Dawa ngani ginigibo nindo an saindong pinakamakakaya para magin maugma kamong mag-agom asin an saindong pamilya, tibaad may mangyaring dai inaasahan na makakahali kan saindong kaugmahan. (Parahulit 9:11) An Diyos mamumuton na nagtatabang sa sato pag may inaagihan kitang mga kasakitan. Kun susunudon mo an minasunod na mga prinsipyo sa Bibliya, makakayanan mo saka kan pamilya mo dawa an pinakagrabeng sitwasyon.

AN SINASABI KAN BIBLIYA: ‘Ibugtak nindo sa saiya an gabos nindong kahaditan, huli ta siya may pagmakulog sa saindo.’ (1 Pedro 5:7) Tandaan na bako an Diyos an dapat basulon sa mga pagbalo sa saindo. (Santiago 1:13) Kun marani kamo sa saiya, tatabangan niya kamo sa pinakamarahay na paagi. (Isaias 41:10) “Isabi nindo saiya an gabos nindong kasakitan.”—Salmo 62:8, BPV.

Mararanga ka man kun babasahon asin pag-aadalan mo an Bibliya aroaldaw. Mamamatian mo kun paano si Jehova ‘nagraranga sato sa gabos tang kasakitan.’ (2 Corinto 1:3, 4; Roma 15:4) Nanunuga an Diyos na tatawan ka niya kan ‘saiyang katuninungan na minalampas sa gabos na pakasabot.’—Filipos 4:6, 7, 13.

AN PUWEDE MONG GIBUHON:

• Ipamibi ki Jehova na tabangan kang magin kalmado asin makapag-isip nin malinaw

• Pag-isipan kun ano an mga puwede mong gibuhon asin pilion diyan an pinakamarahay

AN SINASABI KAN BIBLIYA: ‘An puso kan nakakasabot nakakakua nin kadunungan, asin an talinga kan mga madunong naghahanap kan kadunungan.’ (Talinhaga 18:15) Aramon an gabos na impormasyon saka an kaipuhan kan lambang miyembro nin pamilya. Kaulayon sinda. Dangugon sinda.—Talinhaga 20:5.

Paano kun magadanan ka nin kapamilya? Dai matakot na iluwas an namamatian mo. Tandaan na si Jesus ngani naghibi. (Juan 11:35; Parahulit 3:4) Importante man an igong pahingalo asin turog. (Parahulit 4:6) Makakatabang iyan para mas madali kang makabawi sa nakakamundong sitwasyon.

AN PUWEDE MONG GIBUHON:

• Ugalion na makipag-ulay sa mga kapamilya bago pa man magkaigwa nin trahedya. Pag nagkaproblema, dai sinda madidipisilan na makipag-ulay sa saimo

• Makipag-ulay sa mga nakaeksperyensiya na man kaiyan

AN SINASABI KAN BIBLIYA: ‘An katuod namumuot sa gabos na panahon, asin tugang siyang minadamay sa oras nin kasakitan.’ (Talinhaga 17:17, BPV) Gusto kang tabangan kan mga amigo mo, pero tibaad dai lang ninda aram kun paano. Dai mag-alangan na sabihon sa sainda kun ano talaga an kaipuhan mo. (Talinhaga 12:25) Humagad nin espirituwal na tabang sa mga tawong may aram sa Bibliya. Makakatabang sa saimo an sasabihon ninda hali sa Bibliya.—Santiago 5:14.

Makakakua ka kan suporta na kaipuhan mo kun regular kang makikiasosyar sa mga tawo na may tunay na pagtubod sa Diyos asin nagtitiwala sa saiyang mga panuga. Mararanga ka man kun tatabangan mo an mga nangangaipo nin pampakusog sa buot. Sabihon sa sainda an manungod sa pagtubod mo ki Jehova asin sa mga panuga niya. Magin sibot sa pagtabang sa iba na nangangaipo, asin dai isuway an sadiri sa mga namumuot asin nagmamakulog sa saimo.—Talinhaga 18:1; 1 Corinto 15:58.

AN PUWEDE MONG GIBUHON:

• Makipag-ulay sa amigo mo asin magpatabang ka sa saiya

• Magin prangka asin sabihon kun ano mismo an kaipuhan mo