Inorganisar nin Dios an mga naggikan sa patriarkang si Abraham na magin nasyon asin tinawan nin kodigo nin mga ley. An nasyon na iyan inapod niang “Israel” asin inasignaran na ingatan an tunay na pagsamba asin an tataramon nia. (Salmo 147:19, 20) Kaya, an mga tawo sa gabos na nasyon puedeng makinabang sa Israel.​—Basahon an Genesis 22:18.

 Pinili nin Dios an mga Israelita na magin mga saksi nia. Ipinapahiling kan suanoy na kasaysayan ninda kun paano an mga tawo nakikinabang paagi sa pagkuyog sa mga ley nin Dios. (Deuteronomio 4:6) Sa siring, paagi sa mga Israelita puedeng mamidbid nin iba an tunay na Dios.​—Basahon an Isaias 43:10, 12.

 Pag-abot nin panahon, nawara kan Israel an pabor ni Jehova, asin isinalida Nia an Kristianong kongregasyon. (Mateo 21:43; 23:37, 38) Ngonyan, bilang kasalida kan mga Israelita, an tunay na mga Kristiano an nagseserbing mga saksi ni Jehova.​—Basahon an Guibo 15:14, 17.

 Inorganisar ni Jesus an mga parasunod nia tanganing maghulit asin gumibo nin mga disipulo sa gabos na nasyon. (Mateo 10:7, 11; 24:14; 28:19, 20) An gibohon na ini harani na sa kulminasyon kaiyan, sa pagtatapos kan presenteng sistema nin mga bagay. Sa kaenot-enote sa kasaysayan, pinagsasararo ni Jehova sa tunay na pagsamba an minilyon hale sa gabos na nasyon. (Kapahayagan 7:9, 10) Inorganisar an tunay na mga Kristiano tanganing parigonon asin tabangan an lambang saro. Sa bilog na kinaban, pararehong programa nin pagtotokdo sa Biblia an inaako ninda sa mga pagtiripon.​—Basahon an Hebreo 10:24, 25.

 Kan dekada nin 1870, sarong sadit na grupo nin mga estudyante sa Biblia an nagpoon na diskobrehon liwat an haloy nang nalingawan na mga katotoohan sa Biblia. Naaraman ninda na inorganisar ni Jesus an Kristianong kongregasyon tanganing maghulit, kaya pinonan ninda an internasyonal na kampanya nin paghuhulit dapit sa Kahadean. Kan 1931, inako ninda an ngaran na Mga Saksi ni Jehova.​—Basahon an Guibo 1:8; 2:1, 4; 5:42.

 Kan enot na siglo, nakinabang an Kristianong mga kongregasyon sa dakol na kadagaan sa sentral na namamahalang grupo na minimidbid si Jesus bilang Payo kan kongregasyon. (Guibo 16:4, 5) Kaagid kaiyan, nakikinabang ngonyan an Mga Saksi ni Jehova sa bilog na kinaban sa Namamahalang Grupo na kompuesto nin eksperyensiadong mga elder sa kongregasyon. Iyan an nagdidirehir sa mga sangang opisina kan mga Saksi na nagtatradusir, nag-iimprenta, asin nagdidistribwir nin mga publikasyon para sa pag-adal sa Biblia sa labing 600 na lenguahe. Huli kaiyan, nakakapagtao an Namamahalang Grupo nin sono sa Kasuratan na pamparigon asin paggiya sa labing 100,000 na kongregasyon sa bilog na kinaban. Sa kada kongregasyon, may kualipikadong mga lalaki na naglilingkod bilang elder, o paraataman. Sinda mamomoton na nangangataman sa aripompon nin Dios.​—Basahon an 1 Pedro 5:2, 3.

 Inoorganisar an mga Saksi tanganing ihulit an maogmang bareta asin gumibo nin mga disipulo. Naghaharongharong kami arog kan mga apostol. (Guibo 20:20) Inaalokan mi man nin pag-adal sa Biblia an mga sinsero asin mamomoton sa katotoohan. Alagad, bakong basta sana organisasyon an Mga Saksi ni Jehova. Kami sarong pamilya na may mamomoton na Ama. Kami magturugang na nagmamakolog sa lambang saro. (2 Tesalonica 1:3) An banwaan ni Jehova an pinakamaogmang pamilya huling sinda inoorganisar tanganing paogmahon an Dios asin tabangan an iba.​—Basahon an Salmo 33:12; Guibo 20:35.