Salmo 74:1-23
Sarong maskil.* Salmo ni Asaf.+
74 O Diyos, taano ta isinikwal mo kami sagkod lamang?+
Taano ta naglalaad* an kaanggutan* mo sa aripumpon na saimong pinapasturan?+
2 Girumduma an banwaan* na pinili mo kaidtong haloy na panahon na,+An tribo na tinubos mo bilang saimong mana.+
Girumduma an Bukid nin Sion, kun sain nag-irok ka.+
3 Dumanan mo an lugar na nagdadanay na gaba sagkod lamang.+
Linaglag kan kalaban an gabos na bagay na nasa banal na lugar.+
4 Nagkurahaw sa kapangganahan an mga kalaban mo sa laog kan saimong lugar nin pakipagtagbuan.*+
Pinatindog ninda an sadiri nindang mga bandera tanganing magserbing mga tanda duman.
5 Garo sinda mga tawong nagwawasiwas nin patok sa sarong mahibog na kadlagan.
6 Pigpararaot ninda an gabos na inukit diyan+ gamit an mga patok asin mga perno.
7 Sinulo ninda an saimong santuwaryo.+
Linapastangan ninda asin ginaba an saimong tabernakulo na kinamumugtakan kan pangaran mo.
8 Sinda asin an saindang mga aki nagsarabi sa puso ninda:
“Dapat suluon an gabos na lugar nin pakipagtagbuan sa Diyos* na yaon sa kadagaan.”
9 Mayo kaming mahiling na mga tanda;Mayo nang propeta,Asin mayo ni saro sa samo an nakakaaram kun sagkod nuarin ini magpapadagos.
10 O Diyos, sagkod nuarin padagos na magtutuya-tuya an kalaban?+
Sagkod lamang daw na tatrataron na daing galang kan kaiwal mo an saimong pangaran?+
11 Taano ta pinupugulan mo an saimong kamot, an saimong tuong kamot?+
Unata iyan hali sa saimong daghan* asin tarapuson mo sinda.
12 Alagad an Diyos iyo an sakong Hadi kaidto pang haloy na panahon na,An saro na nagsasagibo nin mga pagliligtas sa ibabaw kan daga.+
13 Binukag* mo an dagat paagi kan saimong kusog;+Pinasa mo an mga payo kan mga higanteng hayop sa dagat.
14 Rinunot mo an mga payo kan Leviatan;*Itinao mo iyan tanganing magin kakanon kan mga tawo, idtong mga nag-iistar sa mga disyerto.
15 Rinalabutan* mo an daga tanganing magburulos an mga burabod asin mga sapa;+Pinamara mo an mga salog na sige sanang sulog.+
16 Saimo an aldaw, siring man an banggi.
Ginibo mo an ilaw* asin an saldang.*+
17 Ibinugtak mo an gabos na sagkudan kan daga;+Minukna mo an tig-init asin an tiglipot.+
18 Girumduma an mga panunuya kan kalaban, O Jehova,Kun paano tinatratar na daing galang kan mangmang na banwaan an saimong pangaran.+
19 Dai mo itao sa mga layas na hayop an buhay* kan saimong gamgam* na agbaan.
Dai mo paglingawan sagkod lamang an buhay kan nagsasakit mong banwaan.
20 Girumduma tabi an tipan,Huling an mga madiklom na lugar sa daga napano na nin istaran nin mga tawong naggigibo nin kadahasan.
21 Lugod na an inaapi dai maghali na nasudya an linalauman;+Lugod na umawon kan hamak asin kan dukha an saimong pangaran.+
22 Tumindog ka, O Diyos, asin idepensa mo an saimong kaso.
Girumduma kun paano ka bilog na aldaw na pigtutuya-tuya kan mangmang na tawo.+
23 Dai mo paglingawan an pigpaparataram kan mga kaiwal mo.
Padagos na nag-iitaas an kariribukan kan mga tawong minatumang sa saimo.
Mga Nota
^ Sa literal, “nag-aaso.”
^ O “dagit.”
^ Sa literal, “an saimong katiripunan.”
^ O “lugar na tiripunan.”
^ O “gabos na lugar kun sain sinasamba an Diyos.”
^ O “Iluwas mo iyan sa katiklupan kan saimong gubing.”
^ O “Inukag.”
^ O “Pigruluhuan.”
^ O “aldaw.”
^ O “tingraw.”
^ O “kalag.”
^ O “bayong.”
