1, 2. Ano an puwede tang gibuhon para magdanay sa pagkamuot nin Diyos?

 GUSTO niyato gabos na magin makusog saka dai magkahilang. Kaya nagkakakan kita nin masustansiyang kakanon, regular na nag-eehersisyo, asin inaataman ta an satong hawak. Maski ngani bako iyan arog kaiyan kadali, sulit man an resulta, kaya dai kita nagpupundo. Pero dapat man kitang magin makusog saka dai magkahilang sa saro pang bagay.

² Dawa ngani namidbid ta na si Jehova, kaipuhan tang padagos na pakusugon an satuyang relasyon sa saiya. Kan sabihon ni Judas sa mga Kristiyano na ‘magdanay sa pagkamuot nin Diyos,’ ipinaliwanag niya kun paano ninda iyan magigibo. Sinabi niya: “Pakusuga an sadiri nindo sa saindong kabanal-banaling pagtubod.” (Judas 20, 21) Paano niyato mapapakusog an satong pagtubod?

3-5. (a) Ano an gusto ni Satanas na isipon mo manungod sa mga pamantayan ni Jehova? (b) Ano an masasabi mo sa mga pagbuot asin prinsipyo ni Jehova?

³ Mahalaga na kumbinsido ka mismo na an mga pamamaagi ni Jehova an pinakamarahay. Gusto ni Satanas na isipon mo na dipisilon sunudon an mga pamantayan nin Diyos asin na magigin mas maugma ka kun ika an madesisyon kun ano an tama asin sala. Hininguwa niya, puon pa sa  hardin nin Eden, na patubudon diyan an mga tawo. (Genesis 3:1-6) Asin iyan pa man giraray an hinihinguwa niyang gibuhon sagkod ngunyan.

⁴ Tama daw si Satanas? Sobra daw kaistrikto kan mga pamantayan ni Jehova? Dai. Bilang halimbawa, isipon na naglalakaw ka sa sarong magayon na parke. Tapos may nariparo kang sarong halangkaw na kudal kaya dai mo madumanan an sarong lugar. Tibaad maisip mo, ‘Nakakaulang man an kudal na ini.’ Pero bigla kang nakadangog nin ungal nin leon sa ibong kan kudal. Ano na ngunyan an hiling mo sa kudal? Siguradong magpapasalamat ka ta napoprotektaran ka kaiyan na dai masakmal kan leon! Arog kan kudal na iyan an mga prinsipyo ni Jehova, asin arog kan leon na iyan an Diyablo. An Tataramon nin Diyos nagpapatanid sa sato: “Pagdanayon nindo an tultol na pag-iisip, magin mapagbantay! An saindong kaiwal, an Diyablo, naglilibot-libot na siring sa nag-uungal na leon, na naghahanap nin masisiba.”—1 Pedro 5:8.

⁵ Gusto ni Jehova na magkaigwa kita kan pinakamarahay na buhay. Habo niya na madaya kita ni Satanas. Iyan an dahilan kaya tinawan niya kita nin mga pagbuot asin prinsipyo tanganing protektaran kita asin magin maugma. (Efeso 6:11) Isinurat ni Santiago: “Kun an saro maingat na pinagmamasdan an perpektong katugunan na nagdadara nin katalingkasan asin kun siya nagdadanay diyan, . . . siya magigin maugma sa saiyang ginigibo.”—Santiago 1:25.

 6. Ano an makakatabang sa sato na magin kumbinsido na an mga pamamaagi nin Diyos an pinakamarahay?

⁶ Pag nagsusunod kita sa mga pagbuot ni Jehova, nagigin mas marahay an satong buhay asin mas lalo kitang nagigin harani sa saiya. Halimbawa, nakikinabang kita pag ginigibo ta an pangagda niya sa sato na pirming mamibi sa saiya. (Mateo 6:5-8; 1 Tesalonica 5:17) Maugma kita pag sinusunod ta an pagbuot niya na magtiripon para sambahon siya  asin pakusugon an lambang saro saka pag maigot kitang naghuhulit asin nagtutukdo kan maugmang bareta. (Mateo 28:19, 20; Galacia 6:2; Hebreo 10:24, 25) Pag iniisip-isip ta kun paano napapakusog kan mga bagay na ini an satong pagtubod, mas lalo kitang nagigin kumbinsido na an mga pamamaagi ni Jehova an pinakamarahay.

7, 8. Ano an makakatabang sa sato na dai magparahadit manungod sa mga pagbalo na tibaad mag-abot sa sato?

⁷ Tibaad mahadit kita na dai ta makaya an maabot na mga pagbalo sa satong pagtubod. Kun arog kaiyan an namamati mo, girumdumon an sinabi ni Jehova: “Ako, si Jehova, an saimong Diyos, an Saro na nagtutukdo sa saimo tanganing ika makinabang, an Saro na naggigiya sa saimo sa dalan na dapat mong lakawan. Kun tatawan mo lang kuta nin atensiyon an sakuyang mga tugon! Dangan magigin siring sa salog an saimong katuninungan asin magigin siring sa mga alon kan dagat an saimong katanusan.”—Isaias 48:17, 18, NW.

⁸ Pag nagsusunod kita ki Jehova, an satong katuninungan nagigin arog sa salog na dai nawawaran nin tubig, asin an satong katanusan nagigin arog sa mga alon sa dagat na padagos  na nag-aapwak sa baybayon. Ano man an mangyari sa buhay ta, kaya tang magin maimbod. Nangangako an Bibliya: “Ipasa mo ki Jehova an saimong pasan, asin ika saiyang aalalayan. An saro na matanos dai niya tutugutan na matumba nuarin man.”—Salmo 55:22, NW.

9, 10. Paano ta masasabi na an saro may makusog na espirituwalidad?

⁹ Mantang pinapakusog mo an saimong relasyon ki Jehova, ‘padagos man na matalubo an saimong espirituwalidad.’ (Hebreo 6:1) Ano an buot sabihon kan magtalubo sa espirituwal?

¹⁰ Bako edad an basehan para masabing nagtalubo o makusog na kita sa espirituwal. Para kumusog an satong espirituwalidad, dapat na magin pinakadayupot na Amigo ta si Jehova asin arugon ta an paghiling niya sa mga bagay-bagay. (Juan 4:23) Si Pablo nagsurat: “An mga nabubuhay na kauyon kan laman nakasentro an isip sa mga bagay na minamawot kan laman, alagad an mga nabubuhay na kauyon kan espiritu, nakasentro an isip sa mga bagay na inuuyunan kan espiritu.” (Roma 8:5) An tawong makusog an espirituwalidad dai nakapokus sa pagpasiram-siram sa buhay o sa materyal na mga bagay. Imbes, nagpopokus siya sa paglilingkod ki Jehova asin naggigibo nin madunong na mga desisyon sa buhay. (Talinhaga 27:11; basahon an Santiago 1:2, 3.) Dai siya nagpapaimpluwensiya na gumibo nin sala. Aram kan saro na may makusog na espirituwalidad kun ano an tama asin determinado siyang gibuhon iyan.

11, 12. (a) Ano an sinabi ni Pablo manungod sa kakayahan na makasabot nin sarong Kristiyano? (b) Ano an pagkakapareho nin sarong Kristiyanong makusog an espirituwalidad saka nin sarong atleta?

¹¹ Kaipuhan tang maghinguwa para kumusog an satong espirituwalidad. Nagsurat si apostol Pablo: “An matagas na  kakanon para sa mga tawong makusog na sa pagtubod, sa mga tawong paagi sa paggamit kan saindang [kakayahan na makasabot] sinanay iyan na mamidbid an kalainan kan tama asin kan sala.” (Hebreo 5:14) Sa tataramon na “sinanay,” puwede tang maisip an training nin sarong atleta.

¹² Pag nakakahiling kita nin sarong matibay na atleta, aram ta na dakul na panahon saka pagsasanay an kinaipuhan para magin matibay siya. Dai siya ipinangaking atleta. Pag an sarong tawo namundag, dai pa niya talaga aram kun paano gagamiton an saiyang mga kamot saka bitis. Pero sa paglihis nin panahon, nakakanuod siyang magkapot saka maglakaw. Pag pig-training, puwede siyang magin atleta. Sa kaagid na paagi, kaipuhan niyato nin panahon asin pagsasanay para kumusog an satong espirituwalidad bilang Kristiyano.

13. Ano an makakatabang sa sato na maarog an kaisipan ni Jehova?

¹³ Sa librong ini, nanudan niyato kun paano ta maaarog an kaisipan ni Jehova asin an paghiling niya sa mga bagay-bagay. Nanudan tang magustuhan asin pahalagahan an mga pamantayan ni Jehova. Pag naggigibo kita nin mga desisyon, hinahapot ta an satong sadiri: ‘Anong mga pagbuot o prinsipyo sa Bibliya an puwedeng makatabang sa sitwasyon na ini? Paano ko iyan masusunod? Ano daw an gusto ni Jehova na gibuhon ko?’—Basahon an Talinhaga 3:5, 6; Santiago 1:5.

14. Ano an kaipuhan niyatong gibuhon para kumusog an satong pagtubod?

¹⁴ Kaipuhan na padagos tang pakusugon an satong pagtubod ki Jehova. Kun paanong an pagkakan nin masustansiyang kakanon nakakatabang para kumusog an satong hawak, an pag-adal manungod ki Jehova nakakatabang man para kumusog an satong pagtubod. Kan mag-adal kita nin Bibliya, nanudan ta an pundamental na mga katotoohan manungod ki Jehova asin sa saiyang mga pamamaagi. Pero  sa paglihis nin panahon, kaipuhan tang masabutan an mas harararom na bagay. Iyan an buot sabihon ni Pablo kan sabihon niya: “An matagas na kakanon para sa mga tawong makusog na sa pagtubod.” Pag isinasabuhay niyato an satong mga nanunudan, nagkakaigwa kita nin kadunungan. Sinasabi sa sato kan Bibliya: “An kadunungan iyo an pinakaimportanteng bagay.”—Talinhaga 4:5-7, NW; 1 Pedro 2:2.

15. Taano ta mahalaga an tunay na pagkamuot ki Jehova saka sa satong mga tugang?

¹⁵ Dawa makusog saka daing hilang an sarong tawo, aram niya na kaipuhan niyang padagos na atamanon an saiyang sadiri para pirming magayon an kondisyon kan saiyang hawak. Sa kaagid na paagi, aram kan sarong tawong makusog an espirituwalidad na kaipuhan niyang maghinguwang marhay para pirming magin makusog an saiyang relasyon ki Jehova. Ipinapagirumdom sa sato ni Pablo: “Padagos na siyasaton an saindong sadiri kun baga nangangapot kamo sa pagtubod; padagos na baluon an saindong sadiri para mapatunayan nindo kun anong klaseng tawo kamo.” (2 Corinto 13:5) Pero, bako sanang makusog na pagtubod an kaipuhan niyato. Dapat man na padagos na kumusog an satong pagkamuot ki Jehova saka sa satong mga tugang. Sinabi ni Pablo: “Kun igwa ako nin . . . kaaraman, asin kun igwa ako nin makusugon na pagtubod na makakapahiro nin mga bukid, pero mayo akong pagkamuot, dai akong serbi.”—1 Corinto 13:1-3.

16. Ano an gusto ni Satanas na isipon ta?

¹⁶ Gusto ni Satanas na isipon niyato na dai ta mapapaugma si Jehova dawa ano pang gibuhon ta. Gusto niya na pangluyahan kita nin buot asin isipon ta na mayo nang solusyon sa mga problema niyato. Habo niyang magtiwala kita sa satong mga kapwa Kristiyano, asin habo niya kitang magin maugma. (Efeso 2:2) Aram ni Satanas na an  negatibong mga kaisipan puwedeng makaraot sa sato asin sa satong relasyon sa Diyos. Pero may itinao sa sato si Jehova na makakatabang sa sato na malabanan an negatibong mga kaisipan—an satong paglaom.

17. Gurano kahalaga an paglaom?

¹⁷ Sa 1 Tesalonica 5:8, an satong paglaom iinagid kan Bibliya sa helmet na nagpoprotektar sa payo nin sarong suldados pag nasa laban. An helmet na iyan inaapod na ‘paglaom na kaligtasan.’ Kun igwa kita nin paglaom sa mga panuga ni Jehova, magigin proteksiyon iyan sa satong isip asin matatabangan kita kaiyan na labanan an negatibong mga kaisipan.

18, 19. Paano nakapakusog ki Jesus an paglaom?

¹⁸ Nakapakusog ki Jesus an paglaom. Kan huring banggi niya digdi sa daga, napaatubang siya sa sunod-sunod na masakit na sitwasyon. Trinaydor siya kan saro sa namumutan niyang mga amigo. Pignigaran man siya kan saro pa. Binayaan siya kan iba pa asin nagdurulag. Pinagkasararuan siya kan mismong mga kahimanwa niya asin iyo pa an naghagad  na pasakitan siya sagkod na magadan. Ano an nakatabang saiya na makayanan an mga bagay na ini? “Huli sa kaugmahan na inaantisipar niya, tinagalan niya an hariging pasakitan, na dai iniintindi an kasusupgan, asin tuminukaw siya sa may tuo kan trono nin Diyos.”—Hebreo 12:2.

¹⁹ Aram ni Jesus na kun magigin maimbod siya, mapapamuraway niya an saiyang Ama asin mapapatunayan na putikon si Satanas. An paglaom na ini an nagtao saiya nin dakulang kaugmahan. Aram niya man na madali na niyang makaibanan giraray sa langit an saiyang Ama. An paglaom na iyan nakatabang sa saiya na magtagal. Arog ni Jesus, dapat kitang magpokus sa satong paglaom. Makakatabang iyan sa sato na makatagal ano man an mangyari.

20. Ano an makakatabang sa saimo na magin positibo?

²⁰ Nahihiling ni Jehova an saimong pagtubod asin pakatagal. (Isaias 30:18; basahon an Malaquias 3:10.) Nanunuga siya na “an mga minamawot kan puso mo itatao niya.” (Salmo 37:4, NW) Kaya pirming ipokus an saimong isip  sa saimong paglaom. Gusto ni Satanas na mawaran ka nin paglaom asin mamati mo na dai nuarin man magkakatotoo an mga panuga ni Jehova. Pero dai ka dapat magpadaog sa negatibong mga kaisipan! Kun marisa mong nagluluya na an saimong paglaom, maghagad nin tabang ki Jehova. Girumdumon an mga tataramon sa Filipos 4:6, 7: “Dai kamo mahadit sa ano man na bagay, kundi sa gabos na panahon paagi sa pamibi asin pagngayo-ngayo na may kaibang pasasalamat, ipaaram nindo sa Diyos an saindong mga kahagadan; asin an katuninungan nin Diyos na nakakalabi sa gabos na pakasabot iyo an magbabantay sa saindong puso asin kaisipan paagi ki Cristo Jesus.”

21, 22. (a) Ano an katuyuhan ni Jehova para sa daga? (b) Ano an determinado mong gibuhon?

²¹ Pirming magtao nin panahon para isip-isipon an magayunon na puturong naghahalat sa sato. Dai na mahahaloy, an gabos na nabubuhay magsasamba ki Jehova. (Kapahayagan 7:9, 14) Isipa na sana an magigin buhay sa bagong kinaban. Mas magigin magayon pa iyan kisa sa ano man na maiisip niyato! Si Satanas, an saiyang mga demonyo, asin an gabos na maraot mawawara na. Dai ka na magkakahilang asin dai ka na magagadan. Imbes, mamata ka kada aldaw na makusog asin maugma. An gabos magtatarabangan para gibuhon na paraiso an daga. An gabos magkakaigwa nin masiram na kakanon asin ligtas na istaran. An mga tawo dai na magigin maisog o madahas kundi magigin mabuot talaga sinda sa kada saro. Pag-abot nin panahon, maeeksperyensiyahan kan gabos na tawo sa daga an “mamuraway na katalingkasan bilang mga aki nin Diyos.”—Roma 8:21.

²² Gusto ni Jehova na magin pinakadayupot na Amigo mo siya. Kaya gibuhon mo an saimong pinakamakakaya na sunudon si Jehova asin lalo pang magin harani sa saiya sa kada aldaw. Iyo, lugod na gabos kita magdanay sa pagkamuot nin Diyos habangbuhay!—Judas 21.