Salmo 33:1-22
33 Kamong mga matanos, maugmang magkurahaw huli ki Jehova.+
Angay lang para sa mga matanos na umawon siya.
2 Magpasalamat kamo ki Jehova gamit an arpa;Magkanta kamo nin mga pag-umaw* sa saiya gamit an instrumentong may sampulong kuwerdas.
3 Magkanta kamo sa saiya nin bagong kanta;+Husayan nindo an pagtugtog nin mga instrumentong de-kuwerdas, kasabay nin mga kurahaw nin kaugmahan.
4 Huli ta an tataramon ni Jehova matanos,+Asin an gabos niyang ginigibo mapagtitiwalaan.
5 Mamumuton siya sa katanusan asin hustisya.+
An daga pano nin maimbod na pagkamuot ni Jehova.+
6 Paagi sa tataramon ni Jehova nagibo an kalangitan,+Asin paagi sa espiritu* kan saiyang nguso nagibo an gabos na bagay na yaon diyan.*
7 Tinitipon niya nin siring sa sarong dam an mga tubig sa dagat;+Ilinalaog niya sa mga bodega an nagraragasang mga tubig.
8 Lugod na an bilog na daga magkaigwa nin pagkatakot ki Jehova.+
Lugod na an mga nag-iistar sa mabungang daga magkaigwa nin hararom na paggalang sa saiya.
9 Huli ta nagtaram siya, asin nangyari iyan;+Ipinagbuot niya, asin nag-eksister iyan.+
10 Inulang ni Jehova an mga pakana* kan mga nasyon;+Rinaot niya an mga plano* kan mga banwaan.+
11 Pero an mga desisyon* ni Jehova magdadanay sagkod lamang;+An kaisipan kan puso niya magdadanay sagkod sa gabos na henerasyon.
12 Maugma an nasyon na an Diyos iyo si Jehova,+An banwaan na saiyang pinili na magin pagsadiri niya.+
13 Minadungaw si Jehova hali sa langit;Nahihiling niya an gabos na aki nin tawo.+
14 Hali sa lugar na iniirukan niya,Saiyang pinagmamasdan an mga nag-iistar sa daga.
15 Siya an nagpoporma kan puso kan gabos na tawo;Pigsisiyasat niya an gabos nindang gibo.+
16 Mayo nin hadi na maililigtas nin dakulang hukbo;+An sarong makapangyarihan na lalaki dai maililigtas kan saiyang dakulang kusog.+
17 An kabayo dai malalauman para sa kaligtasan;*+An dakulang kusog kaiyan bakong garantiya para an saro makadulag.
18 Uya! An mata ni Jehova nakabantay sa mga may pagkatakot sa saiya,+Sa mga naghahalat kan maimbod na pagkamuot niya,
19 Tanganing iligtas sinda* sa kagadananAsin tanganing papagdanayon sindang buhay sa panahon nin tiggutom.+
20 Naghahalat kita* ki Jehova.
Siya an satong paratabang asin satong kalasag.+
21 An puso ta nag-uugma huli sa saiya,Huli ta nagtitiwala kita sa banal na pangaran niya.+
22 Lugod na magdanay sa samuya an saimong maimbod na pagkamuot, O Jehova,+Mantang padagos kaming naghahalat sa saimo.+
Mga Nota
^ O “Maggibo kamo nin musika para.”
^ O “hinangos.”
^ Sa literal, “an bilog nindang hukbo.”
^ O “sadol.”
^ O “mga nasa isip.”
^ O “an katuyuhan.”
^ O “kapangganahan.”
^ O “an saindang kalag.”
^ O “an satong kalag.”
