Kapitulo 19

Pagtatak sa Israel nin Dios

Bisyon 4—Kapahayagan 7:1-17

Tema: Tinatakan an 144,000, asin an sarong dakulang kadaklan naheling na nagtitindog sa atubangan kan trono ni Jehova asin sa atubangan kan Kordero

Panahon nin kaotoban: Magpoon kan pagtukaw ni Cristo Jesus sa trono kan 1914 sagkod sa saiyang Milenyal na Paghade

1. “Siisay an makakatindog” durante kan dakulang aldaw kan grabeng kaanggotan nin Dios?

 “SIISAY an makakatindog?” (Kapahayagan 6:17) Iyo, siisay man nanggad? Kun laglagon na kan dakulang aldaw kan grabeng kaanggotan nin Dios an sistema ni Satanas, posible nanggad na ihapot iyan kan mga namamahala asin mga tawo sa kinaban. Sa pagheling ninda garo baga tataposon kan nagdadangadang na grabeng kapahamakan na iyan an gabos na buhay nin tawo. Alagad talaga daw na siring? Marahay sana ta inaasegurar kita kan propeta nin Dios: “An gabos na nag-aapod sa ngaran ni Jehova makakaligtas.” (Joel 2:32) Iyan kinokompirmar ni apostol Pedro asin Pablo. (Gibo 2:19-21; Roma 10:13) Iyo, idtong mga nag-aapod sa ngaran ni Jehova matatadang buhay. Sairisay an mga ini? Mantang nahahayag an sunod na bisyon, maheheling niato.

2. Taano ta pambihira na may mga matatadang buhay sa aldaw nin paghokom ni Jehova?

² Pambihira nanggad na an siisay man makaligtas na buhay sa aldaw nin paghokom ni Jehova, huli ta iyan ilinaladawan kan saro pa sa mga propeta nin Dios sa mga tataramon na ini: “Uya! An sarong bagyo nin doros ni Jehova, an kabangisan mismo, nagluwas, an sarong nagdadagasang unos. Sa ibabaw kan payo kan mga marigsok iyan mag-iipoipo. An naglalaad na kaanggotan ni Jehova dai matunong sagkod na magibo nia asin sagkod na maotob nia an mga kaisipan kan saiyang puso.” (Jeremias 30:23, 24) Kaipuhan na marhay na gumibo kita nin mga paagi tanganing makaligtas sa bagyong iyan!—Talinhaga 2:22; Isaias 55:6, 7; Sofonias 2:2, 3.

An Apat na Doros

3. (a) Anong espesyal na paglilingkod na ginigibo kan mga anghel an naheling ni Juan? (b) Ano an isinisimbolisar kan “apat na doros”?

³ Bago butasan ni Jehova an kabangisan na ini, an langitnon na mga anghel may gigibohon na espesyal na paglilingkod. Naheling ngonyan ni Juan an bisyon na ini: “Pagkatapos kaini nakaheling ako nin apat na anghel na nagtitindog sa apat na kanto kan daga, na pinupugolan an apat na doros kan daga, tanganing mayo nin doros na maghuyop sa daga o sa dagat o sa arin man na kahoy.” (Kapahayagan 7:1) Ano an boot sabihon kaini para sa sato ngonyan? An “apat na doros” na ini malinaw na simbolo kan mapanlaglag na paghokom na madali nang butasan sa marigsok na sosyedad digdi sa daga, sa nag-aalimbukay na “dagat” nin tampalasan na katawohan, asin sa harohalangkawon, garo kahoy na mga namamahala na nagkukua nin suporta asin sustento sa mga tawo digdi sa daga.—Isaias 57:20; Salmo 37:35, 36.

4. (a) Ano an irinerepresentar kan apat na anghel? (b) Ano an magigin epekto sa daganon na organisasyon ni Satanas kun butasan na an apat na doros?

 ⁴ Daing duwa-duwa, an apat na anghel na ini nagrerepresentar sa apat na grupo nin mga anghel, na ginagamit ni Jehova tanganing pugolan an paghokom sagkod sa itinalaan na panahon. Kun butasan na kan mga anghel an mga doros na idto kan grabeng kaanggotan nin Dios tanganing sarabay na mag-ipoipo hale sa amihanan, timog, sirangan, asin solnopan, grabe nanggad an mangyayaring pagkadestroso. Makakaagid iyan, alagad sa dakulaon na sokol, sa paggamit ni Jehova kan apat na doros tanganing iwarak an suanoy na mga Elamita, na rinoronot asin pinopoho sinda. (Jeremias 49:36-38) Iyan magigin grabe kakosog na doros nin bagyo na mas nandedestrosar kisa sa “unos” na paagi kaiyan pinoho ni Jehova an nasyon nin Amon. (Amos 1:13-15) Mayong kabtang kan organisasyon ni Satanas digdi sa daga na makakatindog sa aldaw kan kabangisan ni Jehova, kun ibindikar na nia an saiyang soberaniya sagkod lamang.—Salmo 83:15, 18; Isaias 29:5, 6.

5. Paano nakakatabang sato an propesiya ni Jeremias na masabotan na an mga paghokom nin Dios magigin lakop sa bilog na daga?

⁵ Makakasierto daw kita na an mga paghokom nin Dios mandedestrosar sa bilog na daga? Hinanyoga giraray an saiyang propetang si Jeremias: “Uya! Sarong kalamidad an minaluwas pasiring sa sunod-sunod na nasyon, asin sarong makosog na unos an pupukawon hale sa kaporoporohi kan daga. Asin an pangagaradanon ni Jehova sa aldaw na iyan paghale sa sarong poro kan daga sagkod sa ibong na poro kan daga.” (Jeremias 25:32, 33) Durante kan maunos na bagyong ini na an kinaban na ini mapapatos nin kadikloman. An namamahalang mga ahensia kaiyan matatanyog sagkod na mapara. (Kapahayagan 6:12-14) Alagad dai magigin madiklom an ngapit para sa gabos. Kun siring, para kiisay na pinupugolan an apat na doros?

An Pagtatak sa mga Oripon nin Dios

6. Siisay an nagsasabi sa mga anghel na pugolan an apat na doros, asin ini nagtao nin panahon para sa ano?

⁶ Ilinadawan ngonyan ni Juan kun paano tatandaan an iba para sa kaligtasan, na sinasabi: “Asin nakaheling ako nin saro pang anghel na nag-iitaas hale sa sirangan, na may pantatak kan Dios na buhay; asin sia nagkurahaw sa makosog na tingog sa apat na anghel na tinogotan na mandanyar sa daga asin sa dagat, na an sabi: ‘Dai nindo pagdanyaran an daga o an dagat o an mga kahoy, sagkod na matatakan niamo an mga oripon kan satong Dios sa saindang angog.’”—Kapahayagan 7:2, 3.

7. Siisay talaga an ikalimang anghel, asin anong ebidensia an nakakatabang sato na maaraman kun siisay sia?

⁷ Minsan ngani dai nginaranan an ikalimang anghel na ini, an gabos na ebidensia nagpapaheling na sia an pinamuraway na Kagurangnan na Jesus. Kaoyon kan pagigin Arkanghel ni Jesus, ipinapaheling sia digdi na igwa nin autoridad sa ibang mga anghel. (1 Tesalonica 4:16; Judas 9) Nag-iitaas sia hale sa sirangan, siring “kan mga hade hale sa subangan”—si Jehova asin an saiyang Cristo—na minaabot sa paghokom, siring kan ginibo kan mga hadeng si Dario asin Ciro kan ibagsak ninda an suanoy na Babilonya. (Kapahayagan 16:12; Isaias 45:1; Jeremias 51:11; Daniel 5:31) An anghel na ini agid man ki Jesus huli ta sia pinaniwalaan na tatakan an linahidan na mga Kristiano. (Efeso 1:13, 14) Dugang pa, kun butasan na an mga doros, si Jesus an mangengenot sa langitnon na mga hukbo sa paghokom sa mga nasyon. (Kapahayagan 19:11-16) Kun siring, rasonable sana na si Jesus an magboot na pugolan nguna an paglaglag sa daganon na organisasyon ni Satanas sagkod na matatakan an mga oripon nin Dios.

8. Ano an pagtatak, asin kasuarin iyan nagpoon?

⁸ Ano an pagtatak na ini, asin sairisay an mga oripon na ini nin Dios? An pagtatak nagpoon kan Pentecostes 33 C.E. kan lahidan nin banal na espiritu an enot na Judiong mga Kristiano. Sa huri, inapod asin linahidan nin Dios an “mga tawo kan mga nasyon.” (Roma 3:29; Gibo 2:1-4, 14, 32, 33; 15:14) Nagsurat si apostol Pablo manongod sa pagkaigwa kan linahidan na mga Kristiano nin garantiya na sinda “sadiri ni Cristo” asin idinugang nia na an Dios “nagbugtak man kan saiyang tatak sa sato asin nagtao sa sato kan garantiya para sa maabot, arin na baga, an espiritu, sa satong puso.” (2 Corinto 1:21, 22; ikomparar an Kapahayagan 14:1.) Sa siring, kun an mga oripon na ini inaampon bilang espirituwal na mga aki nin Dios, sinda may inaakong garantiya antes pa kan saindang langitnon na mana—sarong tatak. (2 Corinto 5:1, 5; Efeso 1:10, 11) Kun siring, masasabi ninda: “An espiritu man sana nagpapatotoo kaiba kan satong  espiritu na kita mga aki nin Dios. Kun siring, kun kita mga aki, kita man mga paramana: mga paramana nanggad nin Dios, alagad kaibang mga paramana ni Cristo, basta kita iribang magdusa tangani na kita man iribang mapamuraway.”—Roma 8:15-17.

9. (a) Anong pakatagal an hinahagad sa natatada pang pinaniaki sa espiritung mga aki nin Dios? (b) Gurano kahaloy magpapadagos an pagbalo sa mga linahidan?

⁹ “Basta kita iribang magdusa”—ano an boot sabihon kaiyan? Tanganing akoon an korona nin buhay, an linahidan na mga Kristiano kaipuhan na magtagal, maimbod dawa sagkod sa kagadanan. (Kapahayagan 2:10) Bako iyan na ‘oras na maligtas, pirme nang ligtas.’ (Mateo 10:22; Lucas 13:24) Imbes, sinasadol sinda: “Gibohon an saindong bilog na makakaya tanganing masierto an pag-apod asin pagpili sa saindo.” Kapareho ni apostol Pablo, dapat na masabi ninda sa katapustapusi: “Nakipaglaban ako kan marahay na pakilaban, natapos ko an paorumbasan, naingatan ko an pagtubod.” (2 Pedro 1:10, 11; 2 Timoteo 4:7, 8) Kaya kaipuhan na magpadagos digdi sa daga an pagbalo asin pagsaligsig sa natatada pang pinaniaki sa espiritung mga aki nin Dios sagkod na piho nang ikabugtak ni Jesus asin kan saiyang kairibang anghel an tatak ‘sa angog’ kan gabos na ini, na sa dai na mapagdududahan, dai na mababawing paagi, nagpapamidbid sainda bilang nabalo asin maimbod na “mga oripon kan satong Dios.” Dangan an tatak na iyan nagigin permanenteng marka. Minalataw na, kun butasan na an apat na doros kan kahorasaan, natatakan na nin pinal an gabos na kabilang sa espirituwal na Israel, minsan ngani nabubuhay pa sa laman an nagkapira. (Mateo 24:13; Kapahayagan 19:7) Magigin kompleto na an mga miembro!—Roma 11:25, 26.

Pira an Tatatakan?

10. (a) Anong mga kasuratan an nagpaparisa na limitado an kabilangan kan mga tinatakan? (b) Ano an total na kabilangan kan mga tinatakan, asin paano sinda ilinista?

¹⁰ Sinabi ni Jesus sa mga mag-aako kan pagtatak na ini: “Dai kamo matakot, sadangoton na aripompon, huli ta an saindong Ama nag-oyon na itao sa saindo an kahadean.” (Lucas 12:32) Ipinaparisa nin ibang kasuratan, siring kan Kapahayagan 6:11 asin Roma 11:25, na an kabilangan kan sadangoton na aripompon na ini limitado nanggad asin, sa katunayan, dineterminaran antes pa. Kinokompirmar ini kan sunod na mga tataramon ni Juan: “Asin nadangog ko an kabilangan kan mga tinatakan, siento kuarenta y kuatro mil, na tinatakan hale sa lambang tribo kan mga aki ni Israel: Hale sa tribo ni Juda dose mil an tinatakan; hale sa tribo ni Ruben dose mil; hale sa tribo ni Gad dose mil; hale sa tribo ni Aser dose mil; hale sa tribo ni Neftali dose mil; hale sa tribo ni Manases dose mil; hale sa tribo ni Simeon dose mil; hale sa tribo ni Levi dose mil; hale sa tribo ni Isacar dose mil; hale sa tribo ni Zabulon dose mil; hale sa tribo ni Jose  dose mil; hale sa tribo ni Benjamin dose mil an tinatakan.”—Kapahayagan 7:4-8.

11. (a) Taano an pagkasambit sa 12 tribo ta dai puedeng umaplikar sa literal, sa laman na Israel? (b) Taano ta ilinilista kan Kapahayagan an 12 tribo? (c) Taano ta mayo nin tribo sa Israel nin Dios na eksklusibong paghahalean nin mga hade o saserdote?

¹¹ Dai daw ini nanonongod sa literal, sa laman na Israel? Dai, huli ta dai sinusunod kan Kapahayagan 7:4-8 an nakatodan na paglista kan mga tribo. (Bilang 1:17, 47) Malinaw na an paglista digdi bakong sa katuyohan na ngaranan an mga Judio sa laman paagi kan saindang mga tribo kundi tanganing ipaheling an kaagid na organisasyonal na estruktura kan espirituwal na Israel. Timbang ini. Magkakaigwa nin eksaktong 144,000 na miembro an bagong nasyon na ini—12,000 hale sa lambang saro kan 12 tribo. Mayong tribo sa Israel na ini nin Dios na eksklusibong paghahalean nin mga hade o saserdote. An bilog na nasyon mamamahala bilang mga hade, asin an bilog na nasyon maglilingkod bilang mga saserdote.—Galacia 6:16; Kapahayagan 20:4, 6.

12. Taano ta angay na awiton kan 24 kamagurangan an mga tataramon sa Kapahayagan 5:9, 10 sa atubangan kan Kordero?

¹² Minsan ngani mga Judio sa laman asin Judiong mga proselita an tinawan kan enot na oportunidad na pilion para sa espirituwal na Israel, minoriya sana sa nasyon na iyan an naghimate. Kun siring, ipinaabot ni Jehova an imbitasyon sa mga Hentil. (Juan 1:10-13; Gibo 2:4, 7-11; Roma 11:7) Kapareho kan nangyari sa mga taga Efeso, na kaidto “siblag sa estado nin Israel,” ngonyan an mga bakong Judio puede nang tatakan kan espiritu nin Dios asin magin kabtang kan kongregasyon kan linahidan na mga Kristiano. (Efeso 2:11-13; 3:5, 6; Gibo 15:14) Angay kun siring na an 24 kamagurangan umawit sa atubangan kan Kordero: “Paagi kan saimong dugo nagbakal ka nin mga tawo para sa Dios hale sa lambang tribo asin lenguahe asin banwaan patin nasyon, asin ginibo mo sindang sarong kahadean asin mga saserdote para sa satong Dios, asin sinda mamamahala bilang mga hade sa daga.”—Kapahayagan 5:9, 10.

13. Taano ta tama sana na ipadara kan tugang ni Jesus sa ina na si Santiago an saiyang surat “sa doseng tribo na wararak”?

¹³ An Kristianong kongregasyon “rasang pinili, sa hadeng grupo nin mga saserdote, banal na nasyon.” (1 Pedro 2:9) Sinasalidahan an Israel sa laman bilang nasyon nin Dios, iyan nagigin bagong Israel na iyo an “tunay na ‘Israel.’” (Roma 9:6-8; Mateo 21:43) * Huli sa rason na ini, tama sana na ipadara kan tugang ni Jesus sa ina na si Santiago an saiyang surat para sa  espirituwal na pagpastor “sa doseng tribo na wararak,” an boot sabihon, sa pambilog na kinaban na kongregasyon nin linahidan na mga Kristiano na sa maabot na panahon magigin 144,000 an kabilangan.—Santiago 1:1.

An Israel nin Dios Ngonyan

14. Ano an nagpapaheling na an Mga Saksi ni Jehova daing liwat-liwat na naniwala na an 144,000 iyo an literal na kabilangan kan mga minakompuesto sa espirituwal na Israel?

¹⁴ Interesante nanggad, namidbid ni Charles T. Russell na an 144,000 literal na kabilangan nin mga indibiduwal na minakompuesto sa espirituwal na Israel. Sa The New Creation, Tomo VI kan saiyang Studies in the Scriptures, na ipinublikar kan 1904, isinurat nia: “Yaon sato an gabos na dahelan na maniwala na an depinido, pihong kabilangan kan mga pinili [piniling mga linahidan] iyo an nagkapirang beses na sinambit sa Kapahayagan (7:4; 14:1); arin na baga, an 144,000 na ‘binalukat hale sa mga tawo.’” Sa Light, Book One, na ipinublikar kan Mga Estudyante sa Biblia kan 1930, sinabi man: “Sa siring, an 144,000 na miembro kan hawak ni Cristo nasa katiriponan na ipinaheling bilang pinili asin linahidan, o tinatakan.” Daing liwat-liwat na pinangaptan kan Mga Saksi ni Jehova an punto-de-vista na literal na 144,000 na linahidan na Kristiano an minakompuesto sa espirituwal na Israel.

15. Bago mismo kan aldaw kan Kagurangnan, ano an hinona kan sinserong mga estudyante sa Biblia na makakamtan kan mga Judio sa laman pagkatapos kan Mga Panahon kan mga Hentil?

¹⁵ Minsan siring, dai daw maninigo sa kadikit na espesyal na pabor an Israel sa laman ngonyan? Kaidtong panahon bago mismo an aldaw kan Kagurangnan, kan nadidiskobre giraray kan sinserong mga estudyante sa Biblia an dakol sa pundamental na mga katotoohan sa Tataramon nin Dios, hinona na sa pagtatapos kan Mga Panahon kan mga Hentil an mga Judio magkakaigwa giraray nin pribilehiadong kamugtakan sa atubangan nin Dios. Sa siring, iinaplikar kan libro ni C. T. Russell na The Time Is at Hand (Tomo II kan Studies in the Scriptures), na ipinublikar kan 1889, an Jeremias 31:29-34 sa mga Judio sa laman, asin nagkomento: “An kinaban saksi sa katotoohan na an padusa sa Israel sa irarom nin pagsakop kan mga Hentil nagpadagos magpoon kan B.C. [607], na iyan nagpapadagos pa, asin na mayong rason na laoman an saindang nasyonal na reorganisasyon nin mas amay kisa sa A.D. 1914, an sagkodan kan saindang ‘pitong panahon’—2520 taon.” Garo baga makakaeksperyensia nin nasyonal na pagbabalik sa dati an mga Judio sa panahon na iyan, asin minalataw na nagliwanag an paglaom na ini kan 1917, kan ipanuga kan Deklarasyon nin Balfour an suporta kan Britania sa paggibo sa Palestina na magin nasyonal na erokan kan mga Judio.

16. Anong mga pagmamaigot an ginibo kan mga Saksi ni Jehova tanganing mapaabotan kan Kristianong mensahe an mga Judio sa laman, asin ano an resulta?

¹⁶ Pagkatapos kan enot na guerra mundial, an Palestina nagin teritoryong itinao sa Gran Britania sakop nin sarong mandato, asin nagkaigwa na nin oportunidad an dakol na Judio na makabalik sa dagang iyan. Kan 1948 naestablisar an politikal na Estado nin Israel. Dai daw ini nagpaheling na may nakatagamang mga bendisyon nin Dios para sa mga Judio? Sa dakol na taon, ini an paniniwala kan Mga Saksi ni Jehova. Sa siring, kan 1925 ipinublikar ninda an 128-pahinas na librong Comfort for the Jews. Kan 1929 ilinuwas ninda an nakakaatraer na 360-pahinas na tomo, an Life, na dinisenyo tanganing makaakit sa mga Judio asin tinotokar man kaiyan an libro sa Biblia na Job. Ginibo an dakulang mga pagmamaigot, nangorogna sa Siudad nin Nueva York, tanganing mapaabotan kan Mesiyanikong mensaheng ini an mga Judio. Makaoogma, may nagkapirang naghimate, alagad sa pangkagabsan, isinikwal kan mga Judio, siring kan saindang mga apoon kan enot na siglo, an ebidensia kan presensia kan Mesiyas.

17, 18. Ano an nasabotan kan mga oripon nin Dios digdi sa daga mapadapit sa bagong tipan asin sa mga propesiya kan Biblia manongod sa pagbabalik sa dati?

¹⁷ Sayod na sayod na an Kajudiohan, bilang sarong banwaan asin bilang sarong nasyon, bakong iyo an Israel na ilinadawan sa Kapahayagan 7:4-8 o sa iba pang propesiya kan Biblia na konektado sa aldaw kan Kagurangnan. Sa pagsunod sa tradisyon, an mga Judio padagos na naglikay sa paggamit kan ngaran nin Dios. (Mateo 15:1-3, 7-9) Sa pagtokar kan Jeremias 31:31-34, sinabi bilang konklusyon kan librong Jehovah, na ipinublikar kan Mga Saksi ni Jehova kan 1934: “An bagong tipan mayong koneksion sa mga gikan ni Israel sa laman asin sa katawohan  sa pangkagabsan, kundi . . . sa espirituwal na Israel sana.” An mga propesiya kan Biblia manongod sa pagbabalik sa dati mayong koneksion sa mga Judio sa laman ni sa politikal na Israel, na miembro kan Naciones Unidas asin kabtang kan kinaban na sinabi ni Jesus sa Juan 14:19, 30 asin 18:36.

¹⁸ Kan 1931 inako kan mga oripon nin Dios digdi sa daga, na may dakulang kagayagayahan, an ngaran na Mga Saksi ni Jehova. Bilog na puso sindang makakaoyon sa mga tataramon sa Salmo 97:11: “An liwanag suminilyab para sa matanos, asin an kagayagayahan para ngani sa mga tanos an puso.” Malinaw nindang namansayan na solamente an espirituwal na Israel an inako sa bagong tipan. (Hebreo 9:15; 12:22, 24) An dai naghimateng Israel sa laman mayong kabtang dian, ni an katawohan sa pangkagabsan. An pakasabot na ini iyo an nag-andam kan dalan para sa masulang pagsilyab kan liwanag hale sa Dios, na pambihira sa teokratikong kasaysayan. Ihahayag kaini kun gurano kaabunda na ipinapaabot ni Jehova an saiyang pagkaherak, mamomoton na kabootan, asin katotoohan sa gabos na tawo na minarani sa saiya. (Exodo 34:6; Santiago 4:8) Iyo, may iba pa apuera sa Israel nin Dios na makikinabang sa pagpugol kan mga anghel sa apat na doros nin kalaglagan. Sairisay daw ini? Puede daw kamong magin saro sa sainda? Helingon niato ngonyan.

[Nota sa Ibaba]

[Mga Hapot Para sa Pag-adal]

 [Bilog na pahinang ritrato sa pahina 114]

[Mga ritrato sa pahina 116, 117]

An pangkagabsan na pagpili kan tunay na Israel nin Dios nangyari poon kan aldaw nin Pentecostes 33 C.E. sagkod 1935 kan, sa sarong historikong kombension kan Mga Saksi ni Jehova sa Washington, D.C., an pagdodoon napasiring sa pagtipon nin sarong dakulang kadaklan na may esperansang mabuhay digdi sa daga (Kapahayagan 7:9)