LEKSIYON 35
Kun Paano Makakagibo nin Marahay na mga Desisyon
Gabos kita kaipuhan na gumibo nin mga desisyon. Dakul sa mga desisyon na iyan an puwedeng magkaigwa nin dakulang epekto sa sato asin sa satong relasyon ki Jehova. Halimbawa, tibaad kaipuhan tang magdesisyon kun sain kita maistar, kun ano an pipilion tang trabaho, o kun baga maagom o dai. Pag nakakagibo kita nin marahay na mga desisyon, nagigin maugma kita asin napapaugma ta man si Jehova.
1. Paano makakatabang an Bibliya para makagibo ka nin marahay na mga desisyon?
Bago magdesisyon, mamibi ki Jehova na tabangan ka asin magsiyasat sa Bibliya para maaraman kun ano an paghiling niya sa sarong bagay. (Basahon an Talinhaga 2:3-6.) May mga bagay na diyan nagtao si Jehova nin malinaw na pagbuot. An pagsunod sa mga pagbuot na iyan an pinakamarahay na desisyon na magigibo mo.
Pero paano kun mayong malinaw na pagbuot an Bibliya manungod sa sarong bagay na kaipuhan mong desisyunan? Gigiyahan ka pa man giraray ni Jehova “sa dalan na dapat mong lakawan.” (Isaias 48:17) Paano? Tibaad may mga prinsipyo sa Bibliya na puwedeng makatabang sa saimo. An mga prinsipyo sa Bibliya mga panginot na katotoohan na nagpapahiling kan kaisipan asin pagmati nin Diyos. Sa parati, naaaraman ta an paghiling nin Diyos sa sarong bagay pag binasa ta an sarong pagkasaysay sa Bibliya. Pag nasasabutan ta an pagmati ni Jehova, makakagibo kita nin mga desisyon na makakapaugma sa saiya.
2. Anong mga bagay an dapat tang pag-isipan bago gumibo nin desisyon?
Sinasabi kan Bibliya: “An saro na alisto an isip pinag-iisipan an lambang lakad.” (Talinhaga 14:15) Buot sabihon, bago kita magdesisyon, dapat tang pag-isipan nguna kun ano an satong mga pagpipilian o kun ano an mga puwede tang gibuhon. Mantang pinag-iisipan an kada saro kaiyan, haputon an saimong sadiri: ‘Anong mga prinsipyo sa Bibliya an aplikado digdi? Arin sa mga pagpipilian an makakatao sako nin tuninong na isip? Paano puwedeng makaapekto sa iba an desisyon ko? Urog sa gabos, makakapaugma daw iyan ki Jehova?’—Deuteronomio 32:29.
May deretso si Jehova na magbugtak nin pamantayan sa kun ano an marahay asin kun ano an maraot. Pag hinihinguwa tang masabutan an mga pagbuot asin mga prinsipyo ni Jehova saka kun determinado kitang sunudon iyan, sinasanay ta an satong konsiyensiya. An konsiyensiya iyo an satong natural na pakamati kun baga tama o sala an sarong bagay. (Roma 2:14, 15) An konsiyensiya na nasanay nin tama makakatabang sa sato na makagibo nin marahay na mga desisyon.
ARAMON PA
Aramon pa kun paano makakatabang an mga prinsipyo sa Bibliya asin an satong konsiyensiya para makagibo kita nin marahay na mga desisyon.
3. Magpagiya sa Bibliya
Paano makakatabang an mga prinsipyo sa Bibliya pag naggigibo kita nin mga desisyon? I-play an VIDEO, dangan pag-ulayan an mga hapot.
-
Ano an libertad na magdesisyon?
-
Taano ta tinawan kita ni Jehova nin kakayahan na magdesisyon para sa satong sadiri?
-
Ano an mga itinao niya sa sato para matabangan kitang makagibo nin pinakamarahay na mga desisyon?
Para mahiling an sarong halimbawa kan prinsipyo sa Bibliya, basahon an Efeso 5:15, 16. Dangan pag-ulayan kun paano mo ‘magagamit sa pinakamarahay an saimong panahon’ para . . .
-
mabasa nin regular an Bibliya.
-
magin mas marahay na agom, magurang, o aki.
-
makaatender sa mga pagtiripon kan kongregasyon.
4. Sanayon an saimong konsiyensiya para makagibo nin marahay na mga desisyon
Pag may malinaw na pagbuot an Bibliya sa sarong bagay, madali sanang maaraman kun ano an dapat gibuhon. Pero paano kun mayong malinaw na pagbuot? I-play an VIDEO, dangan pag-ulayan an hapot.
-
Sa video, ano an mga ginibo kan sister para sanayon an konsiyensiya niya asin makagibo nin desisyon na makakapaugma ki Jehova?
Taano ta dai ta dapat hagadon sa iba na sinda an magdesisyon para sa sato? Basahon an Hebreo 5:14, dangan pag-ulayan an mga hapot na ini:
-
Dawa ngani garo baga mas madali na iba na lang an magdesisyon para sa sato, ano an dapat na manudan ta mismo?
-
Ano an igwa kita na makakatabang sa sato para masanay ta an satong konsiyensiya asin makagibo nin marahay na mga desisyon?
Arog nin sarong mapa, tinatabangan kita kan satong konsiyensiya na makapagdesisyon kun anong direksiyon sa buhay an dudumanan ta
5. Irespeto an konsiyensiya kan iba
An desisyon ta tibaad iba sa desisyon kan iba. Paano ta maipapahiling na rinerespeto ta an konsiyensiya kan iba? Pag-isipan an duwang sitwasyon:
Sitwasyon 1: Sarong sister na mahilig mag-makeup an nagbalyo sa sarong kongregasyon na dakul na sister an negatibo kun manungod sa paggamit nin makeup.
Basahon an Roma 15:1 asin 1 Corinto 10:23, 24, dangan pag-ulayan an mga hapot na ini:
-
Base sa mga tekstong iyan, ano an tibaad magin desisyon kan sister? Ano an gigibuhon mo kun may kaiba ka na habong gibuhon an sarong bagay dahil dai iyan kaya kan konsiyensiya niya pero okey lang iyan sa konsiyensiya mo?
Sitwasyon 2: Aram nin sarong brother na dai ipinagbabawal kan Bibliya an tama sanang pag-inom nin arak, pero nagdesisyon siya na dai mag-inom nin ano man na arak. Naimbitaran siya sa sarong gathering na diyan nahiling niya na may mga brother na nag-iinom nin arak.
Basahon an Eclesiastes 7:16 asin Roma 14:1, 10, dangan pag-ulayan an mga hapot na ini:
-
Base sa mga tekstong iyan, ano an tibaad magin desisyon kan brother? Ano an gigibuhon mo pag may nahiling kang naggigibo nin sarong bagay dahil okey lang iyan sa konsiyensiya niya pero dai iyan kaya kan konsiyensiya mo?
Ano an mga dapat gibuhon para makagibo nin marahay na mga desisyon?
1. Mamibi ki Jehova na tabangan kang makapagdesisyon.—Santiago 1:5.
2. Mag-research sa Bibliya saka sa mga babasahon na basado sa Bibliya para maaraman an mga prinsipyo na makakatabang. Puwede ka man maghapot sa eksperyensiyadong mga Kristiyano.
3. Pag-isipan an puwedeng magin epekto sa konsiyensiya mo asin sa konsiyensiya kan iba kan desisyon na gigibuhon mo.
MAY MGA NAGSASABI: “Deretso mong gibuhon kun ano an gusto mo. Ta’no ta iisipon mo pa man an iba?”
-
Taano ta dapat tang isipon an mamamati ni Jehova asin kan ibang tao?
SUMARYO
Makakagibo kita nin marahay na mga desisyon kun aaramon ta an paghiling ni Jehova sa mga bagay-bagay saka kun pag-iisipan ta kun baga makakatabang o makakaraot sa iba an satong gigibuhon.
Rebyu
-
Paano ka makakagibo nin desisyon na makakapaugma ki Jehova?
-
Paano mo sasanayon an saimong konsiyensiya?
-
Paano mo maipapahiling na rinerespeto mo an konsiyensiya kan iba?
HILINGON MAN
Paano ka makakagibo nin mga desisyon na makakapakusog kan relasyon mo sa Diyos?
“Gumibo nin mga Desisyon na Nagtataong Onra sa Dios” (An Torrengbantayan, Abril 15, 2011)
Pararumon an saimong pakasabot sa kun paano kita ginigiyahan ni Jehova.
Aramon kun ano an nakatabang sa sarong lalaki sa paggibo nin sarong magabat na desisyon.
Aramon pa kun paano mapapaugma si Jehova pag nagdedesisyon sa sarong bagay na diyan mayo siyang espesipikong pagbuot.
“Kamo daw Pirmeng Nangangaipo nin Pagboot sa Biblia?” (An Torrengbantayan, Disyembre 1, 2003)
Puwede Mo Man Magustuhan
PARATING MGA IHINAHAPOT
Ano an Pag-adal sa Bibliya na Iinaalok kan mga Saksi ni Jehova?
Sa interactive na programa nin pag-adal na iinaalok kan mga Saksi ni Jehova, puwede mong gamiton an arin man na traduksiyon nin Bibliya. Dai mag-alangan na imbitaran an saimong bilog na pamilya o an siisay man sa mga amigo mo na umiba saimo.
