ANO daw an magigin buhay kun an bilog na nasyon asin an namamahala dian nagsusunod ki Jehova bilang saindang Soberano asin nagkukuyog sa Saiyang mga ley? An simbag ipinaheling durante kan 40 taon na pamamahala ni Hadeng Salomon.

Bago magadan si David, ninombrahan nia an aki niang si Salomon bilang saiyang kasalida. Sa sarong pangatorogan, sinabihan nin Dios si Salomon na sabihon an saiyang kahagadan. Si Salomon naghagad nin kadonongan asin kaaraman tanganing makahokom sa banwaan sa makatanosan asin madonong na paagi. Naogma si Jehova asin tinawan nia si Salomon nin pusong may kadonongan asin pakasabot. Pinanugaan man sia ni Jehova nin kayamanan, kamurawayan, asin halawig na buhay kun sia magdadanay na makinuyog.

Si Salomon nagin bantog huli sa saiyang madonong na mga paghusgar. Sa sarong kaso, pinag-iwalan nin duwang babae an sarong omboy na lalaki, na an lambang saro nagsasabi na sia an ina kaiyan. Nagboot si Salomon na bangaon an omboy asin magtigkabanga an duwang babae. An enot na babae nag-oyon, alagad an tunay na ina tolos na nakimaherak na itao na sana sa babaeng iyan an omboy. Malinaw na naheling ngonyan ni Salomon na an naherak na babae iyo an ina asin itinao nia sa saiya an omboy. Dai nahaloy naaraman kan bilog na Israel an manongod sa hudisyal na desisyon na ini, asin naaraman kan banwaan na an kadonongan nin Dios yaon ki Salomon.

An saro sa pinakadakulang mga nagibo ni Salomon iyo an pagtogdok kan templo ni Jehova​—an kahangahangang estruktura sa Jerusalem na nagserbing sentro nin pagsamba sa Israel. Kan inagurasyon kan templo, si Salomon namibi: “Uya! Sa kalangitan mismo, iyo, sa langit kan kalangitan, dai ka magkaigo; kun siring, gurano pa daw sa harong na ini na itinogdok ko!”​—1 Hade 8:27.

Napabantog si Salomon sa iba pang kadagaan, sagkod pa ngani sa Seba sa Arabia. An reyna nin Seba nagbiahe tanganing maheling an kamurawayan asin kayamanan ni Salomon saka baloon an rarom kan saiyang kadonongan. An reyna naghangang marhay sa kadonongan ni Salomon asin sa kaoswagan nin Israel kaya inomaw nia si Jehova huli sa pagbugtak Nia sa trono nin siring kadonong na hade. Tunay nanggad, paagi sa bendisyon ni Jehova, an pamamahala ni Salomon iyo an pinakamaoswag asin pinakamatoninong sa kasaysayan nin suanoy na Israel.

Makamomondo, si Salomon dai nakapagpadagos na humiro kaoyon kan kadonongan ni Jehova. Binaliwala nia an pagboot ni Jehova, asin nag-agom sia nin ginatos na babae, kaiba an dakol na nagsasamba sa mga dios nin ibang nasyon. An saiyang puso luway-luway na irinayo ki Jehova kan mga agom nia asin sia nagsamba sa mga idolo. Sinabi ni Jehova ki Salomon na hahaleon sa saiya an sarong parte kan kahadean. Segun sa Dios, saro sanang kabtang an magdadanay sa saiyang pamilya huli sa ama ni Salomon na si David. Sa ibong kan pagsuhay ni Salomon, si Jehova nagdanay na maimbod sa saiyang tipan ki David dapit sa Kahadean.

​—Basado sa 1 Hade kapitulo 1 sagkod 11; 2 Cronica kapitulo 1 sagkod 9; Deuteronomio 17:17.