Kapitulo 21

An Aldaw nin Paghokom Asin Pakalihis Kaiyan

1. Ano an opinyon nin kadaklan manongod sa Aldaw nin Paghokom?

 ANO an naiimahinar nindo sa Aldaw nin Paghokom? An iba iniimahinar an sarong dakulang trono, asin sa atubangan kaiyan an halabang linya nin mga tawo na binuhay liwat hale sa mga gadan. Sa pag-agi kan lambang saro sa atubangan kan trono, sia hinohokoman basado sa saiyang nakaaging mga gibo, na an gabos nasusurat sa libro kan Hokom. Basado sa mga bagay na ginibo nia, an tawo pinaduduman magsalang sa langit o sa naglalaad na impierno.

2. (a) Siisay an nag-areglo para sa Aldaw nin Paghokom? (b) Siisay an ninombrahan nia bilang hokom?

² Minsan siring, an Biblia nagtatao nin laen na gayong paglaladawan sa Aldaw nin Paghokom. Iyan bakong aldaw na maninigong kahandalan o katakotan. Helinga an sinasabi kan Biblia manongod sa Dios: “Sia nagtalaan nin aldaw tanganing hokoman an ineerokan na daga sa katanosan paagi sa sarong lalaki na saiyang ninombrahan.” (Gibo 17:31) An hokom na ini na ninombrahan nin Dios siyempre iyo si Jesu-Cristo.

3. (a) Taano ta makaseseguro kita na si Cristo magigin makatanosan sa saiyang paghokom? (b) Basado sa ano na hohokoman an mga tawo?

³ Makaseseguro kita na si Cristo magigin makatanosan asin may hustisya sa saiyang paghokom. An sarong hula manongod sa saiya sa Isaias 11:3, 4 naggagarantiya kaini sa sato. Kaya, kontra sa opinyon nin kadaklan, dai nia hohokoman an mga tawo basado sa saindang nakaaging mga kasalan, na an kadaklan tibaad naginibo huli sa kadaihan nin pakaaram. Ipinaliliwanag kan Biblia na pagkagadan an saro nagigin talingkas o nabubutasan sa ano man na kasalan na saiyang naginibo. Iyan nagsasabi: “An nagadan nakabutas na sa saiyang kasalan.” (Roma 6:7) Ini nangangahulogan na kun an tawo buhayon liwat sia hohokoman basado sa saiyang gigibohon sa panahon kan Aldaw nin Paghokom, bakong basado sa saiyang ginibo bago sia nagadan.

4. (a) Magigin gurano kalawig an Aldaw nin Paghokom? (b) Siisay an magigin mga hokom kaiba ni Cristo?

⁴ Kun siring, an Aldaw nin Paghokom bakong literal na 24 oras.  Liniliwanag ini kan Biblia kan iyan magtaram manongod sa mga makakaibanan ni Jesu-Cristo sa paghokom. (1 Corinto 6:1-3) “Nakaheling ako nin mga trono,” sabi kan kagsurat sa Biblia, “asin may mga nakatukaw dian, asin sinda tinawan nin kapangyarihan nin paghokom.” An mga hokom na ini iyo an maimbod na linahidan na mga parasunod ni Cristo na, arog kan padagos na sinasabi kan Biblia, “nagkaburuhay asin naghade sa kaibanan ni Cristo sa laog nin sangribong taon.” Kaya an Aldaw nin Paghokom magigin 1,000 taon an lawig. Iyan man sana an 1,000 taon na peryodo nin panahon na dian si Cristo asin an saiyang 144,000 na maimbod na linahidan na mga parasunod maghahade bilang “bagong kalangitan” asin “bagong daga.”—Kapahayagan 20:4, 6; 2 Pedro 3:13.

5, 6. (a) Paano ilinadawan nin sarong salmista sa Biblia an Aldaw nin Paghokom? (b) Kumusta an magigin buhay sa daga sa Aldaw nin Paghokom?

 ⁵ Helinga an mga pahina 176 asin 177 sa librong You Can Live Forever in Paradise on Earth. Iyan nagtatao nin ideya kun magigin gurano kamakangangalas kan Aldaw nin Paghokom para sa katawohan. An salmista sa Biblia nagsurat manongod sa mamuraway na panahon na iyan: “Mag-ogma an oma asin an gabos na yaon dian. Kadungan kaiyan kumurahaw sa kaogmahan an gabos na kakahoyan sa kadlagan sa atubangan ni Jehova. Huli ta sia nagdatong; huli ta sia nagdatong sa paghokom sa daga. Hohokoman nia an mabungang daga sa katanosan asin an mga banwaan sa saiyang kaimbodan.”—Salmo 96:12, 13.

⁶ Sa panahon kan Aldaw nin Paghokom an mga makakaligtas sa Armagedon magtatrabaho tanganing gibohon na paraiso an daga. Sa paraisong ini bubuhayon liwat an mga gadan. (Lucas 23:43) Kanigoan na kaogmahan an mamamatean  kun an mga pamilya na haloy na pinagsuhay nin kagadanan magkairiba giraray! Iyo, kanigoan kaogma na mabuhay sa katoninongan, tanganing magkaigwa nin marahay na salud asin umako nin instruksion manongod sa mga katuyohan nin Dios! An Biblia nagsasabi: “Kun igwa nin mga paghokom gikan sa saimo para sa daga, an katanosan iyo an manonodan kan mga nag-eerok sa mabungang daga.” (Isaias 26:9) Sa panahon kan Aldaw nin Paghokom an gabos na tawo makakanood manongod ki Jehova, asin tatawan sinda kan gabos na oportunidad na kumuyog asin maglingkod sa saiya.

7. Sa Aldaw nin Paghokom, ano an mangyayari sa mga pipilion na maglingkod sa Dios asin sa mga masayumang gibohon iyan?

⁷ Sa siring na mga kamugtakan sa paraiso na si Jesu-Cristo asin an saiyang 144,000 na kairibang hade maghohokom sa katawohan. An mga tawo na nagpili na maglingkod ki Jehova mag-aako nin buhay na daing katapusan. Alagad, dawa sa irarom kan pinakamarahay na mga kamugtakan na ini, an iba masayumang maglingkod sa Dios. Arog kan sinasabi kan Kasuratan: “Minsan pa pahelingan nin marahay na boot an sarong maraot, dai nanggad sia makakanood nin katanosan. Sa daga nin katanosan sia magibo nin bakong makatanosan.” (Isaias 26:10) Kaya pakatapos na matawan nin bilog na oportunidad na magbakle asin makanood nin katanosan, an siring na maraot na mga tawo lalaglagon. An iba gagadanon na bago pa man matapos an Aldaw nin Paghokom. (Isaias 65:20) Dai sinda totogotan na magdanay tanganing raoton o pakanuson an paraisong daga.

8. Paano ipinaheling ni Jesus na sa Aldaw nin Paghokom magigin mas depisil para sa nagkapira na gumibo nin katanosan ki sa iba?

 ⁸ Magigin mas masakit daw para sa nagkapira sa binuhay liwat na gadan na makanood asin gumibo nin katanosan ki sa iba? Kan si Jesu-Cristo nasa daga, ipinarisa nia na iyo. An kadaklan na hinulitan nia asin kan saiyang mga disipulo dai naghinanyog. Isinikwal ninda si Jesus bilang an Mesiyas, dawa pakatapos na madangog an saiyang paghuhulit asin maheling sia na nagmimilagro. Kan isinusugo an saiyang mga disipulo na maghulit, si Jesus nagsabi manongod sa sarong siudad na masikwal sa saindang mensahe: “Sa katotoohan ako nagsasabi saindo, magian pa para sa daga nin Sodoma asin Gomorra sa Aldaw nin Paghokom ki sa siudad na iyan.”—Mateo 10:15.

9, 10. (a) Siisay na mga bakong matanos an bubuhayon liwat sa Aldaw nin Paghokom? (b) Taano ta magigin mas masakit para sa ibang bakong matanos ki sa ibang bakong matanos?

⁹ Sa pagsabi kaini, ipinarisa ni Jesus na kisuerra an nagkapira sa bakong matanos na mga tawo na tagasuanoy na Sodoma asin Gomorra yaon sa daga sa panahon kan Aldaw nin Paghokom. Minsan ngani sinda nagin inmoral na gayo, makakalaom kita na an iba sa sainda bubuhayon liwat. (Genesis 19:1-26) Si Jehova huli sa saiyang pagkaherak bubuhayon sinda liwat tanganing magkaoportunidad sinda na makanood manongod sa saiyang mga katuyohan. Alagad ipinarisa man kan mga tataramon ni Jesus na an iba sa mga maraot na personal na hinulitan nia asin kan saiyang mga disipulo yaon man sa Aldaw nin Paghokom. Sinda man bubuhayon liwat asin tatawan nin dagdag pang oportunidad na makanood kan mga katuyohan nin Dios. Para kiisay magigin mas masakit na akoon si Cristo bilang hade sa panahon na iyan? Para sa mga tagasuanoy na Sodoma o para sa mga nagsikwal sa paghuhulit ni Jesus asin kan saiyang mga disipulo?

¹⁰ Magigin mas masakit para sa mga personal na nagsikwal ki Jesus. Sa pagtaram manongod sa Capernaum, an saro sa mga siudad na pinagmilagrohan nia, si Jesus nagsabi: “Kun an mga ngangalasan na nangyari sa saimo nangyari sa Sodoma, iyan kutana nagdanay sagkod sa aldaw mismong ini. Kaya sinasabi ko sa saindo banwaan, Magigin magian pa para sa daga nin Sodoma sa Aldaw nin Paghokom ki sa saimo.” (Mateo 11:22-24) Iyo, sa Aldaw nin Paghokom magigin mas masakit pa para sa mga taga-Capernaum na admitiron an saindang sala asin akoon saka paglingkodan si Cristo bilang hade ki sa para sa mga tagasuanoy na Sodoma na makanood nin katanosan.

11. Taano ta magigin pasil sa Aldaw nin Paghokom para sa “mga matanos” ki sa siisay pa man na “bakong matanos”?

¹¹ Kaya magigin mas pasil para sa nagkapirang “bakong matanos” na binuhay liwat na makanood manongod sa Dios asin maglingkod sa saiya  kisa ibang “bakong matanos.” (Mateo 12:41, 42) Kun siring, kumusta man an “mga matanos” na bubuhayon liwat—mga tawo na kapareho ni Abraham, Isaac, Job, Debora, Rut, Daniel asin iba pa? Bago sinda nagadan sinda gabos naglaom sa pagdatong kan Mesiyas. Magigin maogmahon nanggad sinda sa Aldaw nin Paghokom na makanood manongod sa saiya, asin na sia naghahade sa langit! Kaya magigin mas pasil para sa mga “matanos” na ini na gumibo nin katanosan sa panahon na iyan ki sa siisay pa man sa mga “bakong matanos.”—Gibo 24:15.

MGA PAGKABUHAY LIWAT SA “BUHAY” ASIN SA “PAGHOKOM”

12. Sono sa Juan 5:28-30, siisay an mag-aako nin “pagkabuhay liwat sa buhay,” asin siisay an mag-aako nin “pagkabuhay liwat sa paghokom”?

¹² Sa paglaladawan kan situwasyon sa Aldaw nin Paghokom, si Jesus nagsabi: “An gabos na mga nasa lolobngan nin girumdoman makakadangog kan saiyang tingog asin maruluwas, idtong naggiribo nin marahay sa pagkabuhay liwat sa buhay, idtong naggiribo nin maraot sa pagkabuhay liwat sa paghokom. . . . sono sa sakong nadangog, ako naghohokom; asin an paghokom na sakuyang ginigibo matanos, huli ta pinagmamaigotan kong maotob, bakong an sadiri kong kabotan, kundi an kabotan nia na nagsugo sa sako.” (Juan 5:28-30) Ano ining “pagkabuhay liwat sa buhay,” asin ano an “pagkabuhay liwat sa paghokom?” Asin siisay an mag-aako kaiyan?

13. Ano an magigin kahulogan para sa tawo na umako nin “pagkabuhay liwat sa buhay”?

¹³ Malinaw na niatong nasabotan na kun an mga gadan lumuwas na sa lolobngan, sinda dai hohokoman basado sa saindang nakaaging mga gibo. Imbes, sinda hohokoman basado sa gigibohon ninda sa panahon kan Aldaw nin Paghokom. Kaya kan sabihon ni Jesus “idtong naggiribo nin marahay” asin “idtong naggiribo nin maraot,” an boot niang sabihon iyo an marahay na mga bagay asin maraot na mga bagay na gigibohon ninda sa panahon kan Aldaw nin Paghokom. Huli sa marahay na mga bagay na saindang gigibohon, an kadaklan sa binuhay liwat maoswag pasiring sa pagkasangkap nin tawo sa katapusan kan 1,000 taon na Aldaw nin Paghokom. Kaya an saindang pagkabuhay liwat hale sa mga gadan magigin “pagkabuhay liwat sa buhay,” huli ta sinda makakaabot sa sangkap na buhay na daing kasalan.

14. Ano an magigin kahulogan para sa saro na umako nin “pagkabuhay liwat sa paghokom”?

¹⁴ Sa ibong na kampi, kumusta man an ‘naggiribo nin maraot’ sa panahon kan Aldaw nin Paghokom? An saindang pagbuwelta hale sa mga gadan magigin “pagkabuhay liwat sa paghokom.” Ano an boot  sabihon kaini? Ini nangangahulogan nin paghokom o pagkakondenar sa kagadanan. Kaya an mga tawong ini lalaglagon magsalang sa laog kan o sa katapusan kan Aldaw nin Paghokom. An dahelan iyo na sinda naggigibo nin maraot; matagas an payo na sinda nagsasayumang makanood asin gumibo nin katanosan.

KUN NOARIN MAPOON AN ALDAW NIN PAGHOKOM

15. Ano an mangyayari bago pumoon an Aldaw nin Paghokom?

¹⁵ Naheling ni apostol Juan sa bisyon kun ano an mangyayari bago an Aldaw nin Paghokom. Sia nagsurat: “Nakaheling ako nin dakulang puting trono asin an saro na nakatukaw dian. Hale sa saiyang atubangan an daga asin an langit nagdulag, . . . Asin naheling ko an mga gadan, an darakula asin saradit, na nagtitindog sa atubang kan trono . . . Asin hinokoman an mga gadan.” (Kapahayagan 20:11, 12) Kaya bago pumoon an Aldaw nin Paghokom, an presenteng palakaw na ini nin mga bagay na kompuwesto kan “daga asin langit” mawawara. Solamente an mga naglilingkod sa Dios an maliligtas, mantang an gabos na maraot lalaglagon sa Armagedon.—1 Juan 2:17.

16. (a) Siisay apuwera sa mga gadan an hohokoman sa Aldaw nin Paghokom? (b) Basado sa ano na sinda hohokoman?

¹⁶ Kaya bako sanang an binuhay liwat na “mga gadan” an hohokoman sa Aldaw nin Paghokom. An “mga nabubuhay” na makaliligtas sa Armagedon, saka an siisay man na magin aki ninda, hohokoman man. (2 Timoteo 4:1) Sa saiyang bisyon naheling ni Juan kun paano sinda hinokoman. “Asin an mga balumbon biniriklad,” an surat nia. “Asin hinokoman an mga gadan sono sa mga bagay na nasusurat sa mga balumbon oyon sa saindang mga gibo. Asin itinao kan dagat an mga gadan na yaon dian, asin itinao kan kagadanan asin kan Hades an mga gadan na yaon dian, asin an lambang saro hinokoman oyon sa saindang mga gibo.”—Kapahayagan 20:12, 13.

17. Ano an “mga balumbon” na gikan dian hohokoman an “mga buhay” asin an “mga gadan”?

¹⁷ Ano an “mga balumbon” na biniriklad na gikan dian an “mga gadan” saka an “mga buhay” hinokoman? Malinaw na iyan dagdag pa sa satong presenteng Banal na Biblia. An mga iyan ipinasabong na mga kasuratan o libro na igwa kan mga ley asin instruksion ni Jehova. Paagi sa pagbasa kaini an gabos na tawo sa daga makakaaram kan kabotan nin Dios. Dangan, basado sa mga ley asin instruksion sa mga “mga balumbon” na ini, an gabos sa daga hohokoman. An mga makuyog sa mga nasusurat dian maako kan mga pakinabang sa pantubos na atang ni Cristo, asin sinda luway-luway na maoswag pasiring sa pagkasangkap nin tawo.

18. (a) Ano an magigin situwasyon sa katapusan kan Aldaw nin Paghokom? (b) Sa anong paagi na an “mga gadan” mabubuhay sa katapusan kan 1,000 taon?

 ¹⁸ Sa katapusan kan 1,000 taon na Aldaw nin Paghokom mayo na nin siisay man sa daga na nasa magagadanon na kamugtakan huli sa kasalan ni Adan. Tunay na, sa pinakalubos na sentido an gabos nabuhay na. Ini an boot sabihon kan Biblia kun iyan nagsasabi: “An iba kan mga gadan [an apuwera sa 144,000 na nagsakat sa langit] dai nabuhay sagkod na natapos an sangribong taon.” (Kapahayagan 20:5) An pagkasabi digding “an iba kan mga gadan” dai nangangahulogan na an iba bubuhayon liwat sa katapusan kan 1,000 taon na Aldaw nin Paghokom. Imbes, iyan nangangahulogan na an gabos mabubuhay sa sentido na sa katapustapusi sinda makakaabot sa pagkasangkap nin tawo. Sinda magigin sangkap kapareho ni Adan asin Eva sa tatamnan nin Eden. Ano na ngonyan an mangyayari?

PAKALIHIS KAN ALDAW NIN PAGHOKOM

19. Ano an gigibohon ni Cristo sa katapusan kan Aldaw nin Paghokom?

¹⁹ Mantang nagibo na an gabos na ipinagigibo sa saiya nin Dios, itatao na ni Jesu-Cristo “an kahadean sa saiyang Dios asin Ama.” Ini sa katapusan kan 1,000 taon na Aldaw nin Paghokom. Sa panahon na iyan an gabos na kaiwal napara na. An ultimo digdi iyo an kagadanan na minana ki Adan. Iyan lalaglagon! Dangan an Kahadean magigin rogaring ni Jehova Dios. Sia direktang magsasakop dian bilang Hade.—1 Corinto 15:24-28.

20. (a) Ano an gigibohon ni Jehova tanganing aramon kun kiisay na ngaran an isusurat sa “libro nin buhay”? (b) Taano ta angay an ultimong pagbalo sa katawohan?

²⁰ Paano aaramon ni Jehova kun kiisay an mga ngaran an isusurat sa “balumbon nin buhay,” o “libro nin buhay”? (Kapahayagan 20:12, 15) Iyan paagi sa sarong pagbalo sa katawohan. Girumdoma kun paano si Adan asin Eva dai nakapasar sa pagbalong iyan, asin kun paano si Job, kan baloon, nagdanay sa integridad. Alagad an kadaklan na tawo na mabubuhay sagkod sa katapusan kan 1,000 taon dai pa noarin man nabalo an saindang pagtubod. Bago sinda buhayon liwat sinda ignorante sa mga katuyohan ni Jehova. Kabtang sinda kan maraot na palakaw nin mga bagay ni Satanas; sinda “bakong matanos.” Dangan, pagkabuhay ninda liwat, pasil para sa sainda na maglingkod ki Jehova huli sa pag-erok sa Paraiso na daing ano man na pagtumang an Diablo. Alagad an binilyon daw na mga tawong ini, na sangkap na sa panahon na iyan, maglilingkod ki Jehova kun si Satanas tawan nin oportunidad na probaran na papondohon sinda sa paggibo kaiyan? Kaya daw ni Satanas na gibohon sa sainda an ginibo nia sa sangkap na si Adan asin Eva?

21. (a) Paano ipapabalo ni Jehova an katawohan? (b) Kun tapos na an pagbalo, ano an mangyayari sa gabos na napapalabot?

 ²¹ Tanganing masimbag an siring na mga hapot, bubutasan ni Jehova si Satanas asin an saiyang mga demonyo sa bungaw na namugtakan ninda sa laog nin 1,000 taon. Ano an resulta? Ipinaheheling kan Biblia na si Satanas magigin mapanggana sa pagpatalikod sa nagkapira sa paglilingkod ki Jehova. An mga ini magigin siring sa “mga baybay sa dagat,” na nangangahulogan na dai maaraman an saindang kabilangan. Pakagiboha kan pagbalong ini, si Satanas asin an saiyang mga demonyo, saka an mga dai makakapasar sa pagbalo, iaapon sa simbolikong “danaw nin kalayo,” na iyo an ikaduwang (daing sagkod) kagadanan. (Kapahayagan 20:7-10, 15) Alagad idtong mga manonompongan an saindang ngaran na nasusurat sa “libro nin buhay” magdadanay sa mamuraway na daganon na paraiso. An pagkasurat kan saindang ngaran sa “libro nin buhay” nangangahulogan na hinokoman sinda ni Jehova na sangkap an pagigin matanos sa puso, isip asin hawak asin sa siring maninigo na mabuhay sagkod lamang sa paraiso sa daga.

AN ALDAW NIN PAGHOKOM SA PRESENTE

22. Tanganing maheling an Aldaw nin Paghokom asin an ultimong pagbalo sa katawohan, ano an dapat na maligtasan niato ngonyan?

²² Kaya an Biblia nagtatao nin impormasyon manongod sa mga mangyayari sa maabot na labing 1,000 taon. Asin ipinaheheling kaiyan na mayo nin dahelan na matakot sa natatagama sa ngapit. Alagad an hapot iyo ini: Yaon daw kamo duman tanganing kamtan an marahay na mga bagay na itinagama ni Jehova Dios? Ini depende sa kun baga makakaligtas kamo sa mas amay na aldaw nin paghokom, arin na baga, an presenteng “aldaw nin paghokom asin kalaglagan kan maraot na mga tawo.”—2 Pedro 3:7.

23. (a) Sa anong duwang klase pinagbubulagbulag ngonyan an mga tawo? (b) Ano an mangyayari sa lambang klase, asin taano?

²³ Iyo, poon kan si Cristo bumuwelta asin tumukaw sa saiyang langitnon na trono, an bilog na katawohan hinohokoman na. An presenteng “aldaw nin paghokom” na ini maeenot sa 1,000 taon na Aldaw nin Paghokom. Sa presenteng paghokom an mga tawo pinagbubulagbulag bilang “mga kanding” sa wala ni Cristo o bilang “mga karnero” sa saiyang too. An “mga kanding” lalaglagon ta sinda dai nakakatabang sa linahidan na “mga tugang” ni Cristo sa saindang paglilingkod sa Dios. Pag-abot nin panahon, ipinaheheling kan “mga kanding” na ini na sinda habong magsolsol na mga parakasala, maraot, matagas na sa saindang paggibo nin karatan. Sa ibong na kampi, an “mga karnero” bebendisyonan nin buhay na sakop kan Kahadean ta sinda nagsusuportar sa “mga tugang” ni Cristo sa gabos na paagi.—Mateo 25:31-46.

[Mga Hapot Para sa Pag-adal]

[Mga ritrato sa pahina 178]

Taano ta sinabi ni Jesus na magigin magian pa sa Aldaw nin Paghokom para sa mga taga-Sodoma?