Malinaw na ipinapahiling kan mga propesiya sa Bibliya saka kan kasaysayan na nagpuon na maghadi si Jesus sa langit kan 1914, asin iyan an tanda na nagpuon na an huring mga aldaw kan sistema ni Satanas digdi sa daga. Ano an ginibo ni Jesus kan magin Hadi siya? Pinatalingkas niya daw tulos an saiyang mga lingkod sa daga sa pagkauripon sa Dakulang Babilonya? Ninombrahan niya daw an “maimbod asin mapagmansay na uripon” kan 1914 asin pinunan an dakulang gibuhon na pag-ani?—Mat. 24:45.

Malinaw na dai. Tandaan, pinasabngan si apostol Pedro na isurat na an paghukom “[pupunan] sa harong nin Diyos.” (1 Ped. 4:17) Ihinula man ni propeta Malakias na maabot si Jehova sa Saiyang harong nin pagsamba kaiba an “mensahero kan tipan,” an Aki nin Diyos. (Mal. 3:1-5) Magigin panahon iyan nin pagdalisay asin pagbalo. An mga propesiya daw na iyan kauyon kan mga pangyayari sa kasaysayan?

 Iyo nanggad! An mga taon puon 1914 sagkod sa pagpupuon kan 1919 masakit na panahon nin mga pagbalo saka pagdalisay para sa Mga Estudyante sa Bibliya, an apod kaidto sa Mga Saksi ni Jehova. Kan 1914, dakul sa banwaan nin Diyos sa daga an nadisganar kan dai nag-abot an linalauman nindang katapusan kan sistemang ini. Lalo sindang nadisganar kan 1916 kan magadan si Charles T. Russell, na maigot na nanginginot kaidto sa banwaan nin Diyos. An nagkapira na sobra an paghanga ki Brother Russell pigparakontra an mga paghihinguwa ni Joseph F. Rutherford, na iyo an nagsalida ki Russell sa panginginot. Nagkaigwa nin pagkampihan kaya dikit pang mabanga an organisasyon kan 1917. Dangan kan 1918, huli sa sutsut kan klero, si Brother Rutherford saka an pito sa mga kairiba niya binista, hinatulan na nagkasala base sa salang sahot, asin iprineso. Ipinasara an headquarters sa Brooklyn. Malinaw na an banwaan nin Diyos dai pa napatalingkas sa Dakulang Babilonya!

Pero ano an nangyari kan 1919? Biglang nagbago an mga bagay-bagay! Sa pagpupuon kan taon na iyan, pinaluwas sa presuhan si Brother Rutherford saka an saiyang mga kairiba. Asin idinagos tulos ninda an saindang trabaho! Tulos-tulos sindang nag-areglo nin sarong makasaysayan na kumbensiyon, asin pinunan an pagpublikar kan bagong babasahon, an The Golden Age (ngunyan Awake!). Dinisenyo an bagong babasahon para sa mga kampanya sa pampublikong ministeryo. Nagnombra man sa lambang kongregasyon nin paraataman na maorganisar asin masuportar sa ministeryo. Ipinublikar man kan taon na iyan an Bulletin (ngunyan An Satong Kristiyanong Pamumuhay Asin Ministeryo—Workbook Para sa Pagtiripon) para makatabang sa pag-organisar sa gibuhon na paghuhulit.

Ano an nangyari? Malinaw na pinatalingkas ni Cristo an mga lingkod niya sa pagkabihag sa Dakulang Babilonya. Ninombrahan niya an saiyang maimbod asin mapagmansay na uripon. Nagpupuon na an gibuhon na pag-ani. Puon kan importanteng marhay na taon na 1919, an gibuhon dagos-dagos na nag-abante sa makangangalas na paagi.