Kaipuhan an paghihinguwa para magkaigwa nin sarong katuod; kaipuhan an paghihinguwa para magdanay an sarong katuod. An mga paghihinguwa mong magin asin magdanay na katuod nin Diyos lubos na bebendisyunan. Sinabi ni Jesus sa mga nagtubod sa saiya: “An katotoohan mapatalingkas sa saindo.” (Juan 8:32) Ano an buot sabihon kaiyan?

Puwede kang makamati nin kaginhawahan ngunyan. Puwede kang makahali sa salang mga katukduan asin kaputikan na pinapalakop ni Satanas. Mahahali sa saimo an kawaran nin paglaom na namamatian kan minilyon na tawong dai nakakamidbid ki Jehova. (Roma 8:22) An mga katuod nin Diyos mayo na ngani nin “pagkatakot sa kagadanan.”​—Hebreo 2:​14, 15.

Puwede kang makamati nin kaginhawahan sa bagong kinaban nin Diyos. Pambihirang kaginhawahan nanggad an mamamati mo sa maabot na panahon! Sa Paraisong daga, mayo na nin giyera, hilang, asin krimen. Mayo nang pagtios asin gutom. Mayo nang paggurang asin kagadanan. Mayo nang takot, pang-aapi, asin inhustisya. An Bibliya nagsasabi manungod sa Diyos: “Ibinubuka mo an saimong kamot asin pinapaniguan an mawot nin lambang bagay na may buhay.”​—Salmo 145:16.

 An mga katuod nin Diyos mabubuhay sagkod lamang. An buhay na daing katapusan sarong mahalagang marhay na regalo na itatao nin Diyos sa gabos na naghihinguwang magin katuod niya. (Roma 6:23) Isip-isipa na sana kun ano an magigin kahulugan para sa saimo kan buhay na daing katapusan!

Magkakapanahon kang gibuhon an dakul na bagay. Tibaad gusto mong makanuod na tumugtog nin sarong instrumento. O tibaad gusto mong makanuod na magpinta nin mga ritrato o magin panday. Tibaad gusto mong makanuod manungod sa mga hayop o tanom. O siguro gusto mong magbiyahe para mahiling an iba-ibang nasyon asin mga tawo. Magigin posible an gabos na ini dahil igwa ka nang buhay na daing katapusan!

Magkakapanahon kang makahanap nin dakul na katuod. Dahil sa buhay na daing katapusan, dakul kang mamimidbid na nagin mga katuod nin Diyos. Maaaraman mo an mga talento asin marahay na mga kuwalidad ninda, saka magigin mga katuod mo man sinda. Mamumutan mo sinda, asin mamumutan ka man ninda. (1 Corinto 13:8) An pagkaigwa nin buhay na daing katapusan matao sa saimo nin panahon na makipagkatuod sa gabos na nabubuhay sa daga! Urog sa gabos, an pagigin magkatuod nindo ni Jehova lalong magkukusog sa pag-agi nin mga taon. Lugod na ika magin katuod nin Diyos sagkod lamang!