1, 2. Taano ta naggagamit si Jehova kun minsan nin mga visual aid pag may ihinahayag siyang mga katotoohan sa saiyang mga lingkod sa daga?

 IMAHINARA an sarong pamilya na may saradit na aki na nakatukaw sa palibot kan lamesa sa kusina. Nagkatiripon sinda diyan para mag-adal nin Bibliya. Tanganing tabangan an mga aki na masabutan an sarong katotoohan sa Bibliya, nagpahiling nin simpleng mga drowing an ama. An mga ngirit sa lalawgon kan mga aki asin an ganado nindang pagkomento nagpapahiling na epektibo an pamamaagi kan ama. Naggamit siya nin mga ritrato sa pagtukdo. Dahil diyan, natabangan niya an saiyang mga aki na masabutan an mga katukduan manungod ki Jehova na masakit pang masabutan kan mga aki.

² Sa kaagid na paagi, naggamit si Jehova nin mga visual aid para tabangan an saiyang mga aking tawo na masabutan an mga bagay na dai ninda nahihiling. Halimbawa, para ipaliwanag an hararom na mga katotoohan manungod sa saiyang sadiri, ipinahiling ni Jehova ki Ezekiel an sarong bisyon na pano nin kahanga-hangang mga paglaladawan. Sa sinusundan na kapitulo kan publikasyon na ini, napag-ulayan ta an saro sa mga paglaladawan na iyan. Magpokus kita ngunyan sa sarong espesipikong parte kan kahanga-hangang bisyon na iyan, asin hilingon ta kun paano an pakasabot sa kahulugan kaiyan makakatabang sa sato na magin mas harani kita ki Jehova.

3. (a) Sigun sa Ezekiel 1:4, 5, ano an nahiling ni Ezekiel sa bisyon? (Hilingon an ritrato sa kapinunan kan kapitulo.) (b) Ano an narisa mo sa paagi kan pagkasaysay ni Ezekiel sa bisyon na ini?

³ Basahon an Ezekiel 1:4, 5. Ilinadawan ni Ezekiel an “garo apat na buhay na linalang” na may pagkakaagid sa anghel, tawo, saka hayop. Mangnuhon kun paano eksaktong isinurat ni Ezekiel an saiyang nahiling; sinabi niya na nakahiling siya nin “garo” mga buhay na linalang. Mantang binabasa mo an bilog na bisyon sa Ezekiel kapitulo 1, maririsa mo na pauruutrong ginamit kan propeta an mga tataramon na “garo” asin “arog.” (Ezek. 1:13, 24, 26) Malinaw nanggad na narealisar ni Ezekiel na an nahiling niya mga kaagid sana, o paglaladawan, kan dai nahihiling na mga bagay sa langit.

4. (a) Ano an epekto ki Ezekiel kan bisyon? (b) Ano an siguradong aram ni Ezekiel manungod sa mga kerubin?

⁴ Siguradong napahangang marhay si Ezekiel huli sa mga nahiling niya asin nadangog sa bisyon. An itsura kan apat na buhay na linalang garo “naglalaad na mga baga.” An saindang marikas na paghiro garo “mga kikilat.” An tanog kan saindang mga pakpak ‘garo tanog nin nagraragasang tubig,’ asin an saindang paghiro ‘garo tanog nin sarong hukbo.’ (Ezek. 1:13, 14, 24-28; hilingon an kahon na “Pinagmamasdan Ko an mga Buhay na Linalang.”) Sa ibang bisyon, sinabi ni Ezekiel na an apat na buhay na linalang na ini “mga kerubin,” o makapangyarihan na mga anghel. (Ezek. 10:2) Huling hali sa pamilya nin mga saserdote, siguradong aram ni Ezekiel na naglilingkod sa Diyos an mga kerubin asin parati sindang harani sa Saiya.—1 Cron. 28:18; Sal. 18:10.

5. (a) Taano ta masasabing an mga kerubin saka an saindang apat na lalawgon nagrerepresentar sa nakakalabing marhay na kapangyarihan asin kamurawayan ni Jehova? (b) Taano ta nagigirumduman ta sa parteng ini kan bisyon an kahulugan kan pangaran nin Diyos? (Hilingon an nota sa ibaba.)

⁵ Basahon an Ezekiel 1:6, 10. Narisa man ni Ezekiel na an lambang kerubin igwa nin apat na lalawgon—lalawgon nin tawo, leon, torong baka, asin agila. Dahil sa apat na lalawgon na iyan na nahiling niya, siguradong mas nagrarom an pagpapahalaga ni Ezekiel sa nakakalabing marhay na kapangyarihan asin kamurawayan ni Jehova. Taano man? Mahalagang mangnuhon na mga lalawgon ini nin mga linalang na nagrerepresentar sa kamahalan, kusog, asin kapangyarihan. Kamahalan an irinerepresentar kan leon. An torong baka man sarong kahanga-hangang hayop, an agila sarong makusog na gamgam, asin an tawo—an obra maestra nin Diyos sa daga—an namamahala sa gabos na iba pang mga linalang diyan. (Sal. 8:4-6) Pero sa bisyon na ini, nahiling ni Ezekiel na an apat na makapangyarihan na linalang, na ilinaladawan kan apat na lalawgon kan lambang kerubin, nasa irarom kan trono ni Jehova, an Kahuruhalangkawing Soberano. Angay nanggad na ilustrasyon iyan para ipahiling na kayang gamiton ni Jehova an saiyang mga linalang tanganing utubon an saiyang katuyuhan! a Iyo, arog kan sinabi kan salmista manungod ki Jehova, “An saiyang kamahalan nasa ibabaw kan daga asin langit.”—Sal. 148:13.

6. Ano an posibleng nakatabang ki Ezekiel na masabutan kun ano pa an irinerepresentar kan apat na lalawgon?

⁶ Pakalihis nin pirang panahon, posibleng nagirumduman ni Ezekiel na an mga lingkod nin Diyos, na nainot sa saiya, naggamit nin mga hayop para gumibo nin kumparasyon. Halimbawa, an  patriyarkang si Jacob ikinumparar an saiyang aki na si Juda sa sarong leon asin an saiyang aki na si Benjamin sa sarong lobo. (Gen. 49:9, 27) Taano? Huling an leon saka lobo naglaladawan sa mga karakteristiko, o kuwalidad, na magigin risang-risa sa personalidad kan mga lalaking ini. Base sa mga halimbawang ini na parte kan ipinasabong na surat ni Moises, posibleng naisip ni Ezekiel na an mga lalawgon kan mga kerubin naglaladawan man sa magagayon na kuwalidad. Anong mga kuwalidad?

7, 8. Sa anong mga kuwalidad parating ikinokonektar an apat na lalawgon kan mga kerubin?

⁷ Bago pa an panahon ni Ezekiel, sa anong mga kuwalidad ikinokonektar kan mga kagsurat kan Bibliya an leon, agila, saka torong baka? Mangnuhon an mga pananaram na ini sa Bibliya: “[An] sarong lalaking makusog an buot na an puso siring sa puso nin leon.” (2 Sam. 17:10; Tal. 28:1) “Minalayog paitaas an agila,” asin “naghihiling an mga mata kaiyan sa harayo.” (Job 39:27, 29) “An kusog nin torong baka nagtatao nin abundang ani.” (Tal. 14:4) Uyon sa mga tekstong ini saka arog kan parating pigsasambit sa satong mga publikasyon, an lalawgon nin leon naglaladawan sa kusog-buot na pagsagibo nin hustisya; an lalawgon nin agila, sa kadunungan na harayo an nahihiling; an lalawgon nin torong baka, sa makusog na kapangyarihan.

⁸ Pero kumusta man an “lalawgon nin tawo”? (Ezek. 10:14) Siyertong nanunungod iyan sa sarong kuwalidad na dai mahihiling sa arin man na hayop kundi sa tawo sana, na linalang nin Diyos uyon sa saiyang ladawan. (Gen. 1:27) An kuwalidad na iyan—na sa daga, sa mga tawo sana mahihiling—idinuon sa mga pagbuot na ini kan Diyos: “Kamutan mo si Jehova na saimong Diyos sa bilog mong puso” asin “kamutan mo an saimong kapwa nin siring sa saimong sadiri.” (Deu. 6:5; Lev. 19:18) Pag sinusunod ta an mga pagbuot na ini paagi sa pagpahiling nin bakong makasadiring pagkamuot, naaarog ta an pagkamuot ni Jehova. Arog kan isinurat ni apostol Juan, “kita namumuot, huli ta inot niya kitang namutan.” (1 Juan 4:8, 19) Kaya an “lalawgon nin tawo” nagrerepresentar sa pagkamuot.

9. Siisay an igwa kan mga kuwalidad na irinerepresentar kan mga lalawgon kan mga kerubin?

⁹ Siisay an igwa kan arog kaiyan na mga kuwalidad? Huling sa mga kerubin an mga lalawgon na ini, an mga kuwalidad na iyan yaon sa gabos na linalang na irinerepresentar kan mga kerubin sa bisyon—an pamilya ni Jehova sa langit nin maimbod na mga espiritung linalang. (Kap. 5:11) Dugang pa, huling si Jehova an Burabod nin buhay kan mga kerubin, siya man an Burabod, o pinaghalian, kan mga kuwalidad ninda. (Sal. 36:9) Kaya an mga lalawgon kan mga kerubin naglaladawan man mismo sa mga kuwalidad ni Jehova. (Job 37:23; Sal. 99:4; Tal. 2:6; Mik. 7:18) Ano an pira sa mga paagi na diyan ipinapahiling ni Jehova an pambihirang mga kuwalidad na ini?

10, 11. Ano an nagkapirang paagi na diyan nakikinabang kita sa pagpahiling ni Jehova kan saiyang apat na panginot na kuwalidad?

¹⁰ Hustisya. Bilang Diyos na “mamumuton sa hustisya,” “mayo nin pinapalain” si Jehova. (Sal. 37:28; Deu. 10:17) Kaya ano man an satong estado sa buhay o pinaghalian, gabos kita may oportunidad na  magin lingkod niya, magdanay na lingkod niya, asin mag-ako nin daing sagkod na mga bendisyon. Kadunungan. Bilang Diyos na “madunong,” nagtao si Jehova nin libro na pano nin “praktikal na kadunungan.” (Job 9:4; Tal. 2:7) An pagsabuhay kan madunong na sadol kan Bibliya nagtatabang sa sato na maatubang an mga problema sa aroaldaw saka magkaigwa nin makahulugan na buhay ngunyan. Kapangyarihan. Bilang Diyos na “makusugon an kapangyarihan,” ginagamit ni Jehova an saiyang banal na espiritu para tawan kita nin “puwersa na urog kisa sa ordinaryo.” Pinapakusog kita kaini para makayanan ta an masakit saka makulog na mga pagbalo na posibleng atubangon niyato.—Nah. 1:3; 2 Cor. 4:7; Sal. 46:1.

¹¹ Pagkamuot. Bilang Diyos na “abunda sa maimbod na pagkamuot,” nungkang pinapabayaan ni Jehova an saiyang maimbod na mga parasamba. (Sal. 103:8; 2 Sam. 22:26) Kaya dawa kun namumundo kita huling bako nang arog kadakul kan nagigibo ta kaidto an nagigibo ta ngunyan sa paglilingkod ki Jehova dahil sa hilang o paggurang, nararanga kita huling nagigirumduman ni Jehova an mga ginibo ta kaidto huli sa satong pagkamuot sa saiya. (Heb. 6:10) Malinaw nanggad na dakula an inaako tang pakinabang huli sa pagpahiling ni Jehova nin hustisya, kadunungan, kapangyarihan, saka pagkamuot, asin padagos kitang makikinabang sa apat na panginot na kuwalidad na ini sa maarabot pang panahon.

12. Ano an dapat niyatong tandaan manungod sa kakayahan ta na masabutan an mga kuwalidad ni Jehova?

¹² Siyempre, dapat niyatong tandaan na bilang mga tawo, ‘mga gilid pa sana kan mga dalan’ ni Jehova an kaya tang masabutan manungod sa mga kuwalidad niya. (Job 26:14) “Dai ta kayang sabuton nin lubos an Makakamhan sa Gabos,” huling “an saiyang kadakulaan dai kayang siyasaton.” (Job 37:23; Sal. 145:3) Dahil diyan, naaraman tang dai kayang bilangon an mga kuwalidad ni Jehova o isuway sa lambang saro. (Sal. 139:17, 18; basahon an Roma 11:33, 34.) Sa katunayan, an katotoohan na iyan manungod sa mga kuwalidad nin Diyos ihinahayag mismo sa bisyon ni Ezekiel. Anong kabtang kan bisyon an nagduduon sa mahalagang katotoohan na iyan?

13, 14. Ano an irinerepresentar kan apat na lalawgon kan mga kerubin, asin paano niyato iyan naaraman?

¹³ Nahiling ni Ezekiel sa bisyon na bako sanang saro, kundi apat, an lalawgon kan lambang kerubin. Ano an ipinaparisa kaini? Tandaan na sa Tataramon nin Diyos, parating ginagamit an bilang na apat para iladawan an pagigin kumpleto, o sakop an gabos. (Isa. 11:12; Mat. 24:31; Kap. 7:1) Mahalagang mangnuhon na sa bisyon na ini, 11 beses na sinambit ni Ezekiel an bilang na apat! (Ezek. 1:5-18) Ano ngunyan an manunudan ta digdi? Kun paanong an apat na kerubin nagrerepresentar sa gabos na iba pang maimbod na espiritung linalang, an apat na lalawgon kan mga kerubin, pag hiniling iyan sa kabilugan, nagrerepresentar sa gabos na kuwalidad ni Jehova. b

¹⁴ Para masabutan ta kun taano ta labi sa apat na kuwalidad an irinerepresentar kan apat na lalawgon kan mga kerubin, pag-isipan  an apat na ruweda sa bisyon. Makangangalas an lambang ruweda, pero pag hiniling sa kabilugan an apat na ruweda, bako sana ini basta apat na makangangalas na ruweda—an mga iyan an pundasyon kan karwahe. Sa kaagid na paagi, pag hiniling sa kabilugan an apat na lalawgon, bako sana iyan basta apat na magagayon na kuwalidad—an mga iyan an pinakapundasyon kan kahanga-hangang personalidad ni Jehova.

15. Anong nakakapakusog sa buot na katotoohan an nanudan ni Ezekiel sa inot na bisyon na nahiling niya?

¹⁵ Paagi sa inot na bisyon na ini, nanudan ni Ezekiel an sarong mahalaga asin nakakapakusog sa buot na katotoohan manungod sa relasyon niya ki Jehova. Ano iyan? Mababasa iyan sa kapinunan kan libro na isinurat niya. Pagkatapos sabihon ni Ezekiel na yaon siya “sa daga kan mga Caldeo,” ini pa an sinabi niya manungod sa nagin eksperyensiya niya: “Nag-abot sa saiya duman an kapangyarihan ni Jehova.” (Ezek. 1:3) Mangnuhon na sinabi ni Ezekiel na bako niya sa Jerusalem nahiling an bisyon kundi duman—sa Babilonya. c Ano an nanudan diyan ni Ezekiel? Nanudan niya na dawa saro siyang hamak na tawong idinistiyero asin harayo na sa Jerusalem saka sa templo kaini, dai siya kaiyan nairayo ki Jehova asin sa pagsamba sa Saiya. Huling ipinahiling ni Jehova ki Ezekiel na yaon man Siya sa Babilonya,  ipinapahiling kaini na an pagtao nin dalisay na pagsamba sa Diyos dai nakadepende sa lugar o kamugtakan. Imbes nakadepende iyan sa kamugtakan kan puso ni Ezekiel asin sa saiyang pagmawot na paglingkudan si Jehova.

16. (a) Anong nakakapakusog na asigurasyon an manunudan ta sa bisyon ni Ezekiel? (b) Ano an nagpapahiro saimo na paglingkudan si Jehova nin bilog mong puso?

¹⁶ Taano ta nakakapakusog nanggad sa sato an katotoohan na iyan na nanudan ni Ezekiel? Huling sinisiyerto kaini sa sato na pag bilog na puso tang pinaglilingkudan si Jehova, nagdadanay siyang harani sa sato sain man kita nakaistar, gurano man kasakit an inaagihan ta, o ano man an magin kamugtakan ta sa buhay. (Sal. 25:14; Gibo 17:27) Huling abunda an maimbod na pagkamuot ni Jehova sa lambang lingkod niya, dai niya kita tulos-tulos na pigsusukuan. (Exo. 34:6) Kun siring, pirming maipapamati sa sato ni Jehova an saiyang maimbod na pagkamuot. (Sal. 100:5; Roma 8:35-39) Dugang pa, ipinapagirumdom kan kahanga-hangang bisyon na ini manungod sa kabanalan asin daing kapantay na kapangyarihan ni Jehova na maninigo siya sa satong pagsamba. (Kap. 4:9-11) Nagpapasalamat nanggad kita na naggamit si Jehova nin arog kaiyan na mga bisyon para tabangan kitang masabutan an nagkapira sa importanteng mga katotoohan manungod sa saiya saka sa saiyang mga kuwalidad! Mantang mas nagrararom an satong pakasabot sa magagayon na kuwalidad ni Jehova, mas lalo man kitang napaparani sa saiya asin napapahiro na umawon siya saka paglingkudan nin bilog tang puso asin bilog tang kusog.—Luc. 10:27.

17. Anong mga hapot an sisimbagon ta sa masunod na mga kapitulo?

¹⁷ Pero nakakamundo, kan panahon ni Ezekiel, naramugan an dalisay na pagsamba. Paano iyan nangyari? Ano an nagin reaksiyon ni Jehova? Asin ano an manunudan ta ngunyan sa mga pangyayaring iyan? Sisimbagon an mga hapot na iyan sa masunod na mga kapitulo.