Sarong Kaiwal kan Buhay na Daing Katapusan
Kapitulo 2
Sarong Kaiwal kan Buhay na Daing Katapusan
1. Mantang an kaogmahan asin katoninongan parateng dai nakakamtan, anong mga hapot an minalataw?
KAOGMAHAN digdi sa daga—haros gabos gusto kaiyan. Kun siring taano ta kadakol kan mamondo? Ano an diperensia? Mantang haros gabos gusto nin katoninongan, taano ta naggeguerra an mga nasyon asin taano ta nagkakainongisan an mga tawo? Igwa daw nin puwersang naggigiya na nagtutulod sainda na gibohon an maraot na mga bagay na ini? Posible daw na may sarong dai naheheling na puwersa na nagpapalakaw sa mga nasyon?
2. Anong mga krimen sa kasaysayan an dahelan na iniisip-isip nin dakol kun baga may maraot, dai naheheling na kapangyarihan na nagpapalakaw sa mga tawo?
2 Dakol an nag-iisip-isip kaini kun hinohorophorop ninda an grabeng panriringis nin tawo—an makatatakot na mga gas na ginagamit sa guerra tanganing puoton asin pasoon an mga tawo sagkod na magadan, saka an mga bombang napalm asin bomba atomika. Siring man, helinga an flamethrower, mga kampo de konsentrasyon, lagduan na paggadan sa minilyon na daing maginibong mga tawo, arog kan sa Cambodia kan nakakaagi pa sanang mga taon. Sa paghona daw nindo pagkanorongod sana an pangyayari kan gabos na karatan na ini? Minsan ngani an tawo puwedeng makagibo nin maraot sa sadiri nia, kun hohorophoropon nindo an labi-labing karatan kan saiyang mga gibo, bako daw na garo sia inimpluwensiahan nin sarong maraot, dai naheheling na puwersa?
3. Ano an sinasabi kan Biblia manongod sa namomoon sa kinaban?
3 Dai na kaipuhan na todan an bagay. Malinaw na ipinaheheling kan Biblia na may intelihenteng dai naheheling na persona na namomogol sa mga tawo asin nasyon. Sa Biblia, inaapod ni Jesu-Cristo an sarong makapangyarihan na ini na “an poon kan kinaban na ini.” (Juan 12:31; 14:30; 16:11) Siisay sia?
4. Ano an ipinaheling kan Diablo ki Jesus, asin ano an iinopresir nia sa saiya?
4 Tanganing matabangan kitang maaraman kun siisay sia, isip-isipa an nangyari sa kapinonan kan ministeryo ni Jesus digdi sa daga. Sinasabi sato kan Biblia na kan mabautismohan na si Jesus sia nagduman sa kapatagan na duman sia tenentaran nin sarong dai naheheling na linalang na an ngaran Satanas na Diablo. An sarong kabtang kan pagtentar na iyan isinasaysay nin arog kaini: “Sa giraray dinara sia kan Diablo sa sarong halangkawon na bukid, asin ipinaheling sa saiya an gabos na kahadean kan kinaban asin an kamurawayan kan mga iyan, asin sia nagsabi sa saiya: ‘Ini gabos itatao ko sa saimo kun ika lumohod asin gumibo nin sarong akto nin pagsamba sa sako.’ ”—Mateo 4:8, 9.
5. (a) Ano an nagpaparisa kun baga an gabos na gobyerno sa kinaban sadiri kan Diablo? (b) Sono sa Biblia, siisay an “dios kan palakaw na ini nin mga bagay”?
5 Isip-isipa an iinopresir kan Diablo ki Jesu-Cristo. An “gabos na kahadean kan kinaban.” Talaga daw na sadiri kan Diablo an gabos na kinabanon na gobyernong idto? Iyo, ta kun dai paano nia iyan ikaoopresir ki Jesus? Si Jesus dai nagnigar na iyan sadiri ni Satanas, na ginibo kutana nia kun iyan bakong sadiri ni Satanas. Si Satanas an talagang dai naheheling na poon kan gabos na nasyon kan kinaban! Malinaw na sinasabi kan Biblia: “An bilog na kinaban namumugtak sa kapangyarihan kan maraot.” (1 Juan 5:19) An totoo, si Satanas inaapod kan Tataramon nin Dios na “dios kan palakaw na ini nin mga bagay.”—2 Corinto 4:4.
6. (a) An impormasyon na ini manongod sa paghade ni Satanas nakatatabang sato na masabotan an ano? (b) Ano an gustong gibohon sato ni Satanas, kaya ano an kaipuhan na gibohon niato?
6 An impormasyon na ini nakatatabang satong masabotan kun taano ta si Jesus nagsabi: “An sakong kahadean bakong kabtang kan kinaban na ini.” (Juan 18:36) Tinatabangan man kita kaiyan na masabotan kun taano an mga nasyon ta nagkakainongisan asin naghihingoang maglinaglagan mantang kamawotan nin gabos na normal na tawo na mabuhay nin toninong. Iyo, si “Satanas . . . nagdadaya sa bilog na ineerokan na daga.” (Kapahayagan 12:9) Boot man niang dayaon kita. Habo nia na kita mag-ako kan balaog nin Dios na buhay na daing katapusan. Kaya kaipuhan kitang makilaban tanganing dai nia maimpluwensiahan na gumibo kan maraot. (Efeso 6:12) Kaipuhan na makaaram kita dapit ki Satanas asin kun ano an saiyang mga paagi tanganing mapaglabanan an saiyang mga paghihingoa na dayaon kita.
KUN SIISAY AN DIABLO
7. Taano ta dai niato naheheling an Diablo?
7 Si Satanas na Diablo tunay na persona. Sia bako sanang an karatan na nasa gabos na katawohan, arog kan paniniwala nin iba. Siyempre, dai naheheling nin mga tawo an Diablo, huli sa kaparehong dahelan na dai ninda naheheling an Dios. An Dios asin an Diablo pareho espiritung mga persona, mga porma nin buhay na mas halangkaw sa tawo asin dai naheheling kan satong mata.—Juan 4:24.
8. Taano ta dakol an naniniwala na linalang nin Dios an Diablo?
8 ‘Alagad kun an Dios pagkamoot,’ tibaad may maghapot, ‘taano ta ginibo nia an Diablo?’ (1 Juan 4:8) An totoo, dai linalang nin Dios an Diablo. ‘Pero kun linalang nin Dios an gabos,’ tibaad sabihon nin saro, ‘seguradong linalang nia an Diablo. Siisay pa an ibang magibo kaiyan? Saen palan naghale an Diablo?’
9. (a) Anong klaseng persona an mga anghel? (b) Ano an kahulogan kan mga terminong “diablo” asin “satanas”?
9 Ipinaliliwanag kan Biblia na an Dios naglalang nin kadakoldakol na espiritung persona na kaagid nia. Sa Biblia, an mga espiritung ini inaapod na mga anghel. Siring man, sinda inaapod na “mga aki nin Dios.” (Job 38:7; Salmo 104:4; Hebreo 1:7, 13, 14) Sinda gabos linalang nin Dios na sangkap. Mayo ni saro sa sainda na diablo, o satanas. An terminong “diablo” nangangahulogan parapakaraot asin an terminong “satanas” nangangahulogan paratumang.
10. (a) Siisay an naggibo ki Satanas na Diablo? (b) Paano puwedeng gibohon na kriminal nin sarong marahay na tawo an saiyang sadiri?
10 Minsan siring, uminabot an panahon na an saro sa espiritung mga aking ini nin Dios ginibo an sadiri na Diablo, an boot sabihon, pano nin pagkaongis na putikon na nagtataram nin maraot manongod sa iba. Ginibo man nia an sadiring Satanas, an boot sabihon, paratumang sa Dios. Dai sia linalang na siring, kundi sa huri nagin siring na persona. Bilang ilustrasyon: An parahabon dai namumundag na parahabon. Tibaad gikan sia sa marahay na pamilya, na may sadiosan na mga magurang asin makinuyog sa ley na mga tugang na lalaki asin babae. Alagad an saiyang sadiring pagmawot sa mababakal nin kuwarta tibaad iyo an nagin dahelan na sia magin parahabon. Kun siring, paano ginibo nin saro sa espiritung mga aki nin Dios an sadiri na magin Satanas na Diablo?
11. (a) Anong katuyohan nin Dios an aram kan sarong rebeldeng anghel? (b) Ano an kamawotan kan anghel na ini, asin dinara sia kaiyan na gumibo nin ano?
11 An anghel na nagin Diablo yaon kan lalangon nin Dios an daga dangan an enot na tawong mag-agom, si Adan asin Eva. (Job 38:4, 7) Kaya nadangog nia an Dios kan sabihan sindang mangaki. (Genesis 1:27, 28) Aram nia na paghaloyhaloy an bilog na daga mapapano nin matanos na mga tawo na nagsasamba sa Dios. Iyan an katuyohan nin Dios. Minsan siring, sobra an pagpahalaga kan anghel na ini sa sadiri niang kagayonan asin kadonongan asin boot niang mapasaiya an pagsamba na itatao sa Dios. (Ezequiel 28:13-15; Mateo 4:10) Imbes na haleon sa saiyang isip an salang pagmawot na ini, pigparaisip-isip nia iyan. Nagbunga ini kan saiyang paghiro na makua an onra asin importansia na boot nia. Ano an ginibo nia?—Santiago 1:14, 15.
12. (a) Paano kinaolay kan anghel na ini si Eva, asin ano an isinabi nia sa saiya? (b) Paano nagin Satanas na Diablo an anghel na ini? (c) Ano an salang paghona dapit sa itsura kan Diablo?
12 Ginamit kan rebeldeng anghel an sarong ordinaryong halas tanganing magtaram sa enot na babae, si Eva. Ginibo nia ini kapareho sa kayang gibohon nin sarong eksperto na garo pinapagtataram an nasa haraning hayop o kiko. Alagad an totoo an rebeldeng anghel na ini, an inaapod sa Biblia na “an enot na halas,” iyo an nagtataram ki Eva. (Kapahayagan 12:9) Sia nagsabi na an Dios dai nagsasabi kan katotoohan ki Eva, asin dai itinatao saiya an kaaraman na maninigo kutanang akoon nia. (Genesis 3:1-5) Ini pano nin pagkaongis na kaputikan asin ginibo sia kaiyan na diablo. Paagi kaiyan nagin man siang paratumang sa Dios, o Satanas. Arog kan maheheling nindo, salang isipon na an Diablo may mga sungay asin pantalsok na namamahala sa sarong lugar na pasakitan sa irarom kan daga. Sia sa katotoohan sarong makapangyarihan na gayo, pero maraot, na anghel.
GINIGIKANAN KAN MGA KARIRIBOKAN SA KINABAN
13. (a) Ano an reaksion ni Eva sa kaputikan kan Diablo? (b) Ano an mga hiningako kan Diablo?
13 An kaputikan na isinabi kan Diablo ki Eva nagkaepekto nin siring sa plano nia. Tinubod iyan ni Eva asin kun siring nakisuway sa Dios. Asin nadara nia an saiyang agom na lapason man an pagboot nin Dios. (Genesis 3:6) An hinihingako kan Diablo iyo na an mga tawo mabubuhay na mayo nin Dios. Sia nangatanosan na kaya nin tawo na pamahalaan an sadiri, na mayo kan tabang nin Dios. Hiningako man kan Diablo na kaya niang patalikodon sa Dios an gabos na ipangangaki ni Adan asin Eva.
14. Taano ta dai tolos linaglag nin Dios si Satanas?
14 Siyempre, puwede kutanang linaglag tolos nin Dios si Satanas. Pero dai kutana kaiyan nasimbag an mga hapot na pinalataw ni Satanas, mga hapot na puwedeng magdanay sa isip kan mga anghel na nagmamasid. Kaya tinawan nin Dios nin panahon si Satanas na probaran na patunayan an saiyang mga paghihingako. Ano an resulta?
15, 16. (a) Ano an pinatunayan kan pag-agi nin panahon manongod sa mga paghihingako kan Diablo? (b) Anong pangyayari an harani na?
15 Pinatunayan kan pag-agi nin panahon na dai kaya nin tawo na pamahalaan an sadiri na mayo kan tabang nin Dios. Biyong nasudya an saindang mga paghihingoa. An mga tawo nagsakit nin labi-labi sa pagsakop kan mga gobyerno nin tawo, na, arog kan ipinaheheling kan Kasuratan, kontrolado kan Diablo. Saro pa, an pagtogot nin Dios nin panahon malinaw na nagpaheling na dai napatalikod ni Satanas an gabos sa pagsamba sa Dios. Perming may nagkapira na nagdanay na maimbod sa paghade nin Dios. Halimbawa, mababasa nindo sa Biblia na prinobaran ni Satanas, na daing nangyari, na paontokon si Job sa paglilingkod sa Dios.—Job 1:6-12.
16 Kaya napatunayan na falso an mga paghihingako kan Diablo. Tunay na maninigo siang laglagon huli sa pagpoon nin maraot na pagrebelde tumang sa Dios. Marahay sana ta naabot na niato ngonyan an panahon para sa pagtapos nin Dios sa paghade ni Satanas. Sa pagsaysay kan enot na tangga sa paggibo kaini, an Biblia nagbabareta dapit sa importanteng ralaban sa langit, na, siyempre, dai naheling o nadangog nin mga tawo sa ibabaw kan daga. Maingat na basahon an minasunod na tala kan Biblia:
17. (a) Paano isinasaysay kan Biblia an ralaban sa langit? (b) Ano an resulta kaiyan para sa mga nasa langit, asin para sa mga yaon digdi sa daga?
17 “Puminotok an ralaban sa langit: Si Miguel [na iyo an binuhay liwat na si Jesu-Cristo] asin an saiyang mga anghel nakipaglaban sa dragon, asin an dragon asin an mga anghel kaiyan nakipaglaban alagad ta dai iyan nanggana, minsan an saindang kamugtakan dai na nakua sa langit. Kaya ihinolog an dakulang dragon, an enot na halas, an inaapod Diablo asin Satanas, na nagdadaya sa bilog na ineerokan na daga; ihinolog sia sa daga, asin an saiyang mga anghel ihinolog sa kaibanan nia. ‘Huli kaini mag-ogma, kamo kalangitan asin kamo na nag-eerok dian! Herak man kan daga asin kan dagat, huli ta huminilig na dian saindo an Diablo, na may dakulang kaanggotan, sa pakaaram na halipot na sana an saiyang panahon.’ ”—Kapahayagan 12:7-9, 12.
18. (a) Kasuarin nangyari an ralaban sa langit? (b) Ano an nangyayari sa daga poon kan si Satanas ‘iholog’?
18 Kasuarin nangyari an ralaban na ini sa langit? Ipinaheheling kan ebidensia na iyan nangyari kaidtong panahon kan Guerra Mundial I, na nagpoon kan 1914. Arog kan ipinaheheling kan Kapahayagan, si Satanas hinale sa kalangitan kan panahon na idto, na nangangahulogan na poon kaidto kita nabubuhay na sa saiyang ‘halipot na panahon.’ Kaya, ini na an “huring mga aldaw” kan kinaban ni Satanas. An pag-orog nin katampalasanan, an takot, an mga guerra, an mga kakulangan sa pagkakan, mga helang asin iba pang masakit na mga kamugtakan na inaagihan niato pruweba sa bagay na ini.—Mateo 24:3-12; Lucas 21:26; 2 Timoteo 3:1-5.
19. (a) Ano an desididong gibohon ngonyan ni Satanas? (b) Ano an madonong niatong gibohon?
19 Mantang aram ni Satanas na haros ubos na an saiyang ‘halipot na panahon,’ mas desidido sia kisa kasuarin pa man na olangon an mga tawo sa paglilingkod sa Dios. Boot niang idamay sa kalaglagan an pinakadakol na tawo. May marahay na dahelan na ilinaladawan sia kan Biblia bilang nangangarob na leon na naghahanap nin masisiba. (1 Pedro 5:8, 9) Kun habo niatong madakop nia, kaipuhan na pag-adalan niato kun paano sia minaatake saka an mga paagi na sia nandadaya sa mga tawo.—2 Corinto 2:11.
KUN PAANO SI SATANAS NANDADAYA SA MGA TAWO
20. (a) Gurano kaepektibo kan pagsalakay ni Satanas? (b) Taano ta makalalaom kita na sa parate an saiyang mga pakana garo inosente, kapakipakinabang pa ngani?
20 Dai nindo honaon na an mga paagi ni Satanas na mapasunod saiya an mga tawo perming madaling maheling. Eksperto sia sa pandadaya sa mga tawo. An totoo, an saiyang mga paagi sa nag-aging rinibong taon nagin tusong gayo kaya ngonyan dakol an dai ngani naniniwala na sia nabubuhay. Para sa sainda an karatan asin kabikoan normal sanang mga kamugtakan na perming magdadanay. Si Satanas kapareho nin modernong mga namomoon sa krimen na nagsasagin kagalang-galang, pero, sa likod, naggigibo nin maraot na gayong mga bagay. An Biblia nagpapaliwanag: “Si Satanas nagmamalemale na anghel nin liwanag.” (2 Corinto 11:14) Kaya makalalaom kita na an saiyang mga pakana sa pandadaya parateng garo inosente, kapakipakinabang pa ngani.
21. Ano an sarong pakana na ginamit ni Satanas?
21 Girumdoma na si Satanas nagsagin katood ni Eva. Dangan linoko nia si Eva na gibohon an paghona ni Eva para sa sadiri niang karahayan. (Genesis 3:4-6) Iyo man ngonyan. Halimbawa, paagi sa saiyang representanteng mga tawo tusong sinasadol ni Satanas an mga tawo na ipaorog an intereses kan mga gobyerno nin tawo sa saindang paglilingkod sa Dios. Ini nagbunga kan espiritu nin nasyonalismo, na an resulta grabeng mga guerra. Sa nakakaagi pa sanang mga panahon pinahiro ni Satanas an mga tawo na magpaluwas nin laen-laen na mga pakana sa saindang paghanap nin katoninongan asin katiwasayan. An saro digdi iyo an Naciones Unidas. Alagad ini daw nakagibo nin matoninong na kinaban? Harayoon! Imbes, iyan napatunayan na sarong paagi na irayo an atension kan mga tawo sa areglo nin Dios para sa pagtao nin katoninongan sa katawohan, an saiyang nagdadangadang na kahadean na pamamahalaan ni Jesu-Cristo, an “Prinsipe nin Katoninongan.”—Isaias 9:6; Mateo 6:9, 10.
22. Anong kaaraman an habo ni Satanas na kamtan niato?
22 Tangani kitang mag-ako nin buhay na daing katapusan, kaipuhan niato an tamang kaaraman manongod sa Dios, sa saiyang Hade-Aki asin sa saiyang kahadean. (Juan 17:3) Masisierto nindo na habo ni Satanas na Diablo na kamo magkaigwa kan kaaraman na ini, asin gigibohon nia an gabos niang makakaya na olangon kamo sa pagkamit kaiyan. Paano nia ini gigibohon? An sarong paagi iyo an pagsierto na kamo mag-ako nin pagtumang, tibaad sa porma nin pagtuya. Sinasabi sato kan Biblia: “An gabos na nagmamawot na mamuhay sa kabanalan kaibahan ni Cristo Jesus paglalamagon man.”—2 Timoteo 3:12.
23. (a) Paano puwedeng gamiton ni Satanas pati mga katood asin paryentes tanganing papanluyahon an satong boot? (b) Taano ta dai kamo noarin man maninigong padaog sa pagtumang?
23 Tibaad pati an saindong haraning mga katood o paryentes magsabi saindo na dai ninda nagugustohan an saindong pagsiyasat sa Kasuratan. Si Jesu-Cristo mismo nagpatanid: “Sa katotoohan, an magigin mga kaiwal nin saro iyo mismo an mga nasa laog kan saiyang pamilya. An namomoot sa ama o ina nin orog kisa sako bakong maninigo sa sako; asin an namomoot sa aking lalaki o aking babae nin orog kisa sako bakong maninigo sa sako.” (Mateo 10:36, 37) Tibaad pagmaigotan nin mga paryentes na papanluyahon an saindong boot, na ginigibo iyan sa bilog na sinseridad ta dai ninda aram an makangangalas na mga katotoohan sa Biblia. Alagad kun ipopondo nindo an pag-adal sa Tataramon nin Dios kun may pagtumang, ano daw an magigin pagheling sa saindo nin Dios? Saro pa, kun kamo pumondo, paano nindo matatabangan an mga katood asin namomotan na iyan na makasabot na sa tamang kaaraman sa Biblia nasasarig an buhay o kagadanan? An pagdadanay nindo sa mga nanodan nindo sa Tataramon nin Dios tibaad pag-abot nin panahon makaimpluwensia sainda na mag-adal man kan katotoohan.
24. (a) Ano pang ibang paagi an ginagamit kan Diablo tanganing olangon an mga tawo sa pagkua nin nagtataong-buhay na kaaraman? (b) Sa paghona nindo gurano kahalaga kan pag-adal sa Tataramon nin Dios?
24 Sa ibong na kampi, tibaad tentaran kamo ni Satanas na umayon sa sarong inmoral na gibo, na ikinaaanggot nin Dios. (1 Corinto 6:9-11) O tibaad ipamate nia saindo na mayo kamo nin panahon na mag-adal sa Biblia. Pero kun iisip-isipon nindo, igwa daw nin mas mahalaga pa kisa pagkua kan kaaraman na ini? Dai pagtogotan an ano man na makaolang saindo sa pagkamit kan kaaraman na ini na puwedeng magbunga kan saindong pag-ako nin buhay na daing katapusan sa paraiso digdi sa daga!
25. Kun padagos niatong tutumangon an Diablo, ano an dai nia magigibo sato?
25 An Biblia nagsasadol: “Tumangon nindo an Diablo.” Kun gigibohon nindo ini, “sia madulag sa saindo.” (Santiago 4:7) Ini daw nangangahulogan na kun tutumangon nindo an pagsalakay ni Satanas sia masuko na asin dai na magtatao nin problema saindo? Dai, paorootro niang pagmamaigotan na mapagibo kamo kan gusto nia. Alagad kun padagos nindong tutumangon sia, nungka nia kamong madadara na gumawe nin tumang sa Dios. Kaya, magmaigot na kamtan an pinakaimportanteng kaaraman sa Biblia asin gibohon an saindong nanonodan. Ini kaipuhan tanganing dai kamo madaya kan saro pang paagi ni Satanas sa pandadaya sa mga tawo, an falsong relihiyon.
[Ritrato sa pahina 16, 17]
Ikaoopresir daw ni Satanas ki Cristo an gabos na gobyernong ini sa kinaban kun iyan bakong saiya?
[Ritrato sa pahina 19]
An parahabon na ini dai namundag na parahabon, kun paanong an Diablo dai linalang na “diablo”
[Ritrato sa pahina 20, 21]
An ralaban sa langit natapos na si Satanas asin an mga demonyo ihinolog sa daga. Namamatean na nindo an mga epekto
[Ritrato sa pahina 24]
Tibaad magkaigwa nin pagtumang sa saindong padagos na pag-adal sa Biblia
[Mga Hapot Para sa Pag-adal]
