Makakanuod ka manungod ki Jehova paagi sa pagbasa kan Bibliya. Kaidtong haloy nang panahon an nakaagi puminili an Diyos nin nagkapirang tawo tangani na isurat an saiyang kaisipan. An mga isinurat na iyan inaapod na Bibliya. Ngunyan nakakanuod kita manungod sa Diyos paagi sa pagbasa kan Bibliya. Dahil yaon sa Bibliya an tataramon, o mensahe, ni Jehova, inaapod man iyan na Tataramon nin Diyos. Makakatubod kita sa sinasabi kan Bibliya ta si Jehova pirming nagsasabi nin totoo. “Dai mangyayaring magputik an Diyos.” (Hebreo 6:18) Nasa Tataramon nin Diyos an katotoohan.​—Juan 17:17.

An Bibliya saro sa pinakamahalagang regalo nin Diyos sa sato. Garo iyan surat nin sarong mapagpadabang ama sa saiyang mga aki. Sinasabi kaiyan sa sato an manungod sa panuga nin Diyos na an daga gigibuhon na marahayon na istaran​—sarong paraiso. Sinasabi kaiyan sa sato an ginibo niya kan nakaagi, an ginigibo niya ngunyan, saka an gigibuhon niya sa maabot na panahon para sa saiyang maimbod na mga aki. Tinatabangan man kita kaiyan na masolusyunan an satong mga problema asin magin maugma.​—2 Timoteo 3:​16, 17.

 An Mga Saksi ni Jehova katuod nin Diyos; tatabangan ka nindang masabutan an itinutukdo kan Bibliya. Sabihon mo sana sa sainda na gusto mong mag-adal kan Bibliya. Dai sinda nagpapabayad para diyan. (Mateo 10:8) Saro pa, puwede kang mag-atender sa Kristiyanong mga pagtiripon. An mga ini ginigibo sa mga lugar nin pagsamba na inaapod Kingdom Hall. Kun maatender ka sa Kristiyanong mga pagtiripon, madaling madadagdagan an kaaraman mo manungod sa Diyos.

Puwede kang makanuod manungod sa Diyos paagi sa mga bagay na ginibo niya. Halimbawa, sinasabi kan Bibliya: “Linalang nin Diyos an kalangitan asin an daga.” (Genesis 1:1) Kan lalangon ni Jehova “an kalangitan,” ginibo niya an aldaw, o an saldang. Ngunyan ano an sinasabi kaiyan sa sato manungod sa Diyos? Sinasabi kaiyan sa sato na dakulaon an kapangyarihan ni Jehova. Siya lang an makakagibo nin sarong bagay na arog kan saldang na grabe an puwersa. Sinasabi man kaiyan sa sato na si Jehova madunong, ta kaipuhan an kadunungan sa paggibo kan saldang, na nagtatao nin init saka liwanag pero dai nauubusan kaiyan.

Ipinapahiling kan mga linalang ni Jehova na padaba niya kita. Isip-isipon mo an gabos na iba-ibang klase nin prutas na yaon digdi sa daga. Puwede kutana na an itinao sa sato ni Jehova saro sanang klase nin prutas​—o mayo ngani. Pero, tinawan kita ni Jehova nin dakul na klase nin prutas na iba-iba an korte, sukol, kulor, saka namit. Ipinapahiling kaini na si Jehova bako sanang sarong mapagpadabang Diyos kundi matinao man na marhay asin maasikaso saka mabuot.​—Salmo 104:24.