Panahon kaidto para sa pamilya ni Jose, kaiba an mga amigo asin paryente, na magbaklay pa-Jerusalem, arog kan ginigibo ninda taon-taon. Nagduman sinda para iselebrar an Paskuwa, siring sa ipinagbubuot kan Katugunan. (Deuteronomio 16:16) Haling Nazaret, mga 120 kilometros an pagbaklay na ini pa-Jerusalem. Sibot asin maugma an gabos sa pagpreparar para digdi. Si Jesus, na 12 anyos na ngunyan, gustong-gusto nang makaduman giraray sa kapiyestahan asin sa templo.

Para ki Jesus asin sa saiyang pamilya, an Paskuwa bako sanang sarong aldaw na okasyon. An aldaw pagkatapos kan Paskuwa an kapinunan kan pitong aldaw na Kapiyestahan kan Tinapay na Daing Lebadura. (Marcos 14:1) Ibinibilang iyan na kabtang kan panahon nin Paskuwa. An pagbaklay hali sa saindang harong sa Nazaret, an pagdagos sa Jerusalem, asin an pagbaklay papuli inaabot nin mga duwang semana. Pero ngunyan na taon, may nangyari ki Jesus, kaya medyo nahaloy-haloy sinda. May nariparo sindang problema kan pabalik na sinda hali sa Jerusalem.

Mantang nagbabaklay, hinuna ni Jose asin Maria na si Jesus kasabay sa grupo kan mga paryente asin mga amigo ninda na magkairibang nagbabaklay panorte. Pero kan magpundo sinda para magpahingalo kan bangging idto, dai ninda siya nahiling. Kaya hinanap ninda siya sa mga kairiba nindang nagbabaklay, pero mayo siya duman. Nawawara si Jesus! Huli kaini, nagbalik si Jose asin Maria sa Jerusalem para hanapon siya.

Bilog na aldaw sindang naghanap, pero dai ninda siya nahiling. Dai man ninda siya nahiling maski kan ikaduwang aldaw na. Pero kan ikatulong aldaw na, nanumpungan man giraray ninda an saindang aki, na yaon duman sa templo kun sain may dakul na kuwarto. Nahiling ninda siya na nakatukaw sa tahaw nin nagkapirang Judiong paratukdo. Nagdadangog siya, naghahapot, asin napapangalas niya sinda huli sa saiyang pakasabot.

“Aki ko, taano ta ginibo mo ini sa samo?” an hapot ni Maria. “Uni kami kan saimong ama, natataranta na sa pagparahanap sa saimo.”—Lucas 2:48.

Napangalas si Jesus ta dai ninda aram kun sain siya ninda manunumpungan. “Taano ta pighahanap nindo ako?” an hapot niya. “Dai nindo naisip na siguradong yaon ako sa harong kan sakuyang Ama?”—Lucas 2:49.

Ngunyan na magkairibanan na giraray sinda, uminiba si Jesus ki Jose asin Maria pabalik sa Nazaret asin padagos siyang nagpasakop sa sainda. Padagos na nadadagdagan an saiyang kadunungan asin padagos siyang nagdadakula. Dawa hoben pa, nakamit niya an pag-uyon nin Diyos asin nin mga tawo. Iyo, puon sa pagkaaki, nagpahiling si Jesus nin marahay na halimbawa bako sana sa paghanap nin espirituwal na mga bagay kundi pati man sa pagpahiling nin paggalang sa mga magurang.