1-3. (a) Iladawan an nahiling asin nadangog ni Ezekiel. (Hilingon an ritrato sa kapinunan kan kapitulo.) (b) Anong kapangyarihan an nasa likod kan naeksperyensiyahan ni Ezekiel, asin ano an nagin epekto kaini sa saiya?

 NAKAHILING si Ezekiel sa harayo; nakatanaw siya lampas pa sa mahiwas saka mabaybay na kapatagan. Tapos, biglang napaburarat an saiyang mga mata. Dai nanggad siya makatubod sa saiyang nahihiling. Garo may papaabot na bagyo. Pero bako iyan ordinaryong bagyo. Mantang pigpapalid-palid an saiyang buhok asin an saiyang bado kan makusugon na duros hali sa norte, nahiling niya an sarong dakulaon na panganuron. Nagliliwanag iyan huli sa nagsisilyab na kalayo hali sa laog kaiyan, asin an liwanag kaiyan garo arog sa tinunaw na mamahalon na metal. a Mantang marikas na paparani ki Ezekiel an panganuron, nadadangog niya an sarong tanog na pakusog nin pakusog—garo tanog nin sarong dakulaon na hukbo na nagsasalakay.—Ezek. 1:4, 24.

² Mga 30 anyos siya kaidto, asin ini an inot sa sunod-sunod na dai malilingawan na eksperyensiya kan hoben na lalaking ini. Namati niya na yaon sa saiya “an kamot ni Jehova,” an dai malalabanan na kapangyarihan kan banal na espiritu ni Jehova. Paagi sa espiritung iyan, makakahiling siya asin makakadangog nin pambihirang mga bagay, na mas kahanga-hanga nanggad kisa sa ano man na special-effect sa pelikula. Sa sobrang pagngalas niya, napasubsob siya sa daga.—Ezek. 1:3, 28; nota sa ibaba.

 ³ Alagad, an katuyuhan digdi ni Jehova bako lang basta pahangaon an lalaking ini. An inot na bisyon ni Ezekiel—arog kan iba pang mga bisyon na yaon sa nakakapukaw sa buot na propetikong librong iyan—pano nin kahulugan, para sa saiya asin para sa maimbod na mga lingkod ni Jehova ngunyan. Kaya hilingon ta ngunyan kun ano an nahiling asin nadangog ni Ezekiel.

4, 5. Ano an kamugtakan kan banwaan kan mahiling ni Ezekiel an bisyon?

⁴ Basahon an Ezekiel 1:1-3. Girumdumon ta nguna an kamugtakan. An taon 613 B.C.E. Arog kan nanudan ta sa sinundan na kapitulo, nakaistar si Ezekiel sa Babilonya kaiba kan mga kahimanwa niya na idinistiyero, o puwersahan na dinara, sa Babilonya. Yaon sinda sa sarong komunidad sa may salog nin Kebar—minalataw na sarong salog na gibo nin tawo asin naaagihan nin mga sakayan na pantubig. An salog na iyan nagsanga hali sa salog nin Eufrates dangan nagsugpon giraray sa sarong parte kaini.

⁵ An Jerusalem, na iyo an pinaghalian na lugar kan mga idinistiyero, mga 800 na kilometro an rayo. b An templo, kun sain naglingkod an ama ni Ezekiel bilang saserdote, naramugan nin palsong pagsamba asin idolatriya. An trono sa Jerusalem, kun sain namahala si David asin si Solomon, nagin nang kasusupgan ngunyan. An daing pagtubod na si hading Jehoiakim yaon man sa Babilonya kaiba kan mga idinistiyero. An kasalida niya sa trono na si Zedekias nagin tawo-tawuhan sana asin sarong maraot na tawo.—2 Ha. 24:8-12, 17, 19.

6, 7. Taano ta namati ni Ezekiel na nabubuhay siya sa masakiton na panahon?

⁶ Masakiton ini para sa sarong tawo na may pagtubod arog ni Ezekiel. Tibaad iniisip-isip kan nagkapira sa mga kapwa niya idinistiyero: ‘Binayaan na daw talaga kita ni Jehova? Paparaon daw talaga kan  Babilonya asin kan dakulon na palsong mga diyos kaini an dalisay na pagsamba ki Jehova asin tatapuson an pamamahala niya sa daga?’

⁷ Pagkatapos na maaraman an mga impormasyon na iyan, taano ta dai mo punan na basahon an buhay na buhay na paglaladawan ni Ezekiel kan inot niyang bisyon? (Ezek. 1:4-28) Mantang ginigibo mo iyan, imahinaron mo na ika si Ezekiel, na garo baga nahihiling mo an nahihiling niya asin nadadangog mo an nadadangog niya.

8. Ano an nahiling ni Ezekiel sa bisyon, asin sa ano iyan nagrerepresentar?

⁸ Sa kabilugan, ano an nahiling ni Ezekiel? Garo iyan dakulaon asin kahanga-hangang lunadan, na ilinaladawan bilang karwahe. Igwa iyan nin apat na dakulaon na ruweda na may kataid na apat na kakaibang mga espiritung linalang, na kan huri ipinamidbid bilang mga kerubin. (Ezek. 10:1) Sa may itaas ninda, igwa nin mahiwason na plataporma, o salóg, na garo yelo, asin sa ibabaw kaiyan yaon an mamuraway na trono nin Diyos, na si Jehova mismo an nakatukaw! Pero, ano an irinerepresentar kan karwahe? Sa sarong bagay lang puwedeng magrepresentar an karwahe: sa langitnon na kabtang kan mamuraway na unibersal na organisasyon ni Jehova. Taano ta nasabi ta iyan? Pag-ulayan ta an tulong dahilan.

9. Taano ta angay an deskripsiyon kan lunadan para iladawan an relasyon ni Jehova sa mga linalang niya sa langit?

⁹ An relasyon ni Jehova sa mga linalang niya sa langit. Mangnuhon na sa bisyon na ini, an trono ni Jehova nasa may itaas kan mga kerubin. Sa ibang kabtang kan Tataramon nin Diyos, ilinaladawan man  si Jehova na nakatukaw sa trono na nasa ibabaw o nasa tahaw kan saiyang mga kerubin. (Basahon an 2 Hadi 19:15; Exo. 25:22; Sal. 80:1) Siyempre, dai man siya literal na nakatukaw sa ibabaw kan saiyang mga kerubin—na garo baga kaipuhan siyang alsahon kan makapangyarihan na mga espiritung linalang na iyan—kun paanong dai man niya kaipuhan na magsakay sa literal na karwahe. Pero sinusuportaran kan mga kerubin an saiyang soberaniya, asin puwede niya sindang isugo maski sain sa uniberso tanganing gibuhon an saiyang kabutan bilang Soberano. Arog kan gabos na banal na anghel nin Diyos, isinasagibo kan mga kerubin an mga desisyon ni Jehova bilang saiyang mga ministro, o mga representante. (Sal. 104:4) Sa dahilan na iyan, sinda gabos garo minakompuwesto sa sarong dakulaon na lunadan, asin “nakasakay” sa sainda si Jehova, na iyo an naggigiya o namamahala sa sainda bilang an saindang Soberano.

10. Ano an nagpaparisa na bako sanang apat na kerubin an sakop kan langitnon na karwahe?

¹⁰ Bako lang mga kerubin an irinerepresentar kan lunadan. Apat na kerubin an nahiling ni Ezekiel. An numerong iyan parating ginagamit sa Bibliya para iparisa an marahay na proporsiyon o pagigin kumpleto—sakop kaiyan an gabos. Kun siring angay nanggad na an apat na kerubin nagrerepresentar sa gabos na maimbod na espiritung mga aki ni Jehova. Risahon man na an mga ruweda, pati an mga kerubin mismo, pano nin mga mata. Ipinaparisa kaiyan na dakul an maingat na nagbabantay, bako lang apat na espiritung linalang. Asin an  paglaladawan ni Ezekiel sa lunadan nagpaparisa na dakulaon iyan. Kaya an dakulaon na mga kerubin garo saditon na sana. (Ezek. 1:18, 22; 10:12) Sa kaagid na paagi, dakulaon an langitnon na kabtang kan organisasyon ni Jehova, kaya bako sanang apat na kerubin an sakop kaiyan.

11. Anong kaparehong bisyon an nahiling ni Daniel, asin ano an rasonable sanang isipon ta?

¹¹ An kaparehong bisyon ni Daniel manungod sa langit. Si propeta Daniel haloy na nagin distiyero sa siyudad nin Babilonya, asin nagkaigwa man siya nin bisyon manungod sa langit. Interesante na sa bisyon na iyan, igwa man nin mga ruweda an trono ni Jehova. An bisyon ni Daniel nakapokus sa pagigin dakula kan espiritung pamilya ni Jehova sa langit. Nahiling ni Daniel an “sangribong manangribo . . . asin sampulong ribo na manampulong ribo” na mga espiritung aki nin Diyos na nakatindog sa atubangan ni Jehova. Nakatukaw sinda bilang sarong Husgado sa langit, na minalataw na an kada saro yaon sa kanya-kanya nindang puwesto. (Dan. 7:9, 10, 13-18) Bako daw na rasonable sanang isipon na an mamuraway na grupong ini nin mga espiritu iyo man an pinapanungdan kan bisyon ni Ezekiel?

12. Taano ta proteksiyon para sa sato na pag-adalan an mga pagkasaysay na arog kan bisyon ni Ezekiel manungod sa langitnon na karwahe?

¹² Aram ni Jehova na proteksiyon para sa satong mga tawo an pagpokus kan satong isip sa espirituwal na mga bagay—“sa mga bagay na dai nahihiling,” arog kan apod diyan ni apostol Pablo. Taano? Bilang mga linalang na may laman asin dugo, may tendensiya kita na magpokus na marhay sa “mga bagay na nahihiling,” sa pisikal na mga bagay, na temporaryo sana. (Basahon an 2 Corinto 4:18.) Sa parati, inaaprobetsaran ni Satanas an tendensiyang iyan asin tinetentaran kita na magin makalaman. Para malabanan iyan, mamumuton na tinatawan kita ni Jehova nin mga kasuratan arog kaining propesiya ni Ezekiel na nagtatao sa sato nin nakakapukaw sa buot na mga pagirumdom manungod sa kahanga-hangang pamilya ni Jehova​ sa langit!

13, 14. (a) Paano ilinadawan ni Ezekiel an mga ruweda na nahiling niya? (b) Taano ta angay na an karwahe ni Jehova igwa nin mga ruweda?

¹³ Kan primero, ipinokus ni Ezekiel an saiyang atensiyon sa apat na kerubin, asin sa kapitulo 4 kan publikasyon na ini, aaramon ta kun ano an itinutukdo sato manungod ki Jehova kan mga linalang na iyan asin kan pambihirang itsura ninda. Pero nahiling ni Ezekiel an apat na ruweda na kataid kan mga kerubin, na minalataw na nasa apat na kanto na minaporma nin sarong dakulaon na kuwadrado. (Basahon an Ezekiel 1:16-18.) Garo iyan gibo sa krisolito, sarong mamahalon na gapo, na silag asin kulor yellow o berdeng nagyeyelo-yellow. An magayon na bagay na ini nagkikinang.

¹⁴ Sa bisyon ni Ezekiel, tinawan nin dakulang pagduduon an mga ruweda kan karwahe. Kakaiba an kumbinasyon na iyan, bako? Sarong trono na may mga ruweda. Tibaad naiisip ta an sarong trono na nakapuwesto lang sa sarong lugar, asin tama sana iyan huling an mga  hadi sa daga limitado sana an sakop. Pero an soberaniya ni Jehova bakong arog kan arin man na pamamahala nin tawo. Arog kan manunudan ni Ezekiel, mayo nin limitasyon an kapangyarihan ni Jehova. (Neh. 9:6) An buot sabihon, kayang gamiton kan Soberanong ini an saiyang awtoridad sain man na lugar!

15. Ano an narisa ni Ezekiel manungod sa itsura asin kadakulaan kan mga ruweda?

¹⁵ Napahanga si Ezekiel sa kadakulaan kan mga ruweda. Isinurat niya: “Halangkawon na marhay an mga ruweda kaya makangangalas nanggad an mga iyan.” Maiimahinar ta si Ezekiel na nakatangad mantang pinagmamasdan niya an dakulaon saka nagliliwanag na mga ruweda na haros abot na sa langit. Asin idinagdag niya: “An mga rim kan apat [na ruweda] pano nin mga mata sa palibot.” Pero tibaad an pinakamakangangalas sa gabos iyo an kakaibang itsura asin pagkagibo kan mga ruweda. Sinabi niya: “An itsura saka an pagkagibo kan mga iyan garo sarong ruweda na nasa saro pang ruweda.” Ano an buot sabihon kaiyan?

16, 17. (a) Ano an buot sabihon kan paglaladawan na an mga ruweda kan karwahe garo sarong ruweda na nasa saro pang ruweda? (b) Ano an ipinapahiling kan mga ruweda manungod sa pagigin madaling maniobrahon kan lunadan ni Jehova?

¹⁶ Minalataw na an lambang ruweda na nahiling ni Ezekiel garo man sana duwang ruweda na pinagsaro, na an posisyon kan duwa magkaekis. Iyan an dahilan kaya nagigibo kan mga ruwedang ini an arog kan ilinadawan ni Ezekiel: “Pag naghihiro an mga iyan, kaya kan mga iyan na magpasiring sa arin man sa apat na direksiyon na dai minabirik.” Ano an ipinaparisa kan mga ruwedang ini manungod sa nahiling ni Ezekiel na lunadan sa langit?

¹⁷ Huling dakulaon an mga ruweda, sarong itok sana kaiyan, harayuon na an naaabot kaiyan. An totoo, sinasabi sa bisyon na an lunadan arog karikas nin kikilat. (Ezek. 1:14) Saro pa, minalataw na madaling maniobrahon an lunadan huli sa kakaibang mga ruweda kaini na kayang dumalagan sain man na direksiyon—sarong disenyo nin ruweda na sagkod sana sa pangarap kan mga inhenyero. An lunadan na ini kayang magbago nin direksiyon na dai kaipuhan magmenor o magsiko! Pero dai ini basta na sana minadalagan na dai iniintindi an palibot. Huling pano nin mga mata an mga rim, an buot sabihon, aram na aram kan lunadan na ini an mga nangyayari sa palibot kaini, sa gabos na direksiyon.

18. Ano an manunudan ta sa dakulaon na mga ruweda saka sa dakulon na mga mata diyan?

¹⁸ Kun siring, ano an itinutukdo ni Jehova ki Ezekiel—asin sa gabos na maimbod na tawo—manungod sa langitnon na kabtang kan Saiyang organisasyon? Pag-isipan an mga natukar ta na. Mamuraway iyan asin kahanga-hanga, arog kan ipinapahiling kan nagliliwanag na mga ruweda asin kan kadakulaan kaiyan. Aram kaiyan an gabos na bagay, arog kan ipinapahiling kan kadakul na mata sa mga ruweda. Nahihiling kan mga mata ni Jehova an gabos na bagay. (Tal. 15:3; Jer. 23:24) Apuwera kaiyan, igwa siya nin milyon-milyon na mga lingkod na anghel na puwede niyang isugo sa arin man na lugar sa uniberso. Asin maingat nindang maoobserbaran an mga bagay-bagay asin masasabi ninda ini sa saindang Soberano.—Basahon an Hebreo 1:13, 14.

19. Dahil marikas saka madaling maniobrahon an karwahe ni Jehova, ano an itinutukdo kaini sa sato manungod ki Jehova asin sa langitnon na kabtang kan saiyang organisasyon?

 ¹⁹ Saro pa, nahiling ta na an karwahe marikason na marhay asin madaling maniobrahon. Isip-isipa na sana kun paano napapalain an langitnon na kabtang kan organisasyon ni Jehova sa mga gobyerno, institusyon, asin organisasyon nin tawo. Garo sinda nagkakapkap sa diklom, na dai aram kun paano reresolberan an mga problema sa kinaban, asin dai sinda makasabay sa nagbabagong mga kamugtakan. Dahil diyan, dai sinda magigin mapanggana asin mapapahamak sinda. Pero perpektong ipinapabanaag kan karwahe ni Jehova an pagigin rasonable asin madaling makibagay nin Diyos, na iyo an may kontrol kaiyan. Arog kan ipinaparisa kan saiya mismong pangaran, kaya niyang magin ano man na kinakaipuhan para mautob an saiyang katuyuhan. (Exo. 3:13, 14) Halimbawa, puwede tulos siyang magin sarong makusog na Parapakilaban na nakikipaglaban para sa saiyang banwaan, alagad puwede man tulos siyang magin mahihirakon na Parapatawad nin mga kasalan na inaalalayan saka tinatabangan na makabangon dawa an mga nalugadan nin grabe an puso pero nagsusulsol na mga parakasala.—Sal. 30:5; Isa. 66:13.

20. Taano ta dapat kitang humanga sa karwahe ni Jehova?

²⁰ Sa puntong ini kan bisyon ni Ezekiel, tibaad maihapot ta sa satong sadiri, ‘Talaga daw na napapahanga ako sa karwahe ni Jehova?’ Kaipuhan tang tandaan na an karwahe talagang nag-eeksister ngunyan. Dai ta dapat nuarin man pag-isipon na an mga problema na nagpapaluya sa sato dai nahihiling ni Jehova, kan saiyang aki, asin kan gabos na mga anghel. Dai man kita dapat mahadit na an satuyang Diyos maaatraso sa pagtao kan satong mga pangangaipo o na an saiyang organisasyon dai makakasabay sa bagong mga kadipisilan na resulta kan nagbabagong mga kamugtakan sa kinaban. Dai ta paglingawan na an organisasyon ni Jehova aktibo, padagos na naghihiro. Sa katunayan, nadangog ni Ezekiel an sarong boses hali sa langit, na nagsasabi: “Mga ruweda!”—na minalataw na sarong pagbuot sa mga ruweda na humiro na. (Ezek. 10:13) Bako daw na napapahanga kita pag pinag-iisipan ta kun paano pinapahiro ni Jehova an saiyang organisasyon? Pero an pinakahinahangaan ta iyo si Jehova mismo.

21, 22. Paano ta ipapaliwanag kun ano an nagpapadanay sa mga parte kan karwahe na dai magkasuruwayan?

²¹ An atensiyon ni Ezekiel napaduman sa may itaas kan mga ruweda, kun sain nahiling niya an “garo mahiwas na salóg na nagkikintab arog nin makangangalas na yelo.” (Ezek. 1:22) Sa may itaas kan payo kan mga kerubin, igwa nin mahiwas na salóg na nagkikintab. Pero, sa puntong ini, an sarong parabasa na tatao sa makina tibaad kadakul nin hapot manungod sa lunadan. Halimbawa, tibaad maisip niya: ‘Ano an nagpupugol sa plataporma para magdanay na nasa may itaas kan mga ruweda? Asin paano makakahiro an mga ruweda kun mayo iyan nin mga ehe (axle)?’ Tandaan na an lunadan na ini dai sakop nin pisikal na mga ley huling simboliko ini, sarong paglaladawan kan mga bagay sa langit. Mangnuhon man an importanteng mga tataramon na ini: “An espiritu na naghihiro sa mga buhay na linalang yaon man  sa mga ruweda.” (Ezek. 1:20, 21) Ano an espiritung nagpapahiro sa mga kerubin saka sa mga ruweda?

²² Mayong duda na iyo iyan an banal na espiritu ni Jehova, an pinakamakapangyarihan na puwersa sa uniberso. An aktibong puwersang iyan an nagpapadanay na dai magkasuruwayan an mga parte kan lunadan na ini, an nagtatao nin kapangyarihan diyan, asin an naggigiya para uruyon nanggad an mga paghiro kaiyan. Mantang isinasaisip iyan, subaybayan ta si Ezekiel mantang pinagmamasdan niya ngunyan an Saro na nagkokontrol kan karwahe.

23. Anong mga tataramon an ginamit ni Ezekiel tanganing iladawan si Jehova, asin taano?

²³ Basahon an Ezekiel 1:26-28. Sa bilog na paglaladawan ni Ezekiel kan bisyon na ini, parati siyang naggagamit kan mga tataramon na “itsura,” “garo,” “kapareho,” asin “kaagid.” Pero sa mga bersikulong ini, mas parati pa siyang naggamit kan mga tataramon na iyan. Minalataw na nasakitan siyang makahanap nin mga tataramon para iladawan an kahanga-hangang mga nahihiling niya. May nahiling siyang “garo gapong sapiro, asin garo iyan sarong trono.” Naiimahinar mo an sarong trono na inukit hali sa sarong dakulaon na asul na gapong sapiro? Asin may nakatukaw duman na sarong Persona. An “itsura [niya] garo tawo.”

24, 25. (a) Ano an ipinapagirumdom sa sato kan bulalangaw na nakapalibot sa trono ni Jehova? (b) Ano an nagin epekto kan arog kaiyan na mga bisyon sa nagkapirang maimbod na mga lalaki?

²⁴ An pangkagabsan na itsura lang an mamamansayan sa kahanga-hangang ladawan na iyan, huling igwang nagluluwas na kalayo hali  ki Jehova puon sa habayan paibaba asin puon sa habayan paitaas. Tibaad kinaipuhan kan propeta na medyo ipirong asin tahuban an saiyang mga mata mantang pinagmamasdan niya an mamuraway na porma nin Diyos. Sa katapos-tapusi, nahiling ni Ezekiel an tampok na parteng ini kan bisyon: “May maliwanagon na liwanag sa palibot niya na arog nin bulalangaw sa panganuron sa sarong mauran na aldaw.” Bako daw na nauugma ka pag nakakahiling ka nin bulalangaw (rainbow)? Nagpapagirumdom nanggad iyan kan kamurawayan kan satong Kaglalang! An makulor na arkong iyan sa kalangitan nagpapagirumdom man sa sato kan tipan ni Jehova para sa katuninungan pagkatapos kan Delubyo. (Gen. 9:11-16) Dawa makapangyarihan siya, an Makakamhan sa Gabos sarong Diyos nin katuninungan. (Heb. 13:20) Nangingibabaw sa puso niya an katuninungan, asin ipinapalakop niya iyan sa gabos na maimbod na nagsasamba sa saiya.

²⁵ Ano an nagin epekto ki Ezekiel kan mahiling niya an paglaladawan kan kamurawayan kan Diyos na Jehova? Sinabi ni Ezekiel an nangyari: “Kan mahiling ko iyan, suminubsob ako.” Huli sa sobrang paghanga asin sa diyosnon na pagkatakot, suminubsob si Ezekiel sa daga. Arog man kaiyan an reaksiyon kan ibang mga propeta na nag-ako nin bisyon hali ki Jehova; an makakaeksperyensiya kaiyan siguradong magpapakumbaba o mangruruluya pa ngani. (Isa. 6:1-5; Dan. 10:8, 9; Kap. 1:12-17) Pero, pag-abot nin panahon, an mga lalaking idto napakusog na marhay kan ihinayag sa sainda ni Jehova. Siguradong iyan an nangyari ki Ezekiel. Kaya, ano an dapat na magin epekto sa sato pag nakakabasa kita sa Bibliya nin arog kaining mga pagkasaysay?

26. Paano napakusog si Ezekiel kan bisyon niya?

²⁶ Kun napupurisaw kaidto si Ezekiel huli sa ano man na pagduda manungod sa kamugtakan kan banwaan nin Diyos sa Babilonya, siguradong napakusog siya kan bisyon na iyan. Malinaw na bakong mahalaga kun an maimbod na mga lingkod nin Diyos nasa Jerusalem o nasa Babilonya o sain pa man na lugar. Siguradong kaya sindang abuton kan kahanga-hangang karwahe ni Jehova! Igwa daw nin magagamit si Satanas na puwedeng ilaban sa Diyos, na iyo an may kontrol kan arog kaiyan kamamuraway na organisasyon sa langit? (Basahon an Salmo 118:6.) Nahiling man ni Ezekiel na an lunadan sa langit bakong harayuon sa katawuhan. Nakaduta pa ngani iyan sa daga! (Ezek. 1:19) Kaya talagang interesado si Jehova sa maimbod na mga lingkod niya na nakadistiyero. Pirmi nanggad na makakaabot sa sainda an mamumuton na pag-ataman kan saindang Ama!

27. Ano an kahulugan para sa sato ngunyan kan bisyon ni Ezekiel?

²⁷ Igwa daw nin kahulugan para sa sato ngunyan an bisyon ni Ezekiel? Igwa nanggad! Tandaan, mas naggagrabe an mga pag-atake ni Satanas sa dalisay na pagsamba ki Jehova. Gusto niyang kumbinsiron  kita na nagsosolo kita, harayo, asin dai maaabot kan satong Ama sa langit asin kan saiyang organisasyon. Dai mo nanggad pagtugutan an mga kaputikan na ini na makaapektar sa saimong isip o puso! (Sal. 139:7-12) Arog ni Ezekiel, igwa kita nin dakul na dahilan para makamati nin labi-labing paghanga. Tibaad dai man kita magsubsob sa daga arog niya. Alagad, dai daw kita napapangalas asin napapahanga sa kapangyarihan, sa rikas, sa pagigin madaling maniobrahon, sa pagigin madaling makibagay, asin sa lubos na kamurawayan kan langitnon na kabtang kan unibersal na organisasyon ni Jehova?

28, 29. Ano an nagpapahiling na naghihiro an karwahe ni Jehova durante kan nakalihis na 100 na taon?

²⁸ Girumdumon man na an organisasyon ni Jehova igwa nin daganon na kabtang. Totoo, an daganon na kabtang kompuwesto nin bakong perpektong mga tawo. Pero isip-isipon kun ano an naisagibo ni Jehova digdi sa daga! Sa bilog na kinaban, tinabangan ni Jehova an mga tawo na magibo an mga bagay na dai nanggad ninda magigibo kun sinda sana. (Juan 14:12) Pag binasa ta an librong Namamahala Na an Kahadian nin Diyos!, marerealisar ta kun gurano na kahiwas an naabot kan gibuhon na paghuhulit sa nakalihis na 100 na taon. Mahihiling ta man an marikas na pag-uswag na nagibo kan organisasyon ni Jehova sa pagtukdo sa tunay na mga Kristiyano, sa pagkamit nin kapangganahan sa mga kaso sa korte, asin maski sa paggamit kan pinakabagong teknolohiya para maisagibo an kabutan nin Diyos!

²⁹ Pag pinag-iisipan ta an gabos na nagibo na para ibalik an dalisay na pagsamba durante kan huring mga aldaw kan maraot na sistemang ini nin mga bagay, nagigin mas malinaw sa sato na naghihiro an karwahe ni Jehova. Pambihirang pribilehiyo nanggad na magin kabtang kan organisasyon na ini asin na maglingkod sa Soberano!—Sal. 84:10.

30. Ano an pag-uulayan ta sa sunod na kapitulo?

³⁰ Alagad dakul pa an itutukdo sa sato kan bisyon ni Ezekiel. Sa sunod na kapitulo, urog ta pang aaramon an manungod sa apat na pambihirang “mga buhay na linalang,” o mga kerubin. Ano an puwede tang manudan sa sainda manungod sa satong mamuraway na Soberano, an Diyos na Jehova?