Kapitulo 23

An Naheheling na Organisasyon nin Dios

1. Ano an sinasabi kan Biblia manongod sa dai naheheling na organisasyon nin Dios?

 TAANO ta makaseseguro kita na an Dios igwa nin naheheling na organisasyon? An sarong dahelan iyo na sia igwa nin dai naheheling na organisasyon. Si Jehova naglalang nin mga kerubin, mga serafin asin dakol pang ibang anghel tanganing gumibo kan saiyang kabotan sa kalangitan. (Genesis 3:24; Isaias 6:2, 3; Salmo 103:20) Si Jesu-Cristo iyo an Arkanghel na pinakahalangkaw sa sainda gabos. (1 Tesalonica 4:16; Judas 9; Kapahayagan 12:7) Ilinaladawan kan Biblia an mga anghel na inorganisar sa “mga trono o mga kapangyarihan o mga gobyerno o mga autoridad.” (Colosas 1:16; Efeso 1:21) Sinda gabos naglilingkod sa pagboot ni Jehova, na sararong ginigibo an trabaho na ipinagigibo nia sa sainda.—Daniel 7:9, 10; Job 1:6; 2:1.

2. Paano ipinaheheling kan pagkalalang nin Dios sa satong materyal na uniberso na sia nagpapahalagang gayo sa organisasyon?

² Magkakaideya man kita sa halaga na ibinubugtak nin Dios sa organisasyon kun kokonsideraron niato an saiyang materyal na mga linalang. Halimbawa, may rinibong bilyon na bitoon sa uniberso na inareglo sa darakulang grupo nin inaapod na mga galaksia. An mga galaksiang ini nagbibiyahe sa espasyo sa aregladong paagi, siring man an indibiduwal na mga bitoon asin planeta na nasa laog kan mga galaksiang ini. Halimbawa, an satong planetang Daga taon-taon naglilibot sa aldaw, na iyo an pinakaharaning bitoon sa sato, sa laog nin eksaktong 365 aldaw, 5 oras, 48 minutos asin 45.51 segundos. Iyo, an materyal na uniberso organisado nanggad!

3. Ano an itinotokdo sa sato kan marahay na organisasyon sa tahaw kan dai naheheling na mga linalang nin Dios asin sa saiyang materyal na uniberso?

³ May itinotokdo daw sa sato an makangangalas na organisasyon na ini sa tahaw kan dai naheheling na mga linalang nin Dios asin sa saiyang materyal na uniberso? Iyo, iyan nagtotokdo sato na si Jehova sarong Dios nin organisasyon. Kaya segurado na dai pababayaan nin siring na Dios an mga tawo sa daga na talagang namomoot sa saiya na mayo nin paggiya asin organisasyon.

 AN NAHEHELING NA ORGANISASYON NIN DIOS—KAN NAKAAGI ASIN SA PRESENTE

4, 5. Paano niato naaaraman na giniyahan nin Dios an saiyang banwaan sa organisadong paagi kan kaaldawan ni Abraham asin kan nasyon nin Israel?

⁴ Ipinaheheling kan Biblia na si Jehova perming naggigiya sa saiyang mga lingkod sa organisadong paagi. Halimbawa, an mga tawo na may pagtubod na kapareho ni Abraham nangenot sa saindang mga pamilya asin oripon sa pagsamba ki Jehova. Ipinaaram ni Jehova an saiyang kabotan ki Abraham paagi sa pakikipag-olay sa saiya. (Genesis 12:1) Asin sinabihan sia nin Dios na ipaabot an impormasyon na ini sa iba, na an sabi: “[Si Abraham] namidbid ko tanganing pagbotan nia an saiyang mga aki asin an saiyang harong na masunod sa saiya tangani na sinda magdanay sa dalan ni Jehova.” (Genesis 18:19) Uya an husay na areglo para sa sarong grupo nin mga tawo na sumamba ki Jehova sa tamang paagi.

⁵ Pakalihis nin mga taon, kan an mga Israelitas magdakol asin magin minilyon, dai pinabayaan ni Jehova na an lambang saro sumamba sa sadiri niang paagi, na siblag sa ano man na organisadong areglo. Dai, an mga Israelitas pinorma na magin sarong nasyon nin organisadong mga parasamba. An nasyon nin Israel inapod na “kongregasyon ni Jehova.” (Bilang 20:4; 1 Cronica 28:8) Kun kamo tunay na parasamba ki Jehova kaidto, kaipuhan na kamo magin kabtang kan kongregasyon na idto nin mga parasamba, bakong siblag dian.—Salmo 147:19, 20.

6. (a) Paano ipinaheling nin Dios na an saiyang pag-oyon nasa mga parasunod ni Cristo? (b) Ano an ebidensia na an mga Kristiano organisado para sa pagsamba?

⁶ Ano an kamugtakan kan enot na siglo? Ipinaheheling kan Biblia na an pag-oyon nin Dios nasa mga parasunod kan saiyang Aking si Jesu-Cristo. Ibinubo ni Jehova an saiyang banal na espiritu sa sainda.  Tanganing ipaheling na ginagamit na nia ngonyan an Kristianong organisasyon na ini imbes na an nasyon nin Israel, tinawan nia an nagkapirang enot na mga Kristiano nin kapangyarihan na magpaomay sa mga naghehelang, bumuhay sa mga gadan asin gumibo nin iba pang milagro. Dai nindo mababasa an Kristianong Griegong Kasuratan na dai kamo minahanga sa bagay na an mga Kristiano inorganisar para sa pagsamba. Sa katunayan, sinda pinagbotan na magtiripon para sa katuyohan na ini. (Hebreo 10:24, 25) Kaya kun kamo tunay na parasamba ki Jehova kan enot na siglo, kaipuhan na kamo kabtang kan saiyang Kristianong organisasyon.

7. Paano niato naaaraman na si Jehova dai naggamit nin labi sa sarong organisasyon sa ano man na partikular na panahon?

⁷ Si Jehova daw naggamit na nin labi sa sarong organisasyon sa ano man na peryodo nin panahon? Kan aldaw ni Noe solamente si Noe asin an mga kaiba nia sa laog kan dahong an igwa kan proteksion nin Dios asin nakaligtas sa baha. (1 Pedro 3:20) Siring man, kan enot na siglo mayo nin duwa o labi pang Kristianong mga organisasyon. Saro sana an inasikaso nin Dios. Igwa sana nin “sarong Kagurangnan, sarong pagtubod, sarong bautismo.” (Efeso 4:5) Siring man sa satong aldaw si Jesu-Cristo naghula na magkakaigwa nin saro sanang gikanan nin espirituwal na pagtotokdo para sa banwaan nin Dios.

8. Paano ipinarisa ni Jesus na magkakaigwa nin saro sanang naheheling na organisasyon nin Dios sa daga sa satong aldaw?

⁸ Kan nagtataram manongod sa saiyang presensia sa kapangyarihan sa Kahadean, si Jesus nagsabi: “Siisay man nanggad an maimbod asin madonong na oripon na pinaniwalaan kan saiyang kagurangnan sa saiyang mga domestiko, tanganing magtao sa sainda kan saindang kakanon sa igong panahon? Maogma an oripon na iyan kun sa pagdatong kan saiyang kagurangnan makua siang naggigibo nin siring. Sa katotoohan sinasabi ko sa saindo, Paniniwalaan nia sia kan gabos niang sadiri.” (Mateo 24:45-47) Sa saiyang pagbuwelta sa kapangyarihan kan Kahadean kan taon 1914, may nanompongan daw si Cristo na “maimbod asin madonong na oripon” na grupo na nagtatao nin espirituwal na “kakanon,” o impormasyon? Iyo, nanompongan nia an siring na “oripon” na kompuwesto kan mga natatada sa daga kan saiyang 144,000 na “mga tugang.” (Kapahayagan 12:10; 14:1, 3) Asin poon kan 1914 minilyon an nag-ako na sa “kakanon” na itinatao ninda, asin nagpoon na gumibo kan tunay na relihiyon kaiba ninda. An organisasyon na ini kan mga lingkod nin Dios inaapod na mga Saksi ni Jehova.

9. (a) Taano an mga lingkod nin Dios ta may ngaran na mga Saksi ni Jehova? (b) Taano ta inaapod nindang Kingdom Hall an saindang mga tiriponan?

⁹ An mga Saksi ni Jehova naglalaom sa Dios asin sa saiyang Tataramon para sa paggiya sa gabos nindang ginigibo. An mismong  ngaran ninda na mga Saksi ni Jehova nagpapaheling na an pangenot nindang aktibidad iyo an pagpatotoo manongod sa ngaran asin kahadean ni Jehova Dios, kapareho sa ginibo ni Cristo. (Juan 17:6; Kapahayagan 1:5) Saro pa, inaapod ninda an saindang tiriponan para sa pagsamba na Kingdom Hall ta an kahadean nin Dios paagi sa Mesiyas, o Cristo, iyo an tema kan bilog na Biblia. Mantang malinaw na an Kristianismo kan enot na siglo inoyonan nin Dios, iinaarog kan mga Saksi ni Jehova an saindang organisasyon dian. Helingon niato sa halipot an enot na Kristianong organisasyon dangan helingon niato an pagkakaparareho sa naheheling na organisasyon nin Dios ngonyan.

AROGAN KAN ENOT NA SIGLO

10. Ano an pirang bagay manongod sa Kristianong organisasyon kan enot na siglo?

¹⁰ Saen man igwa nin mga Kristiano kan enot na siglo, sinda nagtitiripon sa mga grupo para sa pagsamba. An mga kongregasyon na ini regular na nagtitiripon para sa pag-iriba-iba asin pag-adal. (Hebreo 10:24, 25) An pangenot nindang aktibidad iyo an paghuhulit asin pagtotokdo manongod sa kahadean nin Dios, kapareho ni Cristo. (Mateo 4:17; 28:19, 20) Kun an sarong miembro kan kongregasyon nagin maraot, sia pinaluluwas sa kongregasyon.—1 Corinto 5:9-13; 2 Juan 10, 11.

11, 12. (a) Ano an nagpapatunay na an enot na mga kongregasyon Kristiano nag-ako nin paggiya asin pangengenot hale sa mga apostol asin “kamagurangan na lalaki” sa Jerusalem? (b) Ano an boot sabihon kan “teokratikong” pangengenot? (c) Ano an resulta kan pag-ako kan mga kongregasyon sa siring na pangengenot?

¹¹ An mga Kristianong kongregasyon daw na idto kan enot na siglo independiente sa lambang saro, na an lambang saro naggigibo kan sadiring desisyon sa mga bagay? Bako, ipinaheheling kan Biblia na sinda sararo sa sarong Kristianong pagtubod. An gabos na kongregasyon nag-aako nin paggiya asin pangengenot hale sa saro sana. Kaya, kan magkaigwa nin pasuruhay manongod sa pagtuturi, an mga kongregasyon o indibiduwal dai nagdesisyon sa saindang sadiri kun ano an gigibohon. Dai, kundi, imbes, si apostol Pablo, Bernabe asin iba pa pinagbotan na “paduman sa mga apostol asin kamagurangan na lalaki sa Jerusalem manongod sa pasuruhay na ini.” Kan an maygurang na mga lalaking ini, sa tabang kan Tataramon nin Dios asin kan saiyang “banal na espiritu,” gumibo kan saindang desisyon, nagsugo sinda nin maimbod na mga lalaki tanganing paaramon an mga kongregasyon.—Gibo 15:2, 27-29.

¹² Ano an nagin resulta kan pag-ako kan mga kongregasyon sa teokratiko, o itinao nin Dios, na paggiya asin pangengenot na ini? An Biblia nagsasabi: “Ngonyan mantang sinda [si apostol Pablo asin an  saiyang kairiba] nagbibiyahe sa mga siudad itinatao ninda sa mga yaon duman an mga kasugoan na ootobon na pinagdesisyonan kan mga apostol asin kamagurangan na lalaki na yaon sa Jerusalem. Kaya tunay na an mga kongregasyon nagpadagos na mapakosog sa pagtubod asin magdakol an bilang aroaldaw.” (Gibo 16:4, 5) Iyo, an gabos na kongregasyon nakikooperar sa nagin desisyon kan grupong idto nin kamagurangan sa Jerusalem, asin sinda nagin orog na marigon sa pagtubod.

TEOKRATIKONG PAGDIREHIR NGONYAN

13. (a) Hale sa anong lugar sa daga asin paagi sa anong grupo nin mga lalaki an naheheling na organisasyon nin Dios ngonyan nagaako nin giya? (b) Anong relasyon igwa an namamahalang grupo sa “maimbod asin madonong na oripon”?

¹³ An naheheling na organisasyon nin Dios ngonyan siring man nag-aako nin teokratikong paggiya asin direksyon. Sa opisina prinsipal kan mga Saksi ni Jehova sa Brooklyn, Nueva York, igwa nin namamahalang grupo nin Kristianong kamagurangan na lalaki hale sa laenlaen na kabtang kan daga na nagtatao kan kinakaipuhan na pag-ataman sa pambilog na kinaban na trabaho kan banwaan ni Jehova. An namamahalang grupong ini kompuwesto nin mga miembro kan “maimbod asin madonong na oripon.” Ini nagseserbing tagapagtaram para sa maimbod na “oripon.”

14. Sa ano minasarig an namamahalang grupo kan banwaan nin Dios sa paggibo nin mga desisyon?

¹⁴ An mga lalaki sa namamahalang grupo, kaagid kan mga apostol asin kamagurangan na lalaki sa Jerusalem, igwa na nin halawig na eksperyensia sa paglilingkod sa Dios. Alagad dai sinda minasarig sa kadonongan nin tawo sa paggibo nin mga desisyon. Dai, bilang nasasakopan nin teokrasya, sinusonod ninda an halimbawa kan suanoy na namamahalang grupo sa Jerusalem, na an mga desisyon basado sa tataramon nin Dios asin ginigiyahan kan banal na espiritu.—Gibo 15:13-17, 28, 29.

PAGDIREHIR NIN SARONG PANKINABAN NA ORGANISASYON

15. Taano an mga tataramon ni Jesus sa Mateo 24:14 ta nagpapaheling na an Dios magkakaigwa nin dakulang organisasyon sa daga sa panahon nin katapusan?

¹⁵ Si Jesu-Cristo nagtao kan ideya dapit sa magigin kadakulaan kan organisasyon nin Dios digdi sa daga sa panahon nin katapusan kan sia magsabi: “Ining maogmang bareta nin kahadean ihuhulit sa bilog na ineerokan na daga sa pagpatotoo sa gabos na nasyon; asin dangan madatong an katapusan.” (Mateo 24:14) Isipa an kadakulaan kan trabahong kinakaipuhan sa pagsabi sa rinibong milyon nin mga tawo sa daga dapit sa ipinatindog na kahadean nin Dios. An modernong-aldaw na  Kristianong organisasyon daw, na naghahalat nin paggiya asin direksyon sa namamahalang grupo, ekipado sa paggibo kaining dakulang trabaho?

16. (a) Taano ta an mga Saksi ni Jehova nag-establisar nin darakulang mga imprentahan? (b) Ano an ginigibo sa mga paktoriyang ini?

¹⁶ Ihinuhulit na ngonyan kan mga Saksi ni Jehova an mensahe nin Kahadean sa labing 200 na kadagaan asin mga isla nin dagat sa bilog na daga. Tanganing matabangan an sobra sa 2,300,000 na parahayag nin Kahadean (kan 1981) tanganing hamanon an trabahong ini, darakulang imprentahan an inestablisar sa dakol na mga nasyon. Digdi an mga Biblia asin mga literatura sa Biblia ginigibo nin biyoan. Aroaldaw, an promedyo, sobra sa sarong milyon nin Watchtower asin Awake! na magasin an iniimprenta asin ipinapadara hale sa mga paktoriyang ini.

17. (a) Taano ining literatura sa Biblia ta inaandam? (b) Iniimbitaran kamo na gumibo nin ano?

¹⁷ Ini gabos na mga literatura sa Biblia inandam tanganing tumabang sa mga tawo na magtalubo sa kaaraman sa darakulang katuyohan ni Jehova. Sa katunayan, an mga tataramon na “Nagpapahayag kan Kahadean ni Jehova” kabtang kan titulo kan magasin na The Watchtower. Inaalok kamo na makikabtang sa pagwaras kan mga literatura sa Biblia asin magpaliwanag sa iba kan mga katotoohan sa Biblia na linalaman kaiyan. Halimbawa, igwa daw kamong puwedeng hirasan kan mahalagang impormasyon na saindong nanodan hale sa librong, You Can Live Forever in Paradise on Earth?

18. (a) Anong klaseng organisasyon an organisasyon nin Dios ngonyan? (b) Taano an banwaan nin Dios ngonyan ta nangangaipo nin orog na pagdagka?

 ¹⁸ Siring kan enot na siglo, an organisasyon nin Dios ngonyan sarong organisasyon nin dedikado asin bautismadong mga parahulit kan Kahadean. Asin iinandam iyan tanganing tabangan an gabos na mga miembro kaiyan na makikabtang sa trabahong paghuhulit na ini. An mga tawong ini nangangaipo nin orog na pagdagka sa pagpakosog, mantang si Satanas asin an mga naiimpluwensiyahan nia minakontra sa mensahe kan Kahadean. An mga paratumang ipinagadan si Jesus dahel sa paghuhuhlit kaiyan, asin pinapatanidan kan Biblia na an saiyang mga parasonod paglalamagon man.—Juan 15:19, 20; 2 Timoteo 3:12.

19. (a) Sairisay ngonyan an itinaong matabang sa banwaan nin Dios? (b) Paano an kongregasyon napoprotehiran sa maraot na mga impluwensya na nakakaraot kaiyan?

¹⁹ Siring kan enot na siglo ngonyan man “an gurang na mga lalaki,” o kamagurangan inapuwentaran tanganing tumabang asin magpakosog sa lambang kongregasyon. Matatabangan man kamo ninda sa tabang kan sadol nin Biblia na atubangon an laenlaen na problema. Pinoprotehiran man kan kamagurangan na ini “an aripompon nin Dios.” Kaya, kun an sarong miembro nin kongregasyon na minabirik pasiring sa sarong raot na dalan nin pamumuhay  asin minasayuma na magbago, an “kamagurangan na lalaki” sinisiyerto na an siring ikaluwas, o itiwalag, hale sa kongregasyon. Kaya an sarong posog, malinig sa espirituwal na kongregasyon napapagdanay.—Tito 1:5; 1 Pedro 5:1-3; Isaias 32:1, 2; 1 Corinto 5:13.

20. (a) Siisay sa enot na siglo an ipinadara kan namamahalang grupo sa Jerusalem, asin sa anong rason? (b) Siisay an ipinadara kan namamahalang grupo ngonyan?

²⁰ Siring man, kun paano na an namamahalang grupo sa Jerusalem nagpadara nin espesyal na mga representante, siring ki Pablo asin Silas, tanganing magtao nin instruksyon asin magtao nin pagdagka sa banwaan nin Dios, ngonyan man ginigibo kan namamahalang grupo sa panahon nin katapusan. (Gibo 15:24-27, 30-32) Makaduwa kada taon an eksperyensyadong ministro, inaapod na paraataman sa sirkito, semanal na nagsosongko sa lambang kongregasyon sa saiyang sirkito.

21. Paano nagtatabang an paraataman sa sirkito sa mga kongregasyon kan banwaan nin Dios?

²¹ Igwa nin sobrang 43,000 na mga kongregasyon nin mga Saksi ni Jehova sa bilog na kinaban, asin ini binabanga nin mga sirkito na kompuwesto nin haros 20 kongregasyon an kada saro. Mantang sinosongko an mga kongregasyon sa sirkito, an paraataman sa sirkito pinapakosog an mga saksi nin Kahadean paagi sa pag-iba sainda sa saindang paghuhulit asin gibohon na pagtotokdo. Apuwera sa pagpainit sainda, sa paaging ini, nagtatao sia nin mga suhestiyon na matabang sainda na mapaoswag an saindang ministeryo.—Gibo 20:20, 21.

22. (a) Ano pang mga areglo sa pagpakosog kan banwaan nin Dios an ginigibo nin duwa kada taon? (b) Anong imbitasyon an ipinapaabot saindo?

²² Dagdag na pagdagka asin pampakosog an itinatao man, parate duwa kada taon, an mga kongregasyon sa lambang sirkito nagtitiripon para sa duwang aldaw na pansirkitong asamblea. Sa mga okasyon na ini igwa nin poon tolong gatos sagkod 2,000 o labi pa na presente. Imbitado kamo na magatender sa saro kan mga pagtiripon na ini sa saindong lugar. Nasisierto niamo na personal na pakikinabangan nindo asin espirituwalmenteng makakapakosog an asambleang ini.

23. (a) Ano pang ibang pagtiripon an isinasagibo nin makasaro kada taon? (b) Gurano kadakula an saro sa mga kombensyon na ini?

²³ Dangan, kada taon, sarong mas dakulang pagtiripon na inaapod na pandistritong kombensyon an tibaad isagibo sa laog nin pirang aldaw. Taano ta dai tunay na maghingoa na magatender asin helingon nindo kun gurano karahay asin espirituwalmenteng kapakipakinabang an siring na mga kombensyon? Kan nagkapirang taon, imbes na pandistritong kombensyon, nagkaigwa nin mas darakulang nasyonal o internasyonal na mga kombensyon. An pinakadakulang isinagibo sa saro sanang lugar iyo an sa  Yankee Stadium asin Polo Grounds sa Siudad nin Nueva York sa laog nin walong aldaw kan 1958. Sa okasyon na iyan an 253,922 katawo an presente sa pahayag publiko na “Nagsasakop Na An Kahadean Nin Dios—Harani Na Daw an Katapusan Kan Kinaban?” Poon kaidto mayo na nin dakulang lugar na puwedeng pagtiriponan nin siring kadakol, kaya ginibo an mga areglo na magin pasil sa pangenot na mga siudad na gamiton para sa darakulang kombensyon.

MGA PAGTIRIPON SA LAOG NIN MGA KONGREGASYON

24. Anong limang semanal na mga pagtiripon an isinasagibo nin mga kongregasyon kan banwaan nin Dios?

²⁴ An grupong namamahala kan mga Saksi ni Jehova nagareglo man nin sarong programa nin mga instruksyon sa Biblia na isinasagibo sa gabos na kongregasyon kan banwaan ni Jehova. An lambang kongregasyon igwa nin limang pagtiripon kada semana. An mga ini iyo an Teokratikong Paadalan sa Pagmiministro, Pagtiripon sa Paglilingkod, Pahayag Publiko, pagadal sa Torrengbantayan asin pagaadal sa libro kan kongregasyon. Mantang tibaad dai pa nindo aram an mga pagtiripon na ini, halipot na ipapaliwanag niamo saindo.

25, 26. Sa anong katuyohan nagseserbi an Teokratikong Paadalan sa Pagmiministro asin Pagtiripon sa Paglilingkod?

²⁵ An Teokratikong Paadalan sa Pagmiministro ginibo tanganing tumabang sa mga estudyante na magin epektibong tagapagtaram sa iba dapit sa kahadean nin Dios. Sa parate, an mga makalista nagtatao nin haralipot na pahayag sa mga tema sa Biblia sa bilog na grupo. Dangan an eksperyensyadong mga magurang nagtataong mga suhestyon para sa pagoswag.

²⁶ Parate sa iyo man sanang banggi an pagtiripon sa paglilingkod ginigibo. An outline para sa pagtiripon na ini ipinupublikar sa An Satong Ministeryo sa Kahadean, sarong bulanan na publikasyon nin duwa o labi pang mga pahina na ginibo kan namamahalang grupo. Sa pagtiripon na ini an praktikal na mga suhestyon asin mga demonstrasyon sa epektibong mga paagi nin pagtaram sa iba dapit sa mensahe nin Kahadean ipinapaluwas. Sa siring na paagi, pinakosog ni Cristo an saiyang mga parasonod asin tinawan sinda nin mga instruksyon kun paano isasagibo an saindang ministeryo.—Juan 21:15-17; Mateo 10:5-14.

27, 28. Anong klaseng mga pagtiripon an Panpublikong Pagtiripon, an pagaadal sa Torrengbantayan asin an pagaadal sa libro nin kongregasyon?

²⁷ An Panpublikong Pagtiripon asin man an pagaadal sa Torrengbantayan parateng isinasagibo kun Domingo. Hinihingoang gayo na imbitaran an mga interesado na sa pagtiripon panpubliko, na iyo an pahayag sa Biblia nin sarong kuwalipikadong ministro. An pagaadal sa Torrengbantayan  sarong hapot-simbagan na pagorolay sa sarong artikulo nin Biblia na yaon sa bagong luwas nin magasin na Torrengbantayan.

²⁸ Mantang an bilog na kogregasyon tibaad nabibiyo sa pagtiripon sa Kingdon Hall sa mga pagtiripon na nasambit, an mas saradit na grupo nagtitiripon sa pribadong mga harong para sa semanal na pagaadal sa libro kan kogregasyon. Sarong pantabang sa Biblia, siring kan librong Live Forever, ginagamit bilang basihan sa pag-orolay sa Biblia, na naglalawig sagkod sa sarong oras.

29. (a) Anong memoryal an sineselebrar nin tunay na mga Kristiano kada taon? (b) Siisay an tamang nakikikabtang sa tinapay asin arak?

²⁹ Apuwera pa sa regular na pagtiripon na ini, an mga Saksi ni Jehova nagsasagibo nin espesyal na pagtiripon kada taon sa anibersaryo kan kagadanan ni Jesus. Kan enot na iareglo an memoryal kan saiyang kagadanan, si Jesus nagsabi: “Padagos na gibohon nindo ini sa paggirumdom sa sako.” (Lucas 22:19, 20) Sa simpleng seremonya si Jesus naggamit nin arak asin daing lebadurang tinapay bilang simbolo kan saiyang buhay na iaatang nia para sa katawohan. Kaya sa taonan na memoryal na pamangging ini an mga natada sa daga kan 144,000 na linahidan na mga parasonod ni Cristo nagpatunay kan saindang langitnon na paglaom paagi sa pakikabtang sa tinapay asin arak.

30. (a) Siisay pa an angay na minaatender sa memoryal, asin ano an saindang paglaom? (b) Paano ilinadawan ni Jesus an siring na mga tawo?

³⁰ An minilyon na iba pa na minaatender sa memoryal na ini sa mga  Kingdom Hall sa bilog na daga maogmang nagoobserbar. Napapagirumdom man sinda kan ginibo ni Jehova Dios tanganing magin posible an saindang kaligtasan sa kagadanan asin kasalan. Alagad imbes na maglaom sa langitnon na buhay, nagoogma sinda sa paglaom na mabuhay nin daing sagkod digdi sa paraiso sa daga. Arog sinda ki Juan Bautista, na nagtaram dapit sa saiya man sana na “katood kan nobyo” imbes na kabtang kan kompositong nobya ni Cristo na 144,000 an mga miembro. (Juan 3:29) An minilyon na mga tawong ini kabtang kan “ibang mga karnero” na sinabi ni Jesus. Bako sindang miembro kan “sadit na aripompon.” Minsan siring, sa sinabi ni Jesus, naglilingkod sindang kasaro kan “sadit na aripompon,” tanganing an gabos “magin sarong aripompon.”—Juan 10:16; Lucas 12:32.

PAGLILINGKOD SA DIOS KAIBA KAN SAIYANG ORGANISASYON

31. Anong ebidensiya igwa na dai inooyonan nin Dios sa nagdadanay na kabtang kan palsong relihiyon alagad naghihingoa na magin kabtang kan saiyang organisasyon?

³¹ Klarado nanggad, siring kan nakaagi si Jehova Dios igwa nin naheheling na organisasyon ngonyan! Ginagamit nia iyan ngonyan tanganing tokdoan an mga tawo para sa buhay sa saiyang matanos na bagong areglo. Minsan siring, dai kita magigin kabtang kan organisasyon nin Dios asin, siring man, magin kabtang kan palsong relihiyon. An tataramon nin Dios nagsasabi: “Dai kamo makipagsakal na bakong timbang sa mga dai nagtutubod. Huli ta anong pakikiiba igwa an katanosan asin katampalasanan? O ano an pakikisumaro kan liwanag sa diklom? . . . O anong kabtang igwa an maimbod na tawo sa dai nagtutubod?” Kaya an Dios nagboboot: “Kaya humale kamo sa tanga ninda, asin sumiblag kamo.”—2 Corinto 6:14-17.

32. (a) Kun kita “mahale sa tanga ninda,” ano an kaipuhan gibohon? (b) Anong bendisyon an maaako niato kun kita gumibo nin positibong aksyon na maglingkod sa Dios kaiba kan saiyang naheheling na teokratikong organisasyon?

³² Ano an boot sabihon kan “humale kamo sa tanga ninda”? Bueno, dai niato masosonod an pagboot paagi sa pagdanay na kabtang kan o pagtao nin suporta sa sarong relihiyosong organisasyon apuwera sa saro na ginagamit ni Jehova Dios. Kun an siisay man sato kaiba pa sa arin man na relihiyosong organisasyon, kaipuhan humale na kita dian. Kun kita ngonyan nagluwas na sa nagsasagibo nin palsong relihiyon asin naghiro na nin positibo na maglingkod sa Dios kaiba kan saiyang teokratikong organisasyon, magigin kita saro sa mga sinabi nin Dios na: “Ako mageerok sa tanga ninda asin maglalakaw dian sa sainda asin ako manini saindang Dios, asin sinda magigin sakong banwaan.”—2 Corinto 6:16.

[Mga Hapot Para sa Pag-adal]

[Ritrato sa pahina 192]

Kan panahon kan Baha, an Dios daw nagkaigwa nin labi sa sarong organisasyon?

[Mga ritrato sa pahina 196]

AN PANBILOG NA KINABAN NA OPISINA PRINSIPAL NIN MGA SAKSI NI JEHOVA

An OPISINA EHEKUTIBA

Mga Computer

IMPRENTAHAN SA BROOKLYN

Pag-imprentang Rotary

Paggibo nin Libro

Shipping

[Mga ritrato sa pahina 197]

AN NAGKAPIRA SA DAKOL PANG IBANG IMPRENTAHAN KAN WATCH TOWER

Brazil

Inglaterra

South Africa

Wallkill, New York

Canada

 [Mga ritrato sa pahina 198]

An iba sa 253,922 sa sarong kombension nin mga Saksi ni Jehova sa Nueva York

Polo Grounds

Yankee Stadium

[Ritrato sa pahina 201]

An sarong programa nin pagtotokdo sa Biblia nakakamtan sa mga pagtiripon nin mga Saksi ni Jehova