SI Santiago asin Judas mga tugang ni Jesus sa ina. Si Pedro asin Juan kabilang sa 12 apostol. An apat na lalaking iyan naggibo nin total na pitong surat na yaon sa Kristianong Griegong Kasuratan. An lambang saro sa mga surat na ini inginaran sa kagsurat kaiyan. An ipinasabong na konseho na yaon sa mga surat na ini may katuyohan na tabangan an mga Kristiano na papagdanayon an integridad ki Jehova asin danay na isaisip an Kahadean nin Dios.

Magpaheling nin pagtubod. Bakong igo na sabihon sana nin saro na sia igwa nin pagtubod. An tunay na pagtubod sinusundan nin gibo. “Sa katunayan,” an surat ni Santiago, “an pagtubod na daing mga gibo gadan.” (Santiago 2:26) An pakatagal napapatalubo paagi sa paghiro na may pagtubod kun napapaatubang sa mga pagbalo. Tanganing magin mapanggana, an sarong Kristiano kaipuhan na maghagad sa Dios nin kadonongan, na kombensido na iyan itatao nin Dios sa saiya. An pakatagal nagbubunga nin pag-oyon nin Dios. (Santiago 1:2-6, 12) Kun an sarong nagsasamba nagdadanay na may integridad huli sa pagtubod, si Jehova Dios mahiro man. “Rumani kamo sa Dios,” an sabi ni Santiago, “asin sia marani sa saindo.”​—Santiago 4:8.

An pagtubod nin sarong Kristiano dapat na may igong kosog na tabangan siang labanan an mga sugot asin imoral na mga impluwensia. Huli sa lakop na maraot na kamugtakan sa moral, si Judas naobligar na sadolon an saiyang mga kapagtubod na “makipaglaban nin maigot para sa pagtubod.”​—Judas 3.

Papagdanayon an malinig na paggawe. Inaasahan ni Jehova na an mga nagsasamba sa saiya magin banal, an boot sabihon, malinig sa gabos na bagay. Si Pedro nagsurat: “Magin . . . kamong banal sa gabos nindong paggawe, huli ta nasusurat: ‘Magpakabanal kamo, huli ta ako [si Jehova] banal.’” (1 Pedro 1:15, 16) An mga Kristiano igwa nin arogan na angay na arogon. “Si Cristo nagsakit para sa saindo,” an sabi ni Pedro, “na winalatan kamo nin modelo tanganing sunodon nindo nin estrikto an saiyang mga lakad.” (1 Pedro 2:21) Minsan ngani an mga Kristiano puedeng magsakit huling sinda nangangapot sa mga pamantayan nin Dios, napagdadanay ninda “an marahay na konsensia.” (1 Pedro 3:16, 17) Sinadol ni Pedro an mga Kristiano na magin abunda sa banal na paggawe asin mga gibo na nagpapaheling nin diosnon na debosyon mantang hinahalat an aldaw nin paghokom nin Dios saka an ipinanugang bagong kinaban na dian “magdadanay an katanosan.”​—2 Pedro 3:11-13.

Magpaheling nin pagkamoot. “An Dios pagkamoot,” an surat ni Juan. Sinabi kan apostol na ipinaheling nin Dios an saiyang dakulang pagkamoot paagi sa pagsugo ki Jesus bilang “atang para sa satong mga kasalan.” Huli kaini, ano an maninigong gibohon nin mga Kristiano? Si Juan nagpaliwanag: “Mga namomotan, kun arog kaini an pagkamoot sa sato nin Dios, kun siring kita mismo may obligasyon na magkaminorootmootan.” (1 Juan 4:8-11) An sarong paagi na ipaheling an siring na pagkamoot iyo an pagigin mapag-istimar sa mga kapagtubod.​—3 Juan 5-8.

Pero, paano ikakapaheling nin mga nagsasamba ki Jehova an pagkamoot ninda sa saiya? Si Juan nagsimbag: “Ini iyo an boot sabihon kan pagkamoot sa Dios, na kuyogon niato an saiyang mga togon; alagad ta an saiyang mga togon dai nakakapagabat.” (1 Juan 5:3; 2 Juan 6) Huli kaini, an mga nagkukuyog sa Dios nakakasegurado na sinda padagos na mamomotan nin Dios “na nasa isip an buhay na daing katapusan.”​—Judas 21.

​—Basado sa Santiago; 1 Pedro; 2 Pedro;1 Juan; 2 Juan; 3 Juan; Judas.