ANO an naiimahinar nindo sa Aldaw nin Paghokom? Dakol an nag-iisip na saro-sarong papaatubangon sa trono nin Dios an binilyon na kalag. Duman, hohokoman an balang indibiduwal. May mga babalosan nin glorya sa langit, asin an iba kokondenaron sa daing sagkod na pasakit. Minsan siring, laen nanggad an paglaladawan kan Biblia sa peryodong ini nin panahon. Ilinaladawan iyan kan Tataramon nin Dios, bakong bilang nakakasindak na panahon, kundi bilang sarong panahon nin paglaom asin pagbabalik sa dati.

Sa Kapahayagan 20:11, 12, mababasa niato an deskripsion ni apostol Juan sa Aldaw nin Paghokom: “Naheling ko an sarong dakulang puting trono asin si nagtutukaw dian. Hale sa saiyang atubangan an daga asin an langit nagdulag, asin mayo na nin nakuang lugar para sa sainda. Asin naheling ko an mga gadan, an darakula asin an saradit, na nagtitindog sa atubangan kan trono, asin an mga balumbon biniriklad. Alagad saro pang balumbon an biniklad; iyan an balumbon nin buhay. Asin hinokoman an mga gadan sono sa mga bagay na nasusurat sa mga balumbon segun sa saindang mga gibo.” Siisay an Hokom na ilinaladawan digdi?

Si Jehova Dios an supremong Hokom nin katawohan. Minsan siring, idinelegar nia an aktuwal na paghohokom. Segun sa Gibo 17: 31, sinabi ni apostol Pablo na an Dios “nagtalaan nin aldaw na katuyohan niang hokoman an ineerokan na daga sa katanosan paagi sa sarong lalaki na saiyang ninombrahan.” An ninombrahan na Hokom na ini iyo an binuhay liwat na si Jesu-Cristo. (Juan 5:22) Pero, noarin mapoon an Aldaw nin Paghokom? Gurano iyan kalawig?

Ipinapaheling kan librong Kapahayagan na an Aldaw nin Paghokom mapoon pakatapos kan guerra nin Armagedon, kun laglagon na an sistema ni Satanas digdi sa daga. a (Kapahayagan 16:14, 16; 19:19–​20:3) Pagkatapos kan Armagedon, si Satanas asin an saiyang mga demonyo ibibilanggo sa sarong bungaw sa laog nin sangribong taon. Sa panahon na iyan, an 144,000 na langitnon na kairibang paramana magigin mga hokom asin mamamahala “bilang mga hade kaiba kan Cristo sa laog nin sangribong taon.” (Kapahayagan 14:1-3; 20:1-4; Roma 8:17) An Aldaw nin Paghokom bakong sarong inapurang pangyayari na malawig sana nin 24 oras. Iyan malawig nin sangribong taon.

Durante kan peryodong iyan nin sangribong taon, si Jesu-Cristo ‘maghohokom sa mga buhay asin sa mga gadan.’ (2 Timoteo 4:1) An “mga buhay” iyo an “dakulang kadaklan” na makakaligtas sa Armagedon. (Kapahayagan 7:9-17) Naheling man ni apostol Juan “an mga gadan . . . na nagtitindog sa atubangan kan trono” nin paghokom. Siring kan ipinanuga ni Jesus, ‘an gabos na nasa mga lolobngan na girumdoman makakadangog kan tingog ni Cristo asin maruluwas’ paagi sa pagkabuhay liwat. (Juan 5:28, 29; Gibo 24:15) Alagad basado sa ano hohokoman an gabos?

Segun sa bisyon ni apostol Juan, “an mga balumbon biniriklad,” asin “hinokoman an mga gadan sono sa mga bagay na nasusurat sa mga balumbon segun sa saindang mga gibo.” An mga balumbon daw na ini rekord kan nakaaging mga ginibo nin mga tawo? Bako, an paghokom dai ibabasar sa mga ginibo nin mga tawo bago sinda nagadan. Paano niato iyan naaaraman? An Biblia nagsasabi: “An nagadan absuelto na sa saiyang kasalan.” (Roma 6:7) Sa siring an mga binuhay liwat mabubuhay na malinig an rekord, sabi ngani. Kun siring, an mga balumbon siertong nagrerepresentar sa dugang pang mga kahagadan nin Dios. Tanganing mabuhay sagkod lamang, an mga makakaligtas sa Armagedon sagkod an mga binuhay liwat kaipuhan na kumuyog sa mga togon nin Dios, kaiba an ano man  na bagong mga kahagadan na tibaad ihayag ni Jehova durante kan sangribong taon. Sa siring, an mga indibiduwal hohokoman basado sa gigibohon ninda durante kan Aldaw nin Paghokom.

An Aldaw nin Paghokom matao sa binilyon na tawo kan primerong oportunidad ninda na makanood manongod sa kabotan nin Dios asin sumunod dian. Nangangahulogan ini na magkakaigwa nin pagtotokdo na mahiwason an sakop. Tunay na “an katanosan iyo nanggad an manonodan kan mga nag-eerok sa mabungang daga.” (Isaias 26:9) Minsan siring, dai gugustohon kan gabos na sumunod sa kabotan nin Dios. An Isaias 26:10 nagsasabi: “Minsan pa pahelingan nin marahay na boot an sarong maraot, dai nanggad sia makakanood nin katanosan. Sa daga nin katanosan sia magibo nin bakong makatanosan asin dai makakaheling kan kalangkawan ni Jehova.” An mga maraot na ini gagadanon nin permanente durante kan Aldaw nin Paghokom.​—Isaias 65:20.

Sa katapusan kan Aldaw nin Paghokom, an mga makakaligtas ‘mabubuhay’ na nin lubos bilang mga tawong sangkap. (Kapahayagan 20:5) Sa siring, sa Aldaw nin Paghokom an katawohan ibabalik sa orihinal na sangkap na kamugtakan kaini. (1 Corinto 15:24-28) Dangan magkakaigwa nin pangultimong pagbalo. Si Satanas bubutasan sa saiyang pagkabilanggo asin totogotan na probaran na dayaon an katawohan nin saro na sanang beses. (Kapahayagan 20:3, 7-10) Makakamtan kan mga makontra sa saiya an lubos na kaotoban kan panuga kan Biblia: “An mga matanos mismo magmamana kan daga, asin sinda mag-eerok dian sagkod lamang.” (Salmo 37:29) Iyo, an Aldaw nin Paghokom magigin sarong bendisyon sa gabos na maimbod na katawohan!