AN DARAGITANG ini 12 anyos. Kapot ni Jesus an kamot niya, asin yaon man an saiyang ama saka ina. Aram mo daw kun ta’no ta maugmahon sinda? Hilingon ta.

An ama kan daragita sarong midbid na tawo na an pangaran Jairo. Sarong aldaw nagkahilang an aki niya. Nagparagrabe an hilang kaya dai na makabuhat sa higdaan an daragita. Haditon si Jairo asin an agom niya, ta garo magagadan na si nene ninda. Solong aki pati siya. Nabaretaan ni Jairo an manungod sa mga milagro ni Jesus kaya hinanap niya ini.

Kan matagbuan ni Jairo si Jesus, napapalibutan ini nin dakulon na tawo. Nakisusuan siya sagkod na makarani ki Jesus. Suminubsob siya sa pamitisan kaini asin nagsabi: ‘Grabe an hilang kan aki ko. Nakikiulay po ako, mag-iba ka sako. Paumayan mo siya.’ Nag-uyon si Jesus.

Mantang naglalakaw na sinda, padagos an pagsurusuan kan mga tawo. Biglang nagpundo si Jesus. ‘Si’say an nagduot sako?’ an hapot niya. Namati ni Jesus na may kapangyarihan na nagluwas saiya, kaya aram niyang may nagduot saiya. Pero si’say idto? Sarong babayi na 12 taon nang grabe an hilang. Dinuutan niya an bado ni Jesus asin narahay siya!

Naugma si Jairo ta nahiling niya kun gurano kapasil ki Jesus na magpaumay. Pero may sarong nag-abot asin nagbareta: ‘Gadan na po an aki mo. Dai mo na po pag-abalahon si Jesus,’ an sabi niya ki Jairo. Kan madangog ini ni Jesus, sinabi niya ki Jairo: ‘Dai ka mahadit, ayos lang siya.’

Sa harong ni Jairo, todong hiribian an inabutan ninda. Pero sinabi ni Jesus sa mga tawo: ‘Dai kamo maghibi. Bako siyang gadan, turog lang siya.’ Pero pigngirisihan ninda si Jesus asin kinantiyawan siya, huling aram ninda na gadan na an daragita.

Iniba ni Jesus an ama asin ina kan daragita pati an tulo niyang apostol sa kuwartong kinamumugtakan kan daragita. Kinaptan niya an kamot kaini asin sinabi: ‘Buhat!’ Nabuhay an daragita, arog kan mahihiling mo. Nagbuhat ini asin naglakaw-lakaw! Kaya sobra-sobra an kaugmahan kan mga magurang niya.

Bako ini an inot na gadan na binuhay ni Jesus. Sabi sa Bibliya, an primero iyo an aki nin sarong babaying balo na nakaistar sa siyudad nin Nain. Binuhay man ni Jesus an nagadan na si Lazaro, an tugang ni Maria asin Marta. Sa pamamahala ni Jesus bilang hading pinili nin Diyos, bubuhayon niya an dakulon na tawong nagadan. Dai daw kita mauugma kaiyan?