwangwang, na mayo nin nag-iistar.’”+
Mga Nota
^ Sa literal, “Nabucodorosor,” saro pang ispeling kan pangaran.
^ O “prinsipe.”
^ Sa literal, “hali sa harong nin mga uripon.”
^ O “nagkiling kan saindang talinga.”
^ Sa literal, “Asin ngunyan na aldaw.”
^ O “maghali sigun sa gusto kan saindang kalag.”
^ O “hilang.”
^ Saro ining suanoy na kaugalian tanganing gibuhon na balido an sarong tipan.
^ O “prinsipe.”
^ O “bayong.”
^ O “mga naghahanap sa kalag ninda.”
^ O “prinsipe.”
^ O “mga naghahanap sa kalag ninda.”
