Haloy nang mag-agom si Abraham saka Sara. Binayaan ninda an saindang komportableng istaran sa Ur asin nakaistar na sinda sa tolda. Pero dai nagreklamo si Sara, dahil nagtitiwala siya ki Jehova.

Gustuhon ni Sara na magkaaki kaya sinabihan niya si Abraham: ‘Kun magkakaaki an suruguon kong si Hagar, garo aki ko na man sana iyan.’ Pag-abot nin panahon, nagkaaki si Hagar nin sarong aking lalaki. Ismael an pangaran niya.

Pakalihis nin dakul na taon, kan si Abraham 99 na asin si Sara 89 na, nagkaigwa sinda nin tulong bisita. Inagda sinda ni Abraham na magpahingalo sa sirong nin sarong kahoy asin magkakan duman. Aram mo kun siisay an mga bisita ninda? Mga anghel sinda! Sinabihan ninda si Abraham: ‘Sa sunod na taon, magkakaaki kamo ni Sara nin sarong aking lalaki.’ Nagdadangog si Sara sa laog kan tolda. Napangisi siya sa sadiri niya tapos napaisip: ‘Talaga daw na magkakaaki pa ako, dawa gurangon na ako?’

Kan suminunod na taon, nangaki si Sara nin sarong aking lalaki, arog kan ipinangako kan anghel ni Jehova. Pinangaranan siya ni Abraham na Isaac, na an buot sabihon, “Pagngisi.”

 Kan mga limang taon na si Isaac, nahiling ni Sara na tinutuya-tuya ini ni Ismael. Gusto niyang protektaran an saiyang aki kaya nagduman siya ki Abraham asin pinakiulayan ini na pahalion si Hagar saka Ismael. Kan inot, habo ni Abraham na gibuhon iyan. Pero sinabi ni Jehova ki Abraham: ‘Magdangog ka ki Sara. Aatamanon ko si Ismael. Pero paagi ki Isaac mauutob an sakong mga pangako.’