Dai nahaloy pagkabawtismo ki Jesus, napaatubang siya sa sarong kaiwal na gustuhon siyang masudya bago pa man niya punan an saiyang ministeryo. Iyo, pauruutrong tinentaran si Jesus kan Diyablo. Kan huri, sinabi ni Jesus manungod sa maraot na iyan: “An tagapamahala kan kinaban madatong na, asin mayo siya nin kontrol sa sako.”—Juan 14:30.

Patiinot na nahiling ni apostol Juan paagi sa bisyon kun ano an mangyayari sa “dakulang dragon, an orihinal na halas, an inaapod na Diyablo asin Satanas.” An mabangis na kaiwal na ini kan katawuhan papalayason sa langit, “na may dakulang kaanggutan, sa pakaaram na halipot na sana an saiyang panahon.” (Kapahayagan 12:9, 12) Kaya, may marahay na dahilan an mga Kristiyano na maniwala na nabubuhay na sinda sa ‘halipot na panahon’ na iyan asin na dai na mahahaloy “an dragon, an orihinal na halas,” ihuhulog na sa bûngaw, o kairaruman, asin 1,000 taon siyang mayong magiginibo mantang namamahala si Jesus sa Kahadian nin Diyos.—Kapahayagan 20:1, 2.

Sa panahon na iyan, ano an mangyayari sa daga na satong istaran? Siisay an maistar diyan, asin sa anong mga kamugtakan? Itinao mismo ni Jesus an simbag. Sa saiyang ilustrasyon dapit sa mga karnero asin mga kanding, ipinahiling niya kun ano an naghahalat sa matanos na mga tawo na arog-karnero, na nakikipagtabangan saka naggigibo nin marahay sa mga tugang ni Jesus. Lininaw man niya kun ano an kaaabtan kan mga naggigibo nin kabaliktaran kaiyan, idtong mga arog-kanding. Si Jesus nagsabi: “An mga ini [an mga kanding] paparaon nin daing sagkod, alagad an mga matanos [an mga karnero] mabubuhay nin daing katapusan.”—Mateo 25:46.

Tinatabangan kita kaini na masabutan an sinabi ni Jesus sa kataid niyang kriminal na nakapako sa hariging pasakitan. Dai ipinangako ni Jesus sa lalaking idto an arog kan ipinanuga niya sa saiyang maimbod na mga apostol—an pagigin kabtang kan Kahadian kan kalangitan. Imbes, nangako siya sa  nagsulsol na kriminal na idto: “Sinisigurado ko sa saimo sa aldaw na ini, makakaibanan taka sa Paraiso.” (Lucas 23:43) Kaya, an lalaking iyan nagkaigwa nin paglaom na mabuhay sa Paraiso—sarong magayunon na parke, o hardin. Rasonable sana na an mga magigin arog-karnero ngunyan saka “mabubuhay nin daing katapusan” maistar man sa Paraisong iyan.

Kauyon ini kan paglaladawan ni apostol Juan manungod sa magigin kamugtakan kan daga pag-abot nin panahon. An sabi niya: “An tolda nin Diyos nasa mga tawo, asin siya mag-iirok kaiba ninda, asin sinda magigin saiyang banwaan. Asin an Diyos mismo magigin kaibanan ninda. Asin papahidon niya an gabos na luha sa saindang mga mata, asin mawawara na an kagadanan, pati pagmundo, pagtangis, asin kulog. An dating mga bagay nakalihis na.”—Kapahayagan 21:3, 4.

Tanganing makamtan kan kriminal na idto an buhay sa Paraiso, kaipuhan siyang buhayon liwat. Asin bako lang siya an bubuhayon liwat. Lininaw iyan ni Jesus kan siya magsabi: “Maabot an oras na an gabos na yaon sa mga lulubngan na girumduman makakadangog kan saiyang boses asin maruluwas, idtong mga naggiribo nin marahay pasiring sa pagkabuhay liwat para sa buhay, asin idtong mga naggiribo nin karatan pasiring sa pagkabuhay liwat para sa paghukom.”—Juan 5:28, 29.

Pero kumusta man an maimbod na mga apostol ni Jesus asin an sadit na bilang nin iba pa na makakaibanan niya sa langit? Sinasabi kan Bibliya: “Sinda magigin mga saserdote nin Diyos asin kan Cristo, asin mamamahala sinda bilang mga hadi kaiba niya sa laog nin 1,000 taon.” (Kapahayagan 20:6) An mga makakaibanan na ini ni Cristo bilang mga tagapamahala dating nagin mga lalaki asin babayi digdi sa daga. Kaya siguradong an mga tagapamahalang ini sa langit magigin mahihirakon asin mapagsabot sa mga tawo digdi sa daga.—Kapahayagan 5:10.

Gagamiton ni Jesus sa katawuhan an halaga kan saiyang atang na pantubos para halion sa sainda an sumpa kan minanang kasalan. Si Jesus asin an saiyang kairibang tagapamahala dadarahon sa pagkaperpekto an maimbod na mga tawo. Iyo, sa panahon na iyan, makakamtan na nin tawo an buhay na kauyon kan orihinal na katuyuhan nin Diyos para sa sainda, siring kan sinabi niya ki Adan asin Eva na magpakadakul asin panuon an daga. Mawawara na nanggad pati an kagadanan na resulta kan kasalan ni Adan!

Sa siring, uutubon ni Jesus an gabos na ipinapagibo sa saiya ni Jehova. Sa katapusan kan Sangribong Taon na Pamamahala ni Jesus, itatao na niya sa saiyang Ama an Kahadian asin an pamilya nin mga tawo na nagin nang perpekto. Manungod sa pambihirang kapakumbabaan na ini ni Jesus, si apostol Pablo nagsurat: “Pag an gabos na bagay ikinapasakop na sa saiya, dangan an Aki mismo mapasakop man sa Saro na nagpasakop kan gabos na bagay sa saiya, tanganing an Diyos magin an solamenteng kagsakop kan gabos.”—1 Corinto 15:28.

Malinaw na may mahalaga nanggad na papel si Jesus sa pag-utob kan mamuraway na mga katuyuhan nin Diyos. Asin mantang an mga katuyuhan na iyan padagos na nauutob sagkod lamang, si Jesus magdadanay pa man giraray bilang “an dalan asin an katotoohan asin an buhay.”—Juan 14:6.