Kun may katuod ka na hinahangaan asin iginagalang mo, hinihinguwa mong magin arog niya. “Marahay asin tanos si Jehova,” an sabi kan Bibliya. (Salmo 25:8) Tanganing magin katuod nin Diyos, dapat na kita magin marahay asin matanos. Sinasabi kan Bibliya: “Magin kamong mga paraarog sa Diyos, bilang mga aki na namumutan na marhay, asin padagos kamong maglakaw sa pagkamuot.” (Efeso 5:​1, 2) Uya an nagkapirang paagi na magibo iyan:

Magin matinabang sa iba. “Gumibo kita kan marahay sa gabos.”​—Galacia 6:10.

Maghigos sa trabaho. “An parahabon dai na maghabon, kundi marahay pa na siya magpagal, na naggigibo nin marahay na gibo paagi sa saiyang mga kamot.”​—Efeso 4:28.

Magdanay na malinig sa pisikal asin sa moral. “Magpakalinig kita sa lambang ramog nin laman asin espiritu, na sinasangkap an kabanalan sa pagkatakot sa Diyos.”​—2 Corinto 7:1.

 Kamutan asin igalang an mga miyembro kan saindong pamilya. “An lambang saro sa saindo mamuot sa saiyang agom na babayi arog kan pagkamuot niya sa saiyang sadiri; sa ibong na kampi, an agom na babayi maninigong magkaigwa nin hararom na paggalang sa saiyang agom. Mga aki, magin makinuyog sa saindong mga magurang.”​—Efeso 5:33–6:1.

Magpahiling nin pagkamuot sa iba. “Padagos kitang magkaminuruutmuutan, huli ta an pagkamuot gikan sa Diyos.”​—1 Juan 4:7.

Sunudon an mga ley kan nasyon. “An lambang kalag magpasakop sa [gobyerno] . . . Itao sa gabos an nanunungod sa sainda, sa saiya na naghahagad nin buhis, an buhis.”​—Roma 13:​1, 7.