Tunay na Mahalaga Kun Ano an Saindong Relihiyon
Kapitulo 3
Tunay na Mahalaga Kun Ano an Saindong Relihiyon
1. Ano an paniniwala nin iba manongod sa relihiyon?
‘GABOS NA RELIHIYON marahay,’ sabi nin dakol. ‘Iyan laen-laen sanang dalan pasiring sa sarong lugar.’ Kun ini totoo, dai nin halaga kun ano an relihiyon nindo, ta iyan mangangahulogan na an gabos na relihiyon inaako nin Dios. Alagad iyo daw?
2. (a) Ano an pagtratar kan mga Fariseo ki Jesus? (b) Siisay an sinasabi kan mga Fariseo na ama daa ninda?
2 Kan si Jesu-Cristo yaon sa daga, igwa kaidto nin sarong relihiyosong grupo na inaapod mga Fariseo. Sinda nag-imbento nin sarong sistema nin pagsamba asin naniniwala na idto inooyonan nin Dios. Pero, pinagmamaigotan man kan mga Fariseo na gadanon si Jesus! Kaya sinabihan sinda ni Jesus: “Ginigibo nindo an mga gibo kan saindong ama.” Sa pagsimbag sinda nagsabi: “Kami igwa nin sarong Ama, an Dios.”—Juan 8:41.
3. Ano an isinabi ni Jesus manongod sa ama kan mga Fariseo?
3 Totoo daw na an Dios an saindang ama? Inaako daw nin Dios an saindang relihiyon? Dai nanggad! Dawa ngani an mga Fariseo igwa kan Kasuratan asin naghohona na iyan sinusunod ninda, sinda nadaya kan Diablo. Asin iyan isinabi sainda ni Jesus: “Gikan kamo sa saindong ama na Diablo, asin boot nindo na gibohon an mga horot kan saindong ama. An sarong iyan paragadan sa kapinonan, asin dai sia nagdanay sa katotoohan, . . . sia putikon asin iyo an ama kan kaputikan.”—Juan 8:44.
4. Ano an pagheling ni Jesus sa relihiyon kan mga Fariseo?
4 Malinaw na falso an relihiyon kan mga Fariseo. Iyan naglilingkod sa kapakanan kan Diablo, bakong nin Dios. Kaya imbes na ibilang na marahay an saindang relihiyon, kinondenar iyan ni Jesus. Sinabihan nia an relihiyosong mga Fariseong idto: “Pinipintoan nindo an kahadean kan kalangitan sa mga tawo; huli ta kamo mismo dai minalaog, ni tinotogotan nindo an mga minalaog na makalaog.” (Mateo 23:13) Huli sa saindang falsong pagsamba, inapod ni Jesus an mga Fariseong idto na mga parasaginsagin asin mararang mga halas. Huli sa saindang maraot na gibo, sinabi nia na sinda pasiring sa kalaglagan.—Mateo 23:25-33.
5. Paano ipinaheling ni Jesus na an dakol na relihiyon bako sanang laen-laen na dalan pasiring sa sarong lugar?
5 Kaya si Jesu-Cristo dai nagtokdo na an gabos na relihiyon laen-laen sanang mga dalan pasiring sa sarong lugar nin kaligtasan. Sa saiyang bantog na Sermon sa Bukid, si Jesus nagsabi: “Maglaog kamo sa tatang hayakpit, huli ta halakbang asin mahiwas an dalan na pasiring sa kalaglagan, asin dakol an mga nagraralaog dian; sa ibong na kampi piot an tata asin hayakpit an dalan pasiring sa buhay, asin diit an mga nakakakua kaiyan.” (Mateo 7:13, 14) Huli ta dai ninda sinasamba an Dios sa tamang paagi, an kadaklan nasa dalan na pasiring sa kalaglagan. Pipira sana an nasa dalan na pasiring sa buhay.
6. Ano an manonodan niato sa pagsiyasat sa pagsamba kan nasyon nin Israel?
6 An pagsiyasat sa ginibo nin Dios sa nasyon nin Israel nagpapaliwanag kun gurano kahalaga na sambahon an Dios sa paagi na inooyonan nia. Pinatanidan nin Dios an mga Israelitas na lumikay sa falsong relihiyon kan mga nasyon na nasa palibot ninda. (Deuteronomio 7:25) Iinaatang kan mga tawong idto an saindang mga aki sa saindang mga dios, asin naggigibo sinda nin marigsok na seksuwal na mga gibo, pati an homoseksuwalidad. (Levitico 18:20-30) Pinagbotan nin Dios an mga Israelitas na lumikay sa mga gibong ini. Kan sinda makisuway asin sumamba sa ibang dios, pinadusahan nia sinda. (Josue 24:20; Isaias 63:10) Kaya mahalaga nanggad kun ano an saindang relihiyon.
FALSONG RELIHIYON NGONYAN?
7, 8. (a) Ano an nagin paninindogan nin relihiyon kaidtong mga guerra mundial? (b) Ano sa paghona nindo an saboot nin Dios manongod sa ginibo nin relihiyon kan panahon nin guerra?
7 Kumusta man an ginatos na relihiyon ngonyan? Seguro minaoyon kamo na an dakol na ginigibo sa ngaran nin relihiyon dai inooyonan nin Dios. Sa nakaaging mga guerra mundial, na naligtasan nin minilyon na nabubuhay ngonyan, an mga relihiyon sa man-ibong-ibong na lado sinadol an saindang mga miembro na gumadan. “Gadanon nindo an mga Aleman—gadanon nanggad sinda,” sabi kan obispo nin Londres. Asin, sa ibong na lado, sinabihan kan arsobispo nin Cologne an mga Aleman: “Pinagbobotan mi kamo sa ngaran nin Dios, na makilaban sagkod sa ultimong toro kan saindong dugo para sa onra asin kamurawayan kan nasyon.”
8 Kaya an mga Katoliko ginadan an mga kapwa ninda Katoliko na may pag-oyon kan saindang relihiyosong mga namomoon, asin iyo man an mga Protestante. Inadmitir kan klerigong si Harry Emerson Fosdick: “Pati sa satong mga simbahan ibinugtak niato an mga bandera nin guerra . . . Sa sarong lado kan satong ngoso inomaw niato an Prinsipe nin Katoninongan asin sa ibong inomaw niato an guerra.” Ano sa paghona nindo an saboot nin Dios manongod sa relihiyon na naghihingakong nag-ootob kan saiyang kabotan alagad nag-oomaw sa guerra?
9. (a) Ano an saboot nin dakol na tawo manongod sa mga krimen na ginigibo kan mga miembro nin laen-laen na relihiyon? (b) Kun an relihiyon ginigibo an sadiri na kabtang kan kinaban, ano an dapat na magin konklusyon niato?
9 Huli sa mga krimen na naginibo sa ngaran nin Dios kan mga miembro nin dakol na laen-laen na relihiyon sa bilog na kasaysayan, minilyon na tawo ngonyan an tuminalikod na sa Dios asin ki Cristo. Ibinabasol ninda sa Dios an grabeng mga guerrang relihiyoso, arog kan sa pag-oltanan nin mga Katoliko asin Muslim na inapod mga Krusada, an mga guerra sa pag-oltanan nin mga Muslim asin Hindu, asin an mga guerra sa pag-oltanan nin mga Katoliko asin Protestante. Itinotokdo ninda an paggadan sa mga Judio sa ngaran ni Cristo, asin an maringis na mga inkisisyon na Katoliko. Pero, minsan ngani an relihiyosong mga namomoon na may paninimbagan sa grabe karaot na mga krimen na iyan naghihingako na an Dios an saindang Ama, bako daw na sinda mga aki kan Diablo kapareho kan mga Fariseo na kinondenar ni Jesus? Mantang si Satanas an dios kan kinaban na ini, dai daw niato maninigong laoman na sia man an namomogol sa mga relihiyon kan mga tawo sa kinaban?—2 Corinto 4:4; Kapahayagan 12:9.
10. Ano an pirang bagay na ginigibo sa ngaran nin relihiyon na dai nindo inooyonan?
10 Daing duwa-duwa na kadakol kan mga ginigibo sa ngaran nin relihiyon ngonyan na sa paghona nindo bakong tama. Parate na makakabareta kamo nin mga tawo na inmoral na gayo an pamumuhay, pero iginagalang na mga miembro nin mga iglesya. Tibaad may midbid pa ngani kamong mga namomoon sa relihiyon na maraoton an pamumuhay, pero inaako pa man giraray na marahay na mga poon nin relihiyon sa saindang mga iglesya. May mga namomoon sa relihiyon na nagsabi na an homoseksuwalidad asin an pagdodorog na dai kasal bakong sala. Alagad tibaad aram nindo na bakong arog kaiyan an sinasabi kan Biblia. An totoo, kinastigo nin Dios nin kagadanan an saiyang banwaan na Israel huli ta ginigibo ninda an siring na mga bagay. Sa kaparehong dahelan linaglag nia an Sodoma asin Gomorra. (Judas 7) Dai na mahahaloy arog man kaiyan an gigibohon nia sa gabos na falsong relihiyon sa modernong aldaw. Sa Biblia, an siring na relihiyon irenerepresentar na patotot huli sa inmoral na relasyon kaiyan sa “mga hade kan daga.”—Kapahayagan 17:1, 2, 16.
PAGSAMBA NA INOOYONAN NIN DIOS
11. Ano an kaipuhan tanganing an satong pagsamba akoon nin Dios?
11 Mantang an Dios dai oyon sa gabos na relihiyon, kaipuhan na ihapot niato: ‘Ako daw nagsasamba sa Dios sa paagi na inooyonan nia?’ Paano niato maaaraman kun iyo? Bakong siisay man na tawo, kundi an Dios, iyo an hokom kun ano an tunay na pagsamba. Kaya tanganing an satong pagsamba akoon nin Dios, iyan kaipuhan na marigon na basado sa Tataramon nin Dios nin katotoohan, an Biblia. Maninigo na an saboot niato kapareho kan sa parasurat sa Biblia na nagsabi: “Makua logod na an Dios totoo, minsan pa an gabos na tawo makuang putikon.”—Roma 3:3, 4.
12. Taano ta sinabi ni Jesus na an pagsamba kan mga Fariseo dai inooyonan nin Dios?
12 Bakong arog kaiyan an saboot kan mga Fariseo kan enot na siglo. Sinda naggibo kan sadiri nindang mga paniniwala asin tradisyon asin kinuyog ini imbes na an Tataramon nin Dios. Ano an resulta? Sinabihan sinda ni Jesus: “Hinalean nindo nin halaga an tataramon nin Dios huli sa saindong tradisyon. Kamong mga parasaginsagin, marahay nanggad an pagkahula ni Isaias dapit sa saindo, kan sia magsabi, ‘An mga tawong ini nag-oomaw sako sa saindang mga ngabil, alagad an saindang puso harayo sako. Sayang sana na sinda nagsasamba sako, huli ta itinotokdo ninda bilang mga doktrina an mga pagboot nin mga tawo.’ ” (Mateo 15:1-9; Isaias 29:13) Kaya kun boot niatong kamtan an pag-oyon nin Dios, kaipuhan na seguradohon niato na an tinutubod niato kaoyon sa mga katokdoan kan Biblia.
13. Ano an isinabi ni Jesus na kaipuhan na gibohon niato tanganing oyonan nin Dios?
13 Bako pang igo para sa sato na magsabing kita nagtutubod ki Cristo dangan gibohon an pinaghohona niatong tama. Kaipuhan na gayo na aramon niato kun ano an kabotan nin Dios dapit sa bagay. Ipinaheling ini ni Jesus sa saiyang Sermon sa Bukid kan sia magsabi: “Bakong an gabos na nagsasabi sako, ‘Kagurangnan, Kagurangnan,’ makalalaog sa kahadean nin kalangitan, kundi idtong naggigibo kan kabotan kan sakong Ama na nasa langit.”—Mateo 7:21.
14. Taano ta tibaad ibilang kita ni Jesus na “mga paragibo nin katampalasanan” dawa kun kita naggigibo nin “marahay na mga gibo”?
14 Tibaad naggigibo pa ngani kita kan paghona niato “marahay na mga gibo,” asin ginigibo ini sa ngaran ni Cristo. Pero an gabos na ini magigin daing halaga kun dai niato maotob an kabotan nin Dios. Magigin kapareho kita kan suminunod na isinabi ni Cristo: “Balakid an masarabi sa sako sa aldaw na iyan, ‘Kagurangnan, Kagurangnan, bakong kami naghula sa ngaran mo, asin nagpaluwas nin mga demonyo sa ngaran mo, patin naggibo nin dakol na ngangalasan sa ngaran mo?’ Alagad sasabihan ko sinda: Dai ko kamo noarin man namidbid! Humarayo kamo sa sako, kamong mga paragibo nin katampalasanan.” (Mateo 7:22, 23) Iyo, tibaad naggigibo kita nin mga bagay na sa paghona niato marahay—asin tibaad ipinagpapasalamat sato nin ibang tawo asin iinoomaw pa ngani sa sato—alagad kun dai niato magibo an sinasabi nin Dios na tama ibibilang kita ni Jesu-Cristo na “mga paragibo nin katampalasanan.”
15. Taano an ginibo kan mga tagasuanoy na Berea ta madonong na arogon niato?
15 Mantang kadakol kan relihiyon ngonyan na dai nag-ootob sa kabotan nin Dios, dai niato puwedeng ipamugtak sana na an mga katokdoan kan relihiyosong organisasyon na naiibanan niato kaoyon sa Tataramon nin Dios. An bagay na an Biblia ginagamit nin sarong relihiyon dai nagpapatunay na an gabos na itinotokdo asin ginigibo kaiyan yaon sa Biblia. Mahalaga na siyasaton mismo niato kun baga iyan yaon o dai. An mga tagasiudad nin Berea inomaw ta, pakapaghulit sa sainda kan Kristianong apostol na si Pablo, hineling ninda an Kasuratan tanganing seguradohon na totoo an isinasabi nia sa sainda. (Gibo 17:10, 11) An relihiyon na inooyonan nin Dios kaipuhan na kaoyon sa Biblia sa gabos na bagay; iyan dai mag-aako sa pirang kabtang kan Biblia asin isisikwal an ibang kabtang.—2 Timoteo 3:16.
BAKONG IGO AN SINSERIDAD SANA
16. Ano an isinabi ni Jesus tanganing ipaheling na an sinseridad sana bakong igo tanganing an saro oyonan nin Dios?
16 Alagad tibaad may maghapot: ‘Kun an saro sinsero sa saiyang mga paniniwala, dai daw sia ooyonan nin Dios dawa kun sala an saiyang relihiyon?’ Bueno, si Jesus nagsabi na dai nia ooyonan an “mga paragibo nin katampalasanan” minsan ngani sinda nagtutubod na ginigibo ninda an tama. (Mateo 7:22, 23) Kaya dai man ooyonan nin Dios an sinseridad sana. Sarong beses sinabihan ni Jesus an saiyang mga parasunod: “Maabot an oras na an lambang gumadan sa saindo maghohona na nakagibo sia nin banal na paglilingkod sa Dios.” (Juan 16:2) An mga paragadan na iyan sa mga Kristiano tibaad sinserong nagtutubod na sinda naglilingkod sa Dios sa paaging iyan, alagad malinaw na dai. Dai inooyonan nin Dios an saindang ginibo.
17. Minsan ngani sinsero si Pablo, ano an ginibo nia bago nagin Kristiano?
17 Bago sia nagin Kristiano, si apostol Pablo nagtabang sa paggadan ki Esteban. Dangan, naghanap sia nin mga paagi na gumadan nin iba pang Kristiano. (Gibo 8:1; 9:1, 2) Si Pablo nagpaliwanag: “Sagkod sa pagpangana pinaglamag ko an kongregasyon nin Dios asin rinaot iyan, asin orog an sakong pag-oswag sa Judaismo kisa dakol na kaedad ko sa sakong mga kahimanwa, huli ta ako orog na maigot para sa mga tradisyon kan sakong mga magurang.” (Galacia 1:13, 14) Iyo, si Pablo kaidto sinsero, pero dai kaiyan ginibong tama an saiyang relihiyon.
18. (a) Ano an relihiyon kaidto ni Pablo kan paglamagon nia an mga Kristiano? (b) Taano si Pablo asin an iba pa kan saiyang kaaldawan ta kaipuhan na balyohan an saindang relihiyon?
18 Kaidto, si Pablo miembro kan relihiyosong sistema nin mga Judio, na nagsikwal ki Jesu-Cristo, kaya iyan isinikwal man nin Dios. (Gibo 2:36, 40; Talinhaga 14:12) Kaya tanganing kamtan an pag-oyon nin Dios kaipuhan na balyohan ni Pablo an saiyang relihiyon. Sia nagsurat man manongod sa iba na may “kaigotan para sa Dios”—sinsero pero dai inooyonan nin Dios huli ta an saindang relihiyon bakong basado sa tamang kaaraman sa mga katuyohan nin Dios.—Roma 10:2, 3.
19. Ano an nagpapaheling na an katotoohan dai matogot sa laen-laen na klase nin relihiyosong doktrina?
19 An katotoohan dai matogot sa gabos na laen-laen na klase nin relihiyosong doktrina sa kinaban. Halimbawa, an mga tawo magsalang igwa nin kalag na natatadang buhay pagkagadan kan hawak o mayo. An daga magsalang magdadanay sagkod lamang o dai. An Dios magsalang tatapuson an karatan o dai. An mga ini asin an dakol pang ibang paniniwala magsalang tama o sala. Dai puwedeng magkaigwa nin duwang katotoohan kun an saro dai kaoyon kan saro. Arin sa duwa an totoo, pero bakong pareho. An sinserong pagtubod sa sarong bagay, asin pag-otob sa pagtubod na iyan, dai iyan gigibohon na tama kun talagang iyan sala.
20. Kun manongod sa relihiyon, paano niato masusunod an tamang “mapa”?
20 Ano an maninigo nindong magin saboot kun may itaong pruweba na an saindong tinutubod sala? Halimbawa, ipamugtak niato na kamo sakay nin kotse, na nagbibiyahe sa primerong beses pasiring sa sarong lugar. May dara kamong mapa, pero dai nindo iyan nasiyasat nin maingat. May nagsabi saindo kun saen maagi. Nagtiwala kamo sa saiya, na sinserong nagtutubod na an direksion na itinokdo nia sa saindo tama. Alagad halimbawa bako. Ano kun may magsabi saindo kun ano an sala? Ano kun, sa paggamit sa saindo mismong mapa, ipaheling nia na kamo nasa salang dalan? An kapalangkawan daw o katagasan nin payo maolang sa saindo sa pag-admitir na kamo nasa salang dalan? Bueno, kun siring, kun manodan nindo gikan sa pagsiyasat sa saindong Biblia na kamo naglalakaw sa salang relihiyosong dalan, magin andam na bumalyo. Likayan an mahiwas na dalan pasiring sa kalaglagan; paduman sa hayakpit na dalan na pasiring sa buhay!
KAIPUHAN AN PAGGIBO SA KABOTAN NIN DIOS
21. (a) Apuwera sa pakaaram kan katotoohan, ano an kaipuhan? (b) Ano an gigibohon nindo kun manodan nindo na dai inooyonan nin Dios an pirang bagay na ginigibo nindo?
21 Mahalaga na maaraman an mga katotoohan sa Biblia. Pero an kaaraman na ini daing halaga kun dai kamo sumamba sa Dios sa katotoohan. (Juan 4:24) An mahalaga iyo an pag-otob sa katotoohan, paggibo sa kabotan nin Dios. “An pagtubod na daing gibo gadan,” sabi kan Biblia. (Santiago 2:26) Kaya, tanganing makapaogma sa Dios, an saindong relihiyon kaipuhan na bako sanang lubos na kaoyon sa Biblia kundi iaplikar man sa gabos na aktibidad sa buhay. Kun siring, kun manodan nindo na ginigibo nindo an sinasabi nin Dios na sala, andam daw kamong magbakle?
22. Anong mga pakinabang an makakamtan niato ngonyan asin sa ngapit, kun ootobon niato an tunay na relihiyon?
22 Kadakol kan mga bendisyon na natatagama sa saindo kun gigibohon nindo an kabotan nin Dios. Minsan ngonyan makikinabang na kamo. An pag-otob kan tunay na relihiyon gigibohon kamong mas marahay na tawo—mas marahay na lalaki, agom o ama, mas marahay na babae, agom o ina, mas marahay na aki. Paluluwason kaiyan sa saindo an diosnon na mga kuwalidad na magpapalaen saindo sa iba ta ginigibo nindo an tama. Alagad orog pa kaiyan, iyan mangangahulogan na kamo nasa kamugtakan na umako kan mga bendisyon nin buhay na daing katapusan sa kaogmahan asin sangkap na salud sa paraisong bagong daga nin Dios. (2 Pedro 3:13) Daing duwa-duwa iyan—tunay na mahalaga kun ano an saindong relihiyon!
[Mga Hapot Para sa Pag-adal]
[Ritrato sa pahina 25]
Naglilingkod daw sa Dios an mga namomoon sa relihiyon na naghihingoang gadanon si Jesus?
[Mga ritrato sa pahina 26, 27]
An kadaklan na tawo nasa halakbang na dalan na pasiring sa kalaglagan, sabi ni Jesus. Pipira sana an nasa hayakpit na dalan na pasiring sa buhay
[Ritrato sa pahina 28, 29]
“Sinda nagpapahayag na midbid ninda an Dios, alagad sinda nagpapainda sa saiya paagi sa saindang mga gibo.”—Tito 1:16.
Sa Tataramon
Sa Gibo
[Ritrato sa pahina 30]
Huli sa pagkakalaen nin relihiyon, si Pablo nakikabtang sa paggapo sa disipulo ni Cristo na si Esteban
[Ritrato sa pahina 33]
Kun kamo nasa salang dalan, an kapalangkawan daw o katagasan nin payo maolang sa saindo sa pag-admitir kaiyan?
