GUSTO ni Moises na mag-iba sa mga Israelita pa-Canaan. Kaya nakiulay siya ki Jehova: ‘Pabalyuha man tabi ako sa Salog nin Jordan para mahiling ko an maray-rahay na daga.’ Pero sinabi ni Jehova: ‘Tama na! Dai mo na ’yan pagsambiton!’ Aram mo kun ta’no ta sinabi iyan ni Jehova?

Dahil iyan sa nangyari kan pukpukon ni Moises su gapo. Kun natatandaan mo, dai ninda tinawan ni Aaron nin onra si Jehova. Dai ninda sinabi sa banwaan na si Jehova an nagtao nin tubig hali sa gapo. Kaya sinabi ni Jehova na dai sinda makakalaog sa Canaan.

Mga pirang bulan pagkagadan ni Aaron, sinabi ni Jehova ki Moises: ‘Apuda si Josue, tapos iatubang mo siya ki Eleazar na saserdote asin sa banwaan. Sabihon mo sa gabos na si Josue na an bagong lider.’ Ginibo iyan ni Moises, arog kan mahihiling mo sa ritrato.

Sinabi ni Jehova ki Josue: ‘Kusugi an buot mo, dai ka matakot. Papanginutan mo an mga Israelita pasiring sa daga nin Canaan na ipinanuga ko sainda, asin tatabangan taka.’

Paghaloy-haloy, pinatukad ni Jehova si Moises sa Bukid nin Nebo sa daga nin Moab. Sa alituktok kaiyan, natanaw ni Moises an Salog nin Jordan asin an magayon na daga nin Canaan. Sinabi ni Jehova: ‘Iyan an dagang ipinanuga ko sa mga aki ni Abraham, Isaac, asin Jacob. Ipinahiling ko iyan saimo, pero dai taka tutugutan na makalaog diyan.’

Duman sa alituktok kan Bukid nin Nebo, nagadan si Moises sa edad na 120. Kan panahon na iyan, makusog pa siya asin malinaw pa an paghiling niya. Munduon an banwaan asin pigparahibian ninda si Moises. Pero maugma man sinda ta may bago sindang lider, si Josue.